Sprüche

___________________________________________________

5.

Cod. Pal. germ. 848, 418v

Universitätsbibliothek Heidelberg

In Galadite in dem lande ein vogel sus

genennet und erkennet ist Galadrius,

sne wiz sin lip und elliu sin gevidere;

des vogels sehen unt ouch sin art hat solhe maht,

5

swaz siechen er an siht, ez si tag oder naht,

der ist genesen, er si hoh oder nidere:

swem aber er daz gesiht' entseit,

der mak genesen niht, daz ist ein wunder;

in sinem rehten beine er treit

10

ein stein, der ist den ougen guot besunder:

des wünsche ich herren sunder haz,

daz teglich hete ir ein[en], damit si streichten

ir ougen, daz si deste baz

gesehen möhten, wem si ir gäbe sleichten.

15

so wolt ich haben diu ougen sin, dur daz ich möhte meren

der richen argen, kargen tot

in wernde not

unt wolte daz gesihte min ze den vil milten keren.