Buch der Natur

V. VON DEN KRÄUTERN

IN AINER GEMAIN.

___________________________________________________

66.

Von dem psillenkraut.

Psillium haizt psillenkraut und haizt sein sâm psillensâm. daz kraut ist kalt und fäuht, sam Platearius spricht, und hât die art, daz ez küelt und fäuht macht und ist wider daz derren guot in haizen sühten. man schol die zungen des êrsten schaben mit ainem mezzer und schol den sâmen in ain lindez tüechel pinden und in dar inn dunken in ain kaltez wazzer und schol die zungen dâ mit reiben und schol den sâmen under der zungen haben für den durst wider die dürren huosten, diu von der gaistleichen gelider krankhait kümt, und für des leibes twanch. nim psillensâmen und leg in ain weil in ain wazzer und tuo daz wazzer hin und gib in dann dem siechen mit ainem andern kalten wazzer.