| |
|
-
- D a s n a r r e n s c h y f f .
L X X X V . N i t f u r s e h e n d e n d o t
- __________________________________________
- Mag Adel / gůt / sterck / jugents zyer
Han fryd vnd růw / o todt vor dir?
Alls das / das leben ye gewann
Vnd tœttlich ist / das můß dar von
- Nit fursehen den dot
- Wir werden btrogen lieben fründt
All die vff erden leben syndt
Das wir fürsehen nit by zyt
Den dott / der vnser doch schont nüt
- 5
- Wir wissen / vnd ist vns wol kunt
Das vns gesetzet ist die stundt
Vnd wissen nit wo / wenn / vnd wie /
Der dott der ließ nie keynen hye
Wir sterben all / vnd fliessen hyn /
- 10
- Dem wasser glich zůr erden jn /
Dar vmb sint wir groß narreht doren
Das wir nit gdencken jnn vil joren
Die vns gott dar vmb leben lott
Das wir vns rüsten zů dem dot
- 15
- Vnd leren / das wir műssen künnen
Vnd mœgen jnn keyn weg entrynnen
Der wynkouff ist gedruncken schon
Wir mœgen nit dem kouff abston
Die erste stund / die lest ouch braht
- 20
- Vnd der den ersten hat gemacht
Der wust ouch / wie der lest würd sterbē /
Aber die narrheyt důt vns ferben
Das wir gedencken nit dar an
Das vns der dot nit hie wurt lan
- 25
- Vnd vnsers hübschen horsß nit schonen
Noch vnser grűnen krentz / vnd kronen
Er heißt worlich / hans acht syn nit /
Dann wellen er begrifft / vnd schütt
Er sy wie starck / schon / oder jung
- 30
- Den lert er gar eyn seltzen sprüng
Den ich billich den dotsprung heiß
Das eym vß dringt kalt / grym / vñ sweiß
Vñ streckt / vñ krymbt sich / wie ein wurm
Dann do důt man den rechten sturm
- 35
- O dott wie starck ist din gewalt
Sydt du hyn nymbst beid jung / vnd alt /
O dott wie gar hert ist din nam
Dem adel / gwalt / vnd hohem stam
Vor vß dem / der syn freüd / vnd můt
- 40
- Alleyn setzt / vff das zyttlich gůt
Der dott mit glichem fůß zerschütt
Der kunig Sæl / vnd hyrten hüt
Er acht keyn pomp / gewalt / vnd gůt /
Dem babst / er wie dem buren důt /
- 45
- Dar vmb eyn dor ist / wer all tag
Flücht / dem er nit entrynnen mag
Vnd meynt / wann er syn schellen schütt
Das jnn der dott / dar vmb sæh nitt
Vff sollich gding eyn yeder har
- 50
- Kunt / das er ouch von hynnan far
Vnd er erloubet sy dem dot
Wann von dem lib die sel vß got /
Mit glichem gsatz / der dot hyn fűrt
Alls das / das leben ye berűrt
- 55
- Du stürbst / der blibt noch lenger hie
Vnd bleib die leng doch keyner nie /
Die tusent jor erlebten schon
Die műsten doch zů letst ouch gon
Es ist kum / vmb eyn rock zů thůn
- 60
- Das noch dem vatter / leb der sůn
Der vor dem vatter styrbt zů zyt
Dann man fynd ouch vil kelber hüt
Ie eyner fert dem andern noch
Wer nit wol styrbt / der fyndt syn roch
- 65
- Des glich jr narrheyt ouch erscheynen
Die vmb eyn dotten / truren / weynen /
Vnd jm vergünnen syner růw
Do wir doch all begeren zů /
Dann keyner fert zů frűg do hyn
- 70
- Do er můß / ewicklichen syn
Jo gschicht gar manchem wol dar an
Das gott jm rűfft zyttlich hyn dan
Der dott ist manchem nütz gesyn
Das er on wart / trűpsal / vnd pin /
- 75
- Vil hant den dot ouch selb begert
Der dott vil dancks an den bewerdt
Zů den er kam / ee man jm rűff /
Vil gefangen er jnn fryheyt schűff
Vil hat er vß dem kercker bracht
- 80
- Den der was ewicklich eracht /
Das glück deilt vnglich gůt / vnd rich
Aber der dot macht es alls glich
Der ist eyn richter / der gantz nytt
Ettwas abloßt / durch yemans byt /
- 85
- Der ist alleyn / der all ding lont /
Der ist / der nye keym ye hat gschont
Nye keym gehorsam er ye wart
Sye műsten all vff syne fart
Vnd dantzen jm noch synen reyen
- 90
- Bæbst / keyser / künig / bischœff / leyen
Der mancher noch nit hat gedacht
Das man den vordantz jm hatt bracht
Das er můß dantzen an dem gzotter
Den westerwelder / vnd den drotter
- 95
- Hett er sich vor dar zů gerüst
Er wer nit so stümpflyng erwűst
Dann manch groß narr ist yetz do hyn
Der sorg hatt vff die grebniß syn
Vnd leyt dar an so grosses gůt
- 100
- Das es noch manchen wundern důt
Als Mausolum / das jrm man
Arthemysia hatt gemachen lan
Vnd so vil kosten dran geleyt
Mit grosser gzierd / vnd rylicheyt
- 105
- Das es der syben wunder eyns
Ist / die man fyndt jm erden kreiß /
Ouch græber jnn Egypten lant
Die man Pyramides hat gnant /
Vor vß als Chemnis macht eyn grab
- 110
- Dar an er henckt syn gůt vnd hab
Do dry mol hundert tusent man
Vnd sechtzig tusent werckten an
Dan er vmb krut gab also vil
(Der ander kost ich schwigen will)
- 115
- Keyn fürsten ich so rich yetz halt
Der das alleyn mœcht han bezalt /
Des glich ouch Amasis jm macht
Wie Rhodope / hatt eyns volbracht
Das was eyn groß dorheyt der welt
- 120
- Das man leidt eyn so mæhtig gelt
An græber / do man würffet hyen
Den æsch sack / vnd die schelmen beyn
Vnd gab so grossen kosten vß
Das man den würmen macht eyn huß
- 125
- Vnd durch der selen willen nüt
Důt / die doch leben můß all zyt /
Die sel hilfft nüt eyn kostlich grab
Oder das man groß marmel hab
Vnd vff henck schyltt / helm / bâner groß
- 130
- Hie lyt eyn herr / ist woppens gnoß
Howt man jm dann jnn eynen steyn /
Der recht schyltt / ist eyn dotten beyn
Dar an würm / schlangē / krotten nagē /
Das woppen / keyser / buren / tragen
- 135
- Vnd wer hie züht eyn feyßten wangst
Der spißt / syn wæpner aller langst /
Do ist eyn væhten / ryssen / brechen /
Die fründ sich vmb das gůt erstechen /
Welcher es gantz behaltten well
- 140
- Die tüfel / sint gewisß der sel
Vnd důnt mit der wűst tryumphieren
Von eym bad jnn das ander fűren /
Von yttel kelt / jnn ytel hytz /
Wir menschen leben gantz on wytz /
- 145
- Das wir der sel / nit næmen war
Des libs wir sorgen yemer dar /
All erd die ist gesægnet gott
Wol lyt der / der do wol ist dott
Der hymel manchen dotten deckt
- 150
- Der vnder keynen steyn sich streckt
Wie kund der han eyn schœner grab
Dem das gestyrn lücht oben ab /
Got fyndt die beyn zů syner zyt /
Wer wol styrbt / des grab ist das hœhst /
- 155
- Der sünder dot / der ist der bœsst
|
|