| |
|
-
- D a s n a r r e n s c h y f f .
X X V I I . v o n v n n u t z ē s t u d i e r e n
- __________________________________________
- Wer nit die rechte kunst studiert
Der selb jm wol die schellen rűrt
Vnd wurt am narren seyl gefűrt
- von vnnutzē studieren
- Der studentten ich ouch nit für
Sie hant die kappen vor zů stür
Wann sie alleyn die streiffen an
Der zippfel mag wol naher gan
- 5
- Dann so sie soltten vast studieren
So gont sie lieber bůbelieren
Die jugent acht all kunst gar kleyn
Sie lerent lieber yetz alleyn
Was vnnütz vnd nit frůchtbar ist
- 10
- Das selb den meystern ouch gebrüst
Das sie der rehten kunst nit achten
Vnnütz geschwetz alleyn betrachten
Ob es well tab syn / oder nacht
Ob hab eyn mensch / eyn esel gmacht
- 15
- Ob Sortes oder Plato louff
Sollch ler ist yetz der schůlen kouff /
Syndt das nit narren vnd gantz dumb
Die tag vnd nacht gant do mit vmb
Vnd krützigen sich vnd ander lüt
- 20
- Keyn bessere kunst achten sie nüt
Dar vmb Origines / von jnñ
Spricht / das es sint die frœsch gesyn
Vnd die hundsmucken die do hant
Gedurechtet Egypten landt /
- 25
- Do mit so gat die jugent hyen
So sint wir zů Lyps / Erfordt / Wyen
Zů Heidelberg / Mentz / Basel / gstanden
Kumen zů letst doch heym mit schanden
Das gelt das ist verzeret do
- 30
- Der truckery sint wir dann fro
Vnd das man lert vfftragen wyn
Dar vß wurt dann eyn henselyn
So ist das gelt geleit wol an
Studenten kapp will schellen han
|
|