Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

55.

Von dem nosech.

Nosech ist ain stain, der ist zwaierlai. ainer ist weizlot, der ander manigverbich. den stain zeucht man auz ainer kroten haupt, ê daz si wazzer trink oder wazzer rüer, und scheint understunden ain krot an derlai stainen mit zersträuten füezen. der stain ist guot für der würm piz und für vergift. wan sô vergift gegenwärtig ist, sô prent der manig­verbich nosech den vinger. die stain schol man paid mit ainander einmachen und besliezen.