Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

B. VON DEM GEFÜGEL

IN AINER GEMAIN

___________________________________________________

66.

Von dem starn.

Sturnus haizt ain star. Plinius spricht, daz die starn klain vogel sein, snell ze vliegen, und sint swarz vogel mit weizen sprekeln. si vliegent scharot mit ainander und in dem flug machent si ainen sinweln haufen, alsô daz iegleicher begert, daz er in der mitt sei. daz tuont si durch der habich willen, die in lâg setzent. si besamnent sich des âbends und habent ain grôzez murmeln mit enander und ruoent des nahtes, aber des morgens hebent si an ze murmeln und dâ nâch tailnt si sich in klain schar und fliegent an ir waid. si tuont auch grôzen schaden in den weingarten herbstzeiten.