Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

73.

Von dem succin.

Succinus ist ain stain, den haizent die Kriechen electron. der ist gelvar und ist etswenn durchsihtich sam ain glas. Isidorus spricht, daz er von der viehten saf kom, und haizt gemaincleich lambra, und wenn man in mit den vingern reibt, sô zeucht er hälmel an sich und der kleider säum, reht sam der magnes daz eisen zeucht. er pringt seinen tragern käusch und sein rauch hilft den swangern frawen in der purt und scheuht die slangen. der êrst zaher, der von der viehten fleuzt, der ist lauter, und daz ist der in dem sumer in der warmen zeit her für fleuzt. aber der ze anderr zeit ab fleuzt, der ist tunkel und unsauber, und dar nâch ist auch der stain. den stain vindent die läut, die Gothi haizent, in aim wazzer, dâ der zaher ein gevallen ist.