Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

46.

Von dem regenpogen.

Iris haizt der regenpog. der stain geleicht ainer cristallen und ist sehsekkot, und wenn man in an der sunnen schein setzt in dem haus, sô wirft er gar schœn varb an die wend, die des regenpogen varben geleichent. der stain hât kraft wider daz himelplatzen und vindet man die edlisten derlai stain in dem rôten mer und umb daz geperg in dem land Italia. man vindet si auch in däutschen landen an dem stainotem geperg.