Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

D. VON DEN VISCHEN.

___________________________________________________

12.

Von dem delphîn.

Delphinus ist ain visch, der haizt delphin. iedoch ist er niht daz merwunder delphin, dâ von wir vor gesait haben. der visch ist klainer denn daz selb merwunder, sam Isidorus spricht. die visch habent die art, wenn ain ungewiter komen schol, sô springent si auf dem wazzer und spilent, und dâ pei erkennent die schefläut künftigz ungewiter. si sint sô snell in iren sprüngen, sam Solînus spricht, daz si etswenn über die schefsegel springent, und die vischær besamnent sich und werfent eisnein rechen auf, dar inn beslahent sich die delphin und reibent sich an den sant dâ mit, alsô die rechen in ir flaisch gedrukt werdent, und sô wirft si daz mer dann auz an daz lant.