Der Nibelunge Nôt

13. Aventiure

___________________________________________________

Aventivre wie chriemhilt mit ir man

zer hochgecite fvr

778

Alle ir vnmvze | di laze wir nv sin

vnde sagen wi vrowe criemhilt | vnt ovch ir magedin

gegen rine fvren | von nibelvnge lant

ni getrvgen moere | so manich riche gewant

779

vil der sovmschrine | man schiet zv den waegen

do reit mit sinen vrivnden | sifrit der daegen

vnd ovch div chvngeninne | dar si haeten vrevden wan

sit wart ez in allen | ce grozem leide getan

780

da heime si do liezen | sifrides chindelin

vnt svn criemhilde | daz mvs et also sin

von ir hovereise | im erstvnt michel ser

sin vater vnt sin mvter | gesach daz chindel nimmer mer

781

do reit ovch mit in dannen | der herre sigemunt

sold er rehte wizzen | wi ez nach der stvnt

cer hogecite ergienge | er hete ir niht gesehen

im chvnde ce lieben vrivnden | nimmer leider geschehen

782

di boten man fvr sande | di div maere sageten dar

do reit ovch in engegen | mit wunnechlicher shar

vil der voten vrivnde | vnt der gvntheres man

der wirt gegen sinen gesten | vil sere sich vlizen began

783

er gie zv prvnnhilt | da er di sitzen vant

wi enpfie et ivch min swester | do ir chomet in min lant

alsam sult ir enpfahen | daz sifrides wip

daz tvn ich von schvlden gerne | holt ist ir min lip

784

do sprach der kvenich riche | si chvment morgen vrv

welt ir si enpfahen | da griffet balde zv

daz wir ir in der bverge | niht erbiten hie

mir chomen in allen wilen | so rehte liebe geste nie

785

ir maegde vnt ir vrowen | hiez do sa cehant

svehen gvtev chleider | di besten di man vant

di ir ingesinde | vor gesten solden tragen

daz taten si doch gerne | daz mach man lihte gesagen

786

ovch ilten in do dienen | di gvntheres man

alle sine rechen | der wirt zv sich gewan

do reit div kveneginne | vil herliche dan

da wart vil michel grvezen | di liebe geste getan

787

mit wi getanen vrevden | man di geste enpfie

si dvhte daz vrov criemhilt | vrovn prvnnhilde nie

so rehte wol enpfienge | in bvergvnde lant

di si e niht gesahen | den wart vil hoher mvot erchant

788

nv was ovch chomen sifrit | mit den sinen man

man sach di helde wenden | wider vnde dan

des veldes allenthalben | mit vngefvegen scharn

dringen vnd stovben | chvnde da niemen bewarn

789

do der wirt des landes | sifride sach

vnt ovch sigemvnde | wi minnechlich er do sprach

nv sit mir groze willechomen | vnt al di vrivnde min

der iwer hovereise | svl wir hohgemvte sin

790

nv lon iv got sprach sigemvnt | der ere gernde man

sit daz ivch min svn sifrit | ce vrivnde gewan

do rieten mine sinne | daz ich ivch solde saehen

do sprach der chvnich gvnther | mir ist liebe daran geschehen

791

sifrit wart enpfangen | als im da wol gezam

mit vil grozen eren | was im da niemen gram

des half mit grozen zvehten | giselher vnt gernot

ich waene man ez gesten | noch nie so gvetlich erbot

792

do nahten zv einander | der zweir kvenege wip

da wart vil satel laere | manich schoener vrowen lip

wart von helde handen | erhaben vf daz gras

di vrowen gerne dienten | waz der vmmvezegen was

793

do giengen zv einander | div minnechlichen wip

des was in grozen vrevden | vil maniges ritters lip

daz ir beider grvezen | so schone wart getan

do sach man vil der rechen | bi ir ivnchvrowen stan

794

daz herliche gesinde | daz vie sich bi der hant

in zvehte groze nigen | des man vil da vant

vnd chvessen minnechlichen | von vrowen wolgetan

daz was liep ce saehene | gvnthers vnd sifrides man

795

si ne bitten da niht langer | si ritten zv der stat

der wirt daz sinen gesten | wol erceigen bat

daz man si gerne saehe | in bvrgvnden lant

vil manigen pvneiz richen | man vor den ivnchvrowen vant

796

vzer tronege hagene | vnt ovch ortwin

da si gewaldech waeren | daz taten si wol schin

swaz si gebieten wolden | daz torste man niht lan

von in wart michel dienest | den lieben gesten getan

797

vil schilde hort man hellen | da ce dem pvergetor

von stichen vnd von stoezen | lange habt dervor

der wirt mit sinen gesten | e si chomen drin

ia giench in div stvnde | mit grozer chverzwile hin

798

fver den palas richen | mit vrowen si do ritten

manegen pfellel spaehen | gvt vnd wol gesniten

sach man vber saetel | den vrowen wolgetan

allenthalben hangen | do chomen gvntheres man

799

di geste hiez man fveren | balde an ir gemach

vnder wilen blicken | man prvnnhilde sach

aan vrovn criemhilde | div schoene was genvch

ir varwe gegen dem golde | den glanz vil herlichen trvch

800

allenthalben schallen | ce wormez in der stat

horte manz gesinde | gvnther do bat

danchwarten sinen marshalch | daz ir solde pflegen

do begond er daz gesinde | harte gvetliche legen

801

darvze vnt ovch darinne | spisen man si lie

ia wart vremder geste | baz gepflegen nie

alles des si gerten | des was man in bereit

der chvenech der was so riche | daz da niemen niht wart verseit

802

man diente in vrivntliche | vnd an allen haz

der wirt do ce tissche | mit sinen gesten saz

man bat sifride sitzen | als er het e getan

do gi mit im ce sedele | vil manich waetlicher man

803

wol zwelf hvndert recken | an dem ringe sin

da ce tissche sazen | prvnnhilt die chvnegin

gedaht daz eigenholde | niht richer chvnde wesin

si was im noch so waege | daz si in gerne lie genaesin

804

an einem abende | da der chvenech saz

vil der richen chleider | wart von wine naz

da si schenchen solden | zv den tisschen gan

da wart vil voller dienest | mit grozem vlize getan

805

so man ce hohziten | lange hat gepflegen

vrowen vnt maegde | di hiez man schone legen

von swannen si dar chomen | der wirt in willen trvch

mit gvtlichen eren | man gap in allen genvch

806

do div naht het ende | vnt der tach ershein

vz den sovmshrinen | vil manich edelstein

erlvht in gvter waete | di rvorte vrowen hant

do wart dar fver gesvchet | vil manich herlich gewant

807

e daz vol ertagete | do chomen fver den sal

vil ritter vnde chnehte | do hvp sich aber der shal

vor einer vrvemesse | di man dem chvenige sanch

da ritten ivnge helde | daz sin der chvenech sagete danch

808

vil crepfteliche lvte | manich pvsvn erdoz

von trvmben vnt von floyten | wart der shal so groz

daz wormez div vil wite | darnach lvt ershal

di hohgemvten helde | ce rossen chomen veberal

809

do hvp sich in dem lande | vil harte hohe ein spil

von manigem gvtem rechen | der sah man da vil

den ir tvmbiv herce | gaben hohen mvt

da sah man vnder shilde | vil manigen cieren ritter gvt

810

in div venster sazen | div herlichiv wip

vnd vil der schoenen maegede | gecieret was ir lip

si sahen chverzewile | von manigem chvenem man

der wirt mit sinen vrivnden | selbe riten began

811

svs vertriben si di wile | div dvhte niht lanch

man horte da cem tvome | maniger gloken clanch

do chomen in di moere | di vrowen ritten dan

den edelen chveneginnen | den volgete manech chvene man

812

si stvnden vor dem mvenster | nider vf daz gras

prvnnhilt ir gesten | dannoch vil waege was

si giengen vnder crone | in daz mvenster wit

div liebe wart sit gesheiden | daz frvmte grozlicher nit

813

do si gehorten messe | si fvren wider dan

mit vil manigen eren | man sach sider gan

ce tissche vroliche | ir vrevde nie gelach

da cer hohgecite | vnz an den einlefften tach