Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

60.

Von dem panter.

Panthera ist ain stain, der hât nâhen all varb an im. den schol sein tragær des morgens fruo ansehen, wenn diu sunn auf gêt, dar umb, daz er in sighaft mach und kreftig in allen dingen. er vertreibt daz kratzen an der haut, und spricht man, er hab sô vil tugent sô vil varb er hab, und kümpt von dem land India. ich wil aber aines râten, daz dû des morgens des allerêrsten die käuschen magt alsô swanger anrüefst mit irem kindel; wan hâst dû die muoter, dû hâst daz kindel, hâstû muoter und kint, sô hâst dû den vater, und zwâr sô hâst dû waz dû wilt, ân pôshait allain.