Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

52.

Von dem dachspaum.

Taxus oder daxus haizt ain dachspaum. der ist vergiftig, sam Isidorus spricht, und allermaist in dem land Calabria, und dar umb drückt man vergift dar auz, diu ze latein toxicum haizt. auz des paums holz machten die alten haiden hie vor pogen und armprost. daz holz hât mangerlai varb und wert gar vil jâr, und sô ez auf der erd ligt, sô verleuset ez leiht sein kraft. des paums pleter sint daz ganz jâr grüen. Platearius spricht, daz diu hüenr gar vaizt werden von des paumes sâmen, und sô in ain mensch izt, sô macht er im den leib vertig und waich. er spricht auch, daz der paum in dem land Calabria sô grôz kraft hab, sei daz ain mensch dar under sitz und slâf, ez kümt im ze schaden. man spricht auch. sei daz ain pein den paum anrüer, si sterb.