Reynke de Vos

Dat drydde boek

_________________________________________________________________

Wo de wulff vnde de bare

sunderlyken worden bedrouet, do se

seghen, dat de kreye vnde kannyn nicht

bleuen by örer klaghe vnde sus wech rümeden;

vnde wo de konnynck Reynken vorhöret.

Dat III. capittel.

4455

YSegrym was to mode wee

Vnde Brunen, do se desse twee

Vth deme houe rümen saghen.

De konnynk sprak: «wyl yemant klagen,

De kome vort vnde lathe vns horen!

4460

Hir quam der gysteren so vele to voren

Reynke is hir, wor synt de nu?»

«Here», sprack Reynke, «dyt segge ick yw:

Mannich klaget seer vnde hart.

Ja, seghe he syn wedderpart,

4465

Vyllichte de klaghe achter bleue.

So doen ock nu desse twey lozen deue,

Alze de kreye vnde dat kannyn,

De my gherne brochten in schande efte pyn.

Doch wyllen se gnade van my begheren,

4470

Ik vorgheuet en vor dessen heren.

Men nu ik to rechte byn ghekomen,

Hebben se dat refugium ghenomen

Vnde dorsten hir nicht lenger blyuen.

Den slymmen, bözen, lozen ketyuen,

4475

Scholdemen den horen, dat were schade,

So kreghe yd mannich gud to quade,

De yw synt truwe beyde dach vnde nacht.

An my alleyne leghe klene macht,

De ick vnschuldygen hir byn besecht.»

4480

De konnynck sprack: «hore my to recht,

Du vntruwe, loze, böze deff!

Wat was yd, dat dy dar to dreff,

Dattu Lampen, den truwen deghen,

De myne breue plach to dreghen,

4485

Deme du, slymme böze ketyff,

Vnschuldyghen hefst ghenomen dat lyff?

Wente ick dy alle dyne schulde vorgaff

Vnde leet dy gheuen rentzel vnde staff.

Id was so ghesecht, du scholdest tohant

4490

Wanderen in dat hylghe lant

To Yherusalem ouer dat meer,

Van dar to Rome vnde wedder heer.

Dyt sulue ick dy alle ghunde,

Vp dattu beterdest dyne sunde.

4495

Dat erste, dat ick krech to wetten,

Was, dattu Lampen haddest vorbetten;

Wente suluen de cappellan Bellyn

Moste hir van dyn bode syn.

He brachte my den rentzel efte den sack,

4500

Dar ynne Lampen höuet stack.

He sprack openbar vor dessen heren,

Dat in deme rentzel breue weren,

De he myt Reynken hadde gheschreuen,

Vnde he den syn hadde vthghegeuen.

4505

In deme sacke was meer noch myn,

Men Lampen höuet stack dar in.

Dyt dede gy beyden my to schande.

Dar vmme bleff Bellyn to pande

Vnde heft myt rechte vorloren syn lyff;

4510

So schalt ock dy ghan, du böze ketyff!»

Reynke sprack: «wo mach dat syn?

Is Lampe doet vnde ok Bellyn?

We my, dat ick byn gheboren!

So hebbe ick den grotsten schat vorloren!

4515

Wente ik sande yw by dessen boden,

By Lampen vnde Bellyne, de dürbaresten klenöden;

Nicht konnen de beter vp erden syn

We hadde ghelöuet, dat de ram Bellyn

Sus scholde morden den guden man,

4520

Alze Lampen, synen eghenen kumpan,

Vp dat he de kleynöde vndersloghe?!

We hodde syk vor desseme töghe?»

Noch de wyle Reynke dyt sprack,

Ghynck de konnynck in syn ghemack.

4525

He was vortornet vnde seer gram,

Alzo dat he nicht encket vornam,

Wat Reynke do sprack van den dyngen.

De konnynck ghedachte Reynken to bryngen

To deme dode myt aller schande.

4530

In syneme ghemake vant he stande

De konnygynne, syne vrauwe,

Myt der apynnen, vrouwe Rukenauwe.

De konnynck myt der konnygynnen

Hadden seer leff desse apynnen,

4535

Se was by en in groteme state.

Dyt quam do Reynken effen to mathe.

Se was in wyßheyt seer gheleret,

Dar vmme was se ok hoch gheeret,

Men entsach se, al wor se quam.

4540

Do se den konnynck sach sus gram.

Se sprack: «ick bydde yw, eddele here,

Wyllet yw doch nicht tornen so sere!

Reynke horet mede in der apen slechte.

Is he doch nu komen to rechte!

4545

Syn vader plach in yuweme loue

Groet to wesende hir to houe,

Beter wan Ysegrym nu is gheheten

Efte Brun, wo wol se nu syn beseten

Seer hoch by yw myt ereme slecht.

4550

Doch wetten se weynich van ordel efte recht.»

De konnynck sprack: «horet my bysunder!

Duncket yw dat wesen wunder,

Dat ick deme deue Reynken byn gram,

De Lampen kortes dat leuent nam

4555

Vnde brachte Bellyne mede in den dantz

Vnde wyl syck der sake entleggen gantz?

Dar bouen he noch myn gheleyde dor breken!

Horde gy, wat klaghe se vp eme spreken

Van rouen, nemen, van deuerye,

4560

Van morde vnde ock van vorrederye?»

De apynne sprack: «gnedyghe here,

Reynke wert beloghen sere.

He is seer kloek, wo yd ock ghad,

Dar vmme synt eme der vele quad.

4565

Gy wetten wol, des is nicht lange,

Do hir de man quam myt der slange;

Nemant konde desse beyden

Myt rechtem rechte vor yw scheyden;

Men Reynke dede dat myt eren.

4570

Des prysede gy en vor alle de heren.»