Buch der Natur

V. VON DEN KRÄUTERN

IN AINER GEMAIN.

___________________________________________________

57.

Von dem krässelkraut.

Orpinum haizt krässelkraut und haizt auch ze latein crassula. daz kraut ist kalt und fäuht und ist zuo den zerprochen painen guot. ez hât die art, wer ez nimt zehen tag vor der sumersunwenden und hæht ez in ain haus an den luft, sô grüenet ez durch daz jâr nâhent, iedoch ân aller erd hilf und ân wazzers hilf, und wenn ez dorret an ainer seiten, sô wirt ez wider grüen an der andern seiten. des krautes hât man vil ze Parîs in den häusern, und ist guot für der lebern überhitz und küelt gar vast und macht daz gesiht dunkel unde sneidet daz harmwazzer ab, alsô daz ez niht fleuzt, und benimt auch der frawen haimleichen fluz und hindert die unkäusch.