Der Trojanerkrieg

Die Kriegsrüstung der Trojaner

Der Aufbruch der Griechen. Die Vorkehrungen der Trojaner.

Die Verbündeten der Trojaner treffen ein.

24641 - 25088

__________________________________________________________________________________

Sus wart diu minneclîche erneret.

ir lîbes wâren die verheret,

die si verderbet solten hân.

der nebel von in wart getân,

24645

der si verirret hæte.

dâ diu juncfrouwe stæte

was gestanden in daz holz,

dô wart ein blankiu hinde stolz

des mâles funden unde ersehen:

24650

die branten si, daz hœre ich jehen,

an der kiuschen megde stete.

daz wunder diu götinne tete,

dur daz den künic milte

der buoze niht bevilte,

24655

diu von ir ûf gesetzet wart.

die Kriechen ûf ir reise vart

dâ wurden alzehant bereit.

daz ungewiter wart geleit,

daz si gesûmet hete dô.

24660

si kêrten frœlich unde vrô

von dannen gegen Troie sît.

nû was ouch bî der selben zît

der wilde liumet vür geflogen.

ze Troie het er sich gezogen

24665

und seite, daz der Kriechen her

begunde kêren ûf daz mer

mit aller sîner magenkraft.

ê diu vil starke ritterschaft

wâr in diu schif gedrungen,

24670

dô was ir kunft geswungen

Troiæren in daz ôre.

verr in der lüfte kôre

der liumet het gehûset,

dar ûz kam er gesûset

24675

und seite disiu mære,

wan er ist irrebære

und alsô rehte wilde,

daz sich vor sîme bilde

nieman lebender mac bewaren.

24680

er kan ervorschen unde ervaren,

swaz ieman schicket unde tuot.

er wil beid übel unde guot

den liuten in daz ôre tragen.

von himele kan er mære sagen

24685

und ûz der helle krüften.

er wont hôh in den lüften,

dar în hât er sîn hûs gemaht.

wol tûsent venster manger slaht

diu sint dar în gehouwen.

24690

sîn hof lât sich beschouwen

vil offenbære und âne tür.

man gêt dar în und ouch dâ vür

tac unde naht ân alle wer.

den himel siht er und daz mer

24695

und allez, daz ûf erden ist.

sîn umbeswanc wirt alle vrist

gehœhet und genideret:

wan er ist wol gevideret,

er riuschet mit dem winde.

24700

sîn volc und sîn gesinde

daz lâget unde lûzet,

ez loschet unde tûzet,

ez forschet unde frâget vil.

in sîme hûs muoz unde wil

24705

vil harte grôz unmuoze sîn.

dur sîner wende vensterlîn

vil manic mære fliuget.

man seit wâr unde liuget

ûf sînes hoves plâne.

24710

dâ wirt mit rede ûf wâne

vil manic dinc ze liehte brâht

und ist dâ wunders vil gedâht,

daz nie geschach bî keiner frist.

der liumet ûf der erden ist

24715

für alle vogele worden snel.

reht als der windes briute mel

kan er wol stieben über velt.

sîn wirde und al sîn beste gelt

daz lît ûf krieges acker.

24720

er ist z'urliuge wacker,

dar în kan er sich mischen.

er fliuget ie dar zwischen

und wont den strîten allen bî.

ê daz ein kriec erhaben sî,

24725

sô kündet er den ursprinc.

zerteilen kan er manic dinc

und machet zwei von eime.

vil selten er dâ heime

geruowet und gesitzet.

24730

er ist dar ûf erhitzet,

daz er stifte manigen zorn.

sîn ingesinde hât versworn

triuw unde stætes herzen gir.

nû rûne mir, sô rûne ich dir,

24735

daz sprichet al sîn hoveschar.

man wirt in sîme hûs gewar

fröud unde leides grimmeclich.

des einer dinne fröuwet sich,

des ist der ander leidic.

24740

sîn volc ist gar ze freidic

und alze missehelle.

ez machet z'eime spelle

die liuterlichen wârheit

und wirt ein lüge von im geseit

24745

vür ein gewislich mære.

sîn rede sagebære

diu wahset unde mêret sich:

sus kan der liumet irreclich

hûs in den lüften halten.

24750

er sach die Kriechen schalten

mit kielen ûf daz wilde mer,

des wart von im daz starke her

schier und zehant vermeldet.

er hete sich geveldet

24755

ze lande wert vil drâte,

reht als ein wint, der wâte,

ze Troye in einer kurzen stunt.

dô tet er dise reise kunt,

diu von den Kriechen sich erhuop.

24760

ir kunft in sorgen dô begruop

die burger und den künic hêr.

si liten angestlîchiu sêr

und heten alle ûf trûren pfliht;

doch wârens' ungewarnet niht

24765

beliben an den stunden.

ze fremden und ze kunden

hete künic Prîant

briev unde boten ûz gesant

dur helfe in allen enden.

24770

mâc unde friunt besenden

began der tugentrîche.

die bat er algelîche,

daz im ir stiure würde brâht.

gewarnet unde vor bedâht

24775

wart er ze strîte in alle wîs.

und alzehant dô Pârîs

hete erworben Helenam

und er mit ir ze Troye kam

geschiffet ûf dem wilden mer,

24780

sô bôt sîn vater dô ze wer

und wac ûf ein urliuge sich.

der werde künic lobelich

erkande wol der Kriechen sin.

daz si daz laster niemer hin

24785

gar ungerochen liezen

daz seiten und gehiezen

im alle sîne witze.

ir strengen zornes hitze

entsaz er, als der wîse tuot,

24790

der vor hin übel unde guot

in sîme herzen ahtet.

er hete ir kunft betrahtet

unde ir reise bî der zît,

dâ von wart er ûf einen strît

24795

gewarnet schiere und alzehant.

er hete künege vil besant

und rîcher fürsten lobesam.

swaz über allez Asiam

erwelter ritterschefte was,

24800

daz nam z'ein ander unde las

Prîant der künic ûz erwelt.

nû wirt von mir ein teil gezelt

der herren, die mit ritterschaft

ze helfe kâmen sîner craft.

24805

Im brâhte zehen tûsent man

der rîche werde soldan

Sareht von babylônje;

der künic von Laucônje,

der Sarpedon geheizen was,

24810

fünf tûsent ritter, als ich las,

und fuorte die Prîande.

von Lîciâ dem lande

brâht im dur ritterlîche wer

Amfimachus ein michel her,

24815

der wâren sehzic hundert.

vil ritter ûz gesundert

dar inne wol gezieret reit.

si fuorten rîchiu wâpencleit,

dar an vil hôher koste lac.

24820

Samiladech von Baldac,

der heiden bâbest ûz erkorn,

vier tûsent ritter hôchgeborn

ze Troye brâhte in sîner schar.

sô fuorten sibenzic hundert dar

24825

Adrastus unde Hûpolt,

die wurden von in zwein geholt

Prîande von Colabiâ;

der eine was ein grâve dâ

und ein herzoge der ander.

24830

der künic Flordimander,

geboren von Egyptenlant,

der kam mit helferîcher hant

Troyæren ouch ze hôhen staten.

mit stahelringen und mit platen

24835

brâht er in siben tûsent man.

ein amiralt von Carsian

tet in vil starke helfe schîn:

niun tûsent werder Sarrazîn,

die brâhte er in ze stiure sâ.

24840

der künic rîch von Persiâ,

Panfilias geheizen,

began ze Troye erbeizen

mit einlif tûsent heiden,

die gar mit liehten cleiden

24845

kâmen in die stat gezogt.

Fürsilyon, der Mêden vogt,

ein wunder liute brâhte

den Kriechen z' einer âhte

und z' einem schaden bitter.

24850

vierzehen hundert ritter

fuort er dâ hin ze lande,

dâ frecher sarjande

sehs tûsent wâren under.

der künic Palimunder

24855

der brâhte dar vil manigen helt,

zwei tûsent ritter ûz erwelt

die fuorte er von Panfilje.

ein herre von Sicilje,

der künic Pandalus genant,

24860

der kam gezieret in daz lant

gar schœne alsam ein engel.

niun tûsent fuozgengel

fuort er in sîner werden schar,

zwelf hundert ritter wunnevar

24865

dar în gemischet wâren.

ir wâpencleider bâren

den ougen wunnebernden schîn.

dar kam der künic Margalîn

dur hôher wirde gâbe;

24870

er fuorte von Arâbe

fünf tûsent ritter in daz lant.

Rêmus ein künic was genant,

geboren von Zeloniâ,

der lie beschouwen sich aldâ

24875

mit ahzic tûsent mannen,

die kunden bogen spannen

und wâren schützen alle.

den Kriechen z'einem valle

kam ze Troye ein fürste wîs,

24880

der was ein rîcher markîs,

geheizen Alchimeliar.

er brâhte in sîner rotte dar

fünf hundert ritter wol bereit,

die fuorten rîchiu wâpencleit

24885

lieht unde maniger leie.

der künic von Schaldeie,

Florminius genennet,

ze Troie wart erkennet

mit einer rotte vollekomen.

24890

wol tûsent ritter ûz genomen

in sîner kost er schouwen liez.

Archilogus ein künic hiez

und was von Grossiâ geborn.

der brâhte ein her vil ûz erkorn

24895

ze helfe dô Prîande.

er fuorte ûz sîme lande

vier tûsent werder Sarrazîn.

von Marroch künic Pelagrîn,

der brâhte dar zwelf tûsent man,

24900

die fuoren werdeclîche dan

in sîner massenîe.

der künic von Barbarîe,

Panthelamon geheizen,

kam zuo der lande kreizen

24905

mit einer wunneclichen schar.

drîzehen tûsent brâhte er dar

von sînes landes marke.

dar kam Nestor der starke,

ein herzog ûz Agrimonîs,

24910

und der grâve Lifronîs

von Cesariâ geborn.

zwelf hundert ritter ûz erkorn

die zwêne brâhten in den kreiz.

von Culmenîe Panfileiz

24915

sehs tûsent ritter brâhte dar,

wan er mit hôher wirde gar

truoc zepter unde dîadêm.

ein künic von Jerusalêm

geheizen was Aureliant,

24920

der brâhte ritter in daz lant,

der an der zal ein tûsent was.

dar kam der herzog Esoras

von Aggaron gestrichen,

der brâhte werdeclichen

24925

vier tûsent werder liute,

die fuorten an ir hiute

gewæfen lûter unde glanz.

ein künic der hiez Olifranz

und was von êthiopîâ,

24930

der hete in sîner rotte dâ

wol zehen tûsent môre.

Clarencius von Pôre,

der einer grâveschefte wielt,

ze Troie sîne stat behielt

24935

mit aht hundert schützen,

die kunden wol genützen

den bogen und daz arembrust.

dar kam durch ritterlîche just

Achalamus von Indien eilt mit seinem Gefolge Priamus zu Hilfe

Achalmus von Indiâ,

24940

der hete vreche ritter dâ,

der was vier tûsent an der zal.

wer mac die fürsten über al

ze rechenunge bringen,

die man ze Troye dringen

24945

sach in die wunneclichen stat.

ez müeste sîn ein breitez blat,

dâ man geschribe ir namen an.

mîn zunge ir aller niht enkan

gedenken hie besunder.

24950

von ritterschaft ein wunder

Prîande kam ze stiure

dur strîtes âventiure.

Ouch hete er selber liute vil,

der namen ich verswîgen wil,

24955

wan ich ir aller niht enweiz.

vil maniger werder ritter fleiz

zuo sîner starken helfe sich.

gar michel und gar grœzlich

wart sînes volkes magenkraft,

24960

doch was der Kriechen ritterschaft

wol zehenstunt sô manicvalt.

die geste biderb unde balt

herberge enpfiengen in der stat,

die Prîamus in lîhen bat

24965

rîlîche und ûzer mâzen wol.

liut unde ritterschefte vol

die gazzen wurden und diu stift.

in wart vil edel hantgift

und êren manger hande

24970

geboten von prîande,

der hiez ir aller schône pflegen.

er hete sich dar ûf gewegen

mit flîze stille und offenbâr,

daz er spîse manic jâr

24975

moht in der schœnen veste hân.

des wart in allen wol getân

mit rîcher handelunge,

die sîner samenunge

ze helfe stuonden bî der frist.

24980

von werken maniger hande list

was in der stat getihtet,

die stuonden ûf gerihtet

ze schedelichen würfen.

swes ieman sol bedürfen

24985

ze strîteclichen sachen,

des hiez ein wunder machen

Prîant der künic stæte.

geboten mit geræte

wart den gesten manic zuht.

24990

dâ was von liuten grôz genuht,

für wâr sult ir gelouben des.

ein künic hiez Epistroples,

der fuorte dar ein fremdez her.

ûz einer insel bî dem mer

24995

kam er dâ hin beswærde vrî.

sîn rîche lac dem lande bî,

dâ niht wan frouwen inne sint.

er brâhte maniger muoter kint

gar seltsæn und gar wilde.

25000

mit wunderlichem bilde

was ir frecher lîp behaft.

daz oberteil an ir geschaft

was gestellet als ein man,

und schein daz underteil dar an

25005

vih oder tiere vil gelîch.

si wâren fremder forme rîch

sus unde sô geschaffen.

ir sprechen unde ir claffen

wart kûme dâ verstanden.

25010

man sach si zuo den landen

mit ir künege balde zogen;

si truogen starke hornbogen

und kunden alle schiezen.

ze Troie nider liezen

25015

dis egebæren liute sich,

wan si der künic lobelich

gern unde willeclîche sach.

er schuof den allen guot gemach,

die zuo der veste wâren komen.

25020

er het in sîne stat genomen

von ritterschefte manger schar.

der eine der was komen dar

dur sînen küniclichen solt,

sô was der ander frouwen holt

25025

und wolte bî den zîten

dur si nâch lobe strîten.

Ouch fuoren zuo dem rîche

des mâles eteslîche,

die den künic entsâzen

25030

und niht getorsten lâzen

die reise dur sîn starc gebot.

ir sumelîche ân allen spot

dur hôhen muot dar îlten,

daz si dâ kurzewîlten

25035

und die zît vertriben hin.

daz her dur maniger hande sin

kam in die stat mit sneller var,

doch vuor diu meiste menge dar

dur des werden küniges bete,

25040

wan er gewaltes wunder hete

und er gefriundet sêre was:

sô nam er an sich unde las

von liuten grôze magenkraft.

nû daz diu werde ritterschaft

25045

ze Troie sus z' ein ander kam

und in der schœnen stat genam

herberge nâch ir werdekeit,

dô gie ze râte, sô man seit,

Prîant der künic stæte.

25050

waz er des mâles tæte,

daz im daz beste wære,

des kam der tugentbære

mit sînen fürsten über ein.

Hector, der gar ein spiegel schein

25055

kürlicher manheit vollekomen,

der wart ze meister dâ genomen

und z' einem pfleger überz her.

bevolhen wart in sîne wer

diu ritterschaft gemeine,

25060

sô daz er alters eine

gewalt ir aller dâ gewan.

er solte sîn ir houbetman

mit werken und mit worten,

wan si dô z'allen orten

25065

erfüllen wolten sîn gebot.

fünf teil diu wurden âne spot

von im gemachet ûz dem her.

der einez nam in sîne wer

der bruoder sîn Dêîfebus

25070

und daz ander Trôilus;

Pârîs zuo im daz dritte zôch;

Pollidamas der fürste hôch

an sich die vierden rotte las;

der fünften schar Enêas

25075

mit sîner pflege sich underwant.

swaz man dâ fuozgengel vant,

der nam Prîant sich selber an.

er unde zehen tûsent man,

vil wol geriten alle wege,

25080

die solten ir dâ mit ir pflege

und mit ir huote walten.

sus wart daz her zerspalten

und geteilet ûf den strît.

Hector den rotten bî der zît

25085

was z'einem obeman gegeben,

wan er nâch wirde kunde streben

unde an ritterschefte was

vest als ein herter adamas.