Buch der Natur

I. Von dem Menschen

in seiner gemainen Natur.

___________________________________________________

49.

Von den zaichen der natürleichen siten.

aa. Wer die weishait liep hab.

Der ist ain weishait minnent man, des leib oder persôn aufgerekt ist und des flaisch geleich ist, niht ze vil noch ze klain, und der weiz ist. und hât ain klain rôt dar zuo gemischet. sein hâr hât ain mittel zwischen vil und wênig, zwischen sleht und kraus, zwischen weiz und swarz und ist lind. sein anplick geleicht ainem lachenden oder frœleichen anplick. sein hend habent ain mittel zwischen grôz und klain und er hât auch getailt vinger. daz verstên ich alsô, daz der vinger glider sich hinder sich piegen vil nâh als si entzwai sein. sein stirn ist grôz, sein augen habent ain mittelvarb zwischen grüen und swarz.