Ein Geistlich spiel,

von der Gotfurchtigen und

keuschen Frawen Susannen,

gantz lustig und

fruchtbarlich zu lesen

Aus Vorreden Martin Luthers zu

Judith, Tobias, Esther und Daniel

______________________________________________________________________________

[Lv]

Doctor Martinus Luther

In seiner vorred über die Judith.

UNd mag sein / das sie sölch geticht gespielt haben / wie man bey uns die passion spilet / und ander heiligen geschicht/ damit sie yhr volck und die Jugent lehreten / als in einem gemeinen bilde / oder spiel / Gott vertrawen / from sein / und alle hülff unnd trost von Gott hoffen / in allen nöten / wider alle feinde etc. Darumb ists ein fein / gut / heilig / nützlich buch (s. die Judith) uns Christen wol zu lesen / denn die wort / so die Personen hie reden / sol man verstehen / als rede sie ein geist­licher heyliger Poet / oder Prophet / aus dem heiligem geist / der sölche personen fürstellet / in seinem spiel / und durch sie uns predigt etc.

Item in der vorred uber den Tobiam.

WAs von dem buch Judith gesagt / das mag man auch von disem buch Tobia sagen / Ists ein geschicht / so ists ein fein heilig geschicht / Ists aber ein geticht / so ists warlich auch ein recht schön heilßam / nützlich geticht / und spiel eins geistreichen Poeten / und ist zu vermuten / das sölcher schöner geticht und spiel / bey den Jüden viel gewest seind / darinn sie sich auff yhre feste / und Sabbat geübt / und der Jugent also mit lust / Gottes wort / und werck eingebildet haben / sonderlich / da sie in gutem fride / und regiment gesessen sind / denn sie haben gar trefflidie leute gehabt / [Lijr] als Propheten / Singer / Tichter / und der gleichen / die Gottes wort vleissig / und allerley weise getriben haben / und Gott gebe / das die Griedien yhre weiß Comedien und Tragedien zu spielenn / von den Jüden genuhmmen haben / wie auch viel ander weißheyt / und Gottes dienst / denn Judith gibt eine gute / ernste / dapffere Tragedien / So gibt Tobias ein feine liebliche / Gottselige Comedien.

Item in der vorred auff die stuck Esther und Daniel.

ABer der text Susanne / des / Beel / Abacuc / und Drachens / sihet auch schönen / geistlidien getichten gleich / wie Judith / und Tobias / Denn die nahmen lauten auch dazu / Als / Susanna / heißt eine Rosen / das ist / ein schön frum landt und volck / oder armer hauffe unter den dornen / Daniel heist ein richter und so fort an / ist alles leichtlich zu deuten auff eine Policey / economey / oder fromen hauffen der glaubigen / es sey umb die geschicht wie es kan.