Der Nibelunge Nôt

37. Aventiure

___________________________________________________

Aventivre wie rvdeger

erslagen wart

2135

Ez heten di ellende | wider morgen gvt getan

wine der gotelinde | chom ce hove gegan

do sach er beidenthalben | div grozlicher ser

daz weinte innechlichen | der vil gvte rvdeger

2136

so we mir sprach der recke | daz ich ie den lip gewan

daz disen grozen iamer | chan niemen vnderstan

swi gerne ichz vriden wolde | der chvenech en tvt es niht

wande er der sine leide | ie mer vnd mer gesiht

2137

do sande an dieterichen | der gvte rvedeger

ob siz noch chvnden wenden | an den chvenegen her

do enbot im der von berne | wer moht iz vnderstan

ez en wil der kvenech ecel | niemen scheiden lan

2138

do sah ein hivnen recke | rvedgeren stan

mit weinenden ovgen | vnde hetes vil getan

der sprach cer kveneginne | nv seht ir wi er stat

der doch gewalt den meisten | hi bi eceln hat

2139

vnt dem allez dienet | livt vnde lant

wi so vil der bverge | an rvedeger gewant

der er von dem chvenege | vil manege haben mach

er geslvch in disen stvermen | nie lobelichen slach

2140

mich dvnchet ern rvche | wi ez hi vmbe gat

sit er der vollen | nach sinem willen hat

man giht im er si chvener | danne iemen mvege sin

daz ist in disen sorgen | worden bosliche schin

2141

mit trvrigem mvte | der vil getriwe man

den er daz reden horte | der helt der blicht in an

er dahte dv solt ez erarnen | dv gihest ich si verzagt

dv hast disiv maere | ce hove ce lvte gesagt

2142

di fvst begonder twingen | do lief er in an

vnde slvch so chrepftliche | den hivnisschen man

daz er im vor den fvzen | lach vil shier tot

do was aber gemeret | des kvenech eceln not

2143

hin du zage maere | sprach do rvedger

hich han doch genvge | leit vnde ser

daz ich hi niht en vihte | zwiv wizest dv mir daz

ia waere ich den gesten | von grozen schvlden gehaz

2144

vnde allez daz ich moehte | het ich in getan

niwan daz ich di recken | her gefveret han

ia was ich ir geleite | in mines herren lant

des en sol mit in niht striten | min vil ellendes hant

2145

do sprach ce dem margraven | ecel der kvenech her

wi habt ir vns geholfen | vil edel rvedeger

wand wir so vil der viegen | hi ce lande han

wir bedorften ir niht mere | ir habt vil vebele getan

2146

do sprach der ritter edele | da besweret er mir den mvt

vnde hat mich geitewizet | ere vnde gvt

des ich von dinen handen | han so vil genomen

daz ist dem lvgenaere | ein teil vnstaeteliche chomen

2147

do chom div chveneginne | vnde het iz ovch gesehen

daz von des heldes zorne | dem hivnen was geschehen

si chlagetez vngefvge | ir ovgen wurden naz

si sprach ce rvedegere | wi habe wir verdienet daz

2148

daz ir mir vnt dem chvenege | meret vnser leit

nv habt ir vns edel rvedger | allez her geseit

ir woldet dvrh vns wagen | di ere vnde ovch daz leben

ich hort iv vil der recken | den pris vil groezlichen geben

2149

ich man ivch der genaden | vnd ir mir habt gesworn

do ir mir ce eceln rietet | ritter vzerchorn

daz ir mir woldet dienen | an vnser eines tot

des wart mir armem wibe | nie so grozliche not

2150

daz ist ane lovgen | ich swuor iv edel wip

daz ich dvrch ivch wagete | ere vnde ovch den lip

daz ich di sele vliese | des en han ich niht gesworn

zv dirre hohgezite | bat ich di fversten wol geborn

2151

si sprach gedenche rvedger | der grozen triwe din

der staete vnd ovch der eide | daz dv den schaden min

immer woldest rechen | vnd elliv miniv leit

do sprach der margrave | ich han iv selten verseit

2152

ecel der vil riche | vlegen ovch began

do bvten si sich ce fvzen | beide fver den man

den edelen margraven | vnmvtes man do sach

der vil getriwe recke | harte iamerlichen sprach

2153

owe mir gotes armem | daz ich ie dice gelebet han

aller miner eren | der mvz ich abe stan

triwen vnde zvehte | der got an mir gebot

owe got von himele | daz mich es niht wendet der tot

2154

swelhez ich nv laze vnt | daz ander began

so han ich bosliche | vnde vil vbele getan

laze aber ich si beide | mich schiltet elliv diet

nv gervche mich bewisen | der mir ce lebene geriet

2155

do baten sin in genote | der chvenech vnd ovch sin wip

si mvsen sider rechen | verliesen den lip

vor rvedgeres hende | da ovch der helt erstarp

ir mveget daz hi wol hoeren | daz er vil iamerlichen warp

2156

er wiste schaden gewinnen | vnd vngefvgiv leit

et het dem chvenege | vil gerne verseit

vnd ovch der chveneginne | vil sere vorhte er daz

ob er ir einen slvege | daz im div werlt wuerde gehaz

2157

do sprach zv dem chvenege | der vil chvene man

her kvenech nv nemt hin widere | al daz ich von iv han

daz lant mit den bvergen | der sol mir niht bestan

ich wil vf minen fvzen | in daz ellende gan

2158

do sprach der kvenech ecel | wer hvelfe danne mir

daz lant zv den livten | daz gib ich allez dir

daz dv mich rechest rvedger | an den vienden min

dv solt ein kvenech gewaltech | beneben eceln sin

2159

do sprach aber rvedger | wi sol iz ane van

heim zv minem hvse | ich si galaden han

trinchen vnd spise | ich in gvetlichen bot

vnd gab in mine gabe | wi sol ich raten in den tot

2160

di livte waenent lihte | daz ich si verzaget

deheinen minen dienest | han ich in versaget

den vil edeln fversten | vnt den iren man

ovch riwet mich div vrivntschaft | di ich mit in geworben han

2161

giselher dem degene | gab ich di tohter min

si ne chvnde in dirre werlde | niht baz verwendet sin

vf zvht vnde vf ere | vf triwe vnde ovch vf gvt

ine gesach ni kvenech so ivngen | so tvgentlich gemvt

2162

do sprach aber criemhilt | vil edel rvedger

nv la dich erbarmen | vnser beider ser

min vnde ovch des kveneges | gedenche wol daran

daz nie wirt deheiner | so leide geste gewan

2163

do sprach der margrave | wider daz edel wip

ez mvz hivte gelten | der rvedegeres lip

swaz ir vnd ovch min herre | mir liebes habt getan

darvmbe mvz ich ersterben | daz mag niht langer gestan

2164

ich weiz wol daz noch hivte | mine bverge vnde miniv lant

iv mvezen ledech werden | von ir eteliches hant

ich bevilhiv vf genade | min wip vnde miniv kint

vnd ovch di vil ellenden | di da ce bechelaren sint

2165

nv lon dir got rvedeger | sprach der kvenech do

er vnt div chvneginne | si wurden beide vro

vns svln dine livte | vil wol bevolhen wesen

wol truwe ich minem heile | dv maht selbe genesen

2166

nv liez er an di wage | sele vnd lip

do begonde weinen | daz ecelen wip

er sprach ich mvz iv leisten | als ich gelobt han

owe der minen frivnde | di ich vil vngerne bestan

2167

man sah in von dem chvenege | vil trvrechlichen gen

do vande er sine recken | vil nahen vor im sten

er sprach ir svlt ivch waffen | alle mine man

di chvenen bvrgonden | di mvz ich leider bestan

2168

si hiezen balde springen | da man ir geweffen vant

ez der helm waere | oder des schildes rant

von ir ingesinde wart | ez dar getragen

sit horten leidiv maere | di stolzen ellenden sagen

2169

gewaffent wart do rvedger | mit fvnf hvndert man

darveber zwelf recken | ce helfe er do gewan

di wolden pris erwerben | in des stvrmes not

sin wessen niht des | daz in so nahete der tot

2170

do sah man rvedegeren | vnder helm gan

ez trvgen swert div sharpfen | di rvedegeres man

darzv vor ir handen | di liehten schilde breit

daz sach der videlaere | ez was im groezliche leit

2171

do sah der ivnge giselher | sinen sweher gen

mit vf gebvndem helme | wi moht er do versten

waz er da meinte | niwan allez gvt

des wart der kvenech edele | so rehte vroelich gemvt

2172

nv wol mich solher vrivnt | sprach giselher der degen

di wir han gewunnen | vfn disen wegen

wir svln mines wibes | vil wol genizzen hie

mir ist lieb vf mine triwe | daz ie div hirat ergie

2173

ine weiz wes ir ivch troestet | sprah do der spilman

wa gesahet ie dvrh svne | so manegen helt gan

mit vf gebvnden helmen | di trvegen swert enhant

an vns wil dienen rvedeger | sine bverge vnd siniv lant

2174

bedaz der videlaere | di rede vol gesprach

rvedegern den edeln | man vor dem hvse sach

sinen schilt den gvten | satzet er fver den fvz

do mvs er sinen frivnden | versagen dienest vnd grvz

2175

der edel margrave | rief in den sal

ir chvenen nibelvnge | nv wert ivch vber al

ir soldet min geniezen | nv engeltet ir min

e do waren wir vrivnde | der triwen wil ih ledech sin

2176

do erscrachten dirre maere | di nothafen man

wande ir deheiner vrevden | davon niht gewan

daz mit in wolde striten | dem si da waren holt

si heten von ir vienden | michel arbeit gedolt

2177

nv ne welle got von himele | sprach gventher der degen

daz ir ivch genaden | svlt an vns bewegen

vnt der vil grozen triwe | der wir doch heten mvt

ich wil iv des getruwen | daz irz nimmer getvt

2178

ia ne mach ich es niht gelazen | sprah do der chvene man

ich mvz mit iv striten | wand ich ez gelobt han

nv wert ivch chvnen helde | so lieb iv si der lip

mich en woldes niht erlazen | des kvenech eceln wip

2179

ir widersagt vns nv ce spate | sprah do der kvnech her

nv mvez iv got vergelten | vil edel rvedeger

triwe vnde minne | di ir vns habt getan

ob irz an dem ende | woldet gvetlich erlan

2180

wir soldenz immer dienen | daz ir vns habt gegeben

ir vnde mine mage | ob ir vns liezet leben

der herlichen gabe | di ir vns brahtet her

in eceln lant mit triwen | des denchet edel rvedger

2181

wi wol ich iv des gvnde | sprach rvedger der degen

daz ich iv mine gabe | mit vollen solde geben

also willechlichen | als ich des hete wan

so ne wurde mir darvmbe | nimmer schelten getan

2182

erwindet edel rvedeger | sprach do gernot

wand ez wirt deheiner | gesten nie erbot

so rehte minnechlichen | so ir vns habt getan

des svlt ir wol geniezen | ob wir bi lebene bestan

2183

daz wolde got sprach rvedger | vil edel gernot

daz ir ce rine waeret | vnde ich waere tot

mit etelichen eren | sit ich ivch sol bestan

ez en wart noch nie an helden | wirs von frivnden getan

2184

nv lon iv got her rvedger | sprach aber gernot

der vil richen gabe | mich riwet iwer tot

sol an iv verderben | so tvgentlicher mvt

hi trage ich iwer waffen | daz ir mir gabet helt gvt

2185

daz ist mir nie geswichen | in aller dirre not

vnder sinen ecken | lit manich ritter tot

ez ist lvter vnde staete | herlich vnd gvt

ich waene so richer gabe | ein recke nimmer mer getvt

2186

vnde welt ir niht erwinden | irn welt zv zvns gan

slaht ir mir iht der vrivnde | di ich noh hinne han

mit iwer selbes swerte | nim ich iv den lip

so riwet ir mich rvedeger | vnde iwer herlich wip

2187

daz wolde got her gernot | vnde moeht daz ergan

daz aller iwer wille | waere hi getan

vnt daz genesen waere | iwerr frivnde lip

ia sol iv wol getrvtet beide | min tohter vnde min wip

2188

do sprach von bvrgonden | der shoenen vten chint

wi tvt ir so her rvedeger | di mit mir chomen sint

di sint iv alle waege | ir grifet vebel zv

di iwern shonen tohter | welt ir verwitwen ce frv

2189

swenne ir vnd iwer rechen | mit strite mich bestat

wi rehte vnvrivntliche | ir daz schinen lat

daz ich iv wol getruwe | fver alle ander man

davon ich zeinem wibe | iwer tohter mir gewan

2190

gedenchet iwer triwe | vil edel kvnech her

gesende ivch got von hinnen | so sprach rvedger

lat di ivnchvrowen | niht engeltn min

dvrch iwer selbes tvgende | so rvchet ir genaedech sin

2191

daz taet ich pillichen | sprach giseher daz chint

di hohen mine mage | di noch hirinne sint

svln di vor iv ersterben | so mvz gescheiden sin

div vil staete vrivntschapft zv dir | vnd ovch der tohter din

2192

nv mvez vns got genaden | sprah der chvene man

do hvoben si di schilde | also si wolden dan

striten zv den gesten | in criemhilde sal

do rief vil lvte hagene | von der stiegen her ce tal

2193

belibet eine wile | vil edel rvedger

also sprach do hagene | wir wolden reden mer

ich vnd mine herren | als vns des twinget not

waz mach gehelfen eceln | vnser ellenden tot

2194

ich sten in grozen sorgen | sprach aber hagene

den schilt den mir gab | vrov gotelint ce tragene

den habent mir di hivnen | cerhowen vor der hant

ich friwentliche | in daz eceln lant

2195

daz des got von himele | gervchen wolde

daz ich schilt so gvten | noch tragen solde

so den dv hast vor hende | vil edel rvedeger

so bedorft ich in den stvermen | deheiner halsperge mer

2196

vil gerne ich dir waere gvt | mit minem schilde

torst ich dirn bieten | vor criemhilde

doch nim dv in hin hagene | vnt tragen an der hant

hey soldestv in fveren | heim in der bvrgonden lant

2197

do er im so willechlichen | den schilt ce gebene bot

do wart genvger ovgen | von heizen traehen rot

ez was div leste gabe | di sit immer mer

gebot deheinem degene | von bechelaren rvedeger

2198

swi grimme hagen waere | vnd swi herte gemvt

ia erbarmte im div gabe | di der helt gvt

bi sinen lesten ziten | so nahen het getan

vil manech ritter edele | mit im trvren began

2199

nv lon iv got von himele | vil edel rvdger

ez wirt iwer gelichen | deheiner nimmer mer

der ellenden recken | so herliche geb

got sol daz gebieten | daz iwer tvgent immer leb

2200

so we mir dirre maere | sprach aber hagene

wir heten ander swaere | so vil ce tragene

svln wir mit frivnden striten | daz si got gechleit

do sprach der margrave | daz ist mir innechlichen leit

2201

nv lon iv got der gabe | vil edel rvedeger

swi halt gein iv gebaren | dise recken her

daz nimmer ivch gerveret | in strite hi min hant

ob ir si alle slveget | di von bvrgonden lant

2202

des neig im mit zvehten | der gvte rvedeger

si weinten allenthalben | daz disiv hercen ser

niemen gescheiden chvnde | daz was ein michel not

vater maneger tvgende | lach an rvedgeren tot

2203

do sprach von dem hvse | volker der spilman

sit min geselle hagene | den fride hat getan

den svlt ovch ir staete | haben von miner hant

daz habt ir wol verdienet | do wir chomen in daz lant

2204

vil edel margrave | ir svlt min bote sin

dise roten bovge | gap mir div margravin

daz ich si tragen solde | hi cer hogezit

di mveget ir selbe schoven | daz ir min gezivch des sit

2205

daz wolde got von himele | sprach do rvedeger

daz iv div margravinne | noch solde geben mer

div maere sag ich gerne | der trivtinne min

gesihe ich si gesvnde | des mvegt ir ane zwivel sin

2206

als er im daz gelobte | den schilt hvp rvedeger

des mvotes er retobete | do ne beit er da niht mer

do lief er zv den gesten | einem degen gelich

manegen slach vil swinden | slvch der margrave rich

2207

di zwene stvnden hoher | volker vnd hagene

wand ez im e gelobten | di chvenen degene

noch vand er also chvenen | bi dem tvrne stan

daz rvedeger des strites | mit grozen sorgen began

2208

dvrch mortrachen willen | so liezen in dar in

gventher vnd gernot | si heten helde sin

do stvnt vf hoher giselher | zware ez was im leit

er versach sich noch des lebenes | darvmb er rvedgern meit

2209

do sprachen zv den fienden | des margraven man

man sach si nach ir herren | vil degenliche gan

div snidenden waffen | si trvgen an der hant

des brast da vil der helme | vnd manech herlicher rant

2210

do slvgen di vil mveden | manegen herten slach

den von bechelaren | der eben vnd tiefe wach

dvrch di liehten ringe | vaste vnz vf daz verch

si taten in dem stvrme | div vil herlichen werch

2211

daz edel ingesinde was | nv chomen gar dar in

volker vnd hagene | di sprvngen balde hin

si ne gaben vride niemen | wan dem einem man

von ir beider handen | daz plvot dvrh helme nider ran

2212

wi rehte grimmechlichen | vil manech swert darinne erchlanch

vil der schilde spangen | vz den slegen spranch

des reis ir schiltgesteine | verhowen in daz plvot

si vahten also grimme | daz man ez nimmer mer getvt

2213

der vogt von bechlaren | gie wider vnd dan

also der mit ellen | in stvrme werben chan

dem tet des tages rvedeger | harte wol gelich

daz er ein recke waere | vil chvne vnt ovh vil lobelich

2214

hi stvnden dise recken | gvnther vnde gernot

si slvgen in dem stvrme | vil manegen helt tot

giselher vnt danchwart | di zwen ez ringe wach

des frvmten si vil manegen | vnz vf ir ivngesten tach

2215

vil wol zeigete rvedeger | daz er was starch genvch

chvene vnde wol gewaffent | hey waz er helde slvch

daz sach ein bvrgonde | zornes gie im not

davon begvnde nahen | des edeln rvedgeres tot

2216

gernot der starche | den helt rvft er an

er sprach cem margraven | ir welt mir miner man

niht genesen lazen | vil edel rvedger

daz mvet mich ane maze | ichn chans niht angesehen mer

2217

nv mag iv iwer gabe | wol ce shaden chomen

sit ir mir miner vrivnde | habt so vil genomen

nv wendet ivch her vmbe | vil edel chvene man

iwer gabe wirt verdienet | so ich allerbeste chan

2218

e daz der margrave | zv zim vol chom dar

des mvsen liehte ringe | werden missevar

do sprvngen zv einander | di ere gernde man

ir ietwederr schermen | fver starche wunden began

2219

ir swert so scherpfe waren | ez en chvnde niht gewegen

do slvch gernoten | rvedeger der degen

dvrch helme vlins herten | daz nider vloz daz plvt

daz vergalt im schiere | der ritter chvene vnd gvt

2220

di rvedegeres gabe | an hende er hohe wach

swi wunt er cem tode waere | er slvch im einen slach

dvrch den schilt vil gvten | vnz vf div helm gespan

davon so mvs ersterben | der schoenen gotelinde man

2221

ia ne wart ni wirs gelonet | so richer gabe mer

do vielen beide erslagene | gernot vnd rvedeger

gelich in dem stvrme | von ir beider hant

allererst erzvrnede hagene | do er den grozen schaden vant

2222

do sprach der helt von tronege | ez ist vns vebel chomen

wir haben an in beiden | so grozen schaden genomen

den nimmer veberwindent | ir livte vnd ovh ir lant

di rvedegeres helde | sint vnser ellenden pfant

2223

owe mines brvder | der tot ist hi gefrvmt

waz mir der leiden maere | zallen ziten chvmt

ovh mvoz mich immer riwen | der edel rvedger

der schade ist beidenthalben | vnt div vil groezlichen ser

2224

do giselher der herre | sach sinen sweher tot

di do darinne waren | di mvsen liden not

der tot der svchte sere | da sin gesinde was

der von bechelaren | do langer einer niht genas

2225

do gventher vnde giselher | vnd ovch hagene

danchwart vnde volker | di gvten degene

di giengen da si fvnden | ligen di zwene man

do wart da von den helden | mit iamer weinen getan

2226

der tot vns sere rovbet | sprach giselher daz chint

nv lazet iwer weinen | vnd ge wir an den wint

daz vns di ringe erchvlen | vns stritmveden man

ia wen vns got von himele niht lenger | hi ce lebene gan

2227

den sizzen disen leinen | sah man manegen degen

si waren aber mvezech | da waren tot gelegen

di rvedegeres helde | vergangen was der doz

so lange wert div stille | daz sin eceln verdroz

2228

owe dirre dieneste | sprach des chveneges wip

di ne sint so staete | daz viende lip

mvge des engelten | von rvedegeres hant

er wil si wider bringen | in der bvergonden lant

2229

waz hilfet chvenech ecel | daz wir geteilet han

mit im swaz er wolde | der helt hat missetan

der vns da solde rechen | der wil der svne pflegen

des antwurte volker | der vil zierliche degen

2230

de rede en ist niht so leider | vil edel chveneges wip

getorste ich heizen liegen | alsus edelen lip

so het ir tivuellichen | an rvedgeren gelogen

er vnt di sinen degene | sint an der svne gar betrogen

2231

er tet so vollechliche | daz im der kvenech gebot

daz er vnde sin gesinde | ist hi gelegen tot

nv sehet alvmbe criemhilt | wem ir gebieten welt

iv hat vnz vf den ende | gedienet rvedger der helt

2232

welt ir des niht gelovben | man solz sehen lan

dvrch ir hercenleide | so wart do daz getan

man trvch den helt verhowen | da in der chvenech sach

den eceln degene | so rehte leide ni geschach

2233

do si den mragraven | sahen toten tragen

ez en chvnde dehein schribaer | geprieven noch gesach

di manege vngebaere | von wibe vnde ovh von man

div sich von hercen iamer | alda zeigen began

2234

der eceln iamer | wart also groz

als eines lewen stimme | der riche chvenech erdoz

mit herceleidem wuffe | alsam tet ovch sin wip

si klageten vngefvoge | des gvten rvdegeres lip