Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

9.

Von dem cassianpaum.

Cassiana haizt ain paum, der ist haiz und trucken und wechset gern an fäuhten steten und an mosigen. iedoch wechset er etswenn an trucken steten auch, aber sein holz und seineu pleter sint klainer wan sô er an fäuhten steten wechset. des paums pleter und sein früht sint guot zuo erznei und sint sein früht klain gestalt sam die kranwitper. wer die früht oder des paums pleter seudet in ainem starken wein, daz ist guot für daz paralis. wen auch daz paralis sleht, daz er niht gereden mag, nimt er des paums pleter alsô grüen oder den pulver, der auz den dürren pletern ist gemacht, und helt den under der zungen, der wirt redend ân zweifel, aber daz muoz geschehen an dem anvang des siehtums; wert er lang, sô muoz man grœzer erznei dar zuo tuon; iedoch daz ist diu pest erznei. des paums pleter sint guot für die harmwinden, wenn man si under dem kinn tregt, niht in der hant oder in dem puosem.