Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

15.

Von dem corallen.

Corallus ist ain gar rôter stain, iedoch ist er niht sô gar läuhtent sam der corneol. der stain hât ästel sam ain hirzhorn oder sam ains krautes wurzel mit vil zägeln, und daz ist niht ain wunder, wan der stain ist des êrsten ain kraut in dem mer, und wenn daz kraut mit den scheffen auzgezogen wirt oder mit der menschen witz, sô wirt ez hert und wirt ain stain. den stain vindet man halpfüezigen an der grœz. er hât die art, daz er dem himelplatzen und dem ungewiter wider ist, und dar umb sträwten in die alten läut hie vor mit dem akkersâmen auf die äkker und hiengen in auf die ölpæm für den hagel und für daz ungewiter. er ist auch den pœsen gaisten wider, und daz ist leiht dar umb, daz er dick kräuzlot ist und sein est hin und her schrenkt. und dar umb bewært er auch vil geschiht, wenn in der mensch mit esten hât. er ist auch guot wider die nagenden fäuht, diu ze latein flegma haizt.