Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

74.

Von dem sileniten.

Silenites ist ain stain, der ist gar schœn von gesamenter varb, von weiz, von rôt, von grüen, von purpervar. den tragent die snekken in dem land India und ist etleicher derlai stain, der grüen ist sam ain gras. wer den stain in dem mund tregt, der sagt wâr von künftigen dingen. wan sô dû gern westest von mügleichen dingen, diu noch niht geschehen sint, ob si geschehen oder niht, und dû den stain under der zungen hâst, sô welz in deim muot hin und her: weder geschiht daz oder niht; ze hant vellt dein muot auf der ainz und mag dâ von niht gelâzen. und die kraft hât der stain neur, sô der môn wehst, und hât si fruo zuo der sehsten stund und an dem êrsten tag neur ain stunt, an dem zehenden die êrsten und die sehsten stunt. aber sô der môn abnimt, sô hât er der kraft niht. der stain zepricht nümmer von dem feur und widerpringt lieb zwischen den läuten, die ainander hazzent. er hilft auch den menschen, die die swindenden suht habent, diu ze latein tysis haizt.