Der Nibelunge Nôt

4. Aventiure

___________________________________________________

Aventivre wie sivrit

mit den sahsen streit

139

Nu nahten vremdiv maere | in gvnthers lant

von boten di in verre | wurden dar gesant

von vnchvnden rechen | di in trvogen haz

do si die rede vernamen | leit was in waerliche daz

140

die wil ich iv nennen | ez was livdeger

vzer sahsenlande | ein richer fvrste her

vnt ovch von tenemarche | der kvnec livdegast

die brahten in ir reise | vil manegn herlichn gast

141

ir boten chomn waren | in gvnthers lant

di sine widerwinnen | waren dar gesant

do vraget man der maere | di vnchvnden man

man hiez di boten balde | ce hove fvr den kvnec gan

142

der grvozte si vil scone | er sprach sit willechomn

wer ivch her hab gesendent | desn han ich niht vernomn

daz svlt ir lazen hoeren | sprach der kvnec gvot

do vorhten si vil sere | den grimmen gvnthers mvot

143

welt ir kvnec erlovben | daz wir iv maere sagn

div wir iv da bringen | so ne svl wir niht verdagn

wir nennen iv di herren | di vns her habent gesant

livdgast vnd livdger | di wellent svochen her enlant

144

ir habt ir zorn verdienet | ia horten wir wol daz

daz iv di herrn beide | tragent grozen haz

si wellent herverten | ce wormez an den rin

in hilfet vil der degene | daz wizzet vf di triwe min

145

inre zwelf wochen | div reise mvoz gescehn

habt ir iht gvoter friwende | daz lazet balde sehn

di iv vriden helfen | di bvrge vnt iwer lant

hie wirt von in verhovwen | vil manec helm vnd rant

146

oder welt ir mit in dingen | so enbietet ez in dar

so ne ritent iv so nahen | niht die manegen scar

der iwer starchen viende | vf hercenlichiv leit

davon verderben mvezen | vil gvote riter gemeit

147

nv bitet eine wile | sprach der kvnec gvot

vnz ich mich baz versinne | ich chvend iv minen mvot

han ich getriwer iemen | di ne sol ich niht verdagn

disiv starchen maere | sol ich minen friwenden chlagn

148

gvnthere dem vil richen | wart leide genvoch

di rede er tovgenlichen | in sime hercen trvoch

er hiez gewinnen hagenen | vnt ander sine man

vnt bat ovch harte balde | ce hove nach gernote gan

149

do chomen di bestn | swaz man der da vant

er sprach man wil vns svochen | her in vnser lant

mit starchen herverten | daz lat iv wesen leit

des antwurte gernot | ein riter chven vnt gemeit

150

daz wer et wir mit swerten | so sprach gernot

da sterbent wan di veigen | di lazen ligen tot

darvmb ich niht vergezen | mach der eren min

di vnsern viande | svln vns willechomn sin

151

do sprach von tronege hagne | daz en dvnchet mich niht gvot

livdgast vnt livdger | di tragent vbermvot

wir mvgen vns niht besenden | in so chvrcen tagn

so sprach der chvene reche | wan mvgt irz sivride sagn

152

die boten herbergen | hiez man in di stat

swie vient man in waere | vil scone ir pflegn bat

gvnther der riche | daz was wol getan

vnz er revant an friwenden | wer im da wolde gestan

153

dem kvnege in sinen sorgen | was idoch vil leit

do sah in trvorende | ein riter vil gemeit

der niht mohte wizzen | waz im was gescehen

do bat er im der maere | den kvnec gvnther veriehen

154

mich nimt des michel wunder | sprach do sivrit

wie habt ir so vercheret | di vroelichen sit

der ir mit vns nv lange | habt alher gepflegn

des antwurt im do gvnther | der vil cierliche degn

155

ia ne mag ich allen livten | di swaere niht gesagn

di ich mvoz tovgenliche | in mime hercen tragn

man sol staeten vriwenden | chlagen hercen not

div sivrides varwe | wart do bleich vnd rot

156

er sprach zvo dem kvnege | ine han iv niht verseit

ich sol iv helfen wenden | elliv iwer leit

welt ir vriwent svochen | der sol ich einer sin

vnt truowez wol volbringen | mit eren an daz ende min

157

nv lon iv got her sivrit | div rede dvnchet mich gvot

vnt ob mir nimmer helfe | iwer ellen getvot

ich frev mich doch der maere | daz ir mir sit so holt

leb ich decheine wile | ez wirdet vmb ivch wol versolt

158

ich wil ivch lazen hoeren | warvmb ich trvorec stan

von botn miner viende | ich daz vernomn han

daz si mich wellen svochen | mit herverten hie

daz getaten vns noch degene | her zvo disen landen nie

159

daz lat ivch ahten ringe | sprach do sivrit

vnt senftet iwerem mvote | tvot des ich ivch bit

lat mich iv erwerben | ere vnde frvmn

vnt bittet iwer degene | daz si iv ovch ce helfe chvmn

160

swenne iwer starchen viende | zir helfe moehten han

drizech tvsent degene | so wold ich si bestan

vnt het ich niwan tvsent | des lat ivch an mich

do sprach der kvnec gvnther | daz dien ich immer vm dich

161

so heizet mir gewinnen | tvsent iwer man

sit daz ich der minen | bi mir niht en han

niwan zwelf rechen | so wer ich iwer lant

iv sol mit triwen dienen | immer sivrids hant

162

des sol vns helfen hagne | vnt ovch oertwin

danchwart vnd sindolt | di liebn rechen din

ovch sol damit riten | volker der chvene man

der sol den vanen fveren | baz ichs niemn en gan

163

vnt lat di boten riten | heim in ir herrn lant

daz si vns sehen sciere | daz tvo man in bechant

so daz vnser bverge | mvezen vride han

do hiez der kvnec besenden | beide mage vnd man

164

die boten livdegers | ce hove giengen do

daz si ce lande solden | des waren si vil vro

do bot in riche gabe | gvnther der kvnec gvot

vnt scvof in sin geleite | des stvont in hohe der mvot

165

nv sagt sprach do gvnther | den starchen vienden min

si mvgen mit ir reise | wol da heime sin

welln aber si mich svochen | her in miniv lant

mirn cerinne miner vriwende | in wirt arbeit erchant

166

den boten riche gabe | man do fver trvoch

der het in ce gebene| gvnther genvoch

di ne torsten versprech | di livdgers man

do si vrlovp genamen | si schieden vroeliche dan

167

do di boten warn | ce tenemarche chomn

vnt der kvnec livdgast | hete daz vernomn

wie si von rine chomn | als im daz wart geseit

ir starchez vbermveten | daz was im waerlichen leit

168

si sagten daz si heten | vil manegen chvenen man

ovch sahen si darvnder | einen rechen stan

der was geheizen sivrit | ein helt vz niderlant

ez leidete livdegaste | als er daz maere rehte ervant

169

do di von tenemarche | dizze horten sagn

do ilten si der friwente | deste mer beiagn

vnz daz her livdegast | siner chvenen man

zweinzech tvsent degene | zvo siner reise gewan

170

do besant ovch sich von sachsen | der kvnec livdger

vnze si vierzech tvsent | heten vnde mer

mit den si wolden riten | in bvrgonden lant

do het ovch sich hie heime | der chvnech gvnther besant

171

mit den sinen magen | vnt siner brvoder man

die si wolden fveren | dvrch vrlivge dan

vnt ovch di hagenen rechen | des gie den helden not

darvmbe mvosen degene | sider chiesen den tot

172

si vlizzen sich der reise | do si wolden dan

den vanen mvose leiten | volker der chvene man

also si wolden riten | von wormez vber rin

hagene von tronege | der mvose scarmeister sin

173

damite reit ovch sindolt | vnd hvonolt

di wol gedienen chvnden | daz gvnthers golt

danchwart hagenen brvoder | vnt ovch oertwin

di mohten wol mit ern | in der herverte sin

174

her kvnec nv sit hie heime | sprach do sivrit

sit daz iwer rechen | mir wellent volgen mit

belibet bi den frovwen | vnt traget hohen mvot

ich truowe iv wol behveten | beidiv ere vnde gvot

175

die ivch da wolden svochen | ce wormez an den rin

daz wil ich wol behveten | si mvegen da heime sin

wir svlen in geriten | so nahen in ir lant

daz in ir vbermveten | werde in sorgn erwant

176

von rine si dvrch hessen | mit ir helden riten

gegen sahsenlande | da wart sit gestriten

mit rovbe vnt ovch mit brande | wuosten si daz lant

daz ez den fversten beiden | wart mit arbeit bechant

177

si chomen vf di marche | di chnehte zogten dan

sivrit der vil starche | vragen des began

wer sol des gesindes | vns nv hveten hie

ia ne wart den sahsen | geriten schedlicher nie

178

si sprachen lat di tvmben | hveten vf den wegn

den chvenen danchwarten | der ist ein sneller degn

wir vliesen deste minre | von livdgers man

lat in vnt oertewinen | hie di nahhvote han

179

so wil ich selbe riten | sprach sivrit der degen

vnt wil der warte | gegen den vienden pflegn

vnz ich rehte ervinde | wa di rechen sint

do wart gewafent sciere | der scoenen siglinden chint

180

daz volch bevalch er hagenen | do er wolde dan

vnt gernote | dem vil chvenen man

do reit er eine dannen | in der sahsen lant

des wart von im verhovwen | des tages manech helmbant

181

do sah er her daz groze | daz vf dem velde lach

daz wider siner helfe | mit vnfvoge wach

des was wol viercech tvsent | oder dannoch baz

sivrit in hohem mvote | sach vil vroeliche daz

182

do het ovch sich ein reche | gein den vienden dar

erhaben vf di warte | der was ce vlize gar

den sach der herre sivrit | vnt in der chvene man

ietweder do des andern | mit nide hveten began

183

ich sag iv wer der waere | der der warte pflach

ein liehter scilt von golde | im vor der hende lach

ez was der kvnec livdegast | der hvote siner schar

dirre gast vil edele | spranchte vil herlichen dar

184

nv het ovch in her livdgast | vientlich erchorn

ir ross si namen beide | cen siten mit den sporn

si neigten vf di scilde | di scefte mit ir chraft

des wart der kvnec riche | mit grozen sorgen behaft

185

div ross nach stiche trvogen | div richen kvnges kint

beide fvr einander | sam si waete ein wint

mit zovmen wart gewendet | vil riterliche dan

mit swerten ez versvochten | die zwene grimmige man

186

do slvoch der herre sivrit | daz al daz velt erdoz

do stovb vz dem helme | sam von brenden groz

die viwerroten vanchen | von des heldes hant

ir ietweder den sinen | an dem andern vant

187

ovch slvg im her livdgast | vil manegen grimmen slach

ir ietweders ellen | vf schilden vaste lach

do heten dar gehvetet | wol drizech siner man

e daz im di choemen | den sig doch sivrit gewan

188

mit drien starchen wunden | di er dem kvnge slvoch

dvrch eine wize brvnne | div was gvot genvoch

daz swert an sinen ekken | braht vz wunden blvot

des mvose der kvnec livdegast | habn trvorigen mvot

189

er bat sich lebn lazen | vnt bot im siniv lant

vnt sagt im daz er waere | livdegast genant

do chomen sine rechen | di heten wol gesehen

waz da von in beiden | vf der warte was gescehn

190

er wolde in fveren dannen | do wart er angerant

von drizech sinen mannen | do werte des heldes hant

sinen richen gisel | mit vngefvegen slegen

sit tet scaden mere | der vil zierliche degen

191

die drizech er ce tode | vil werliche slvoch

er liez ir lebn einen | balde er reit genvoch

vnt sagte hin div maere | waz hie was gescehen

ovch mohte mans der warheit | an sime rotem helme sehen

192

den von tenemarche | was vil grimme leit

ir herre was gevangen | do in daz wart geseit

man sagt ez sinem brvoder | toben er began

von vngefvegem zorne | wand im was leide getan

193

livdegast der reche | was gefveret dan

von sivrids gewalte | zvo gvnthers man

er bevalch in hagenen | do in daz wart geseit

daz ez der kvnech waere | do was in maezliche leit

194

man hiez den bvrgonden | ir vanen binden an

wol vf sprach sivrit | hie wirt mer getan

e sich der tach verende | sol ich habn den lip

daz mvot in sahsenlande | vil manech waetlichez wip

195

ir helde von dem rine | ir svlt min nemn war

ich chan ivch wol geleiten | in livdegers scar

so seht ir helme hovwen | von gvoter helde hant

e daz wir wider wenden | iv wirdet sorge bechant

196

cen rossen gahte gernot | vnt sine man

den vanen zvchte balde | der starche spileman

volker der herre | do reit er vor der scar

do was ovch daz gesinde | ce strite herlichen gar

197

si fvorten doch niht mere | niwan tvsent man

darvber zwelf rechen | stieben do began

di molten von den strazen | si riten vber lant

da sah man von in scinen | vil manegen herlichen rant

198

do waren ovch di sahsen | mit ir scharn chomn

mit swerten wol gewachsen | daz han ich sit vernomn

div swert div sniten sere | den helden an der hant

do wolden si den gestn | weren bverge vnd lant

199

der herrn scarmeister | daz volch do fvorte dan

do was ovch chomn sivrit | mit den sinen man

di er mit im brahte | vzer niderlant

des tages wart in stvrme | vil manech plvotigiv hant

200

sindolt vnd hvnolt | vnt ovch gernot

di slvogn in dem strite | vil manegen helt tot

e si daz reht erfvnden | wie chvene was ir lip

daz mvose sit beweinen | vil manech edel wip

201

volker vnd hagne | vnt ovch oertwin

di lascten ime strite | vil maneges helmes schin

mit vliezendem blvote | di stvormchvene man

da wart von danchwarte | vil michel wunder getan

202

die von tenemarche | versvochten wol ir hant

do horte man von hvrte | erdiezen manegen rant

vnt ovch von scaerpfen swerten | der man da vil geslvoch

di stritchvenen sahsen | taten scaden da genvoch

203

do di von bvrgonden | drvngen in den strit

von in wart erhovwen | vil manech wunde wit

do sah man vber saetele | fliezen daz blvot

svs wurben nach den eren | di riter chvene vnde gvot

204

man horte da lvote erhellen | den helden an der hant

div vil scarpfen wafen | do di von niderlant

drvngen nach ir herren | in di herten scar

si chomn degenliche | mit samt sivride dar

205

volgen der von rine | niemn man im sach

man mohte chiesen vliezen | den blvtigen bach

dvrch di liehten helme | von sivrids hant

vnz er livdegern | vor sinen hergesellen vant

206

dri widerchere | het er nv genomn

dvrch daz her anz ende | nv was hagene chomn

der half im wol ervollen | in stvorme sinen mvot

des tages mvose ersterben | vor in manech riter gvot

207

do der starche livdger | sivriden vant

vnt daz er alse hohe | trvog an siner hant

den gvoten balmvngen | vnt ir so manegen slvoch

des wart der herre zornech | vnt grimmich genvoch

208

do wart ein michel dringen | vnt grozer swerte chlanch

da ir ingesinde | zvo zeinander dranch

do versvochten sich di rechen | beide deste baz

di scar begvnden wichen | sich hvop da groezlicher haz

209

dem vogte von den sahsen | was daz wol geseit

sin brvoder was gevangen | daz was im harte leit

wol wesser daz ez taete | daz siglinde chint

man zeh ez gernote | vil wol ervant erz sint

210

di slege livdegers | di waren also starch

daz sivride vnder saetele | strvochte daz march

do sich daz ross erholte | der chvene sivrit

der gewan in dem stvrme | einen vreislichen sit

211

des half im wol hagene | vnt ovch gernot

danchwart vnt volker | des lag ir vil da tot

sindolt vnt hvnolt | vnt oertwin der degen

di chvnden in dem strite | cem tode manegen niderlegen

212

in stvrme vngesceiden | waren di fvrsten her

do sach man vber helme | vligen manegen ger

dvrch di liehten schilde | von der helde hant

man sah da var nach blvote | vil mangen herlichen rant

213

in dem starchen stvrme | erbeizte manech man

nider von den rossen | einander liefen an

sivrit der vil chvene | vnt ovch livdeger

man sach da scefte vliegen | vnd manegen scaerpfen ger

214

dvo flovch daz schiltgespenge | von sivrids hant

den sig gedaht erwerben | der helt von niderlant

an den chvenen sahsen | der man vil wunder sach

hei waz da liehter ringe | der chvene danchwart cebrach

215

do het der herre livdeger | vf eime schilde erchant

gemalet eine chrone | vor sivrids hant

wol wesser er daz ez waere | der chreftige man

der helt zvo sinen friwenden | do lvote rvefen began

216

gelovbet ivch des stvrmes | alle mine man

svn den sigmvndes | ich hie gesehn han

sivriden den starchen | han ich hie bechant

in hat der vbele tivuel | her cen sahsen gesant

217

die vanen hiez er lazen | in dem stvrme nider

vrides er do gerte | des werte man in sider

doch mvos er werden gisel | in gvnthers lant

daz het an im betwungen | des chvenen sivrides hant

218

mit gemeinem rate | so liezen si den strit

dvrchel vil der helme | vnd ovch der schilde wit

si leiten von den handen | swaz so man der vant

di trvogen blvotes varwe | von der bvrgonden hant

219

si viengen swen si wolden | des heten si gewalt

gernot vnd hagene | di rechen vil balt

die wunden hiezen baren | si fvorten mit in dan

gevangen zvo dem rine | fvnf hvndert werlicher man

220

die sigelosen rechen | ce tenemarche riten

do ne heten ovch di sahsen | so hohe niht gestriten

daz man in lobes iaehe | daz was den helden leit

do wurden ovch di veigen | von vriwenden sere gechleit

221

si hiezen daz gewafen | wider sovmen an den rin

ez hete wol geworben | mit den helden sin

sivrit der reche | der hetez gvot getan

des im iehen mvosen | alle gvnthers man

222

gegen wormez sande | der herre gernot

heim zvo sime lande | den friwenden er enbot

wie gelvngen waere | im vnt sinen man

ez heten die vil chvenen | wol nach ern getan

223

die garzvone liefen | von den wart ez geseit

da frevten sich vor liebe | di e da heten leit

dirre lieben maere | di in da waren chomn

da wart von edelen frovwen | michel vragen vernomn

224

wie gelvngen waere | des richen kvneges man

man hiez der boten einen | fver chrimilde gan

daz gescach vil tovgen | ia ne torstes vmber lvot

wan si hete darvnder | ir vil liebez hercentrvot

225

do si den boten chomende | zir chemenaten sach

chrimhilt div scoene | vil gvetlichen sprach

nv sag an liebiv maere | ia gib ich dir min golt

tvost dvz ane liegen | ich wil dir immer wesen holt

226

wie sciet vz dem strite | min brvoder gernot

vnt ander mine friwenden | ist vns iht maneger tot

oder wer tet da daz beste | daz solt dv mir sagn

do sprach der bote sciere | wir heten ninder cheinen zagn

227

ze ernste vnt ce strite | reit niemn also wol

vil edeliv kvneginne | sit ichz iv sagen sol

so der gast vil edele | vzer niderlant

da worhte michel wunder | des chvenen sivrides hant

228

swaz di rechen alle | in strite hant getan

danchwart vnt hagene | vnt ander skvneges man

swaz si striten nach ern | daz ist gar ein wint

vnz eine an sivriden | des kvnec sigmvnds kint

229

si frvmten in dem stvrme | der helde vil erslagn

doch moehte iv daz wunder | niemn wol gesagn

waz da worhte sivrit | swen er ce strite reit

den frovwen an ir magen | tet er div groezlichen leit

230

ovch mvoste da belibn | maneger frovwen trvt

sine slege man horte | vf helmen also lvt

daz si von wunden brahten | daz fliezende blvot

erst an allen tvgenden | ein riter chven vnde gvot

231

swaz da hat begangen | von mecen oertwin

swaz er ir moht erlangen | mit dem swerte sin

di mvosen wunt belibn | oder meistech tot

da tet iwer brvoder | die allergroezisten not

232

div immer in den stvermen | chvnde sin gescehn

man mvoz der warheite | den vzerwelten iehn

di stolcen bvrgonden | habent so gevaren

daz si vor allen scanden | ir ere chvnnen wol bewarn

233

man sach da vor ir handen | vil manegen satel bloz

da von liehten swerten | daz velt so lvote erdoz

di rechen von dem rine | di habent so geriten

daz ez ir vianden | waere bezer vermiten

234

die chvenen tronegaere | di frvmtn groziv leit

do mit volches chreften | daz her cesamne reit

da frvmte manegen toten | des chvenen hagenen hant

des vil ce sagene waere | her ce bvrgonden lant

235

sindolt vnt hvnolt | di gernotes man

vnt rvomolt der chvene | di hant so vil getan

daz ez livdegere | mag immer wesen leit

daz er den dinen magen | ze rine hete widerseit

236

strit den allerhoehsten | der inder da gescach

ce ivngest vnt cem ersten | den ieman gesach

den tet vil willechliche | div divrides hant

er bringet riche gisel | in daz gvnthers lant

237

die twanch mit sinen ellen | der waetliche man

des ovch der kvnec livdegast | mvoz den scaden han

vnt ovch von sahsenlande | sin brvoder livdeger

nv hoeret miniv maere | edeliv chvneginne her

238

si hat gevangen beide | div sivrids hant

nie so manegen gisel | man braht in dizze lant

so von sinen schvlden | nv chvmt an den rin

ir chvnden disiv maere | nimmer lieber sin

239

man bringet der gesvnden | fvnf hvndert oder baz

vnt der verchwunden | frovwe wizzet daz

wol ahtzech rote bare | her in vnser lant

di meistech hat verhovwen | des starchen sivrids hant

240

die dvrch vbermveten | widersagten an den rin

di mvezen nv gevangen | di gvnthers sin

die bringet man mit vrevden | her in dizze lant

do erblvete ir liehtiv varwe | do si div maer reht ervant

241

ir scoenez antlvzze | daz wart rosenrot

do mit liebe was gesceiden | vz der grozen not

der waetliche reche | sivrit der ivnge man

si frevte ovch sich ir friwende | daz was von scvlden getan

242

do sprach div minnechliche | dv hast mir wol geseit

dv solt habn darvmbe | ce miete richiv chleit

vnt zehen march von golde | die heiz ich dir tragn

des mach man soelhiv mere | richen frovwen gerne sagn

243

man gab im sine miete | daz golt vnt ovch div chleit

do gie an div venster | vil manec scoeniv meit

si warten vf di strazen | riten man do vant

vil der hochgemvoten | in der bvrgonden lant

244

da chomn die gesvnden | di wunden taten sam

si mohten grvezen hoeren | von friwenden ane scam

der wirt gein sinen gesten | vil vroeliche reit

mit vrevden was verendet | daz sin vil groezliche leit

245

do enpfie er wol di sine | die vremden tet er sam

wan dem richen kvnege | anders niht gezam

wan danchen gvetliche | den di im waren chomn

daz si den sig nah eren | in stvrme heten genomn

246

gvnther bat im maere | von sinen vriwenden sagn

wer im an der reise | ce tode waer erslagn

do het er vloren niemn | niwan sehzec man

verchlagen man di mvose | so sit nach helden was getan

247

die gesvnden brahten | cerhovwen manegen rant

von helme vil verscroten | in gvnthers lant

daz volch erbeizte nidere | fvr des kvnges sal

ce liebem antpfange | man horte vroelichen scal

248

do hiez man herbergen | di rechen in di stat

der chvnech siner geste | vil scone pflegen bat

er hiez der wunden hveten | vnt scaffen gvot gemach

wol man sine tvgende | an sinen vianden sach

249

er sprach ce livdegaste | nv sit mir willechomn

ich han von iwern scvlden | vil grozen scaden genomn

der wirt mir nv vergolten | ob ich gelvcke han

got lone minen vriwenden | si hant liebe getan

250

ir mvgt in gerne danchen | sprach do livdeger

also hoher gisel | gewan nie kvnec mer

vmbe scoene hvote | wir gebn michel gvot

daz ir genaedechliche | an iwern vianden tvot

251

ich wil ivch beide lazen | sprach er ledech gen

daz mine viande | hie bi mir besten

des wil ich habn pvergen | daz si miniv lant

iht rvemen ane hvlde | des bot livdeger di hant

252

man brahte si ce ruowe | vnt scvof in ir gemach

den wunden man gebettet | vil gvetlichen sach

man schancte den gesvnden | met vnt gvoten win

do chvnde daz gesinde | nimmer vroelicher sin

253

ir cerhovwen schilde | behalten man do trvoch

vil blvotiger saetele | der was da genvoch

di hiez man verbergen | da weinten niht div wip

da chom hermvede | maneges gvoten riters lip

254

der kvnec pflach siner geste | vil groezliche wol

der vremden vnt der chvnden | div lant waren vol

er bat der sere wunden | vil gvetliche pflegn

do was ir vbermveten | vil harte ringe gelegn

255

die ercenie chvnden | den bot man richen solt

silber ane wage | darzvo daz liehte golt

daz si die helde nerten | nach der strites not

darzvo der kvnec den gesten | gabe groezlichen bot

256

die wider heim ce hvse | heten reise mvot

di bat man noch beliben | also man vriwenden tvot

der kvnech do gie ce rate | wi er lonte sinen man

si heten sinen willen | nach grozen ern getan

257

do sprach der herre gernot | man sol si riten lan

vber sechs wochen | si in daz chvnt getan

daz si chomn widere | ce einer hohgecit

so ist ir maneger geheilet | der nv vil sere wunder lit

258

do gert ovch vrlovbes | sivrit von niderlant

do der kvnec gvnther | den willen sin ervant

er bat in minnechliche | noch bi im bestan

niwan dvrch sine swester scoene | so ne waer ez nimmer getan

259

darzvo was er ce riche | daz er iht naeme solt

er het daz wol verdienet | der kvnec was im holt

sam waren sine mage | di heten daz gesehn

waz von sinen chreften | in dem strite was gescehn

260

dvrch der scoenen willen | gedahter noch bestan

ob er si gesehen moehte | sit wart ez getan

wol nach sinen willen | wart im div maget bechant

sit reit er vroeliche | in daz sigmvnds lant

261

der wirt hiez ce allen citen | riterscefte pflegn

daz tet do willechlichen | vil manech ivnger degn

di wile hiez er sideln | vor wormez vf den sant

den di im chomn solden | zvo der bvrgonden lant

262

in den selbn citen | do si nv solden chomn

do het div scoene chrimhilt | div maere wol vernomn

er wolde hohgecite | dvrch liebe vriwende han

do wart vil michel vlizen | von scoenen frovwen getan

263

mit waete vnt mit gebende | daz si da solden tragen

vote div vil riche | div maere horte sagn

von den stolzen rechen | di da solden chomn

do wart vz der valde | vil richer chleider genomn

264

dvrch ir chinde liebe | hiez si bereiten chleit

damite wart gecieret | vil manec frovwe vnt manech meit

vnt vil der ivngen rechen | vz bvrgonden lant

ovch hiez si vil den vremden | prveuen herlich gewant