Sprüche

___________________________________________________

4.

Cod. Pal. germ. 848, 418v

Universitätsbibliothek Heidelberg

Diu kerge birt, und ist, unt pruevet manige untugent,

diu kerge nidert alter und unwirdet jugent,

diu kerge selten hohen pris erwirbet;

diu kerge ist gegen den tugenden ein herter vlins,

5

diu kerge selten bringet hoher eren zins,

diu kerge manik rilich lop verdirbet;

diu kerge ist gegen den tugenden laz,

diu kerge manigem laster mal bevilhet,

diu kerge treit der milte haz,

10

diu kerge schande zwilhet unde drilhet;

diu kerge lazzet an der schrift,

diu kerge an werdekeit ist gar verstummet,

diu kerge hazzet eren trift,

diu kerge laster enpfet unde summet,

15

diu kerge niemer stunde keiner arger vuore entwenket,

diu kerge ein rouberin ist hoher eren tat,

diu kerge hat

vil manegen kargen dort in immer werndez ach versenket.