Buch der Natur

[EPILOG]

_____________________________________________________________________

An dem puoch ze latein hât ain maister gearbaitt fünfzehen jâr, als vil und er sein gemacht hât, und hât ez gesament auz der geschrift der hôhen maister, die haizent Aristotiles, Plinius, Solînus, Ambrosius, der grôz Basilius, Isidorus, Augustînus, maister Jacobus von Viatico, der ain puoch hât gemacht von etleichen wunderleichen dingen in den landen über mer, daz hât er gehaizen orientalem historiam. er hât auch gevolgt den maistern, die haizent Galiênus, Physiologus, und hât gevolgt ainem puoch von den dingen, daz ze latein haizt liber rerum, und hât gevolgt den maistern, die haizent Adelînus, Philosophus, und dem puoch, daz haizt der alten väter sag und haizt ze latein veterum narracio, und hât gevolgt dem puoch ains maisters von der jüdischait von den edeln stainen, der hiez Tethel.

Daz ist daz däutsch von Megenberch.

wær daz ain ris und niht ain twerch

und wær ez aller sælden vol,

des gund ich meinen freunden wol.

wærleich ân allen valsch daz ist,

des ist mein zeug der hailig Christ

und auch Marîâ muoter mait.

ach diu benem uns unser lait

und füer uns in daz êwig leben,

dâ haz niht ist noch widerstreben

und auch kain leiden noch kain pein:

ach sprich, Marîâ, daz schol sein.