Deutscher Sinn-Getichte

Drey Tausend

Andres Tausend

________________________________________________________________

Deß Andren Tausend

Siebendes Hundert.

4.

Brüder.

BRüder haben ein Geblüte

Selten aber ein Gemüte.

38.

Gunst vnd Abgunst.

BEy Hofe kan man zu der Gunst/ langsam dringen:

Bey Hofe kan man von der Gunst/ leichtlich springen.

57.

Das Blut Christi.

JCh wag vnd glaub es nur/ daß Jesus Christus Blut

Zu tilgen meine Schuld sey gar genug vnd gut;

Wer wil/ der wasche sich durch eigner Wercke schwitzen/

Jm sterben wird man sehn/ was Blut/ was Schweiß wird nützen.

96.

Bücher=Glücke.

BÜcher haben auch jhr Glücke: Wann sie nicht gesaltzen seyn/

Fasst man dennoch gute Würtze/ Pfeffer oder Saffran drein:

Kümmt es dir/ ich bin zu friede/ liebes Buch/ nur auch so gut/

Wann mit dir nur in geheime/ niemand was verschämtes thut.