Der Nibelunge Nôt

25. Aventiure

___________________________________________________

Aventivre wie die herren alle

zen hevnen fvren

1506

Nv laze wir beliben | wi si gefvren hie

hochgemvte recken | di gefvrn nie

so rehte herliche | in deheines chveniges lant

si heten swaz si wolden | beidiv waffen vnt gewant

1507

der vogt von dem rine | chleidete sine man

sehzech vnd tvsent | als ich vernomen han

vnd niwen tvsent chnehte | gegen der hohgezit

di si da heime liezen | di beweinetenz sit

1508

do trvch man div gereite | ce wormez veber den hoff

do sprach da von spyre | ein alter bisschoff

zv der schoenen vten | vnser frivnde wellent varn

gegen der hohgezite | got mvez ir ere da bewarn

1509

do sprach zv zir chinden | div edel vte

ir soldet hie beliben | helde gvte

mir ist getrovmet hinte | von angestlicher not

wi allez diz gefvegele | in disem lande waere tot

1510

swer sich an trovme wendet | sprach do hagene

der en weiz der rehten maere | niht ce sagene

wenn ez im ze eren | vollechlichen ste

ich wil daz min herre | ze hove nach vrlovbe ge

1511

wir svln gerne riten | in ecelen lant

da mach wol dienen chvenegen | gvter held hant

da wir da schowen mvezen | criemhilde hohgezit

hagen riet di reise | iedoch gerov ez in sit

1512

er hetez widerraten | want daz gernot

mit vngefvegen worten | im also missebot

er mant in sifrides | vrovn criemhilden man

er sprach davon wil hagene | di grozen hovereise lan

1513

do sprach von tronege hagene | dvrh vorhte ich nine tvo

swenne ir gebietet helde | so svlt ir griffen zvo

ia rit ich mit iv gerne | in ecelen lant

sit wart von im verhowen | vil manich helm vnde rant

1514

div siff bereitet waren | da was vil manech man

swaz si chleider heten | div trvch man dar an

si warn vmmvezech | vor abendens zit

si hvoben sich von hvse | vil harte vroeliche sit

1515

gezelt vnde hvetten | spien man an daz gras

anderthalp des rines | do daz geschehen was

der kvenech bat noch beliben | daz sin vil schoene wip

si trvote noch des nahtes | den sinen waetlichen lip

1516

pvsvnen floytiern | hvp sich des morgens frv

dar si varn solden | da bereiten si sich zv

swer liep heten arme | der trvote frivndes lip

des schet sit vil mit leide | des kvnech ecelen wip

1517

div chint der schoenen vten | di heten einen man

chvene vnd getriwe | do si wolden dan

do sagt er dem kvenege | tovgen sinen mvt

er sprach des mvoz ich trvren | daz ir di hovereise tvt

1518

er was geheizen rvmolt | vnd was ein helt cer hant

er sprach wem welt ir lazen | livte vnd ovch div lant

daz niemen chan erwenden | iv recken iwern mvt

div criemhilden maere | nie gedvhten mich gvt

1519

daz lant si dir bevolhen | vnt min kindelin

vnt diene wol den vrowen | daz ist der wille min

swen dv sehest weinen | dem troeste sinen lip

ia ne getvt vns nimmer | des kvenech eceln wip

1520

div ross bereitet waren | den kvenegen vnd ir man

mit minnechlichem chvessen | schiet vil maniger dan

dem in hohem mvte | lebte da der lip

daz mvose sit beweinen | vil manich waetlichez wip

1521

do man di snellen recken | cen rossen sah gan

do chos man vil der vrowen | trvrechlichen stan

daz ir vil langenz scheiden | sagt in vil wol ir mvt

vf grozen schaden ce chomene | daz herce niemen sanfte tvt

1522

di snellen bvergonden | sich vz hvoben

do wart in dem lande | ein miche voben

beidenthalp der berge | weinte wip vnd man

swi dort ir volch getaete | si fvren vroeliche dan

1523

di nibelvnges helde | chomen mit in dan

in tvsent halspergen | ce hvs si heten lan

vil manige schoene vrowen | di gesahen si nimmer me

di sifrides wunden | taten criemhilde we

1524

do sicheten si ir reise | gegen dem mevne dan

vf dvrch ostervranchen | di gventheres man

dar leite si do hagene | dem was ez wol bechant

ir marschalk was danchwart | der helt von bvergonden lant

1525

do si von ostervranchen | gegen salvelde ritten

do mohte man si chiesen | an herlichen siten

di fversten vnt ir mage | di helde lobesam

an dem zwelften morgen | der kvenich an di tvnowe quam

1526

do reit von tronege hagen | zaller vorderost

er was den nibelvngen | ein helflicher trost

do derbeizte der degen chvene | nider vf den sant

sin ross er harte balde | zv zeinem bovme gebant

1527

daz wazzer was engozen | div sciff verborgen

ez ergie den nibelvngen | ze grozen sorgen

wi si chomen vebere | der wach was in ze breit

do erbeizte zv der erden | vil manich ritter gemeit

1528

leide sprach do hagene | mach dir wol hi geschehen

voget von dem rine | nv maht dv selbe sehen

daz wazer ist engozen | vil starch ist im sin flvot

ia waene wir verliesen | noch hivte hie manigen helt gvt

1529

waz wizet ir mir hagene | sprach der kvenech her

dvrh iwer selbes tvgende | vntroestet vns niht mer

den fvrt svlt ir vns svchen | hinveber an daz lant

daz wir von hinnen bringen | beidiv ross vnt ovch gewant

1530

ian ist mir sprach hagene | min leben niht so leit

daz ich mich welle ertrenchen | in disen venden breit

e sol von minen handen | ersterben manich man

in ecelen landen | des ich vil gvten willen han

1531

belibet bi dem wazer | ir stolzen ritter gvt

ich wil di vergen svchen | selbe bi der flvot

di vns bringen vebere | in gelfrates lant

do nam der starche hagene | sinen gvten schildes rant

1532

er was vil wol gewaffent | den schilt er dannen trvch

sinen helm vf gebvnden | lieht was er genvch

do trvg er ob der brvenne | ein waffen also breit

daz ce beden eken | harte vreislichen sneit

1533

do svcht er nah den vergen | wider vnd dan

er horte wazer giezen | losen er began

in einem schoenem brvnnen | daz taten wisiv wip

di wolden sih da chvelen | vnd badeten ir lip

1534

hagen wart innen | er sleich in tovgen nach

do si daz versvnnen | do wart in dannen gach

daz si im entrvnnen | des waren si vil her

er nam in ir gewaete | der helt en schadete in niht mer

1535

do sprach daz eine merewib | hadebvrch was si genant

edel ritter hagene | wir tvon iv hie bechant

swenne ir vns degen chvene | gebet wider vnser wat

wi iv ze den hivnen | disiv hovereise ergat

1536

si swebten sam di vogele | vor im vf der flvt

des dvhten in ir sinne | starch vnd gvt

swaz si im sagen wolden | er gelovbtez deste baz

des er do hin zin gerte | vil wol bescheideten si im daz

1537

si sprach ir mvegt wol riten | in eceln lant

des setze ich iv ce bvergen | mine triwe hi ce hant

daz helde nie gefvoren | in deheiniv riche baz

nach also grozen eren | nv gelovbet waerliche daz

1538

der rede was do hagene | in sinem hercen her

do gap er in ir chleider | vnd svmte sich niht mer

do si do angeliten | ir wunderlich gewant

do sagten si im rehte | di reise in ecelen lant

1539

do sprach daz ander merewip | div hiez sigelint

ich wil dich warnen hagen | daz aldrianes chint

dvrh der waete liebe | hat min mvome dir gelogen

chvemestv hin cen hivnen | so bistv sere betrogen

1540

ia soltv cheren widere | daz ist dir an der zit

wand ir helde chvene | also geladet sit

daz ir sterben mvezet | in eceln lant

swelhe dar geritent | di habent den tot an der hant

1541

do sprach aber hagene | ir trieget ane not

wi moehtez sich gefvegen | daz wir alle tot

solden da beliben | dvrh iemens haz

si begonden im div maere | sagen chventlicher baz

1542

do sprach aber div eine | ez mvz also wesen

daz iwer deheiner | chan da niht genesen

niwan des chveneges kappelan | daz ist vns wol bechant

der chvemet gesvnt widere | in daz gventheres lant

1543

do sprach in grimmem mvote | der chvene hagene

daz waere minen herren | mvelich ce sagene

daz wir alle cen hivnen | solden vliesen den lip

noch zeige vns vberz wazer | daz allerwiseste wip

1544

si sprach sit dv der verte | niht welles haben rat

swa obene bi dem wazer | ein herberge stat

da inne ist ein verge | vnd niender anderswa

der maere der er vragte | der gelovbet er sich da

1545

dem vngemvotem rechen | sprach div eine nach

nv bitet noch her hagene | ia ist iv gar ze gach

vernemet noch div maere | wir chvmet veber sant

dirre marcherre | der ist else genant

1546

sin brvoder ist geheizen | der degen gelfprat

ein herre in beyerlande | wi mvelich ez iv stat

welt ir dvrh sine marche | ir svlt ivh wol bewarn

vnd svlt ovch mit dem vergen | vil bescheidenliche varn

1547

der ist so grimmes mvotes | er lat ivch niht genesen

ir en welt bi dem helde | mit gvoten sinnen wesen

welt ir daz vber er ivh fvere | so gebet im den solt

er hvetet disses landes | vnt ist gelpfrade holt

1548

vnde chvom er niht bezite | so rvffet veber flvt

vnt ieht ir heizet amelrich | der was ein helt gvt

der dvrch fientschepfte | rvomte dizze lant

so chvmt iv der verge | swenne im der nam wirt genant

1549

der vebermvte hagene | der vrowen do neich

ern redete niht mere | wan daz er vaste sweich

do gie er bi dem wazer | fver sich an den sant

da er anderthalben | ein herberge vant

1550

er begonde vaste | rvoffen hin veber den flvt

nv hol mich hi verge | sprach der degen gvt

so gip ich dir ce miete | einen bovch von golde rot

ia ist mir dirre verte | daz wizest waerliche not

1551

der verge was so riche | daz im niht dienen zam

davon er lon vil selten | von iemen da genam

ovch waren sine chnehte | vil harte hohgemvt

noh stvnt allez hagen | eine disehalp der flvt

1552

do rvffte er mit der chreffte | daz al der wag erdoz

wan des heldes sterche | was michel vnd groz

nv hol mich amelrichen | ich pin der elsn man

der dvrch starche fintschaft | disem lande entran

1553

vil hohe an dem swerte | einen bovch er im bot

lieht vnd schoene | was er von golde rot

daz man in veber fvrte | in gelpfrades lant

der vebermvte verge | nam selb daz rvder an di hant

1554

ovch was der selb verge | nivlich gehit

div gvf nach grozem gvte | vil boese ende git

do wold er verdienen | daz hagenen golt so rot

des leid er von dem degene | den swertgrimmigen tot

1555

der verge ilte genote | hinvber an den sant

do zvrnde er ernslichen | als er hagenen sach

vil harte grimmechlich | er zv dem degen sprach

1556

ir mvget wol sin geheizen | benamen amelrich

des ich mich hie verwaene | dem sit ir vngelich

von vater vnd von mvter | was er der brvder min

nv ir mich betrogen habt | ir mvezet disehalp sin

1557

nein dvrch got den richen | sprach do hagene

ich bin ein recke vremde | vnt sorge vff degene

nv nemet hin vrivntliche | hivte minen solt

daz ir mich vberfvret | ich pin iv waerlichen holt

1558

do sprach abe der verge | des mach niht gesin

ez habent fiande | di lieben herren min

darvmbe ich niemen vremden | fvere in diz lant

so liebe dir si ce lebene | so trit vil balde vz an den sant

1559

vnt fvret vns veber tvsent ross | vnt also manigen man

nemet von mir ce minne | diz golt vil gvt

nv ne tvt es niht sprach hagene | wan trvrech ist min mvt

do sprach der grimme verge | ez wirdet nimmer getan

1560

er hvp ein starchez rvder | michel vnd breit

er slvch vf hagenen | des wart er vngemeit

daz er in dem schiffe | strvchte an siniv chnie

so rehte grimmer verge | der chom dem tronegaer nie

1561

do wolde er baz erzvrnen | den vbermvten gast

er slvch im einen schalten | daz div gar cerbrast

hagen vber daz hovbet | er was ein starcher man

davon der elsen verge | grozen schaden da gewan

1562

mit grimmegem mvte | greif hagen zehant

vil balde ze siner scheiden | da er ein waffen vant

er slvch im ab daz hovbet | vnd varf ez an den grvnt

div maere wurden schiere | den stolzen bvrgonden chvnt

1563

in den selben stvnden | do er den schifman slvch

daz shiff daz vloz en owe | daz was im leit genvch

e erz gerihte widere | mveden er began

do zoh vil crefftechliche | des chvenech gventheres man

1564

mit zvegen harte swinden | chert ez der gast

vnz im daz starche rvder | in der hende brast

er wolde zv den recken | vz an einen sant

da was deheinez mere | hey wi schier erz da gebant

1565

mit einem shiltvezel | daz was ein porte smal

gegen einem walde | chert er hin ze tal

do vant er sinen herren | an dem stade stan

do gie im hin engegen | vil manich waetlicher man

1566

mit grvoze in wol enpfiengen | di snellen ritter gvt

do sahens in dem shiffe | riechen daz blvt

von einer starchen wunden | di er dem vergen slvch

do wart von den degenen | gevraget hagen genvch

1567

do der kvenich gventher | daz heize blvt ersach

sweben in dem shiffe | wi balde er do sprach

wan sagt ir mir hagene | war ist der verge chomen

iwer starchez ellen | ich waen im daz leben hat benomen

1568

do sprach er lovgenliche | da ich daz shif da vant

bi den wilden widen | da lost ez min hant

ich han deheinen vergen | hivte hie gesehen

ez ist ovch niemen leide | von minen shvlden hi geschehen

1569

do sprach von bvrgonden | der herre gernot

hivte mvz ich sorgen | vf lieber frivnde tot

sit wir der shifflivte | bereite nine han

wi wir chvmen veber | des mvz ich trvrende stan

1570

vil lvte rieff do hagene | leit nider vf daz gras

ir chnehte div gereite | ich gedenche daz ich was

der allerbeste verge | den man bi dem rine vant

ia getruwe ich ivch wol bringen | hinveber in gelpfrades lant

1571

daz si dester balder | choemen veber flvt

div ross si anslvgen | daz swimmen daz wart gvt

wand in div starch vende | deheinez da benam

etelichez owete verre | als ez mveden began

1572

do trvgen si cem sheffe | ir golt vnd ovh ir wat

sit daz si der verte | niht mohten haben rat

hagen was da meister | des fvrt er vff den sant

vil manegen richen recken | in daz vnchvnde lant

1573

zem ersten braht er veber | wol tvsent ritter her

darnach sine recken | dannoch was ir mer

nivn tvsent knehte | fvrt er an daz lant

des tages was vnmvezech | des tronegeres hant

1574

do er si wol gesvnde | brahte veber den flvt

do gedahte vremder maere | der snelle degen gvt

div im e da sageten | div wilden merwip

des het des chvneges kapelan | nach verlorn sinen lip

1575

bi dem kappelsavme | er den pfaffen vant

ob dem heilchtvme | er leinte an siner hant

des moht er niht genizen | do in hagen sach

der gotes arme priester | mvose liden vngemach

1576

er swang in vz dem shiffe | darzv wart im gach

do rieffen ir genvge | nv vaha herre vach

giselher der ivnge | zvernen erz began

ern wold iz doh niht lazzen | ir deheinen vnderstan

1577

do sprach von bvrgonden | der herre gernot

waz hilffet ivh nv hagene | des kappelanes tot

taet ez ander iemen | daz sold iv wesen leit

vmbe welhe shvlde | habt ir dem priester widerseit

1578

der pfaffe swam genote | er wolde sin genesen

ob im iemen hvelfe | des mohte da niht wesen

wan der starche hagene | vil zornech was gemvt

er stiez in zv dem grvnde | daz dvhte niemene gvt

1579

do der arme pfaffe | der helfe nine sach

do chert er wider vebere | des leid er vngemach

swi er niht swimmen chvnde | im half div gotes hant

daz er wol chom gesvnder | hin wider vz an daz lant

1580

do stvnt der arme priester | vnde schvtte sine wat

dabi sach wol hagen | saz sin niht waere rat

daz im fver war sageten | div wilden merewip

er dahte dise degen | mvezen verliesen den lip

1581

do si daz shif entlvden | vnd gar getrvgen dan

swaz darvf heten | der drier chvenege man

hagen slvch ez ce stvchen | vnd warf ez an den flvt

des het michel wunder | di recken chvene vnde gvt

1582

zwiv tvt ir daz brvder | so sprach danchwart

wi svl wir veber | so wir di widervart

riten von den hivnen | ze lande an den rin

sit do sagete in hagene | daz des chvnde niht gesin

1583

do sprach der helt von tronege | ich tvn iz vf den wan

ob wir an dirre reise | deheinen zagen han

der vns entrinnen welle | dvrch zaegeliche not

der mvz an disem waege | doch liden schameliche tot

1584

si fvrten mit in einen | vz bvrgonden lant

einen helt ce sinen handen | der was volker genant

der redete spaeheliche | allen sinen mvt

swaz ie begie der hagene | daz dvht den videlaere gvt

1585

ir ross bereitet waren | di sovmer wol geladen

si heten an der verte | noch deheinen schaden

genomen der si mvete | wan des kveneges chappelan

der mvse vffe sinen fvezen | hin wider zv dem rine gan