Der Nibelunge Nôt

26. Aventiure

___________________________________________________

Aventivre wie si mit elsen vnd gelpfraten striten

vnd wie in gelang

1586

Do si nv waren chomen | alle vffe den sant

der kvenech begonde vragn | wer sol vns dvrch daz lant

di rehten wege wisen | daz wir niht irre varn

do sprach der starche volker | daz sol ich eine bewarn

1587

nv enthaltet ivch sprach hagene | ritter vnde chneht

man sol frivnden volgen | ia dvnchet ez mich reht

vil vngefvegiv maere | div tvn ich iv bechant

wir en chvmen nimmer wider | in bvergonden lant

1588

daz sageten mir zwei merwip | hivte morgen frv

daz wir niht chomen widere | nv rat ich waz man tv

daz ir ivch waffent helde | ir svlt ivch wol bewarn

wir han hi starche fiende | daz wir gewaerliche varn

1589

ich wande an lvgen finden | div wilden merwip

si iahen daz gesvnder | vnser deheines lip

wider ze lande choeme | niwan der kappelan

darvmb ich in wolde so gerne | hivt ertrenchet han

1590

do flvgen disiv maere | von schare ce shar

des wurden snelle helde | vor leide missevar

do si begonden sorgen | vf den herten tot

an dirre hovereise | des gie in waerliche not

1591

da ze moeringen | si waren veber chomen

da dem elsen vergen | der lip was benomen

do sprach aber hagene | sit daz ich fiende han

verdienet vf der straze | wir werden sicherlich bestan

1592

ich slvch den selben vergen | hivte morgen frv

si wizen wol div maere | nv griffet helde zv

ob gelpfrat vnd else | hivte hi beste

vnser ingesinde | daz iz in schaedelich erge

1593

ich erchenne si so chvene | ez wirdet niht verlan

div ross div svlt ir lazen | deste sanfter gan

daz des iemen wane | wir vliehen vff den wegen

des rates wil ich volgen | so sprach giselher der degen

1594

wer sol daz ingesinde | wisen veber lant

si sprachen daz tv volker | dem ist ez hie wol bechant

stige vnd straze | der chvene spileman

e daz mans vollen gerte | man sach gewaffent stan

1595

den snellen videlaere | den helm er vff gebant

in herlicher varwe | was sin wichgewant

er bant ovch ce sinem shaffte | ein zeichen daz was rot

sit chom er mit den kvenegen | in eine groezliche not

1596

do was tot des vergen | gelpfrate chomen

mit gewissem maere | do het ez ovch vernomen

else der vil starche | ez was in beden leit

si sanden nach ir helden | di waren schiere bereit

1597

in vil chvrcen ziten | ich wilz ivch hoeren lan

sach man zv in riten | di schaden heten getan

in starchen verlivgen | vil vngefvegiv her

der chomen gelpferate | wol siben hvndert oder mer

1598

do si ir grimmen fienden | begonden riten nach

ia beiten si ir herren | den was ein teil ze gach

nach den chvenen gesten | si wolden anden ir zorn

des wart der herren frivnde | sider mer verlorn

1599

do hete von tronege hagene | wol gefveget daz

wi mohte siner mage | ein helt gehveten baz

er pflach der nachhvte | mit den sinen man

vnd danchwart sin brvder | daz was vil wislich getan

1600

in was des tages cervnnen | des en heten si niht mer

er vorhte an sinen vrivnden | leit vnde ser

si riten vnder shilden | dvrch der beyrlant

danach in chvrcer wile | di helde wurden angerant

1601

beidenthalp der straze | vnd hinden vaste nach

si horten hveue chlaffen | dem livte was ce gach

do sprach der chvene danchwart | man wil vns hi bestan

nv bintet vf di helme | daz dvnchet mich raetlich getan

1602

si hielten ab ir verte | als iz mvste sin

si sahen in der finster | der liehten schilde schin

do ne wolde hagene | niht langer si verdagen

wer iaget vns vf der straze | daz mvs im gelpfrat do sagen

1603

do sprach der margrave | vz beyerlant

wir svchen vnser viende | vnde haben hernach gerant

ine weiz niht wer mir hivte | minen vergen slvch

der was ein helt cen handen | des ist mir leide genvch

1604

do sprach von tronege hagen | was der verge din

der wold vns niht fveren | des ist div schvlde min

do slvch ich den recken | deiswar des gie mir not

ich het von sinen handen | vil nach gewunnen den tot

1605

ich bot im ce miete | golt vnd gewant

daz er vns vberfvrte | helt in din lant

do zvrnde er so sere | daz er mich do slvch

mit einer starchen shaltn | des was ih grimme genvch

1606

do chom ich cem swerte | vnd wert im sinen zorn

mit einen starchen wunden | des wart der helt verlorn

daz bringe ich iv ce svne | swi ivch dvnchet gvt

do gie ez an ein striten | si warn herte gemvt

1607

ich wesse wol sprach gelpfrat | do hi fver gereit

gventher vnd sin gesinde | daz vns taete leit

hagen von tronege | nv sol er niht genesen

fver des vergen ende | der helt mvz hi pverge wesen

1608

si neigeten veber schilde | ce stichen nv div sper

gelpfrat vnd hagene | in was zein ander ger

else vnd danchwart | vil herliche riten

si versvchten wer si waren | da wart vil grimme gestriten

1609

wi moehten sich versvchen | immer helde baz

von einer starchen tioste | hinder daz ross gesaz

hagen der chven | von gelpfrates hant

im brast daz fverbvege | do wart im striten bechant

1610

von ir ingesinde | der crach der sheffte shal

do erholt ovch sich do hagane | der e was ce tal

chomen von dem stiche | nider an daz gras

er waene vnsanftes mvtes | wider gelpfrate was

1611

wer in div ross behielte | daz ist mir vmbechant

si waren zv der erden | chomn vf den sant

hagen vnd gelpfrat | einander lieffen an

des hvlfen ir gesellen | daz in wart striten chvnt getan

1612

swi pitterliche hagen | ce gelpfrate spranch

der edel margrave | des schildes hin im swanch

ein michel stvche | deiz fiwer draete dan

des was vil nach erstorben | der chven gventheres man

1613

do begonde er rveffen | danchwarten an

hilf mir lieber brvder | ia hat mich bestan

ein helt cen sinen handen | dern lat mich niht genesen

do sprach der chven danchwart | des sol ich sheidaer wesen

1614

der helt do spranch dar naher | vnd slvch im einen slach

mit einem sharffen waffen | davon er tot gelach

else wolde gerne | rechen do den man

er vnd sin gesinde | schieden shedeliche dan

1615

im was erslagen der brvder | selbe wart er wunt

wol ahzech siner degene | beliben da cestvnt

mit dem grimmen tode | der herre mvose dan

flvhtechlichen | von den gventheres man

1616

do di von beyerlande | wichen vz dem wege

do hort man nachhellen | di vreislichen slege

do iageten di von tronege | ir fianden nach

di sin niht en kelten wandn | den was allen ce gach

1617

do sprach an der flvehte | danchwart der degen

wir svln wider wenden | balde vf disen wegen

vnd laze wir si riten | si sint von blvte naz

gahe wir cen frivnden | ich rate waerlichen daz

1618

do si hin wider chomen | da der shade was geshehen

do sprach von tronege hagene | helde ir svlt besehen

wes vns hi gebreste | oder wen wir han verlorn

hi in disem strite | dvrh den gelpfrades zorn

1619

si heten vlorn viere | di mvsen si verchlagen

di waren wol vergolten | da wider was erslagen

der von beyerlande | hvndert oder baz

des waren den von tronege | ir schilde trvebe vnd blvtes naz

1620

ein teil schein vz den wolchen | des liehten manen prehen

do sprach aber hagene | niemen sol veriehen

den minen lieben herren | waz wir hi han getan

lat siv vnze morgen | ane sorge bestan

1621

do si nv nach in chomen | di dort striten e

do tet dem ingesinde | div mvede harte we

wi lange svl wir riten | sprach manich man

do sprach der chvene danchwart | wir mvgen niht herberge han

1622

ir mvezet alle riten | vnz ez werde tach

volker der snelle | der des gesindes pflach

bat den marshalch vragen | wa svl wir hinte sin

da gerasten vnser moere | vnd ovch di liebn herren min

1623

do sprach der chvene danchwart | ine chans iv niht gesagen

wir en mvegen niht geruwen | e iz beginne tagen

swa wirz danne vinden | da legen vns an ein gras

do si div maere horten | wi leit in svemelichen was

1624

si beliben vnvermeldet | des heizen blvtes rot

vnz daz div svnne | ir liehtez schinen bot

dem morgen veber berge | daz ez der kvenich sach

daz si gestriten heten | der helt vil zornechlichen sprach

1625

wi nv frivnt hagene | iv waen versmahet daz

daz ich pi iv waere | da iv di ringe naz

svs wurden von dem blvte | wer hat daz getan

er sprach daz tet else | der het vns naehten bestan

1626

dvrch den sinen vergen | wir wurden angerant

da slvch gelpfraten | mins brvder danchwarten hant

sit entran vns else | des twang in michel not

in hvndert vnd vns viere | beliben in dem strite tot

1627

wir chvnnen niht bescheiden | wa si sich leiten nider

alle di lantlivte | di gevriesshen sider

daz ze hove fvren | der edeln vten chint

si wurden wol enpfangen | da ze pazowe sint

1628

der edeln chvenege oheim | der bisshoff pilgrin

dem wart vil wol ze mvte | do di neven sin

mit also vil recken | chomen zv zim in daz lant

daz er in willech waere | daz wart in schier bechant

1629

si wurden wol enpfangen | von vrivnden vf den wegen

da ze pazowe | man chonde ir niht gepflegen

si mvsen veberz wazzer | da si fvnden velt

da wurden vf gespannen | hvtten vnde gecelt

1630

si mvsen da beliben | allen einen tach

vnd ovch di naht mit vollen | wi shon man ir pflach

darnach si mvsen riten | in rvedegeres lant

dem wurden ovch div maere | darnach vil schiere bechant

1631

do di wegemveden | rowe genamen

vnde si dem lande | naher quamen

do fvndens vf der marche | slaffende einen man

dem von tronege hagen | ein starchez waffen an gewan

1632

ia was geheizen eckewart | der starche ritter gvt

er gewan darvmb | einen trvrigen mvt

da er verlos daz waffen | von der helde vart

di march rvedegeres | di fvndens vebele bewart

1633

owe mir dirre schande | sprach do eckewart

ia riwet mich vil sere | der bvrgonden vart

sit ich sifride vlos | sit was min frevde cergan

owe herre rvedger | wi han ich wider dich getan

1634

do hort vil wol hagene | des edelen recken not

er gab im wider sin waffn | vnd sehs povge rot

di habe dir helt ce minnen | daz dv min frivnt sist

dv bist ein degen chvene | swi eine dv vffe der marche list

1635

got lon iv iwerr povge | sprach do ecchewart

doch riwet mich vil sere | zen hivnen iwer vart

ir slvget sifriden | man ist hie gehaz

daz ir ivch wol behvetet | an triwen rat iv ich daz

1636

nv mveze vns got behveten | sprach do hagene

ian hant niht mere sorge | dise degene

wan vmb di herberge | di chvenige vnd ovch ir man

wa wir in disem lande | noch hinte nahtselde han

1637

div ross sint vns verdorben | vf den herten wegen

vnt der spise cervnnen | sprach hagen der degen

wir finden iz ninder veile | vns waere wirtes not

der vns noch hinte gaebe | dvrch sine tvgende sin brot

1638

do sprach aber eckwart | ich zeih iv einen wirt

daz ir ce hvse selten | so wol bechomen birt

in deheinem lande | als iv hi mach geschehen

ob ir vil snelle degene | wellet rvedgern sehen

1639

der sizet vf der straze | vnd ist der beste wirt

der ie chom ce hvse | sin herce tvgende birt

also der sveze meye | daz gras mit blvmen tvt

swenne er sol helden dienen | so ist er vroelich gemvt

1640

do sprach der kvnech gventher | welt ir min bote sin

ob vns welle enthalten | dvrch den willen min

min lieber frivnt rvedger | mine mage vnd vnser man

daz wil ih immer dienen | so ich allerbeste chan

1641

der bote pin ich gerne | sprach do eckewart

mit vil gvtem willen | hvb er sich an di vart

vnd sagete do rvedgere | als er het vernomen

im was in manigen ziten | niht so lieber maere chomen

1642

man sah ce bechelaren | ilen einen degen

selbe erchande in rvedger | er sprach vf disen wegen

dort her gahet eckewart | ein criemhilde man

er wande daz di viende | im heten leide getan

1643

do gi er fver di porten | da er den boten vant

daz swert er ab gvrte | vnd leitez von der hant

div maere div er brahte | wurden niht verdaget

den wirt vnt sine frivnde | ez wart in schiere gesaget

1644

er sprach cem margraven | mich hat zv ziv gesant

gventher der herre | von bvrgonden lant

vnd giselher sin brvder | vnd ovch gernot

der reckn ieslicher | iv sinen dienest her enbot

1645

daz selbe hat ovch hagene | vnd voelker

mit triwen vlizechliche | noch sage ich iv mer

daz iv des kveneges marsshalch | bi mir daz enbot

daz den gvten chnehten | waere iwer herberge not

1646

mit lachendem mvnde | antwurte rvedger

nv wol mich dirre maere | daz di kvenge her

daz si gervchent miner dieneste | der wirt in niht verseit

choment si mir ce hvse | des pin ich vro vnt gemeit

1647

danchwart der marshalch | der hiez ivch wizzen lan

wen ir ce hvse bmit in soldet han

sehzech sneller recken | vnd tvsent ritter gvt

vnd nivn tvsent chnehte | do wart er vrolich gemvt

1648

nv wol mich dirre geste | sprach do rvedeger

daz mir choment ce hvse | dise geste her

den ich noch vil selten | iht gedienet han

nv ritet in engegene | beide mage vnde man

1649

do ilten zn den rossen | ritter vnd kneht

swaz in gebot ir herre | daz dvhtes alle reht

do liezen sie in der dienste | zogen deste baz

noch en weste es niht vrov goetelint | div in ir chemenaten saz