Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

F. VON DEN WÜRMEN.

___________________________________________________

[Vorwort]

WEz ist noch ainrlai tierl, die haizent würm. von den schüll wir nu sagen, und des êrsten in ainer gemain. Isidorus spricht, ain wurm ist ain tierl, daz allermaist auz flaisch oder auz holz oder auz andern erdischen dingen wehset ân all unkäusch. dû scholt auch wizzen, daz die maister etswenn die slangen auch würm haizent, und in dér weis ze reden von den würmen koment etleich würm von unkäusch des mans und der frawen in slangen art, als vor geschriben ist, und etleich auz airn, sam der schorp, und in dér weis redt Plinius von den würmen und spricht, kain wurm hât pluot denn gar ain klain nâch seiner grœz. etleich würm sint ân füez, iedoch habent si pain in irm leib oder græt, sam die slangen habent, und die selben slingent auf der erd von ainr stat zuo der andern. von derlai würmen well wir niht reden hie, wan wir haben vor von in geschriben. aber anderlai würm sint, die kain pain oder kainen grât in irm leib habent und habent auch niht füez; die selben würm runzelnt sich in klain runzeln an dem leib, wenn si hin und her kriechent. ez sint auch etleich, die füez und flügel habent, sam die wespen habent und die peinen und sämleich würm, und etleich habent zwên füez oder vier ân flügel. die selben laufent und habent etswie vil pluotes. etleich habent auch mêr dann vier füez, die selben laufent auch, aber si habent niht aigens pluotes, dar umb, daz ir kost und ir narung gar vil in ir füez gêt, und daz verniht in ir pluot. iedoch hât ain iegleich wurm ain fäuhten in seim leib an des pluotes stat. Nu well wir von der aller lai würmen hie sagen, und des êrsten von der pein, wan diu ist diu edelst under in allen.