Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

32.

Von dem emathiten.

Emathites ist ain stain eisenvar, besprengt mit rôten æderleinn und kümt von der môren land oder von Arabia. wenn man den stain zerstœzt und in in wazzer zerlæt, sô hailt er die pluotspaicheln und verstellt auch der frawen haimleichait und den gemaihen rôten fluz von dem leib. wenn man sein pulver mit wein mischet, sô hailt er die swern und ist guot wider die vergiften piz, und sô man in in diu augen träuft, sô hailt er diu augen und rainigt si, und wer in trinkt dem zerpricht er den stain in der plâtern.