Der Trojanerkrieg

Die Massenschlacht vor Troja

Heldentaten des Agamemnon.

Mauerschau der Trojanerinnen.

Zweikampf zwischen Menelaos und Paris.

Helenas Klage über Paris' Gefangennahme.

Rettung des Paris durch Hektor.

33771 - 35178

__________________________________________________________________________________

Si truogen maniger slaht.

der Troiær iemer vaht

an zwêne Kriechen bî der stunt,

des wart des lîbes ungesunt

33775

vil maniger bî den zîten.

die schar ze beiden sîten

z' ein ander alle wâren komen

und wart dâ von der schade genomen,

der gnuoge sunder ende smarz.

33780

von slegen wart vil manger swarz

an sîner blanken hiute weich,

dâ wurden rôtiu wangen bleich

und lûter ougen trüebe gar,

wan die zwô jüngeslichen schar,

33785

die von den Kriechen strichen,

die giengen dâ mit stichen

und mit slegen wunder an.

si schuofen, daz vil manic man

tœtlicher swære wart gewon.

33790

der künic Agamennon

des mâles ritterlichen streit.

sîn scharphiu klinge dâ versneit

Prîandes schenken ûf dem wal,

der was geheizen Perfigal

33795

und hete liehten prîs bejaget.

mit frechen henden unverzaget

maht in der werde künic siech.

er sluoc in twerhes dur daz diech

und schriet daz linke bein im abe,

33800

alsô daz er des plânes habe

mit einem valle dô begreif.

den schenkel und den stegereif

sluoc er im bêdesament hin.

gevohten hete er wider in

33805

und tet mit slegen im gedon,

dar umbe in Agamennon

von sînem linken beine schiet.

ouch wizzent, daz er dâ verschriet

Troiære noch ein michel teil.

33810

sîn manheit diu gap im daz heil,

daz er begienc rîlîche tât.

den aller besten plîât,

den ie geworhte Sarrazîn,

den fuort er an dem lîbe sîn

33815

und was dar ûf mit sinnen

von werden küniginnen

zernæjet wol zam unde wilt.

bedecket was sîn grüener schilt

mit smaragden grasevar,

33820

dar ûz erlûhte ein adelar,

der gap der heide rôten schîn.

von golde lieht ûz Arâbîn

was er in daz gesteine

mit houbetlisten reine

33825

gevelzet harte schône.

von sîme kophe ein krône

erlûhte niht ze michel,

diu was ein glanz onichel

und hete wunnebæren glast.

33830

rîlicher koste niht gebrast

dem herren Agamennonê.

sîns bruoder schade tet im wê

des mâles unde bî der zît,

dâ von sluoc er enwiderstrît

33835

ros unde man diu beide

und valte zuo der heide

Troiære vil mit sîner craft.

dâ was diu grœste ritterschaft

z' ein ander bêdenhalben komen,

33840

von der gehœret und vernomen

ie wart bî keinen stunden:

des wurden tiefe wunden

gehouwen und geschrôten.

mit veigen und mit tôten

33845

beströuwet wart der grüene klê.

die vlecken von dem kalten snê

gevielen nie sô dicke nider,

alsam die strâlen von gevider

ûf die plânîe tâten.

33850

hey, waz die schützen sâten

der phîle ûf daz gevilde!

diu schoz snel unde wilde

sach man dâ snurrend umbevarn,

als bî den süezen bînekarn

33855

vil manic tûsent bîen.

sich huop von den störîen

sô hürteclich gedrenge,

daz gnuogen wart als enge,

daz si vor tamphe ersticten.

33860

die rotte sich verstricten

z' ein ander sô mit liuten frevel,

daz in daz warf des garnes wevel

nie vaster wart geflohten.

ahî, wie dâ gevohten

33865

mit herzen und mit lîbe wart!

diu swert diu wurden niht gespart

noch diu lanze noch der boge.

dâ streit vil manic herzoge

und vâhten hôhe künge wert.

33870

mit bluote wart grien unde hert

begozzen dâ, dort unde hie,

daz diu ros biz an diu knie

dar inne wuoten über al.

ûf der plânîe und ûf dem wal

33875

wart ein sô griuwelicher kampf,

daz sich der nebel und der tampf

ze berge wunden in den luft.

als ob der tiefen helle kruft

sich hete gar entslozzen ouch

33880

und ir vertânen fiures rouch

ûz ir dâ lieze timphen.

wer mac die nôt gelimphen,

diu von dâ geschach?

swaz man von jâmer ie gesach,

33885

daz allez was ein kleinez dinc

biz an des mordes ursprinc,

der sich huop von des kamphes wer.

dô sich diu vîentlichen her

gesamnet heten beide

33890

und ûf der wîten heide

ir schar z' ein ander wurren,

dâ grâzten unde schurren

diu ros in der patelle sûr,

dô manic heller tambûr

33895

mit craft schal in ir ôre.

von holze noch von rôre

wart nie gehœrt sô lûter klac,

sô drîn gesluoc der dunreslac,

als von den scheften wart vernomen,

33900

dô si ze sprîzen und ze dromen

vil manic hant geswinde kloup.

dâ wære ein griuwelicher stoup

gesehen ûf dem plâne breit,

hæt in des mâles niht geleit

33905

daz rôte bluot heiz unde naz,

des man sô vil dâ nider maz

mit dem gewæfen stehelîn,

daz vor der fiuhtekeite sîn

der plân niht mohte stieben.

33910

der strît begunde in lieben

ze sêre bêdenthalben.

ûf bergen unde ûf alben

die slege wider hullen,

die von den swerten schullen

33915

und von den glanzen helmen.

von lûter stimme gelmen

wart dâ gehœret michel dôz,

wan daz getemer was sô grôz

von grimmen slegen ûf dem wal,

33920

daz in die stat ze Troie schal

der swerte griuwelicher klanc.

hurtieren unde grôz gedranc

lie sich des mâles schouwen.

dô wart sô vil gehouwen,

33925

daz sich diu swert von slegen bugen

und über die burcmûre flugen

die gneisten von dem fiure,

daz man ûf der plâniure

sluoc ûz den stahelringen.

33930

mit liehten scharphen klingen

spielt man ors unde liute enzwei.

dâ wart sô jæmerlich geschrei

von veigen und von wunden

gehœret bî den stunden,

33935

daz in der stat die vrouwen

dur warten und dur schouwen

sich huoben an die zinnen.

von glanzen küniginnen

rîch unde gar von hôher art

33940

des strîtes wol geluoget wart.

Helena und eine Begleiterin auf der Mauer beobachten händeringend den Kampf

Dâ wart vil manic edel wîp

beswæret dur ir mannnes lîp

bêd offen unde tougen.

dâ wurden lûter ougen

33945

in trüeben schîn gegerwet.

ê wîz und bleich geverwet

wart dâ vil manic wange rôt,

dur daz ûf der plânîe tôt

beleip sô manic ritter.

33950

sich huop ein trûren bitter

von clâren künges kinden.

man sach dâ megede winden

ir blanken hende liehtgevar.

Helêne diu kam selbe dar

33955

mit ir juncvrouwen ûf die wer

und sach diu vîentlichen her

sêr umb daz leben strîten,

dâ von si bî den ziten

gedâhte: ouwê mir, armez wîp,

33960

daz alsô manic hôher lîp

von mîner schulde wirt verlorn!

daz ich zer welte ie wart geborn,

daz ist ein übel mære,

wan ez vil bezzer wære,

33965

daz man mich hæte nie getragen,

denn ieman hiute würde erslagen

von hôher und von reiner art.

ach got, daz ich ie schœne wart

und ie sô clâren lîp gewan!

33970

des muoz engelten manic man,

der mîn genozzen wênic hât.

ouwê der jæmerlichen tât,

daz edele werde vrouwen

zerhacket und zerhouwen

33975

ir man hie sehen müezen

und daz ich in gebüezen

der grimmen swære niht enmac.

daz ich gelebte ie disen tac,

daz riuwe got den reinen!

33980

man solte mich versteinen

dur die vil hôhen sünde grôz,

daz alsô manic bluotes flôz

hie rinnet von der schulde mîn.

wie sol ich armiu künigîn

33985

die missetât versüenen,

daz man ûf dirre grüenen

plânîe mangen wundet,

der niemer mê gesundet

und âne zil muoz siechen?

33990

daz Pârîs ie den Kriechen

gezuhte mich vil armez wîp,

daz garnet hiute manic lîp,

der sîn vil hôchgebornez leben

muoz eime grimmen tôde geben.

33995

Die clage treip diu guote.

in herzen unde in muote

beswæret si von grunde wart.

vil manic wîp von hôher art

was mit ir komen ûf die wer,

34000

dâ saz ein wunneclichez her

von lûterbæren vrouwen.

sich lie dâ mangiu schouwen,

diu nâch wunsche was gestalt.

doch lûhte Elêne mit gewalt

34005

diu schœnste vor in allen.

diu clârheit was gevallen

ûf ir antlitze reine,

daz si den plân gemeine

dâ zierte mit ir glaste,

34010

als ob diu sunne vaste

dar ûf durliuhteclichen schine.

si lûhte zuo dem anger hine

den Kriechen alsô clâr engegen,

daz si ze stichen und ze slegen

34015

sich deste vaster vlizzen,

wan si begunden wizzen

mit ougen und mit muote,

daz Helenâ diu guote

ob in sæz an der warte:

34020

des wurden si vil harte

von ir gereizet ûf den strît.

si vâhten alle bî der zît

vil herter, dan si tâten vor.

dô si daz liehte wîp enbor

34025

gesâhen an der zinnen,

dô wurdens' in ir sinnen

ermant ir alten riuwe.

ir smerze wart sô niuwe

und alsô vrisch gemachet,

34030

daz von in wart geswachet

Troiære starkiu ritterschaft,

die triben si mit hôher craft

und mit gewalte von dem grase.

den Kriechen wart der grüene wase

34035

gerûmet von Troiæren.

dô man die lûterbæren

Helênen an geblicte,

dô schuof man unde schicte

mit strîte marterlîche nôt.

34040

dâ wart vil manger in den tôt

gedrücket und gedrungen.

Troiære samenungen

Helêne wart ze sûre.

si wurden zuo der mûre

34045

und an die grendel hin gejaget.

nû seht, wie von dem winde waget

ze walde manic tanne,

sus wart von mangen manne

geweget manic lanze.

34050

von liehter schilte glanze

den ougen wuohs grôz überlast.

in schein der kovertiure glast

und daz gesmîde engegenwert

dâ glizzen halsperg unde swert

34055

ein ander an enwiderstrît:

der purper und der samît,

daz golt und daz gesteine

die bâren vil gemeine

dem plâne liehteberenden schîn.

34060

swaz aber glanzes mohte sîn

ûf der geblüemten heide

von rîcher ougenweide,

daz allez was reht als ein wint

und dûhte gar ze tôde blint

34065

biz an den schîn aleine,

den Helenâ diu reine

dâ kunde mit ir bilde geben.

dô sich ir glast begunde weben

in der wâfencleide glanz,

34070

dô truoc ir schîn der wirde cranz

für allez daz gesmîde.

die gimmen und diu sîde,

daz silber und daz edel golt,

daz ûf die heide was geholt,

34075

daz wart an sîme schîne

erlöschet, dô diu fîne

Helêne dran begunde sehen.

si kunde liuhten unde enbrehen

für alle die gezierde rîch.

34080

kein varwe ir schîne was gelîch,

daz wizzent âne lougen!

si bar der Kriechen ougen

durliuhteclicher wunne spil

und gap ir herzen crefte vil.

34085

Si mahte si gemuothaft.

des wart dâ güebet ritterschaft

rîlicher vil denn anderswâ.

wer hæte willeclichen dâ

gestriten und gevohten,

34090

dâ sich nâch wunsche mohten

oug unde herze erwittern.

erkrachen unde erzittern

solt anger unde heide wol

dur den erbermeclichen zol,

34095

den manger dâ von strîte enphie.

wan swer gevaht nâch êren ie,

der muoz mir hie der volge jehen,

swâ der man beginnet sehen

liep unde leit diu beide,

34100

daz von der ougenweide

sîn herze wirt erheizet

und deste mê gereizet

ûf einen grimmeclichen strît.

die Kriechen sâhen bî der zît

34105

liep unde leit, daz got wol weiz.

ich meine, daz Helêne gleiz

ûf die geblüemten heide,

von der si truogen beide

swær unde hôchgemüete dô.

34110

si wâren des gemeine vrô,

daz si die clâren solten sehen,

und was in wê dâ von geschehen,

daz in diu schœne wart genomen.

sus wâren si dô von ir komen

34115

ze sorgen und ze wünne.

ir bruoder unde ir künne,

ir swâger unde ir êlich man

die sâhen si des mâles an

vil gerne durch daz wunder,

34120

daz an ir lac besunder

von lûterlicher schœnheit.

ir glanz der mahte si gemeit

und leite dâ ir vröude nider,

daz si niht komen solte wider

34125

in ir landes umberinc.

dur diu zwivalteclîchiu dinc

die Kriechen wurden ûf den sturm

gereizet sam ein übel wurm

und als ein grimmer slange,

34130

der engeslîche und ange

vil gerne ræche sînen zorn,

swenn er sîn eiger hât verlorn,

dar ûz er brüetet sîne fruht.

in wart diu wilde tobesuht

34135

in daz hirne sô geslagen,

daz si mit craft begunden jagen

Troiære von dem velde,

dô si mit liehter melde

vor in begunden schouwen

34140

ir glanzen landesvrouwen.

Prîandes ritterlîchiu diet

begunde entwîchen unde schiet

von dem gevilde grüene.

wan daz Hector der küene

34145

ein her dâ zen Troiæren bôt,

si wæren anders alle tôt

gelegen bî der zîte.

er kêrte ir muot ze strîte

beid offen unde stille.

34150

reht als ein cocatrille

ûz eime dicken rôre vert

ze schâfen unde ir gnuoc verzert,

swâ man si weidet bî dem mer,

sus îlte er in der Kriechen her

34155

ûz sîner dicken ritterschaft

und mahte ir gnuoge schadehaft

an êren unde an guote.

Prîant der wol gemuote,

der vor der letze selbe enthielt,

34160

und dâ mit sîner huote wielt

der grendel und der porten,

der wart in allen orten

ermant ûf bitterlichen zorn

dô sîne ritter ûz erkorn

34165

die fluht begunden kiesen.

er sprach: solt ich verliesen

die stat und allez, daz ich hân,

ich müeste selbe zuo dem plân

nû gâhen unde kêren.

34170

wer lieze alsus von êren

sich flühticlichen stôzen?

sus nam er eine grôzen

und eine michel rotte an sich.

swaz ritterschefte löbelich

34175

des mâles vor der litze was,

die zôch er an sich unde las

und îlte balde ûf sîne vart,

iedoch liez er dâ wol bewart

die grendel mit fuozliuten.

34180

erzeigen und betiuten

wolt er in kurzer stunde,

daz er noch strîten kunde

mit handen und mit creften.

sich flehten unde heften

34185

begunde er in der vînde schar.

daz er sô wackerlichen dar

mit einer grôzen rotte kam,

daz brach den Kriechen unde nam

den sic des mâles ûz der hant.

34190

der werde künic Prîant

lie dâ sîn ellent schouwen:

vil manger wart verhouwen

von sîner frechen hende quec.

ze strîte wider in den wec

34195

kund er die sînen wîsen.

die schrieten holz und îsen,

golt, silber, sîden unde leder.

Prîant der was den Kriechen scheder,

dann ieman anders bî der zît.

34200

er kam gerüeret an den strît

mit einer presse wunneclich:

des treip er wider hinder sich

die vînde mit gewalte.

ir gnuoge er nider valte

34205

beide ûf gras und ûf daz krût.

er und Hector, sîns herzen trût,

enphiengen lûterbæren prîs;

daz selbe tet ouch Pârîs

und sîn bruoder Trôilus.

34210

Enêas unde Perseus

in hulfen sêre vehten.

grôz wüefen unde brehten

wart eht aber dâ getân.

man sach die wunden ûf dem plân

34215

sich rimphen und grisgrammen.

dâ sprungen fiures flammen

ûz helmen alsô dicke,

als ob des donres blicke

ân underlâz dâ füeren.

34220

Prîant begunde rüeren

sîn altez ellent bî der stunt:

des wart ze tôde manger wunt

von sîner ellentrîcher hant.

der werde künic Prîant

34225

daz velt mit bluote mahte naz.

des endes dâ diu clâre saz

Helêne bî der selben zît,

dâ wart der grimmeclîche strît

gedrücket hin besunder,

34230

wan sich dâ manic punder

z'ein ander vîentlichen slôz.

von slegen alsô rehte grôz

wart diu mâlîe dâ zehant,

daz in den wolken widerwant

34235

der swerte scharpfe klingen.

hin unde her sich dringen

begunde dâ vil manic schar.

sich dranc z'ein ander unde war

der künige massenîe.

34240

vil manic grôz storîe

wart under ein geflohten.

ich wæne, daz gevohten

nie würde vaster denne dâ.

diu wâfenkleit grüen unde blâ,

34245

brûn unde blanc, graw unde rôt

von kamphes und von strîtes nôt

sich zarten unde rizzen.

dâ sluogen unde bizzen

diu ros in dem gedrange.

34250

dâ wart von swertes klange

diu heide wol bedœnet

und michel baz beschœnet

von der gezierde glaste.

Troiære wâren vaste

34255

an ir gemüete wider komen;

Prîandes kunft het in benomen

ir zagelichen vorhte.

sîn angesiht diu worhte

daz wunder an ir crefte,

34260

daz si von ritterschefte

begunden prîs enphâhen.

dô si den herren sâhen,

durch den si kâmen ûf daz velt,

dô wart vil strengez widergelt

34265

den Kriechen dâ von in geboten.

von nœten muoste manger roten,

dem diu sunne ir hitze lêch.

von sweize wart ir harnasch vêch

und von dem bluote moderîn.

34270

dâ muoste werden unde sîn

von strîte grôz unfuoge.

man hôrte schrîen gnuoge

vil mangen jæmerlichen spruch.

stich unde slac, stôz unde bruch

34275

die viere sach man trîben.

wer möhte gar geschrîben,

waz hôher liute dâ verdarp?

dâ viel des mâles unde starp

Urgenius von Trâse,

34280

dem nie kein lastermâse

bî sînen jâren wart beschert.

in valte ûf der plânîe wert

Prîant mit sîner hende.

dô kôs von im ein ende

34285

des mâles ouch Emargalûn.

Profiliar und Atamûn

beleip von im des mâles vrî.

diz wâren herren alle drî

starc unde rîche erkennet.

34290

ir muoz vil ungenennet

belîben, die Prîant ersluoc.

ir was sô vil und alsô gnuoc,

daz ich verswîgen muoz ir namen.

Troiære dorften sich niht schamen

34295

ze herren und ze künge sîn:

er tet in starke helfe schîn

mit vrechen henden ûz erwelt.

ze tôde sluogen mangen helt

Hector und er, si zwêne.

34300

diz jâmer sach Helêne

mit lûterbæren ougen an,

daz durch si manic hôher man

beroubet wart des lîbes:

dâ von des clâren wîbes

34305

ungemüete wart vil grôz.

daz rôte bluot ze berge schôz

gegen der hœhen in den luft.

dâ streit vor dur des lobes guft

vil sêre manic ritter.

34310

in der mâlîe bitter

kam ez von âventiure alsô,

daz Menelaus Pârîsendô

begunde merken unde spehen.

nû daz er in het an gesehen,

34315

dâ blicte er an Helênen ouch

und wart dâ grüene sam ein louch

und als ein wahs geverwet gel.

sîn ors gar frevel unde snel

begunde er zwicken mit den sporn.

34320

er twanc ez dâ durch sînen zorn

ze hurtebæren stœzen,

wan er begunde im flœzen

daz bluot ûz beiden sîten.

ez truoc in bî den zîten

34325

dur die pressiure manicvalt

und brâhte in schiere mit gewalt

des endes, dâ Pârîs enthielt

und mangen lîp ze tôde spielt

ûz ritterlichen creften.

34330

mit rede sich beheften

begunde wider in alsus

der künic Menelâus.

Er sprach: entriuwen, her Pârîs

ir hânt niht wol in gastes wîs

34335

behalten iuwer stæte an mir.

nû sprechent an, wie möhtent ir

getuon sô lasterlichen ie,

dô sich ûf iuwer tugent lie

mîn herze wider alle fluht,

34340

daz ir dâ brâchent iuwer zuht

und iuwer adel wider mich?

wer hæte des versehen sich,

daz edel gast sîn êre

sô gar unmâzen sêre

34345

zerbræche an sîme wirte?

daz iuch ein bœser hirte

von kinde zôch, daz kiuse ich wol.

gelouben ich des kûme sol,

daz iuwer art schin ûz erkorn.

34350

und wærent ir von im geborn,

des nam iu z' einem vater giht,

ir hætent iuwer triuwe niht

gevelschet und geswachet.

ir hânt an mir gemachet,

34355

daz iuwer lop enist niht guot.

ich hæte baz vor iu gehuot

des wîbes und der êren mîn,

wær ich gewis an iu gesîn

untriuwen unde meines.

34360

ich wânde, niht sô reines

jüngelinges wære als ir.

ir swuorent unde seitent mir,

ir wærent von Karthâge.

mit alsô valscher lâge

34365

wart ich von iu gevangen.

ich hete an iu den slangen

gehûset für daz lembelîn,

dô mînes herzen künigîn

ze lande wart von iu gestolen.

34370

ich zôch für einen zamen volen

an iu den tracken wilde.

ir hânt sô grôz unbilde

von meine an mir gebriuwen,

daz ich des wil getriuwen

34375

den göten algelîche,

daz ich mîn künicrîche

beschouwe niemer, ê daz ich

geræche an iu sô vaste mich,

daz ich mîn herze erküele.

34380

ich kume an disem brüele

mit iu ze rechenunge wol.

nieman uns zwêne scheiden sol,

ê daz ir mir den zins gegebent,

daz ir mit mîme wîbe lebent

34385

nû lange, als iu gevellet.

ir hânt iuch mir gesellet

ze lesterlîche uns beiden.

diu friuntschaft muoz gescheiden

noch hiute werden ûf dem plân.

34390

ir möhtent baz gewîbet hân

und werdeclicher denne alsus.

hiez iuch der künic Prîamus

mir stelen mîne vrouwen,

sô wolte er iuch verhouwen

34395

êr unde lop ân endes zil:

wan swer iemanne schaden wil,

der solte im widersagen ê.

mir tuot daz laster iemer wê,

daz ir mich an den triuwen

34400

gewîset hânt ze riuwen

und ze schemelicher nôt.

ez muoz benamen iuwer tôt

hie werden oder mîn verlust,

daz ir mit valscher âkust

34405

zuo mîme hûse kâment

und mir dar ûz benâment

den aller besten prîsant,

den ie gezuhte diebes hant.

Ir redent übel, sprach Pârîs

34410

und swechent sêre künges prîs,

sît ir mich z' einem diebe zelt.

an disen worten ûf entwelt

und mâzent iuch der sprâche!

dur vîentlîche râche

34415

fuor ich in iuwer hûs benamen

und wil mich niemer des geschamen,

daz ich iu laster drinne tete.

man sol an iegelicher stete

dem vînde mêren sîniu leit.

34420

iu was nû langest widerseit

von mir und von dem vater mîn.

dô man die lieben swester sîn

Esîonam niht sante wider

und man uns Troie brach dernider,

34425

dô mohtent ir ouch wizzen,

daz ich und er uns flizzen

ûf aller Kriechen herzesêr.

wer solte iu widersagen mêr

denn iuwer selbes missetât?

34430

swer âne schult gefrevelt hât,

der weiz ouch unde erkennet wol,

daz er sich vor dem hüeten sol,

an dem der frevel ist geschehen.

kein man sich guotes sol versehen,

34435

der übellîche tuon getar.

mîn base wunneclichgevar

wart uns in roubes wîs genomen:

den schaden hân wir überkomen

mit einer semelichen tât.

34440

her Thelamon ze wîbe hât

Esîonam die künigîn:

dâ wider muoz mîn vrouwe sîn

Helenâ, die wîle ich lebe.

daz ich die clâren von mir gebe,

34445

daz wirt noch herter denne ein flins.

welt ir von mir zol oder zins

ze lande füeren unde tragen,

der sol gemünzet und geslagen

mit swerten hiute werden.

34450

ir hânt mir ûf der erden

gesprochen an mîn êre

ze vaste und alze sêre:

daz gilte ich, swenne ez mac gesîn.

daz Prîant was der vater mîn

34455

und niht ein hirte, der mich vant,

daz wirt ûf iuch mit mîner hant

bewæret und behertet.

mîn lop hânt ir verschertet

mit worten ûf dem grüenen plân,

34460

daz wirt mit slegen widertân

od ich gelige dar umbe tôt.

iu was mit rede ûf mich ze nôt,

daz prîset iuch vil selten.

ir soltent mich niht schelten,

34465

und wære iu künges êre liep

ir habent mich für einen diep

und z' eines hirten sun gezelt:

ob ir nû sint ein fromer helt,

sô werent iuch, went ir genesen,

34470

wan ez enmac niht anders wesen

an uns beiden, denne ein strît.

Helêne muoz bî dirre zît

mîn oder iuwer werden

verweiset ûf der erden.

34475

Diz lobe ich, sprach dô sâ zehant

der künic, Menelaus genant,

und bôt vil schiere sich ze wer.

reht als ein marner ûf dem mer

kan zuo dem ruoder gâhen,

34480

swenn im beginnet nâhen

ein grimmeclicher sturmewint,

alsô greif er ân underbint

ze strîte bî den stunden.

ein sper von im gewunden

34485

wart eime ritter ûz der hant:

als er im daz dar ûz gewant,

dô kêrte er von Pârîse hin

und wolte gerne wider in

dâ ritterlicher joste phlegen.

34490

und dô Pârîs der küene degen

wart sînes muotes innen,

dô bat er im gewinnen

schier unde balde eht einen schaft

und wart dar ûf gedanchaft,

34495

daz er vollante sîne ger.

der eine hin, der ander her

begunde drâte kêren sider

und wurfen aber umbe wider

diu ros mit dem gezöume glanz.

34500

die schefte michel unde ganz

ze tal si vornen sancten.

vrîlichen si dâ sprancten

ûf den vil wunneclichen plân.

diu ros diu wurden ane verlân

34505

mit ritterlichen beines slegen.

ûf und ze tal geswinde regen

begunden si die schenkel:

des wart dâ bî dem enkel

von bluote naz ietweder spor,

34510

daz in die lüfte wart enbor

den orsen ûz gesprützet,

diu beide wol genützet

dâ wurden und gebrûchet.

von in wart niht gestrûchet

34515

ûf der plânîe strâze,

wan si die rehten mâze

des loufes dô behielten.

die steine ir hûfe spielten

und drâschen wildez fiur ûz in.

34520

die künge bêde kâmen hin

gesnurret bî der wîle,

gelîch dem snellen phîle,

der ûz der nüzze wischet.

ir zweiger muot erfrischet

34525

was mit vîentlicher ger.

Pârîs der kunde wol sîn sper

ûf Menelâô brechen,

wan er begunde stechen

ûf in den ungefüegen schaft,

34530

daz er enmitten wart behaft

ûf sînem schilte liehtgevar.

er stach in sô geswinde dar,

dâ die vier nagele stuonden glanz,

daz er enphienc vil wîten schranz

34535

und manic schiver ab im stoup.

ouch wizzent, daz der schaft zerkloup,

den Menelaus dâ fuorte.

Pârîsen er beruorte,

dâ man den helm dâ stricket,

34540

daz er vil nâch genicket

was ûz dem satele hinder sich.

daz im der angestbære stich

benam niht sînen lebetagen,

daz schuof die gollier, daz den kragen

34545

verdecket hete mit sîner kraft.

zerbrochen wart ietweder schaft

nâch ritterlichem prîse

und in der besten wîse,

der man ûf rehter joste gert.

34550

dar nâch sô rouften si diu swert

und sluogen ûf ein ander hin

sô töbelîche, als in der sin

wær ûz der mâze wüetic.

si wurden übermüetic,

34555

daz schuof Helênen bilde,

daz vor in daz gevilde

mit sîme glanze erlûhte.

si beide wol bedûhte

gemæze bî den zîten,

34560

daz man si balde strîten

dâ sæhe vor der clâren.

ir man si beide wâren,

dâ von si deste harter

des grimmen kamphes marter

34565

dâ liten unde truogen.

si stâchen unde sluogen

ûf daz erwelte stahelwerc,

daz heide, grien, tal unde berc

bedœnet wurden und der walt

34570

von grimmen slegen manicvalt,

die von ir swerten hullen

und über sich erschullen

ze berge und zuo den wolken.

wîz als ein blankez molken

34575

dranc in beiden ûz der sweiz.

nû seht, wie von dem îsen heiz

ûf einem anebôze var

vil manic gneiste rôtgevar,

alsus begunde springen

34580

ûz ir gevegeten ringen

vil manic wildes fiures blic.

si kunden bêde wol den bic,

der von den swerten sol geschehen.

ob got von himele solte sehen

34585

von zwein kemphen einen strît,

er möhte ir vehten bî der zît

beschouwet hân mit êren.

ring unde spæne rêren

sach man die künge milte.

34590

ir harnasch unde ir schilte

dâ liten grôz getengel,

gezieret sam zwên engel

wârens' an den strît gevarn.

von grimmen einen adelarn

34595

geverwet grasegrüene

truoc Menelaus der küene

in eime schilte rôt guldîn.

dâ tet Pârîs des mâles în

sleg unde stiche manicvalt.

34600

die margarîten ungezalt

sluoc er dar ûz mit grimme

und schuof, daz manic gimme

dô wart geströuwet ûf den klê.

si tâten vaste ein ander wê

34605

mit slegen ûf der heide.

nû daz die künge beide

sus phlâgen starker biusche,

dô kam ein grôz geriusche

von liuten ûf si zwêne dar.

34610

fuozgengel wart ein michel schar

ûf si gedrücket alzehant,

dar ûz ein sneller sarjant

mit eime scharphen spieze trat,

der tet sîn ors Pârîse mat.

34615

Er dranc in sîme zorne

dur ez die lanzen vorne

und valte ez mit dem stiche

sô rehte snellecliche

zuo dem geblüemten anger,

34620

daz Pârîs mohte langer

niht ûf im gesitzen.

mit creften und mit witzen

warf sich der ellentrîche drabe

und îlte zuo des plânes habe

34625

mit eime snellen sprunge.

dâ wart der edel junge

mit fuozliuten bestanden

und êrst von sarjanden

ze grimmer nôt gewîset.

34630

sîn leben hôchgeprîset

geleit wart ûf die wâge.

im wâren sîne mâge

und sîn bruoder verre komen,

der helfe mohte im niht gefromen,

34635

wan si niht wisten sîner nôt.

ze wer sazt er sich unde bôt

aleine wider mangen man.

ze ros vaht in der künic an,

der Menelâus was genant,

34640

und wart vil manic sarjant

ze fuoz ûf in geschicket:

alsô wart er verstricket

in angeslicher swære.

Pârîs der tugentbære

34645

beleip dar umbe niht verzaget,

sîn ellent sêre wart gejaget

ze strîte an allen enden.

er gap ze bêden henden

sîn edel swert, daz er dâ truoc:

34650

dâ mite erstach er unde ersluoc

ze tôde manger muoter kint.

er valte liute sam der wint

daz dürre loup kan rêren.

mit lanzen und mit gêren

34655

wart ûf in ein gestürme,

als ob vil binenwürme

dâ füeren umbe ein honicvaz.

alsô was er durch nîdes haz

mit liuten umbegriffen.

34660

vil manic sper gesliffen

wart dô geneiget wider in,

diu schriet er unde sluoc dâ hin

mit sîner klingen herte,

als obe der hagel berte

34665

dâ nider mangen dürren halm.

von schrîen wart umb in ein galm

und ein gebrehte lûte erkant.

der künic, Menelaus genant,

der rief den sarjanden zuo:

34670

swer des geruoche, daz ich tuo

den willen sîn, die wîle ich lebe,

und iemer im lih unde gebe,

der helfe mir an dem gesigen,

von dem wir algemeine ligen

34675

in lasterbæren schanden.

er sol von uns bestanden

hie sîn mit vîentlicher ger.

nû seht, ir herren, daz ist der,

von dem ich hân mîn wîp verlorn.

34680

swer an im richet mînen zorn,

der wirt gewaltic wes ich hân.

ez sol im an sîn leben gân,

ê man gescheide uns zwêne.

diu künegîn Helêne

34685

verliuret an im ir âmîs!

wer kan daz wizzen, sprach Pârîs,

ob si mich hie verlieren sol?

zwâr ich enweiz ouch niht sô wol,

sprach der künic aber z' ime,

34690

sô daz ich iu daz leben nime,

ê daz ir von ir künnent komen.

mit helfe möhte iu niht gefromen

der tiufel noch der göte craft,

daz ir von mir gesunthaft

34695

und âne schaden koment hie:

wan ez enwart unwæger nie

dekeinem man der lebetage.

ir sint alsô mit eime hage

von liuten umbehalten,

34700

daz iuwer heil muoz walten,

ob ir gesunt mit êren

von uns beginnent kêren.

Pârîs der rede antwürte bôt.

er sprach: entriuwen, mir ist nôt,

34705

daz mir ein wênic baz geschehe,

dan iuwer herze sich versehe

und iuwer munt geheize mir.

hæt ich den willen und die gir,

daz ich von rede wolte erzagen,

34710

sô wære ich hiute lange erslagen

und hæte alhie den lîp verzert.

nû stêt ez sô, daz mich verhert

niht iuwer rede an mîner kraft.

ir müezent anders sigehaft

34715

an mir belîben danne alsô,

wan ich enahte ûf iuwer drô

sô tiure niht als ûf ein grûz.

hie mite sî daz bâgen ûz,

des wir beide phlegende sîn.

34720

ger ieman hie des schaden mîn,

der kêre an mich geswinde.

swaz er hie nutzes vinde,

den strîche er balde an sînen stein.

swie vaste ich komen sî ze bein

34725

und ze fuoz, sô bin ich doch

gevangen niht sô sêre noch,

daz ich erschrockenlichen stê.

sus rette Pârîs dô niht mê

zuo sînen widersachen.

34730

sîn swert begunde machen

vil schedelicher wunden,

die schriet er bî den stunden

mit unverzageten handen.

vor starken sarjanden

34735

wert er mit kraft daz leben sîn,

alsam ein grimmez eberswîn

den lîp vor snellen bracken.

zerhouwen und zerhacken

sach man den helt Pârîsen

34740

des mâles holz und îsen,

tuoch, leder, fleisch, hût unde bein.

dâ wart bewæret unde erschein,

daz er wol schirmen kunde.

dâ mite er dâ begunde

34745

sich fristen ûf der heide.

sleg unde stiche beide

enphienc er schône ûf sînen schilt.

man sach in springen als ein wilt

dar unde dan, her unde hin.

34750

nieman dâ kunde treffen in

ûf sîniu lit blanc unde weich.

dâ stuont ein wol gewahsen eich,

diu was im ein gelücke.

an si kêrt er den rücke

34755

und hete von ir schirmes gnuoc,

sô daz in nieman hinden sluoc

noch in dâ rückeshalben schôz.

dâ von sô rêrte er unde gôz

der vînde bluotes deste mêr.

34760

sô Menelaus der künic hêr

ze ros engegen im gedranc,

sô tet er iemer einen swanc

mit sîme swerte stehelîn

dem orse zuo dem mûle sîn,

34765

daz ez begunde schiuhen

und sich niht langer diuhen

noch trîben ûf Pârîsen liez.

geloubent, daz er mangen spiez

dâ sluoc mit sîner klingen abe!

34770

er schicte gnuoge zuo dem grabe,

die sînes schaden gerten.

von lanzen und von swerten

was umb in ein michel hac,

dar inne stuont er unde phlac

34775

sleg unde stiche manger slaht.

nû daz er alterseine vaht

alsus mit manigem manne starc

und er sich vor dem tôde barc

mit sîme glanzen schilte,

34780

dô kam alrêrst der milte

ûf manicvalter nœte spor:

wan Pollux unde Castor

unde Achilles dise drî

geriten im sô nâhe bî

34785

des mâles von geschihte,

daz si mit der gesihte

vil schiere wurden sîn gewar.

dâ von si balde kâmen dar

ze Menelâô dâ gerant

34790

und sprâchen wider in zehant:

Ist diz von Troie Pârîs,

der uns verstal in diebes wîs

Helênen von dem lande,

sô wirt an im diu schande

34795

gerochen, die wir dulden.

daz wir von sînen schulden

hie lîden angest unde nôt,

daz wirt sîn endelicher tôt

und sîn verlust vil bitter.

34800

nû dar, getriuwen ritter,

daz er niemer hinnen kome!

nein, rief Menelaus der frome,

erslahent in ze tôde niht!

daz er uns werde in unser pfliht

34805

gevangen und gebunden,

daz ist bî disen stunden

vil wæger, denne er tôt gelige.

wan ich mîn trûren übersige

vil baz mit sîme lebetagen,

34810

dan er von uns würde erslagen

und er verlüre sînen lîp.

Helêne, daz vil schœne wîp,

diu wirt uns wider noch gegeben.

ob wir Pârîsen lâzen leben

34815

und in verderben niht zehant,

uns gît sîn vater Prîant

umb in die küniginne wider:

ist aber, daz er tôt hie nider

gevellet zuo dem plâne,

34820

wir müezen iemer âne

ir bildes ûf der erden

belîben unde werden.

Seht, alsô wart vil drâte

dô Menelaus ze râte

34825

mit sînen friunden ûf dem plân,

daz er Pârîsen wolte lân

gevangen werden bî der zît,

dar umbe daz Helêne sît

im wider möhte werden.

34830

er truoc ir ûf der erden

sô lûterlîche stæte,

daz er des mâles hæte

verlâzen allen sînen zorn.

dur daz ir lîp vil ûz erkorn

34835

im wære dô gegeben wider,

dâ von wart im ze muote sider,

daz er Pârîsen vâhen hiez

und in niht sîne swæger liez

erslahen dâ ze tôde alsus.

34840

nû Castor unde Pollus

vernâmen unde Achilles,

daz Menelaus geruochte des,

daz man Pârîsen vienge,

dâ wurben si, daz gienge

34845

sîn wille für sich alzehant.

si wurden alle drî gemant

dar ûf in kurzen stunden,

daz Pârîs dâ gebunden

von in gefüeret würde hin.

34850

ir einer sprach dô wider in:

ergebent iuch, went ir genesen!

ir müezent hie gevangen wesen,

welt ir behalten iuwer leben:

dâ von geruochent iuch ergeben

34855

vil schiere in unser drîer pfliht!

entriuwen, des entuon ich niht,

sprach aber dô Pârîs zehant.

ê daz ich mich in iuwer hant

gevangen welle bieten,

34860

ê wil ich mich genieten

des tôdes ûf dem plâne.

ich stên hie wunden âne

und aller bande ledic noch,

dâ von gæb ich ungerne doch

34865

gevangen mich dekeinen man.

die wîle ich kraft geleisten kan,

sô were ich leben unde lîp.

liez ich mich vâhen als ein wîp,

sô wære ich gnuoc âmehtic.

34870

ich wil dar ûf betrehtic

in herzen unde in muote sîn,

daz ich den lebetagen mîn

schirm al die wîle, daz ich mac

gesunt belîben einen tac.

34875

Pollux der rede antwürte bôt.

nû schirment iuch! daz tuot iu nôt,

sprach er mit zorne wider in.

sus kêrte er an Pârîsen hin

und wolte ûf in dâ dringen vor.

34880

Achilles unde Castor

die wurden ouch ûf in gewant.

si kâmen alle drî zehant

ûf den erwelten man gehurt.

mit starken orsen wol gegurt

34885

dô kêrten si den ritter an.

der künic Menelaus began

mit den herren allen drîn

Pârîse widerwertic sîn

und tet im mit gedrange nôt.

34890

nû sazte er aber unde bôt

mit vrecher hende sich ze wer.

si viere wâren im ein her

und manic sneller sarjant,

der ouch mit ellentrîcher hant

34895

dâ wider in vaht unde streit.

er truoc des mâles unde leit

vil kumbers von gedrange,

doch gienc er in sô lange

mit slegen und mit stichen vor,

34900

daz Pollux unde Castor

und der helt Achilles

in ir gemüete jâhen des,

daz er sich vaste werte.

swaz man ûf in geberte,

34905

daz galt er wol nâch sîner state.

dâ wart der halsperc und diu plate

von im engenzet und der schilt.

sîn lop mîn zunge niht verhilt

und sînen ritterlichen prîs.

34910

der hôchgelobte Pârîs

sô vaste dâ sluoc unde stach,

daz im in sîner hende brach

sîn edel swert, daz lûter schein.

Achille wolt er hân daz bein

34915

geschrôten und geswungen hin,

dô traf er ûf die schîben in

des kniewelinges herte,

diu sich des slages werte

sô sêre mit ir vestekeit,

34920

daz ir daz swert dâ niht versneit

und ez von ungelücke

begunde sich in stücke

dâ brechen ûf der schîben,

alsô daz dâ belîben

34925

Pârîse möhte in sîner phliht

des guotes swertes anders niht,

wan knophes unde helzen.

diu klinge von ir velzen

unde ir snîden sich dô schiet:

34930

dâ von Pârîsen dô beriet

des grimmen zornes tobesuht,

diu schôz des mâles mit genuht

schier unde balde in sînen koph.

die helzen warf er und den knoph

34935

Achille engegen mit der hant

und traf in ûf des schiltes rant,

daz dâ von diu varwe stoup

und er in stücke sich erkloup.

Seht, alsô wart dô Pârîs

34940

von sînem swerte in alle wîs

gescheiden und gesundert.

er hete vor gewundert

mit slegen an der Kriechen her,

nû muoste er werden âne wer

34945

ze sorgen dâ gedrungen.

wær im enzwei gesprungen

daz swert in sîner hende niht,

dâ müeste ein griuwelich geschiht

von slahte sîn ergangen,

34950

ê daz man in gevangen

hæt ûf dem plâne grüene.

nû daz Pârîs der küene

stuont âne spiez und âne swert,

wie solte sich der künic wert

34955

beschirmen dô iht langer?

er muoste von dem anger

sich lân gevangen füeren.

ûf in begunde rüeren

dô Castor unde Achilles

34960

die vârten bêde sament des,

daz er von dannen kæme sâ.

von in wart er geworfen dâ

mit kreften ûf ein ors zehant.

dô man den ellentrîchen vant

34965

gar âne werc und âne wer,

dô wart er gæhes ûz dem her

von in gefüeret ûf daz velt.

hin zuo dem mer in ir gezelt

begunde man dâ wîsen

34970

den vrechen helt Pârîsen,

dô wolte man in füeren în.

des wart diu glanze künegîn

Helêne dô beswæret.

ir tugent wart bewæret

34975

unde ir triuwe an im zehant.

ir hende si vor leide want

erbermeclichen unde sprach:

ouwê, Pârîs, und iemer ach,

nû bin ich armiu dîn verhert!

34980

waz mir nû leides widervert

an herzen unde an lîbe!

ach mir ellenden wîbe,

daz ich gewan mîn leben ie!

wie sol ich zweiger manne hie

34985

verweiset und beroubet wesen?

Pârîs, den ich het ûz erlesen

für alle man ûf erden,

der muoz mir tiure werden

und dar zuo Menelaus mîn wirt.

34990

sol ich ir beider sîn verirt

und doch ir wîp nû sîn genant,

sô riuwe got, daz mich verslant

daz wilde mer niht under wegen,

dô mich Pârîs der küene degen

34995

ze Troie ûz Kriechen brâhte.

ich würde in leides âhte

begraben unze an mînen tôt

und wære daz ein ringiu nôt,

der mich in sorgen lieze leben.

35000

mir wirt von schulden hie gegeben

ein bitterlichez ende sûr,

sint mînes herzen nâchgebûr

enwec alsus gefüeret ist.

mir lât unlange die genist

35005

Prîant der werde künic wîs,

swenn er bevindet, daz Pârîs

wirt ze tôde lîhte erslagen.

wer lieze mir den lebetagen,

swenn er verdorben wære?

35010

ouch ist mir alsô mære,

daz ich ersterbe in kurzer stunt,

sô daz man lâze mich gesunt

in osrgen iemer alten.

ouwê, daz mir zerspalten

35015

daz herze niht von leide kan,

dur daz ich mînen lieben man

alsus gevangen sæhe niht.

daz er zuo mîner angesiht

muoz lîden angest unde nôt,

35020

daz tuot mir wirs, denn ich den tôt

hie selbe dulden solte.

daz man mich tœten wolte

für in, daz dûhte mich ein heil,

wan ich enwirde niemer geil

35025

noch frœlich âne sînen lîp:

dâ von wolt ich vil armez wîp

für in mit willen tôt geligen.

wes hânt die göte mich gezigen,

daz si bî ganzer clârheit

35030

die râche hânt ûf mich geleit,

daz nie kein wîp von hôher art

sô rehte gar unsælic wart,

als ich ellendiu vrouwe bin.

Pârîs hât mîn gelücke hin

35035

und alle mîne sælekeit.

mîn heil, daz was ûf in geleit,

daz ich nû leider hân verlorn,

durch in het ich mîn lant verkorn

und alle, die mir sippe sint.

35040

ich lie durch in man unde kint

und muoz ich nû sîn mangel hân,

wan im der grimme tôt getân

wirt von den Kriechen alzehant.

daz er enterbet hete ir lant

35045

des bildes und der schœne mîn,

daz muoz sîn bitter ende sîn!

h elêne dise clage treip.

ân alle vröude si beleip,

dô man Pârîsen fuorte dan.

35050

si sach in jæmerlichen an

und blicte im inneclichen nâch.

den Kriechen wart von dannen gâch

mit im des mâles über velt.

daz man in bræhte in ir gezelt,

35055

des wolten si dô vlîzic sîn.

dô wart im starkiu helfe schîn

getân vil gæhes under wegen.

Hector der ellenthafte degen

mit willen im ze trôste kam.

35060

er hôrte sagen und vernam,

daz er gevangen wære:

dâ von der strîtebære

vil drâte kam gesnurret.

sîn ors was niht ergurret

35065

an loufe noch an sprunge.

der hôchgeborne junge

twanc ez ûf eine snelle just,

dâ wart den Kriechen ein verlust

und ein vil grôzer ungewin.

35070

den helt Pârîsen nam er in

und brâhte in ûz ir pflihte spor.

Achilles unde Castor

die mit im kêrten ûz dem her

und in dô fuorten in ir wer

35075

gevangen und gezöumet hin,

die muosten beide lâzen in

ûz ir gewalticlichen phlege:

wan in Hector kam ûf dem wege

mit nîde zuo gesprenget.

35080

er hete ûf si gehenget

sô drâte bî der wîle,

daz si mit sneller île

von im ervolget wâren

und bêde von dem clâren

35085

Pârîse muosten scheiden.

er kunde wol in beiden

den bruoder sîn entheften.

mit witzen und mit creften

gap er in zwein sô grimmen strît,

35090

daz si Pârîsen bî der zît

dâ liezen vil gemeine

und Hectorem aleine

bestuonden hertes kamphes.

hie wart eht aber tamphes

35095

beschouwet unde fiures gnuoc,

daz man dâ tengelt unde sluoc

ûz harnasch unde ûz îsen.

nû man verlie Pârîsen

und Hector hete erlœset in,

35100

seht, dô begunde er sînen sin

dar ûf mit flîze wenden,

daz er zuo sînen henden

ein swert gewinnen möhte,

daz im des mâles töhte

35105

ze kampfe und z'eime strîte.

nû lac dâ bî der zîte

ein ritter siech und ungesunt,

der was versêret und verwunt

ûf die plânîe alrêrst gehurt

35110

und hete ein swert umb in gegurt,

daz was vil manger marke wert.

und dô Pârîs daz selbe swert

dâ bî dem wunden man ersach,

dô rief er zuo im unde sprach:

Paris und Hector im Kampf gegen Castor und Achill

35115

Herr, öugent an mir iuwer zuht!

ob ir des swertes mit genuht

ze kamphe niht gebrûchen mügent,

sô denkent dar an und gehügent,

daz ir ein edel ritter sît,

35120

und lîhent mirz bî dirre zît,

dur daz ich hie ze strîte kome

und ich dem bruoder mîn gefrome,

den man hie grimmes kamphes wert.

ist, daz ir mir daz selbe swert

35125

geruochent lîhen, herre trût,

ich diene iu stille und über lût

mit willen biz an mînen tôt.

der wunde des antwürte bôt

gezogenlichen unde sprach:

35130

friunt herre, sît daz ich ze swach

ze strîte leider worden bin,

sô nement unde enphâhent hin

daz swert von mîner hende!

ob iuwer strît ein ende

35135

mit lobe und mit gelinge neme,

sô tuont mir, als iu wol gezeme,

und helfent mir ze lîbe wider!

der mir verbünde mîniu lider,

ich möhte noch vil wol genesen,

35140

des lânt mich iu bevolhen wesen

und ruochent mir genædic sîn!

diz tuon ich ûf die triuwe mîn

sprach dô Pârîs der künic wert.

daz edel und daz guote swert

35145

enphienc er willeclichen dô

und wart als inneclichen vrô

nie von dekeiner gâbe mê.

ze strîte kêrte er ûf den klê

mit ellenthaften muote dan.

35150

Hector von sîner kunft gewan

rîlichen trôst, geloubent des!

wan Castor unde Achilles

mit nîde vâhten wider in.

daz wart ir beider ungewin,

35155

dô Pârîs kam ze strîte.

man sach in bî der zîte

dem bruoder sîn ze helfe stân.

si zwêne wurden ûf dem plân

von disen zwein bestanden.

35160

dâ wart mit vrechen handen

gestriten von den vieren.

si kunden wol gezieren

den kampf mit stichen und mit slegen.

man sach si craft und arme regen

35165

ze strîtebæren dingen.

man hôrte ir swert erklingen

ûf in diu wolken enbor.

dâ streit Pârîs und Hector

mit ellentrîchen willen.

35170

Castôren unde Achillen

die vâhten in des mâles an.

si triben si dar unde dan

ûf der geblüemten heide.

ouch wizzent, daz si beide

35175

sich grimmeclîche werten!

si sluogen unde berten

nâch vreches herzen lêre

ûf die gebrüeder sêre.