Der Nibelunge Nôt

5. Aventiure

___________________________________________________

Aventivre wie sivrit

chriemhilt alreste ersach

265

Man sach si taegelichen | nv riten an den rin

die cer hohgecite | gerne wolden sin

di dvrch des kvneges liebe | chomn in daz lant

den bot man svemelichen | ross vnt herlich gewant

266

in was ir gesidele | allen wol bereit

den hoehsten vnt den besten | als vns daz ist geseit

zwein vnt drizech fvrsten | da cer hohgecit

da cierten sich engegene | di scoenen frovwen wider strit

267

ez was da vil vnmvezech | giselher daz chint

di geste mit den chvnden | vil gvetelich sint

di enpfieng er vnd gernot | vnt ovch ir beider man

ia grvozten si di degene | als ez nach ern was getan

268

vil goltroter saetele | si fvorten in daz lant

zierliche scilde | vnt herlich gewant

brahten si ze rine | zvo der hohgecit

manegen vngesvnden | sah man vroelichen sit

269

die in den betten lagen | vnt heten wunden not

di mvosen des vergezzen | wi herte was der tot

di siechen vngesvnden | mvosen si verchlagn

si vrevten sich der maere | gein der hohgecite tagn

270

wie si lebn wolden | da cer wirtscaft

wunne ane maze | mit vrevden vberchraft

heten al die livte | swaz man ir da vant

des hvop sich michel vrevde | vber al daz gvnthers lant

271

an einem pfinxtmorgen | sah man fvere gan

gechleidet wunnechliche | vil manegen chvenen man

fvnf tvsent oder mere | da cer hohgecit

sich hvop div chvrcewile | an manegem ende wider strit

272

der wirt der hete di sinne | im was daz wol erchant

wi rehte hercenliche | der helt von niderlant

sine swester trvote | swi er si niene gesach

der man so grozer scoene | vor allen ivnchfrovwen iach

273

do sprach zvo dem kvnege | der degen oertwin

welt ir mit vollen eren | cer hohgecite sin

so svlt ir lazen scovwen | div wunnechlichen kint

di mit so grozen eren | hie cen bvrgonden sint

274

waz waere mannes wuenne | des vrevte sich sin lip

ez en taeten scoene maegede | vnt herlichiv wip

lazet iwer swester | fver iwer geste gan

der rat der was ce liebe | manegem helde getan

275

des wil ich gerne volgen | sprach der kvnech do

alle di ez erfvnden | di warens harte vro

ernbot ez frovwen voten | vnt ir tohter wolgetan

daz si mit ir mageden | hin ce hove solden gan

276

do wart vz den schrinen | gesvochet gvot gewant

swaz man in der valde | der edelen waete vant

di bovge mit den porten | des was in vil bereit

sich cierte flizechliche | vil manech waetlichiv meit

277

vil manech reche tvmber | des tages hete mvot

daz er an ce sehene | den frovwen waere gvot

daz er dafver niht naeme | eins richen kvneges lant

si sahen di vil gerne | di si nie heten bechant

278

do hiez der kvnec riche | mit siner swester gan

di ir dienen solden | wol hvndert siner man

ir vnt siner mage | di trvogen swert enhant

daz was daz hovegesinde | von der bvrgonden lant

279

voten di vil richen | di sach man mit ir chomn

div hete scoene vrovwen | gesellechlich genomn

wol hvndert oder mere | di trvogen richiv chleit

ovch gie danach ir tohter | vil manech waetlichiv meit

280

von einer chemenaten | sah man si alle gan

do wart vil michel dringen | von heldn dar getan

di des gedingen heten | ob chvnde daz gescehn

daz si di maget edele | solden vroeliche sehn

281

nv gie div minnecliche | also der morgenrot

tvot vz den trveben wolchen | da sciet von maneger not

der si da trvog in hercen | vnt lange het getan

er sach di minnechlichen | nv vil herlichen stan

282

ja lvhte ir von ir waete | vil manech edelstein

ir rosenrotiv varwe | vil minnechlen scein

ob iemem wunscen solde | der chvnde niht geiehn

daz er ce dirre werelde | het iht scoeners gesehn

283

sam der liehte mane | vor den sternen stat

der scin so lvoterliche | ab den wolchen gat

dem stvont si nv geliche | vor maneger frovwen gvot

des wart da wol gehoehet | den zieren helden der mvot

284

die richen chameraere | sah man vor ir gan

di hohgemvoten degene | die ne wolden daz niht lan

si ne drvngen da si sahen | die minechlichen meit

sivride dem herrn | wart beide lieb vnd leit

285

er daht in sinem mvote | wi chvnde daz ergan

daz ich dich minnen solde | daz ist ein tvmber wan

sol aber ich dich vremeden | so waere ich sanfter tot

er wart von den gedanchen | vil diche bleich vnd rot

286

do stvont so minnechliche | daz sigmvndes chint

sam er entworfen waere | an ein permint

von gvotes meisters listen | also man im iach

daz man helt deheinen | nie so scoenen gesach

287

die mit den frovwen giengen | di hiezen von den wegen

wichen allenthalben | daz leiste manech degen

div hohe tragenden hercen | vrevten manegen lip

man sach in hohen zvehten | manech herlichez wip

288

do sprach von bvrgonden | der herre gernot

der iv sinen dienest | so gvetlichen bot

gvnther vil lieber brvoder | dem svlt ir tvon alsam

vor allen disen rechen | des rates ich nimmer mich gescam

289

ir heizet sivride | zvo miner swester chvmn

daz in div maget grveze | des hab wir immer frvmn

div nie gegrvezte rechen | div sol in grvezen pflegn

damit wir habn gewunnen | den vil cierlichen degn

290

do giengens wirtes mage | da man den helt vant

si sprachen zvo dem rechen | vzer niderlant

iv hat der kvnech erlovbet | ir svlt ce hove gan

sin swester sol ivch grvezen | daz ist cen eren iv getan

291

der herre in sinem mvote | was des vil gemeit

do trvog er ime hercen | lieb ane leit

daz er sehen solde | der scoenen voten kint

mit minnechlichen tvgenden | si grvozte sivride sint

292

do si den hohgemvoten | vor ir stende sach

do erzvnde sich sin varwe | div scoene magt sprach

sit willechomn her sivrit | ein edel riter gvot

do wart im von dem grvoze | vil wol gehoehet der mvot

293

er neig ir flizechliche | bi der hende si in vie

wie rehte minnechliche | er bi der frovwen gie

mit lieben ovgenblichen | einander sahen an

der herre vnt ovch div frovwe | daz wart vil tovgenlich getan

294

wart iht da friwentliche | getwungen wiziv hant

von hercenlieber minne | daz ist mir niht bechant

doch en chan ich niht gelovbn | daz ez wurde lan

si het im holden willen | chvnt vil sciere getan

295

bi der svmmer cite | vnt gein des meien tagn

dorft er in sime hercen | nimmer mer getragn

so vil der hohen vrevde | denn er da gewan

do im div gie enhende | di er ce trvote wolde han

296

do gedahte manech reche | hey waer mir sam gescehen

daz ich ir gienge nebene | sam ich in han gesehen

oder bi ce ligene | daz liez ich ane haz

ez en gediente noch nie reche | nach einer kvneginne baz

297

von swelher chvnege lande | di geste chomn dar

di namen al geliche | niwan ir zweir war

ir wart erlovbet chvssen | den waetlichen man

im wart in al der werlde | nie so liebe getan

298

der kvnech von tenemarche | der sprach sa cestvnt

diss vil hohen grvozes | lit maneger vngesvnt

des ich vil wol enpfinde | von sivrides hant

got en laz in nimmer mere | chomn in miniv kvnges lant

299

man hiez do allenthalben | wichen von den wegn

der scoenen chrimhilde | manegen chvenen degn

sah man gezogenliche | cer chirchen mit ir gan

sit wart von ir gesceiden | der vil waetliche man

300

do gie si zvo dem mvenster | ir volgete manech wip

do was ovch so gecieret | der kvneginne lip

daz da hoher wunsche | vil maneger wart verlorn

si was da ce ovgenweide | vil manegem rechen erchorn

301

vil chvome erbeite sivrit | daz man da gesanch

er mohte sinen saelden | des immer sagen danch

daz im div was so waege | di er in hercen trvoch

ovch was er der scoenen | holt von scvlden genvoch

302

do si chom vz dem mvnster | sam er het e getan

man bat den degen chvenen | wider zvo zir gan

alrest begvnd im danchen | div minnechliche meit

daz er vor manegem helde | so rehte herlichen streit

303

nv lon iv got her sivrit | sprach daz vil scoene chint

daz ir daz habt verdienet | daz iv die rechen sint

so holt mit rehten triwen | als ich si hoere iehn

do begvnder minechliche | an frovn chrimhilden sehn

304

ich sol in immer dienen | also sprach der degn

vnt en wil min hovbet | nimmer e gelegn

ih en werbe nach ir willen | sol ich min lebn han

daz ist nach iwern hvlden | min frov chrimhilt getan

305

inre tagen zwelven | der tage al ieslich

sah man bi dem degene | di maget loblich

so si ce hove solde | vor ir vriwenden gan

der dienst wart dem rechen | dvrch groze liebe getan

306

vrevde vnt wunne | vil groezlichen scal

sah man aller taegelich | vor gvnthers sal

darvz vnt ovch darinne | von manegem chvenen man

oertwin vnt hagene | vil grozer wunder began

307

swes iemen pflegen wolde | des waren si bereit

mit vollechlicher maze | di helde vil gemeit

des wurden von den gesten | di rechen wol bechant

davon so was gezieret | allez gvntheres lant

308

die da wunde lagen | die sah man fver gan

si wolden chvrzwile | mit dem gesinde han

schirmen mit den scilden | vnt schiezen manegen scaft

des hvlfen in genvoge | si heten groezliche chraft

309

in der hohgecite | der wirt der hiez ir pflegn

mit der besten spise | er hete sich bewegn

aller slahte scande | di ie kvnech gewan

man sah in vriwentliche | zvo den sinen gesten gan

310

er sprach ir gvoten rechen | e daz ir sceidet hin

so nemt ir mine gabe | also stet min sin

daz ichz immer diene | versmahet iv niht min gvot

daz wil ich mit iv teilen | des han ich willigen mvot

311

die von tenemarche | di sprachen sa cehant

e daz wir wider riten | heim in vnser lant

wir gern staeter svone | des ist vns rechen not

wir han von iwern degenen | manegen liebn vriwent tot

312

livdegast geheilet | siner wunden was

der vogt von den sahsen | nach strite wol genas

eteliche toten | si liezen darn lant

do gie der kvnec gvnther | da er sivriden vant

313

er sprach zvo dem rechen | nv ratet wie ich tvo

di vnsern widerwinnen | die wellent riten frvo

vnd gerent staeter svone | an mich vnt mine man

nv rata degen sivrit | waz dich des dvnche gvot getan

314

waz mir die herren bieten | daz wil ich dir sagen

swaz fvnf hvndert moere | goldes moehten getragen

daz gebn si mir gerne | wold ich si ledech lan

do sprach der starche sivrit | daz waere vil vbele getan

315

ir svlt si ledechlichen | hinnen lazen varn

vnt daz di rechen edele | mere wol bewarn

vientlichez riten | her in iwer lant

des lat iv gebn sicherheit | hie der beider herrn hant

316

des rates wil ich volgen | damit si giengen dan

den sinen vianden | wart daz chvnt getan

ir goldes gerte niemn | daz si da bvten e

da heime ir lieben vriwenden | was nach den hermveden we

317

manege scilde volle | man dar scazes trvoch

er teiltes ane wage | den vriwenden sin genvoch

bi fvnf hvndert marchen | vnt etslichen baz

gernot der vil chvene | der riet gvnthere daz

318

vrlovp si alle namen | also si wolden dan

do sah man die geste | fver chrimhilde gan

vnt ovch da vrovwe vote | div kvneginne saz

ezn wart nie degen | noch mere gevrlovbet baz

319

die herberge wurden laere | do si von dannen ritten

noch bestvont da heime | mit herlichn siten

der kvnech mit sinen magen | vil manech edel man

di sah man taegeliche | zvo frovwen chrimhilde gan

320

vrlovp do nemen wolde | sivrit der helt gvot

er trvowete niht erwerben | des er da hete mvot

der kvnec daz sagen horte | daz er wolde dan

giselher der ivnge | in von der reise gar gewan

321

war woldet ir nv riten | vil edel sivrit

belibet bi den rechen | tvot des ich ivch bit

bi gvnthere dem kvnege | vnt ovch bi sinen man

hie ist vil scoener frovwen | di sol man ivch gerne sehen lan

322

do sprach der starche sivrit | div ross div lazet stan

ich wolde hinnen riten | des wil ich ab gan

vnt tragt ovch hin di schilde | ia wold ich in min lant

des hat mich her giselher | mit grozen triwen erwant

323

svss beleip der chvene | dvrch vriwende liebe da

ia waer er in den landen | ninder andrswa

gewesen also sanfte | davon daz gescach

daz er nv taegeliche | di scoenen chrimhilden sach

324

dvrch ir vnmazen scoene | der herre da beleip

mit maneger chvrzewile | man nv di zit vertreip

wan daz in twang ir minne | div gab im diche not

darvmbe sit der chvene | lach vil iaemerliche tot