Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

12.

Von dem krotenstain.

Borax ist ain krotenstain. den tregt ainrlai krot in dem haupt, und ist zwaierlai. der ain ist weiz, der ist pezzer und ist seltsein. der ander ist swarz und tunkel und ist ain klain gelblot. der selb ist der pest under den tunkeln. wenn man den stain auz ainer lebentigen kroten nimt, diu noch zabelt, sô hât er ain äugel. wenn aber man in nimt auz ainer kroten, diu lang tôt ist gewesen, sô hât der kroten vergift daz äugel vertilgt und den stain gepœsert. wer den stain alsô ganzen verslint in ezzen, dem durchgêt er all sein ingewaid und rainigt in vor aller pœser unsauberkait, und sô er den menschen inwendig gehailt, sô gêt er niden auz im. die kraft hât der weiz krotenstain, und haizent in die walhe crapadinam. man spricht auch, daz der stain der vergift wider sei.