Buch der Natur

V. VON DEN KRÄUTERN

IN AINER GEMAIN.

___________________________________________________

61.

Von dem magenkraut.

Papaver haizt mâgenkraut. daz ist kalt und trucken, sam Platearius spricht. ez ist zwaierlai mâgen: ainer ist weiz und der ander swarz, und der weiz ist kalt und fäuht, aber der swarz ist kalt und trucken und negt mêr wan der weiz. sein sâm ist guot zuo erznei und pringt slâf und sänftigt in vil dingen und negt auch in vil sachen. man macht ain pflaster auz mâgensâmen und auz frawengespünn und von weizem ains ais und legt daz auf die slæf pei den ôrn. daz hilft für die apostem an dem anvang. wider der lebern überhitz ist daz selb auch guot; wenn man aber neur rôsenöl zuo mâgensâmen tuot, daz ist pezzer für die haizen apostem. für die dürren der prust mache diapapaveron, daz ist ain electuari gemacht auz mâgensâmen und auz lakritzenzahersaf, daz man süezholz haizt, und von arabischem zaher, der gummi arabicum haizt, und von tragant, von den allen wir vor gesait haben, und temper diu mit syropel, der dar zuo zimleich wirt.