Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

E. VON DEN SLANGEN.

___________________________________________________

31.

Von der sirên.

Sirena haizt ain sirên, aber ez ist niht diu sirên, dâ von wir vor gesait haben, dô wir von den merwundern schriben. diu slang ist in Arabia, sam ain vorscher spricht, und ist ir vil in dem selben künigreich und sint sneller wan diu pfärt. ez sint auch etleich derlai slangen, die flügel habent, alsô daz si gefliegen mügent. der slangen vergift ist sô gar kreftig in iren werken, daz si dem menschen ê den tôt pringt von der slangen piz, ê si im den smerzen pring, alsô daz der mensch stirbt ân smerzen.