Der Nibelunge Nôt

38. Aventiure

___________________________________________________

Aventivre wie des herren dietriches rechen

alle wrden erslagen

2235

Do hort man allenthalben | iamer also groz

daz palas vnd tvrne | von dem wuffe erdoz

do hort ovch von berne | ein dieteriches man

dvrch disiv starchen maere | wi balde er gahen began

2236

do sprach er zv dem fversten | hoert min her dieterich

swaz ich noh her gelebt han | so rehte vnmvegelich

gehort ich chlage ni mere | als ich nv han vernomen

ich waen der chvenech ecel | ist sebe zv dem schaden chomen

2237

wi moehtens anders alle | haben solhen mvt

der chvenech oder criemhilt | ir einez daz ist tot

von den chvenen gesten | dvrh ir nit gelegen

ez weinet vngefvge | vil manech zierlicher degen

2238

do sprach der helt von berne | mine vil lieben man

nv gahet niht ce sere | swaz hi hant getan

di ellenden recken | des gat in michel not

vnde lat des geniezen | daz ich in minen fride enbot

2239

do sprach der chvene wolfhart | ich wil dar gan

vnde wil vragen der maere | waz si hant getan

vnd wilz iv sagen danne | vil lieber herre min

als ich ez dort ervinde | waz div chlage mvge sin

2240

do sprach der herre dieterich | swa man zorns sich versiht

ob vngefvgiv vrage | danne da geschiht

daz betrvebet lihte den gvten | recken ir vil hohen mvt

ia ne wil ich niht den wolfhart | daz ir di vrage gein in tvt

2241

do bat er helpfrichen | vil balde dar gan

vnd hiez in daz ervinden | an eceln man

oder an den gesten selben | waz waere da geshehen

do ne het man von livten | so grozen iamer ni gesehen

2242

der bote begonde vragen | waz ist hi getan

do sprach einer drvnder | daz ist vil gar cergan

swaz wir vrevden heten | in der hivnen lant

hi lit erslagen rvedeger | von der bvrgonden hant

2243

di mit im dar in chomen | der ist einer niht genesen

do ne chonde helpfriche | nimmer leider wesen

ia ne gesaget er maere | so rehte vngerne nie

der bote zv dieteriche | vil sere weinende gie

2244

waz habt ir vns erfvnden | sprach do dieterich

wi weinet ir so sere | degen helpfrich

do sprach der edele recke | ich mag wol balde chlagen

den gvten rvedgeren | hant die bvrgonde erslagen

2245

do sprach der helt von berne | daz en sol niht wellen got

daz waere ein starchiv rache | vnde ovch des tivels spot

wamit het rvedger | an in daz versolt

ia ist mir daz wol chvende | er ist den ellenden holt

2246

des antwurte wolfhart | vnde heten siz getan

so solt ez in allen | an ir lebn gan

ob wirz in vertrvegen | des waere wir geschant

ia hat vns vil gedienet | des gvten rvedgeres hant

2247

der vogt der amelvnge | hiez ez ervinden baz

vil harte snellechlice | er in ein venster saz

do bat er hildebranden | zv den gesten gan

daz er an in erfvende | waz da waere getan

2248

der stvrmchvene reche | meister hildbrant

weder schilt noch waffen | trvg er an der hant

er wolde in sinen zvehten | zv den gesten gan

von swesterchinde | wart im ein straffen getan

2249

do sprach der grimme wolfhart | welt ir dar blozer gan

so mag er an ein schelten | nimmer wol gestan

so mvezet ir lasterlichen | tvn di widervart

chvmt ir dar gewaffent | daz etelicher wol bewart

2250

do garte sich der wise | dvrch des tvmben rat

e daz ers innen wurde | do waren in ir wat

alle dieteriches recken | vnt trvgen swert enhant

dem helde was leide | vil gerne het erz erwant

2251

er vragte war si wolden | wir wellen mit iv dar

waz ob von tronege hagene | deste wirs gevar

gein iv mit spotte sprechen | des er wol chan pflegen

do er daz gehorte | davon gestattes in der degen

2252

do sach der chvene wolker | wol gewaffent gan

di recken von berne | di dieteriches man

begvertet mit den swerten | si trvgen schilt enhant

er sagetez sinem herren | vzer bvergonden lant

2253

do sprach der videlaere | ich sihe dort her gan

so rehte vientliche | di dieteriches man

gewaffent vnder helme | si wellent vns bestan

ich waen ez an daz vebele | welle vns ellenden gan

2254

in den selben ziten | chom ovch hildebrant

da satzet er fver di fveze | sines schildes rant

er begonde vragen | di gvntheres man

owe ir gvten helde | waz het iv rvedger getan

2255

mich hat min herre dieterich | her zv ziv gesant

ob erslagen hete | iwer deheines hant

den edeln margraven | als vns daz ist geseit

wirn chvnden veberwinden | niht div grozlichen leit

2256

do sprach von tronege hagene | daz maere ist vngelogen

wi wol ich iv des gvnde | het iv der bote betrogen

dvrch rvedegeres liebe | daz noch lebte sin lip

den immer mvgen weinen | beide man vnd ovch div wip

2257

do si daz rehte erhorten | daz er waere tot

do chlageten in di recken | ir triwe in daz gebot

den dieteriches recken | sach man traehne gan

veber berte vnde vber chinne | in was vil leide getan

2258

der herzoge von berne | ce sigestap do sprach

nv hat gar ein ende | genomen der gemach

den vns ie gefvgete rvdeger | nach vnser leide tagen

vroevde ellender diete | lit an rvedger erslagen

2259

do sprach von amelvngen | der degen wolfin

vnd ob ich hivte saehe | tot den vater min

mir en wurde nimmer leider | danne vmbe sinen lip

owe wer sol nv troesten | des edeln margraven wip

2260

do sprach in zornes mvote | der degen wolfhart

wer wiset nv di recken | so manege herewart

also der margrave | vil diche hat getan

owe vil edel rvedeger | daz wir dich svs verlorn han

2261

wolfprant vnd helpfrich | vnd ovch helmnot

mit allen ir vrivnden | chlagten sinen tot

vor svften mohte vragen | niht mere hildebrant

er sprach nv tvt ir degene | darnach min herre hat gesant

2262

gebt vns rvedgern | also toten vz dem sal

an dem gar mit iamer | lit vnser vrevdenval

lat vns an im dienen | daz er ie hat began

an vns vil groze triwe | vnd an manegem andern man

2263

wir sin ovch ellende | als rvedger der degen

wes lazet ir uns pitet | lat in vns after waegen

tragen daz wir nach tode | lonen noch dem man

wir hetenz pilliche | bi sime lebene getan

2264

do sprach der kvenech gventher | ni dienest wart so gvt

so den ein vrivnt vrivnde | nach dem tode tvt

daz heiz ich staete triwe | der di chan began

ir lonet im nach schvlden | er hat iv liebes vil getan

2265

wi lange svln wir vlegen | sprach wolfhart der degen

sit vnser trost der beste | von iv ist tot gelegen

vnd wir sin leider mere | mvegen niht gehaben

lat en vns hinnen tragen | daz wir den recken begraben

2266

des antwurte volker | niemen in iv git

nemt en in dem hvse | da der degen lit

mit starch verchwunden | gevallen in daz plvt

so ist ez ein voller dienest | den ir rvedgeren tvt

2267

do sprach der chvene wolfhart | got weiz her spilman

ir en dverffet vns niht reizen | ir habt vns leit getan

getorst ich vor minem herren | so choemet irs in not

des mvezen wirz lazen | wand er vns striten hi verbot

2268

do sprach der videlaere | der vorhte ist gar ce vil

swaz man im verbivtet | derz allez wil

daz chan ich niht geheizen | rehten heldes mvt

div rede duhte hagenen | uon sinem hergesellen gvt

2269

des en lat iuch niht belangen | sprach aber wolfhart

ich entrihte iv so di seiten | swenne ir di wideruart

ritet gein dem rine | daz irz uuol muget sagen

iuuer vebermueten | mag ich mit eren niht vertragen

2270

do sprach der uidelaere | swenne ir di seiten min

verirret guter doene | der iuuer helme schin

der muz uil truebe uuerden | von der minen hant

suui halt ich gerite | in der buergonden lant

2271

do uuold er zv zim springen | wande daz in niht en lie

hildebrant sin oheim | in uaste zim gevie

ich waene du woldest toben | durch den tumben zorn

mines herren hulde | hetes du immer mer verlorn

2272

lat abe den lewen meister | er ist so grimme gemut

chumt aber er mir cen handen | sprach volker der degen gut

het er di uuerlt alle | mit siner hant erslagen

ich slahe in daz erz uuiderspel | nimmer mer darf gesagen

2273

des wart uil harte erzvernet | der bernaere mut

den schilt gezvchte wolfhart | ein sneller degen gut

alsam ein lev wilder | lief er uor in dan

im wart ein gahez volgen | uon sinen vriunden getan

2274

swi witer sprunge er pflaege | fuer des sales want

doch ergahte in vor der stiege | der alte hildebrant

er en wolde in uor im lazen | niht chomen in den strit

si funden daz si suchten | an den ellenden sit

2275

do gespranch zv hagenen | meister hildebrant

diu swert man horte erchlingen | an ir beider hant

si waren ser erzvernet | daz mohte man chiesen sint

von ir zweier swerten | gie fiwerroter wint

2276

di wurden do gescheiden | in des sturmes not

daz taten di uon berne | als in ir chrapft gebot

zehant do wande hildebrant | uon hagenen wider dan

do lief der starche wolfhart | den chvenen volkeren an

2277

er sluch den uidelaere | vf den helm gut

daz des swertes ecke | vnz an di spangen wut

daz vergalt mit ellen | der chuene spilman

do slug er wolfharten | daz er stieben began

2278

des fiwers vz den ringen | hiwen si genuch

haz ir iegelicher | dem andern da truch

di shiet do von berne | der degen wolfin

ob ez ein helt niht waere | des en chunde niht gesin

2279

guenther der recke | mit uil willeger hant

enpfie di helde maere | von amelunge lant

giselher der herre | diu liehten helmvaz

der frumt er da uil manigez | uon pluote rot unde naz

2280

danchwart hagen bruder | was ein grimmech man

swaz er da uor hete | in strite ie getan

den eceln recken | daz was gar ein wint

nu naht uil tobeliche | des chuenen aldrianes chint

2281

ritschart unde gerbart | helpfrich unde wichart

di heten in manegn sturmen | uil selten sich gespart

des brahten si wol innen | di guentheres man

do sach man wolpranden | in strite herliche gan

2282

do uaht alsam er wuote vder alte hildebrant

uil der guten recken | uor wolfhartes hant

mit tode musen uallen | uon swerten in daz pluot

sus rachen ruedgeren | di recken chuene unde gut

2283

do uaht der herre sigestap | als im sin ellen riet

hey waz er in dem strite | guter helme uerschriet

den sinen uianden | dieteriches swester sun

er en chunde in dem sturme | nimmer bezzers niht getun

2284

uolker der starche | do er daz ersach

daz sigestap der chuene | den bluotegen bach

hiu uzzer herten ringen | daz was dem helde zorn

er spranch im hin engegene | do het sigestap uerlorn

2285

von dem uidelaere | uil schiere da daz sin leben

er begonde im siner chvenste | alsolhen teil da geben

daz er uon sinem swerte | muose ligen tot

daz rach der alte hildebrant | als im sin ellen daz gebot

2286

owe liebes herren | sprach meister hildebrant

der hi lit erstorben | uon volkeres hant

nu sol der uidelaere | langer niht genesen

hildebrant der chuene | wi chund er grimmer gewesen

2287

do sluch er volkeren | daz im div helmbant

stuben allenthalben | zu des sals want

uon helm vnd ouch uon schilde | dem chuenen spileman

dauon der starche volker | do den ende da gewan

2288

do drungen zu dem strite | di dieteriches man

unt daz man ort der swert | uil hohe uliegen sach

si holten uz den helmen | den hieze uliezenden bach

2289

do sach uon tronege hagene | volkeren tot

daz was cer hohgezite | sin allermeistiv not

di er da hete gewunnen | an magen und ouch an man

owe wi harte hagene | den helt do rechen began

2290

nu ne sol es niht geniezen | der alte hildebrant

min helfe lit erslagen | uon des heldes hant

der beste hergeselle | den ich ie gewan

den schilt er ruchte hoher | do gi er howende dan

2291

helpfrich der chuene | danchwarten sluch

guenthere unde giselhere | den was ez leit genuch

do si in uallen sahen | in der starchen not

er hete mit sinen handen | uil wol uergolten sinen tot

2292

di wile gie do wolfhart | beide wider unde dan

allez howende | di guentheres man

er was di driten chere | chomen durch den sal

da uiel uon sinen handen | uil manech recke ce tal

2293

do rief der herre giselher | wolfharten an

owe daz ich so grimmen | uient ie gewan

edel ritter chuene | nu wendet gegen in

ich wilz helfen enden | ez en mag niht lenger gesin

2294

zv giselhere cherte | wolfrhat in den strit

do sluch ietwederr | uil manege wunden wit

so rehte krepftechlichen | er zv dem kvenege dranch

daz imez pluot under fuezen | al ueber daz houbet spranch

2295

mit swinden slegen grimme | der schonen vten chint

enpfie er wolfharten | den chvenen helt sint

swi starch der degen waere | ern chunde niht genesen

ez en dorfte kvenech so iunger | nimmer chuener gewesen

2296

do sluch er wolfharten | durch eine brvenne gvt

daz im uon der wunden | nider uloz daz pluot

er wunte zu dem tode | den dieteriches man

ez en het an einen recken | zware niemen getan

2297

also der chuene wolfhart | der wunden do enpfant

den schilt den liez er uallen | hoher an der hant

hub er ein starchez waffen | daz was starch genuch

durch helm unt durch ringe | der helt do giselheren sluch

2298

si heten beide einander | den grimmen tot getan

do ne lebte ouch niht mere bder dieteriches man

hildebrant der alte | wolfharten uallen sach

im waene vor sinem tode | so rehte leide ni geschach

2299

do waren gar erstorben | di guentheres man

vnd ouch di dieteriches | hildebrant was gegan

da wolfhart was gevallen | nider in daz plut

er besloz mit armen | den recken chven vnde gut

2300

er wolden uzem huse | mit im tragen dan

er was ein teil ce swaere | er muse in ligen lan

do blichte ouch vz dem bluote | der rewende man

er sach wol daz im gerne | sin neve het geholffen dan

2301

do sprach der totwunde | vil lieber oheim min

ir muegt an disen ziten | mir niht frvm gesin

nv hvetet iuch vor hagenen | ia dunchet ez mich gut

er treit in sinem hercen | einen grimmigen mvt

2302

vnde ob mich mine mage | nach tode wellen chlagen

den naehestn vnt den besten | den sult ir von mir sagen

daz si nach mir niht weinen | daz ist ane not

uor eines kveneges handen | lige ich hi herlichen tot

2303

ich han ouch so vergolten | hirinne minen lip

daz ez wol mvgen beweinen | der guten ritter wip

ob iuch des iemen vrage | so muegt ir balde sagen

vor min eines handen | ligent wol hundert erslagen

2304

do gedaht ovch hagen | an den spileman

dem der chvne hildebrant | sin leben an gewan

do sprach er zv dem degene | ir geltet miniv leit

ir habt vns hinne enbunden | vil maneges recken gemeit

2305

er sluch vf hildebranden | daz man wol vernam

balmvngen diezen | den sifride nam

hagen der chvene | da er den helt ersluch

do werte sich der alte | ia was er chvene genuch

2306

der recke dieteriches | sluch ein waffen breit

vf den helt von tronege | daz ovch vil sere sneit

do ne chunder niht verwunden | den guentheres man

do sluoch aber in hagene | durch eine brvenne wolgetan

2307

do der alte hildebrant | der wunden enpfant

do uorhte er schaden mere | von der hagenen hant

den schilt warf veber ruke | der dieteriches man

mit der starchen wunden | der helt do hagenen entran

2308

da was niemen lebende | aller der degene

niwan di einen zwene | guenther vnd hagene

mit bluote gie bervnnen | der alte hildebrant

er brahte leidiv maere | da er dieterichen vant

2309

do sah er trvrechliche | sitzen hi den man

der leide michel mere | der fverste do gewan

er sah ouch hildebranden | in siner brvenne rot

do vragete er der maere | als im div sorge gebot

2310

nv sagt mir meister hildebrant | wi sit ir so naz

von dem verchpluote | oder wer tet iv daz

ich waene ir mit den gesten | zem huse habt gestriten

ich verbot ez iv so sere | ir hetez pilliche vermiten

2311

do sagt er sinem herren | ez tet hagene

der slug mir dise wunden | in dem gademe

do ich von dem recken | wolde wenden dan

mit dem minem lebene | ich dem tivfel vil chvme entran

2312

do sprach der bernaere | vil rehte ist iv geschehen

do ir mich frivntschepfte | den recken hortet gehen

daz ir den vride brachet | den ich in hete gegeben

het ich es niht immer shande | ir soldet vliesen daz leben

2313

nv zvernet niht so sere | min her dieterich

an mir vnd minen frivnden | der schade ist al ce rich

wir wolden rvedgeren | getragen haben dan

des en wolden vns niht gunnen | des chvnech gventheres man

2314

so we mir dirre leide | ist ruedeger doch tot

daz mvz mir sin ein iamer | vor aller miner not

goetelint div edele | ist miner pasen chint

ach we der armen weisen | di da ce bechlaren sint

2315

triwen vnde leides | mant mich sin tot

er begonde starche weinen | des gie dem helde not

owe getriwer helde | di ich verlon han

ia ne veberwinde ich nimmer | des chvenech eceln man

2316

mveget ir mir meister hildebrant | div maere rehte sagen

wer der recke waere | der in da habe erslagen

er sprach daz tet mit chrepften | der starche gernot

vor ruedgeres henden | ist ovch der helt gelegen tot

2317

er sprach ce hildebrande | nv sagt minen man

daz si sich palde waffen | wand ich wil dar gan

vnde heizet mir gewinnen | min liehtez wichgewant

ich wil selbe vragen | di helde vzer burgonden lant

2318

do sprach meister hildebrant | wer sol zv ziv gen

swaz ir habt der lebenden | di seht ir hi bi iv sten

daz pin ich alterseine | di andern di sint tot

do erschract er dirre maere | des gie im waerliche not

2319

wand er leit so grozez | cer werld nie gewan

er sprach vnde sint erstorben | alle mine man

so hat min got vergezzen | ich armer dieterich

ich was ein chvnech here | vil gewaltech vnd rich

2320

wi chvnde ez sich gefvegen | sprah her dieterich

daz si alle sint erstorben | di helde lobelich

von den stritmueden | di doch heten not

wande durch min vngeluecke | in waere vremde noch der tot

2321

sit daz es min vnschulde | niht langer wolde entwesen

so sagt mir ist den geste | noch iemen genesen

do sprach meister hildebrant | daz weiz got niemen mer

niwan hagen aleine | vnde guenther der kvenech her

2322

owe lieber wolfhart | sol ich dich han verlorn

so mag mich balde riwen | daz ich ie wart geborn

sygestap vnd wolfwin | vnd ouch wolfprant

wer sol mir danne helffen | in der amelunge lant

2323

helpfrich der vil chvene | vnd ist mir der erslagen

gerbart vnd wichart | wi solde ich di uerchlagen

daz ist an minen vrevden | mir der leste tach

owe daz vor leide | niemen sterbene mach