Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

E. VON DEN SLANGEN.

___________________________________________________

30.

Von der durstslangen.

Situla haizt ain durstslang. diu ist gar pœs und schedleich, diu ertœtt den menschen in hitz und in durst, sam Jacobus und Solînus sprechent. diu slang ist sô manigverbich, daz si die läut still helt mit irr schœn, alsô daz man si gern siht. die schœn hât ir diu nâtûr geben wider daz si ir trâchait hât geben, wan diu slang ist gar træg ze slingen von ainer stat zuo der andern und dar umb helt si die läut mit irr schœn, den si niht gevolgen mag mit irm gang. si ist sô gar hitzig, daz si sich in dem winter auzhäutt und ir aigen haut abzeuht. wen diu slang peizt, der wirt gevangen mit ainr feureinr hitz und wirt verzert und verprint in im selber.