Der Nibelunge Nôt

14. Aventiure

___________________________________________________

Aventivre wie die chvniginne

mit ander zerwrfen

814

Vor einer vespercite | hovp sich groz vngemach

daz von manigem recken | vf dem hove geschach

si pflagen ritterschepfte | dvrch chvercewile wan

do lieffen dar dvrch schowen | vil manich wip vnde man

815

zesamene do gesazen | di kveneginne rich

si gedahten zweir recken | di waren lobelich

do sprach div schoene criemhilt | ich han einen man

daz elliv disiv riche | ce sinen handen solden stan

816

do sprach div vrov prvnnhilt | wi chvnde daz gesin

ob ander niemen lebte | wan sin vnde din

so mohten im div riche | wol wesen vndertan

di wile lebt gvnther | so chvnd ez nimmer ergan

817

do sprach aber criemhilt | nv sihestv wi er stat

wi rehte herliche er | vor den recken gat

alsam der liehte mane | vor den sternen tvt

des mvz ich von schvlden | tragen vrolichen mvt

818

do sprach div vrov prvnnhilt | swi waetlich si din man

swi edele vnt swi shoene | so mvst tv vor im lan

gvnther den recken | den edeln brvder din

der mvz vor allen chvenegen | daz wizest waerliche sin

819

do sprach do vrov criemhilt | so tiwer ist wol min man

daz ich in ane schvlde | niht gelobet han

an vil manegen dingen | so ist sin ere groz

gelovbestv des prvenhilt | er ist wol gvnthers genoz

820

ia ne solt dv mirz criemhilt | ce arge niht verstan

wand ich ane schvlde | di rede niht han getan

ich horte si iehen beide | do ichs allererste sach

vnd da des chveneges wille | an minem libe geschach

821

vnt da er mine minne | so ritterlich gewan

da iach des selbe sifrit | er waere skveneges man

des han ich in fver eigen | sit ich es in hoere iehen

dv sprach div shone criemhilt | so waere mir vebele geshaehen

822

wi heten so geworben | di edelen brvder min

daz ich eigenmannes | wine solde sin

des wil ich dich prvnnhilt | vil frivntliche bitten

daz dv di rede lazest | dvrch mich mit gvetlichen sitten

823

ia ne mach ir niht gelazen | sprach des chveneges wip

zwiv sold ich verchiesen | so maniges ritters lip

der vns mit dem degene | dienestlich ist vndertan

criemhilt div vil schone | vil sere zvernen began

824

dv mvst in verchiesen | daz er dir immer bi

wone deheiner dieneste | er ist tiwerr danre si

gvnther der min brvder | der vil edel man

dv solt mich des erlazen | daz ich von dir vernomen han

825

vnde nimet mich immer wunder | sit er din eigen ist

vnt daz vber vns beide | so gewaltech bist

daz er dir so lange | den cins versezzen hat

der diner vebermvete | sold ich von rehte haben rat

826

dv zivhest dich ce hohe | sprach des chveniges wip

nv wil ich saehen gerne | op man den dinen lip

habe ce solhen eren | so man den minen tvt

di vrowen wurden beide | vil sere zornech gemvt

827

do sprach div vrowe criemhilt | daz mvz et nv geschaehen

sit dv mines mannes | fvr eigen hast veriehen

nv mvezzen hivte chiesen | der beide chvenige man

op ich vor chveniges wibe | cem mvnster tvrre gan

828

dv mvst da hivte schowen | daz ich pin edelvri

vnt daz min man ist tiwerr | danne der dine si

damit wil ich selbe | niht bescholten sin

dv solt noch hinte chiesen | wi div eigene div din

829

ce hove ge vor recken | in bvergenden lant

ich wil selbe tiwerr wesen | danne iemen habe bechant

deheine chvneginne | div chron ie her getrvch

do hvp sich vnder den vrowen | des grozen nides genvch

830

do sprach aber prvnnhilt | wiltv niht eigen sin

so mvstv dich scheiden | mit den vrowen din

von minem ingesinde | da wir cem mvenster gan

des antwurte criemhilt | entriwen daz sol sin getan

831

nv chleidete ivch mine meide | sprach sifrides wip

ez mvz ane schande | beliben hie min lip

ir svlt wol lazen schowen | vnd habt ir riche wat

si mach sin gerne lovgen | des prvennhilt veriehen hat

832

man moht in lihte raten | si svchten richiv chleit

da wart vil wol gecieret | manich vrowe vnde meit

do gi mit ir gesinde | des edelen chveniges wip

do wart ovch wol gecieret | der schonen criemhilden wip

833

mit drin vnd vierzech meiden | di brahte si an den rin

di trvgen liehte pfelle | geworht in araby

svs chomen zv dem mvenster | di meide wolgetan

ir warten vor dem hvse | alle sifrides man

834

di livte nam des wunder | wavon daz gesach

daz man di chveneginne | also gescheiden sach

daz si bi einander | niht giengen alsam e

davon wart manigem degene | sit vil sorchlichen we

835

hie stvnt vor dem mvenster | daz gvntheres wip

do hete chvrcewile | vil maniges ritters lip

mit den schoenen vrowen | der si da namen war

do chom div vrov criemhilt | mit maniger herlichen schar

836

swaz chleider ie getrvgen | edeler ritter chint

wider ir gesinde | daz was gar ein wint

si was so rich des gvtes | daz drizech kvenige wip

ez mohten niht erzivgen | daz taete criemhilde lip

837

ob iemen wuenshen solde | der chvnde niht gesagen

daz man so richiv chleider | gesaehe ie mere tragen

also da ce stvnden trvgen | ir meide wolgetan

wan ce leide prvennhilde | ez hete criemhilt verlan

838

zesamne si do chomen | vor dem mvenster wit

ez tet div hvsvrowe | dvrch einen grozzen nit

si hiez vil vebelliche | criemhilde stille stan

ia sol vor chveniges wibe | nimmer eigendiv gegan

839

do sprach div schone criemhilt | zornech was ir mvt

chvndestv noch geswigen | daz waere dir gvt

dv hast geshendet selbe | den dinen schoenen lip

wi mohte mannes chebse | werden immer chveniges wip

840

wen hastv hie verschebset | sprach do des chveniges wip

daz tvn ich sprach criemhilt | den dinen schoenen lip

den minnet erste sifrit | der min vil lieber man

ia ne was ez niht min brvder | der dir den magetvm angewan

841

war chomen dine sinne | ez was ein arger list

zwiv lieze dv in minnen | sit er din eigen ist

ich hoere dich sprach criemhilt | an alle schvlde chlagen

entriwen sprach do prvennhilt | daz wil ich gvnthere sagen

842

waz mach mir daz gewerren | din vebermvt dich hat betrogen

dv hast mich ce dieneste | mit rede dich angezogen

daz wizze en rehten triwen | ez ist mir immer leit

getriwer heinliche | sol ich dir wesen vmbereit

843

prvnnhilt do weinende | criemhilt niht langer lie

vor des chvniges wibe | inz mvenster si do gie

mit ir ingesinde | daz hvp sich grozer haz

des wurden ir liehtiv ovgen | vil starche trveb vnd naz

844

swi vil man gote gediende | oder iemen da gesanch

des dvhte prvnnhilde | div wile gar ce lanch

wand ir was vil trvebe | der lip vnd ovch der mvt

des mvose sit engelten | manich helt chven vnd gvt

845

prvnnhilt gi mit ir vrowen | fver daz mvenster stan

si gedahte mich mvz criemhilt | mere horen lan

des mich so lvte zihet | daz wortreze wip

hat er sich es gervemet | ez get an sifrides lip

846

nv chom div edele criemhilt | mit manigem chvenem man

do sprach div vrowe prvnnhilt | ir svlt noch stille stan

ir iahet min ce chebesen | daz svlt ir mich lazen sehen

mir ist von iwern sprvchen | daz wizzet leide geschehen

847

do sprach div vrowe criemhilt | ir mohtet mich lazen gan

ich erzivge ez mit dem golde | daz ich an der hende han

daz brahte mir min vriedel | do er erste bi mir lach

ni gelebte prvnnhilt | deheinen leidern tach

848

si sprach diz golt vil edele | daz wart mir verstoln

vnd ist mich harte lange | vil veble vor verholn

ich chvmes an ein ende | wer mir ez hat genomen

di vrowen waren beide | in groz vngemvete chomen

849

do sprach aber criemhilt | ine wils niht wesen diep

dv mohtes wol gedaht han | vnd were dir ere lip

ich erzivgez mit dem gvertel | den ich hie vmbe han

daz ich niht livge | ia wart min sifrit din man

850

von ninnive der siden | si den porten trvch

mit edelem gesteine | ia was er gvt genvch

do den gesach vrov prvnnhilt | weinen si began

daz mvsen vreischen gvnther | vnd alle bvergvnden man

851

do sprach div chvneginne | heizet here gan

den fvrsten vonme rine | ich wil in hoeren lan

wi mich hat gehoenet | siner swester lip

si sagt hie offenliche | ich si sifrides wip

852

der kvenich chom mit recken | weinen er do sach

di sine trivttinne | wi gvetlich er sprach

sagt mir liebiv vrowe | wer hat iv iht getan

si sprach zv dem kvenige | ich mvz vnvroeliche stan

853

von allen minen eren | mich div swester din

gerne wolde scheiden | dir sol gechlaget sin

si ght mich habe gechebset | sifrit ir man

do sprach der chvenech gvnther | so hetes vebele getan

854

si treit hie minen gvrtel | den ich han verlorn

vnd min golt daz rote | daz ich ie wart geborn

daz riwet mich vil sere | dv ne beredest chvenich mich

der vil grozen schande | daz diene ich chvenech immer vmbe dich

855

do sprach der chvenich gvnther | er sol her fver gan

vnd hat er sis gervemet | daz sol er hoeren lan

oder sin mvz lovgen | der helt von niderlant

den criemhilde vriedel | den hiez man bringen sa cehant

856

do der herre sifrit | di vngemveten sach

ern wesse niht der maere | wi balde er do sprach

waz weinent dise vrowen | daz het ich gerne erchant

oder von welhen schvlden | mich der chvnich habe besant

857

do sprach der chvenich gvnther | ia ist mir harte leit

mir hat min vrowe prvnnhilt | ein maere hie geseit

dv habes dich des gervemet | daz dv ir schoenen lip

allererst habes geminnet | daz sagt criemhilt din wip

858

do sprach der starche sifrit | vnd hat si daz geseit

e daz ich erwinde | ez sol ir werden leit

vnd wil dir daz enpfveren | vor allen dinen man

mit minen hohen eiden | daz ich es niht gesaget han

859

do sprach der chvnich von rine | daz soltv lazen sehen

den eit den dv da bivtest | vnt mach der hie geschehen

aller valschen dinge | der wil ich dich ledich lan

do hiez man zv dem ringe | di stolzen bvrgvnden stan

860

sifrit der vil chvene | cem eide bot di hant

do sprach der chvenich riche | mir ist so wol bechant

iwer groz vnschvlde | ich wil iv ledich lan

des ivch min swester zihet | daz ir des nine habt getan

861

do sprach aber sifrit | genivzzet es min wip

daz si hat betrevbt | den prvennhilde lip

daz ist mir sicherlichen | ane maze leit

do sahen zv zeinander | di gvten ritter gemeit

862

man sol vrowen ziehen | sprach sifrit der degen

daz si vppechliche sprveche | lazen vnder wegen

verbivtez dinem wibe | der minen tvn ich sam

ir grozen vngefvge | ich mich waerliche sham

863

mit rede was gescheiden | manich schoene wip

do trvret also sere | der prvnnhilde lip

daz ez barmen mvse | den gvntheres man

do chom von tronege hagene | zv siner vrowen gegan

864

er vragete waz ir waere | weinende er si vant

do sagte si im div maere | er lobt ir sa cehant

daz ez erarnen mvese | der criemhilde man

oder er wolde nimmer | darvmbe vrolich gestan

865

zv der rede chom do ortwin | vnt gernot

da di helde rieten | den sifrides tot

darzv chom ovch giselher | der edelen vten chint

do er ir rede gehorte | er sprach getriweliche sint

866

ir vil gvten recken | warvmbe tvt ir daz

ia ne gediente sifrit | nie alsolhen haz

daz er darvmbe solde | verliesen sinen lip

ia ist es harte lihte | darvmbe zvernent div wip

867

svln wir govche ziehen | sprach aber hagene

des habent vil lvecel ere | so gvte degene

daz er sich hat gervemet | der lieben vrowen min

darvmbe wil ich sterben | ez en ge im an daz leben sin

868

do sprach der chvenich selbe | ern hat vns niht getan

niwan gvt vnd ere | man sol in lebn lan

waz tovch ob ich dem recken | nv waere gaehaz

er was ie getriwe | vnd tet vil willechliche daz

869

do sprach von metzen | der degen ortwin

ia ne mach in niht gehelffen | div groze sterche sin

erlovbet mirz min herre | ich getv im leit

do heten im di helde | ane schvlde widerseit

870

sin gevolgete niemen | niwan daz hagen geriet

in allen citen gvnther | dem degene ob sifride

niht en lebte | so wurde im vndertan

vil der chvenege lande | der helt des trvren began

871

do liezen siz beliben | spiln man do sach

hey waz man starcher scheffte | vor dem mvnster brach

vor sifrides wibe | al zv dem sale dan

do waren in vmmvte | alle gvntheres man

872

der chvenich sprach lat beliben | den mortlichen zorn

er ist vns ce saelden | vnt ce eren geborn

ovch ist so grimme starch | der wundernchvne man

ob er sin innen wuerde | so torste in niemen bestan

873

nein er sprach do hagene | ir mvget wol stille dagen

ich getruwez heinliche | also wol angetragen

daz prvnnhilde weinen | sol im wesen leit

ia sol im von hagenen | immer wesen widerseit

874

do sprach der chvenich gvnther | wi mach daz ergan

des antwurte hagene | ich wilz ivch horen lan

wir heizen botten | zv zvns in diz lant

widersagen offenliche | di hie nimen sin bechant

875

so ieht ir vor den gesten | daz ir vnd iwer man

wellet herverten | also daz ist getan

so lobt er iv dar dienen | des vlivset er den lip

so ervar ich vns div maere | ab des chvnen recken wip

876

der chvenich gevolgete vbele | hagenen sinem man

di starchen vntriwe | begonden tragen an

e iemen daz erfvnde | di ritter vzerchorn

von zweier vrowen bagen wart | vil manich helt verlorn