Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

23.

Von dem onichen.

Onycha haizt ain onich und haizt auch ze latein ungula, daz spricht clâ oder fuoznagel, sam an den füezen und an des menschen hend negel sint, wan ez ist ain edel stain, der ist an der varb sam ain nagel an dem vinger oder an der zehen, und sprechent etleich, der stain köm von den mervischen, die ostree haizent und sint mersnecken, sam wir vor haben gesagt von den mervischen; aber ander sprechent, der stain sei ain paumzaher, der vliez auz ainem paum gegen der sunnen aufganch und der werd in dem lauf der zeit sô hert, daz der vorgenant stain dar auz werd. der stain oder der zaher ist guot wider die schebichait oder die räudichait und macht daz antlütz weiz und lauter. man sagt gar ain wunderleich dinch von dem stain, daz wil ich behalten, unz wir von den stainen sagen, wan sô müez wir des staines auch gedenken.