Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

D. VON DEN VISCHEN.

___________________________________________________

6.

Von dem regenvisch.

Bocha haizt ze latein auch piscis pluvialis, daz haizt ze däutsch ain regenvisch, dar umb, daz der visch sunderleich zuo nimt in dem regen. die visch swimment neur nâch der praiten, wan si sint gar dünn visch und gar prait. si habent auch flozzen umb und umb nâch der praiten. sô die vischær den visch wellent vâhen, sô senket er sich an den grunt und betrüebt daz wazzer ob im, dar umb, daz man in iht gesehen müg, wan sô er sich nâch der praiten an daz ertreich smucket, sô ist er oben auf dem ruck erdvar.