bibliotheca Augustana

BIBLIOTHECA AUGUSTANA

Konrad der Pfaffe

um 1170

	Das Rolandslied Verse 8000 - 9094
______________________________________________________________________________

8000	preciosa, preciosa! des komen si in groze not: si ilten alle inden grimmigen tot. So horen wir daz buoch sagen, Paligan were fraissam,
8005	sin gesune ware egeslich, sin gebarde were riterlich; sin marh gienc in sprungen, sam er ware iunger. do redeten alle sine man,
8010	Yspaniam scolt er uon rechte han. Do sprach der chuonc Paligan: «hete ich nu dehain man der reche minen anden! swer da blaset Oliuanten,
8015	der muot mich harte sere, ich hore iz ungerne.» der sun do den uater bat, daz er daz urlop gap daz er uor uachte,
8020	di scar zesamne brachte. uil gerne gewert er in des. er sprach: «lieber frunt Malprimes, la dirz wol beuolhen sin: diu ere wirdet elliu din.
8025	ich bin aín alt man. diu riche mache ich dir unter tan: nach minem tode so dinent dir alle chrone. nu uicht huite umbe alle din ere,
8030	ich nesage dir nicht mere.» Do uorderot der chuonc Paligan zwene uorderiste sine man. daz was Curlenes unt Clapamorses:
8035	«ich irkenne iwer ellen, min sun habet ir zehergesellen. nemet drizec tusent man! dem kaiser sint di sine chuone[n] alle erslan; uch dwinget da lutzel dehain not.
8040	di uon Ualpoutenrot furen drizec tusent dar, di helde sint wol gar; drizec tusent uon Meres: uil gewis sit ir des,
8045	daz nicht kuoners mac sin: an dem rucke tragent si boursten sam swin. diu dritte uon Nobiles unt Rosse, diu uîerde uon Plais unt uon Teclauosse, diu fuonfte uon Sordis unt uon Sorbes,
8050	di sechste uon Ermines unt uon Demples, di sibende uon Ioricop, di bringe[n]si in groze not, di achte uon Walgies, di nunte uon Mores,
8055	di zehente uon Paligea: der unter winde du dich sa! dar zu gibe ich dir zehen scar der aller turisten helde wol gar di ich hie uinden chan,»
8060	sprach der chuonc Paligan, «diu aine uon Dorcaniuessen, Falsen unt Flechsen: diu driu lant richtent aine scar. ouch sende ich dir aine dar
8065	uon den chunen Deden, di dritten uon den Peren, di uirden uon den Sulten, di uone Ferren dar unter, di funften uon den Promten,
8070	di sint helde uneruorchtin chuone unt snelle, heluent dir dines willin. unter den allen la dir niemen baz geuallen
8075	denne Darmoloten: di sint helde guote, di fuoren di sechsten, des heluen in di Glessen; di sibenten di Prussen,
8080	di sint chuone ze rossen; di achteden uon Clamerse, di han ich selbe erkunnet ê mit ir guoten isern rouchen; di zehenten uon Turchopen,
8085	di sint chuone wigande. unz ander werlt ende sone mac dir nicht uor gehaben. uon rechte scoltu tragen der erwelten Romare chrone:
8090	di habe du, sun, zelone!» Do sprach der chuonc Paligan: «inoch wil ich han zehen scar wol geraite: selbe wil ich arbaite
8095	daz ich gereche Marsilien: der kaiser geliget nidere hiute uon minen handen. diu erste scar uon Giganden, diu ander uon Malprose,
8100	di dritte uon Surse, die uirde uon Ungeren, den ist dicke wol gelungen; di habent ueste cluse di uon Uallepenuse;
8105	di sechste uon Imanzen, di gestreitint wol den Francken; di sibente uon den Malrosen. Alemani di bosen achtent sich uil biderbe:
8110	Deusen uechtent da widere. di achtede scar uon Targilisen, di nunte uon Bilisen, di zehente uon Carbone. ich swer unter miner chrone,
8115	swer hiute entrinnet, daz er niemir mer gewinnet aigen noch lehen.» dar nach swören die herren uber alle haiden zungen,
8120	swer in da entrunne, swa man in beginge, daz man ‹in› zestete hinge. Do hiz der chuonc Paligan uf richten sinin uan:
8125	ain trache dar ane stunt, der was geziret gnuoc uon golde unt uon gestaine. do scarten sich di haiden. des chuoniges bruder Chanabeus,
8130	daz buoch nennet in sus, der rief uober al di haiden: «swelhe sich nu wellen gehailen, di komen alle samt! hi ist der genadige Teruagant,
8135	den sculen wir anbeten unt den liben Machmete[n], Apollo der mare unt ander hailare, di gote untotliche.»
8140	di haiden alle gemainliche uielen zuo der erde, si sprachen: «wol ir gote werde, gebet uns salde unt sige, daz unse uiande geligen
8145	unter unseren fuozen, daz wir u opheren muozen alnach iweren eren: iwer dinist scul wir imer meren.» Der kaiser ersach ir gebet,
8150	er rief ander stet: «wartet an di uerfluochete diet! got nehat an in niêt. uertiliget ist ir name (si beten di apgot ane)
8155	uon der lebentigen erde: irne mac niemir rat werde; daz urtail ist uober si getan. nu heuen wirz in gotes namen! ia birn wir da zu gehalten
8160	daz wir den gotes anden an in scuolen rechen. der elliu dinc wol kan gezechen, der erhore unsich hí!» die cristen huoben «monsoy, monsoy,»
8165	di haiden ir zaichen sa: «preciosa, preciosa!» rifen si uber al. des guten Oliuantes scal was der haiden ungemach:
8170	der chuonc uil dicke sprach, swer im daz beneme, daz er im lande un[de] burge gebe unt aldaz er des sines wolte; er sprach, daz iz menske nescolte
8175	nimer gefuoren; er macht in ubele gehoren. Do sahen si uon den haiden manigen uanen waiben grune unt waitin.
8180	der mitelare wolte sin, der Daniele[n] behuote daz in di lewen nine zefuorten, der im sine spise hete gesant uober ailf lant,
8185	der chom en an der zit. du huop sich der wic: Gotefrit der uanere er stach uon dem marhe ain haiden also uraisam,
8190	daz er toter uiel unter den uan. Oigir der wigant der furt in siner hant ain spanne braiten ger; da mit gefrumt er
8195	manigen zu der helle. Herman sin geselle machete wizen stal rot: ane maze lagen di haiden tot, unt der helt Gebewin
8200	der lie des tagis anschín, daz er gote nicht wolde entrinnen: mit sinen snellen iungelingen kerter uf aine scar, mit eren bracht er si dar;
8205	den grunen anger maht er rot: der haiden gelac so uil fuor im tot daz ir daz buoch nehaine zal nehat. uon im gescriben stat: egeslich waren sine gebere;
8210	er tet sam der gute ruotere, der gerne wol buowet unt aldaz nider huowet daz im den scat beren mach: so wirt der acker buhaft.
8215	sam tet der wnderkuone man: im ne macht nicht lebentiges for gehan. Iocerans huop sich dar, ain haiden wart sin gewar: di kuonen uolcdegene
8220	stachen zesamene mit michelem nide. Iocerans starht sich in dem wige sam der lewe der da winnet so er zurnen beginnet:
8225	er was erbolgen harte, er gefrumte mit dem swerte manigen haiden toten, mit bluote betrorten. sam tet der helt Haimunt:
8230	er gefrumter tot unt wnt daz di haiden nimer mere uerchlageten. unlange si lebeten, di im chom[en] so nahen daz er ir machte geramen,
8235	derne chom nie dehainer danne[n]. er gefrumt unter Paliganes mannen daz man iz imer scriben mac unz an den iungisten tac. Richart der alte
8240	mit michelem gewalte belait er di sine scar. ain haiden huop sich gegen im dar mit manigem snellen iungelinge; durch ueste stalringe
8245	stach im der helt Richart ein eskinen scaft; daz ort hin durch brach daz er niemir mere wort ersprach. di christen waren geraizet,
8250	di haiden musen erbaizen. des nemacht nehain rat sin: di christen fluren unter in daz si imer chlageten di wile daz si lebeten.
8255	Dar huop sich do Antel, ain helt chuone unt snel, er kerte an di walstat; di haiden werten im daz phat: er kom in aine dicke.
8260	sine wluine bicke taten scaden grozen. Regenbalt mit sinen genozen chom im an der rechten zit: uon dem tode ernert er im den lip.
8265	idoch wart der degen here uerwndet also sere daz er uil chume genas. Regenbalt bi im was, er laiste alser im gehiz
8270	ain fraissamen spiz frumter im mit siner hant durch ain uesten schiltes rant; daz houbit er im abe swanc; er sprach: «dine gote haben undanc!
8275	si habent dich her betrogin; du bist ewiclichen uerloren.» Also der haiden tot lach, manc eskiner scaft wart da zebrochin.
8280	da wart riterlichen wol gestochin: do frouten sich di christen. manc schilt uester wart da uerhouwin. wer scolte gote missetruowín?
8285	Der herzoge Naimes, uon Beigeren Ansgis, di waren des kaiseres rat geben: si chunden herlichen leben, si waren got gehorsam,
8290	willic waren in ir man. ir guot was gemaine, ir herce daz was raine. di kom[en] intsamt dar; si furten aine scar
8295	so si gote wol gezam. di waren der haiden ban: si uachten durch daz himilriche, si cherten uermezenliche uf aine grimmige diet.
8300	da ne sparten si sich niet: helde uzerkorne frumten da uorne mit ir scharphen geren manigen haiden seren.
8305	mit ir swerten si worchten daz iz alle di eruorchtin di sie ersahen: mit dem tode si urlop namen. si sluogen si an dem wal
8310	also di hunde zetal. ir helde erwelten, wi si durch di scar strebeten! si hiwen in ain witen chraiz. da frumten ouch got waiz
8315	di wuotigen haiden manigen christen uaigen: di in gote da beliben unt zehimele sint gestigen zu andere[n] ir genozin,
8320	zegotes antwirt sint si uil groze. Der haiden uiel ain michel menige: halsperge noch helme machten si nicht gefristen: wol uachten di cristen.
8325	do gedacht Malprimes des uermezen urlobes des er zu dem uater nam, daz er den kaiser scolte erslan. er was der Paliganes sun;
8330	er wolte gerne den ruom dar an haben gewnnen. di sine nach im drungen. da uiel manc herlich man: der christen wart uil erslan,
8335	der christen uiel da uil tot. si riefen alle an got. zehelue chom in Naimes: des chuoniges sun Malprimes stach den baigerisken herzogen,
8340	daz er uz dem satel kom. uf dem marhe er sich enthilt: mit dem swerte er in erriet, den helm er im uerscarte. der kaiser des gewarte:
8345	er kom im an der rechten zít, uon dem tode ernert er im den líp. sin spiz er durch in stach, uon dem marhe er in warf: tot uiel der Paliganes barn.
8350	harte erkom[en] sine man, si wuoften mit sere. Naimes genaic sime herren; er sprach: «got selbe muze dir lonen! uil nach was ich dem tode.»
8355	Do starckete sich daz uolcwic, sam uon angenges zít daz sich div werlt erhuop unt muoter ir kint getruoc, sone uiel nie so manc man.
8360	ain haiden huop sich dan: er ilte da er den chuonc uant, sine hende er want; er sprach: «ia du chuonc Paligan, din sun ist erslan.
8365	der diner liget also uiel: ich fuorchte daz di christen gesigen. sine wellent nicht entwiche, si uechtent also uermezenliche: si habent dine helde
8370	gestruot after uelde. ir ist so uil geuallen: di gote zwiuelent alle.» Do uorderot Paligan Ioleun sínín man;
8375	er sagete im umbe sinin sun: «der kaiser nescol alsolhen rum hi zuns nit gewinnen. ich wil an di gote gedingen, ist daz ich in selbe ersihe,
8380	daz er unter minem swerte gelige, †oder flucht erdwingen: anders chume ich niemir hinnen.» «du hast dich sin wol bedacht; iz ist ouh der min rat,»
8385	sprach Ioleun sin man, «doch wil ich dir fur war sagen: der kaiser ist also grimme: erne gefluhet nimer hinne durh dehainer slachte not.
8390	ia suchet er den tot unt alle di sine. nu, herre, hilf ouch ‹du› den dinen: chum in enzit! ich wane der christen nit
8395	uns uil harte gewerre. idoch sage ich dir, herre: wir sculn bi dir ersterben oder din ere erweruen. wirne sculn nicht entwiche
8400	sunter froliche uon dem wige scaiden. hi nerstirbet nimen wan di uaigen.» Amhoch den uan nam: im uolgoten zehenzec tusent man,
8405	mit allem gerechte. si waren gute knechte, si luchten sam di sterren uon golde unt ‹uon› perlen, daz gestaine also edele.
8410	di marche wolten si ledige. sie komen in groze fraise. Karl schlägt Paligan das Haupt ab (P, fol. 114v) si huben sich an den kaiser: ist iz also daz buoch sagit, da wart der kaiser alumbe behabit,
8415	bedecket was daz geuilde. der kaiser sach hin zehimele, er sprach: «gnadeclicher herre, nu gedencke an din ere, erzaige dine tugende:
8420	erlose uns uon den hunden mit dinen boten frone[n], sam du erlostest Gedeone[n] mit brinnenden oleuazin uon ir scarphen scozin!
8425	scol mir aller diner erde nu nicht mere werde wan so ich uf gehaben mag, hiute ist kom der tac daz du di dine scolt erhoren,
8430	dine uiande storen. nu uerlich uns din liecht! ich ne sorge umbe anders nicht wan daz si uns entrinnen. den sunnen wil ich an dich dingen,
8435	unz ich gereche Roulanten.» ain ander si do erkanten, der kaiser unt der chunc haiden: do was iz ungescaiden. Der kaiser unt Paligan
8440	ranten ain ander an; die scefte si uerstachen. di satele bede brachen, si uielen zu der erde[n]. do erhalten sich di herren:
8445	zu den ‹swerten› si do griffen. da wolt got ersichern den sinin lieben dinist man. si liefen ain ander an. do was der chuonc Paligan
8450	michel unt fraissam: sine slege waren ungehirme. do kunde wol schirme der ware gotes chemphe: ia muse uor im wencke
8455	der haiden al zerucke; den schilt hiwer im zestucke; do erhalt sich der ualant: er zehiu ouch im des schiltes rant, den helm er im uerscrît.
8460	daz newas den Francken nicht liep. ir zaichen riefen, si sa: «preciosa, preciosa!» Di haiden uacht grimmicliche: der kaiser wolt im nicht entwiche.
8465	do sprach der haiden: «Karl, wilt duz noch scaiden? wiltu mir daz swert geben, gerne laze ich dich leben. mines laides wil ich dich manen:
8470	min sun hastu mir erslagen, min riche ist allez wöste, tot ligent mine fuorsten; min erbe hastu besezen: des wil ich alles samt uergezzen,
8475	unt wirdestu min man, ich lihe dir Yspania[m] unt habe dich imer mit minnen: dine tugente sculen dir hiute wol gedingen.» Der kaiser antwirt im mit wizen:
8480	«min erbe wolt ich gerne besitzín daz mír uon angenge gegarwet ist, dar mich der heilige Christ mit sinem tiuren bluote erkuofet hat. nu merke du minen rat:
8485	erchius dir in zeherren! sone mac dir nicht gewerren. dine gote sint unraine. di toufe scol dich gehaile: wiltu di behalte[n],
8490	dinen richtum wil ich dir zehenzechualten.» Do sprach der chuonc Paligan: «ia du uil uaiger man, nu mustu uil schire ersterben! † . . . machte halspergen.
8495	min herre Teruagant der hiu dir den schilt uon der hant. wa ist din herre Crist, uf den du so dicke gist? nu helue er dir swes er mege!
8500	din botech ich den uogelin lege, din houbit fuor ich hinnen: daz tuon ich Criste zeminnen.» «Tu uermizest dich ze uil, dines frides ich mere nine wil,»
8505	sprach der mare gotes wigant, «nu helue dir Teruagant, want du an in gihest! wi scantliche du geligest! din boser geselle
8510	brenget dich hiute zu der helle.» uil degenlicher zu im spranc: da wart der nitlichste champ der uf der erde ie dorfte gefrumt werde.
8515	sie sluogen ummuogeliche slege, mere den iu imen gesagen mege. ia truoc der chuonc Paligan zuvo halsperge an, ain huot unter dem helme.
8520	wole uachten di uolc degene. der kaiser im di slege benam: do enthilt sich der heidenischer man; mit listen er allez uacht. der kaiser im uaste zutrat:
8525	mit Ioíosen ecken den sinin schilt dicken er im gar uon der hant sluoc. der sin stal was also guot: der kaiser nemacht sin nicht gewinnen.
8530	duo truroten alle Karlinge. Do sluoc der chunc Paligan dem kaiser sin helm dan, daz har er im abe swanc. wi er uf unt nider spranc!
8535	er uacht im do werde, er hiu im di halsperge. der kaiser begunde muoden: do wanten genuoge daz er scolte uallen.
8540	di haiden begonden scallen, des siges waren si gewis. do chom im an der frist ain trost uon himele; zu im sprach di stimme:
8545	«wes sparstu den man? diu urtaile ist uber in getan: uerfluochet ist al sin tail. got git dir daz hail: dine uiante geligent unter dinin fuzen.»
8550	zehimele genaic er suze. Di christen waren in noten umbe ir herren guten. uil tiure si got dar umbe manten: uil schire si sich erhalten.
8555	der kaiser chom wider zesiner craft, so er da uor nie so starc wart. an lief in der degen: er slugin mittin durh den helm, daz houbit er im in uiriu zetailte.
8560	der haiden sich do naicte. er sluoc im den anderen slac, daz er im unter den fuzen gelac. uon himele chom den christen ain liecht, diu hitze war in mere nicht:
8565	si komen wider zu ir chreftin. got erhorte ie di rechtin, di an in geloubint unt im durhnachtlichen getriwent: den kumet er ie ander not.
8570	der haiden chunc gelac da tot: si uerluren allen ir sin; uil egeslich wart iz unter in: zefluochte huben si sich. da nerte sich mannegelich,
8575	also in di not dwanc. der kaiser in den satel spranc; er begraif ain spiez, di sine er an rief; er sprach: «nu ir gotes wigande,
8580	rechet Rolanden, daz si icht genozen hin kom! si sint zu der helle geborn.» di cristen taten iz so gerne: nahen unt uerren,
8585	swaz si ir machten erlangen, derne chom nie dehainer dannen. ir chunne si rachen: si slugen unt stachen, si ertrancten genuge.
8590	di sconen wiseblumen mit blute befluzin, di wazer hart erguzzen. rot wart di Saibere, uil lac ir da uaigere.
8595	Marsilie ersach der haiden not; uor laide uiel er tot. Brechmunda di chuonigin uiel wainde uber in; si sprach: «macht ich dich geraine,
8600	da ware umbe uaile aldaz ich ie gesach. uil lait ist mir din ungemach. nune mac dich niemen wider gewinne[n]: in der helle mustu brinnen.»
8605	si erwainte so harte. si stunt an ainer warte. Der kaiser unt sine helde schiften sich uber di Saibere. si wrden wol beraten:
8610	al daz di haiden uz brachten, daz kom in allez ze guten staten. so tuot ie der unser rehte uater: so in siniu kint suochint, alle ir not er wol beruochet.
8615	mit uf gerichten uan cherten sie gegen dem burcgraben. diu chuonigin Brehmunda ilente sa hiz si die burgetor entslizen;
8620	den kaiser si dar in lizen. dem kaiser uiel si ze fuzen: «ich wil,» sprach si, «richten unt buzin swa ich mich uersumet han: ich han iz unwizent getan;
8625	di tiuel hat mich lange betrogin. du bist mir zetroste chom. ich erkenne wol dine warhait: hilf du mir zu der christinhait! ich geloube an mínín trechtin:
8630	swi du gebiutest so wil ich sin.» Daz liut sich toufte unt bekerte, also si got lerte. ir bistuom si stiften, unt si sich ze gote richten.
8635	der kaiser unt sine man Brehmunda[m] fuorten si dan, got si lob sungin. si heten gewoucheret unt gewnnen uil manige heilige sele:
8640	si schinent in dem gotes riche sam der sunne iemir mere. Der kaiser nachte genote sinin uil lieben toten, di im belegen waren: si huben ir ameren.
8645	daz ersach di chuoningin: «daz uerbietiu, herre, min trechtin,» sprach di frouwe, «daz ist der min geloube, want si durh daz rechte sint gelegen,
8650	daz sie uor gote iemir leben. nu hort ich dich, herre, sagen: die rechten scol man nicht chlagen (ir tot ist geware), sunt[er] offen suntare,
8655	di totliche ersterben. dise heiligin sculen uns gotes hulde erweruen.» Der kaiser wnderot harte ir wislichen worte. er ne chlagete nimer mere
8660	also grimmiclichen sere so er da uor tet. mit salmen unt mit gebet ir toten sie begruobin, ir wnden si uf huoben.
8665	si besazten di marche. si furten drie sarche zu dem guten sent Romane: da suchet man zeware ir uil heiligiz gebaine.
8670	an dem iungistin urtaile sculn sie unser nicht uergezen, want si habent daz himilriche besezen. Tiv buoch urchundent inoch: der kaiser gebot ain hof.
8675	mit mchelem flize chomen di fursten alle gemainliche: dar chomen achte chuonige unt inoch dar ubere; biscofe unt herzogen
8680	derne machte niemen an daz ende komen. ze Ache wolt er den hof han: da was manc wort spager man. dar chomen ouch di Karlinge. der hof wart uil grimme.
8685	dar chom di scone Alda: wol enphi si da der kaiser selbe unt alle sine helde. si sprach: «Karl, gesegenter kaiser,
8690	uoget witewen unt waisen, war hastu Roulanten getan? gim mir wider min man, dem du mich zewibe gabe! wi gerne ich in ersahe!»
8695	Ter kaiser antwirt ir sa: «liebiu, libiu Alda, ich netar nicht liegin: laider dune gesest in niemir. dune macht sin nicht haben:
8700	er lit laider toter begrabin. chlage du nicht sere! ich irgetze dich sin gerne: ich gibe dich zewibe dem guten Ludewige;
8705	ich mache dich ze chuoninginne uber al Karlinge.» «war sol ich arme denne? Ludewigin du mir niemir fuor genenne, noch niemir dehain anderen man!
8710	scol ich Roulantes nicht han, so wil ich ersterben gerne.» si uiel grimme an di erde. «aller dinge schephare, do du mir in ze wine gabe,
8715	war umbe hastu mir in genomen? war scol ich arme nu komen? ich bite dich, rainer magede barn, daz ich umbewollin muze uarn dar die magede alle sint geladet.
8720	mine sele beuilhe ich in dine gewalt, aller engel chuniginne, daz ich niemir mere chom hinne!» si begunde harte blaichen. der kaiser wolt ir heluen,
8725	er beuie si mit der hant: also tote er si uant. da zaicte got siniu tougen. man begruop si zu anderen heiligin frouwin. Der kaiser an daz gerichte gesaz;
8730	owi waz fursten uor im was! er hiz Genelunen pringen. do wolten im di Karlinge den lip gerne fristen; si sprachen daz sie in nine wisten
8735	an nichte uber wnden, doch er ware gebunden. sin recht ware uil groz, er ware aller fursten genoz. Genelun bat einir stille;
8740	er sprach: «herre, iz was min wille. ich neluogin dir sin niet: der zwelue tot ist mir liep; iz ist gewisse der min rat. ich hete in e wider saget
8745	ze diner antwrte offenliche: daz erzuige ich mit dem riche.» «waz bedurfen wir nu rede mere?» sprach des riches herre, «want er sich offenliche hat ueriehen
8750	daz er di cristen hat gegeben in di gewalt der haiden. ich frage urtaile: also di phachte tichten, so wil ich uber in richten.»
8755	do was Genelunes geslechte chreftic unt machtic, ain uil uorderlichez chunne: si heten im gerne gewnnen des kaiseres hulde.
8760	si sprachen: «uil groz sint sine sculde. uns ist harte misseschehen: die tiuristin sint alle gelegen; nune mac sie niemen wider gewinnen. gere dine chunlinge!
8765	gestille, herre, dinin zorn: laz in ze dinin hulden chom durh diner swester ere! Genelun gefesselt vor dem Kaiser (P, fol. 119r) des bite wir dich, herre. Genelun dinet dem riche
8770	imir mere uorchtliche.» Der kaiser erzurnte harte mit uf geuangem barte; er sprach: «di rede ist mir sware: der mir aldaz golt wage
8775	uz arabisken richen, iz ne si daz mir di fursten geswichen, daz ich sin nine name wider disem uerratere! man scol iz iemir zemare sagen
8780	daz wirz an im gerochin haben unz an der welte ende. diu christinhait ist harte geschendet. des ‹gat› uns michel not: iane geschach nie sus getan mort.»
8785	Tar fur dranc Binabel; er was michel unt snel, starh unt chuone, redehaft genuoge. er sprach: «getar ich for dinin hulden,
8790	so wil ich gerne geunsculdigen Genelunen min ohaim, daz er untriwe nehain an den hat begangen, dar umbe er stat geuangen,
8795	gebunden uor dem riche: er wider saget in offenliche. ich wil mit mime swerte sine triwe im erherte. uzen laz ich min herren ainen,
8800	so nist hie manne nehaine, der in sin sculdigen welle, der uersuoche sin ellen, trete gegen mir in den chraiz: mit champhe berede ich ín gotewaiz.
8805	ich irledige in huite ob ich mac, oder iz ist min iungister tac.» Di fursten geswicten lange. uon manne zemanne sach der kaiser hin unt her;
8810	uil harte enzunter. er sprach: «wanu frunt unt man? swa ich mich uersumet han, ist daz ich leben scol, ich erhale mich sin uil wol.
8815	ich ergetze sis iemir mere, daz sie di ere an dem riche icht gewinnen; unt uarent si genozin hinnen, daz wil ich iemir gote chlagen:
8820	di chrone scol ich mere denne nicht tragen.» Tirrich dar fur trat, ainer stille er bat; er sprach: «Roulant hat mich gezogen. uzer sinim chunne bin ich geboren:
8825	ich bin sin nahister geborn mac. Binabel sich uermezen hat, er welle in der untriwen bereden. Genelun hat si durh miete hin gegeben unt hat ungetriwelichen
8830	geraten an daz riche, unt wolt da enteren di chrone mines herren unt zestoren di hailigin cristinhait. da scol got sin warhait
8835	hiute hie erzaigen, daz er mit lugen unt mit main aiden di untriwe hat begangen. er ist uerfluochet unt uerbannen uon allem cristinlichem rechte.
8840	ich wil durh got huite gerne uechte unt wil mit mime swerte di warhait erherte in des heiligin Cristes namen. din uobermuot scol dir gescaden.
8845	du uersihest dich ze diner sterke; da bi sculn wir merke: Dauid was uil lutzeler gescaft; got selbe gap ime di craft daz er Golie daz houbit abe sluoc
8850	unt fur den chuonc Saule[n] truoc. got hat inoch di selben gewonhait: ez wirdet dir huite uil lait daz du wider gote hîe stast unt der warhait uerlougint hast.
8855	ich bin ain edeler Francke, ich gichtige dich mit dem champhe. ich sende dich zu der helle: der guote sent Dionisíí dich hiute uelle.» Dem kaiser gerieten sine wisen,
8860	daz er uorderote gisel uz iewederem taile: daz lobeten di fursten algemaine. drizzec der waren di sich fur Genelunen gaben,
8865	ube Binabel geuiele, daz daz gerichte uber si ergienge, also di phaht lerte. der kaiser si damit erte: er nam uon Tirriche
8870	drizec gisel dem riche in dem selben gedinge. des frouten sich di Karlinge. Binabel was ain starc man: des nehete niemen nehain wan,
8875	daz im Tirrich uor gehabete oder dehain wile gelebete: an dem libe was er chranc. uil williclichen frumt er den champf. di fursten uon Karlingen
8880	fluren allen ir gedingen. der kaiser uiel sine uenie; er bat alle di menige, daz si got fleten daz er daz riche gerte,
8885	daz er sine tugente bescainte unt di rechten warhait unter in erzaicte. sam taten di heiligen frouwi[n]: di manten got siner tougin. hin zehimele si digeten
8890	daz Tirrich gesigete: wol gehalf im daz. da wart manic ouge naz. si wegeten im allenthalben mit missen unt mit salmen,
8895	mit manigen guoten dingen: uon rechte muse im wol gelingen. Der kaiser scuof zesiner huote manigen helt guoten; uil michel was daz gedranc.
8900	da gelobeten si den champh zu dem braiten uelde. der kaiser unt sine helde gehabeten zeringe; sam taten di Karlinge.
8905	der kaiser hiz uor in allen sage[n], er were fri oder dinist man, swer dehain strit da huobe, daz man im den hals abesluoge. di chemphen waren wol gar:
8910	uermezenliche chomen si dar uf zwain ziren marhen. do wiste man si zesamene, di grizwarten si manten. ain ander si anranten;
8915	di schefte brachen si zestuchen, di scharphen swert si zucten; zu der erde si chomen baide. dane was manne nehainer, der in den chraiz getorste kom,
8920	er nehete den hals uerlorn. Binabel unt Tirrich mit swerten uersuochten si sich; si zehiwen ain ander di schilte. der kaiser allez zegote diegete:
8925	er uorchte des winigin man. der elliu dinc wol kan aine gezechen, der wolt iz anderes scaffen: Tirrich gewan einis lewen muot;
8930	daz swert er do uf huop, uast er an in scrait, den helm er im uersnait. ia muser dolen dar unter aine fraissame wnden.
8935	daz bluot im uber di ougin ran. do sprach des uiandes man: «ia du tiwerlicher degen, ich wil mich dir ergeben. min swert scoltu nemen,
8940	unt wiltu Genelune wegen, fur aigen wil ich dir dinen, elliu di zirde, di mich uon erbe an chom[en] ist. unt gewinnestu uns aine frist,
8945	ich wirde hi zestete din man.» «iz nescol so nicht gestan,» sprach der helt Tirrich, «du bist ain furste also wol sam ouh ich. kume du zemines herren fuzen!
8950	ich wil dich sin alles erlazen. ich wil dir gerne wegen daz er dich laze leben. Genelunen du mir niemir uor genenne, want ich sin niemir gehenge,
8955	also uerre so ich mac, daz er dehain tac hinne fure mere gelebe. in geriwet hiute Marssilien gebe.» Do sprach Binabel:
8960	«durh Genelunen chom ich her. nemagich im nicht gedingen, sone wil ich nicht ligen; nemagiz nicht bezer werde, ich wil durh in ersterbe.»
8965	«daren gegene warne du dich!» sprach der helt Tirrich, «du lebest unlange. der tivel hat dich geuangen. erne wil dich nicht lazen:
8970	mit anderen dinin genozin furt er dich zu der helle. der untriwen bistu geselle.» di tivren uolcdegene sprungen wider zesamene;
8975	si uachten mit grimme: di uesten stalringe machten nicht da uor gestan. ir slege waren fraissam. Tirrich der degen
8980	uerwndot in aue durh den helm. wi fro der kaiser des was! umbe warf er daz sachs, den hals er ime abesluoc. daz houbit er uf huop,
8985	er stachte iz an ain sper. uf sin marh gesaz er. er furt iz wider uf den hof. da wart michel froude unt lof: si luten unt sungen;
8990	uon allerslachte zungen lobeten si got alsus: «te deum laudamus!» Der kaiser gesaz an daz gerichte: do ertailten im di sentphlichte,
8995	daz riche scolte werden gerainet; si heten sich selben uertailet, alle di der untriwen geselle waren unt sich fur Genelunen gaben. di fursten sprachen alle bi ainem munde,
9000	alte unt iunge: «owol du heiliger kaiser, richte den armen waisen! zu dir rufent di kint der uetere uerraten sint.
9005	sines chunnes scol nicht mere wachsen an der erde.» di gisel hiz er uz furen: di houbit si in abeslugen. Genelunen si bunden
9010	mit fuzen unt mit handen wilden rossen zu den zagelen: durh dorne unt durh hagene, an dem buche unt an dem rucke brachen si in zestucke.
9015	so wart di untriwe geschendet: da mit si daz liet uerendet. Nu wnschen wir alle geliche dem herzogin Hainriche daz im got lone.
9020	di matteria di ist scone. di suoze wir uon im haben: daz buoch hiz er uor tragen, gescriben ze den Karlingen. des gerte di edele herzoginne,
9025	aines richen chuoniges barn. mit den liechte[n] himil wizen scaren nach werltlichen arbaiten werdent si gelaitet, unter allen erwelten gotes kinden
9030	da si di ewigen mandunge uinden. daz si sin ie gedachten, daz man ‹iz› fur brachte intutische zungin gekeret, da ist daz riche wol mit geret.
9035	sine tugente dwngin in dar zu. wa lebet dehain furste nu dem ie so wol gescahe? der herre der ist getriwe unt geware. Nune mugen wir in disem zite
9040	dem chuoninge Dauite niemen so wol gelichen so den herzogen Hainrichen. got gap ime di craft daz er alle sine uiande eruacht.
9045	di cristen hat er wol geret, di haiden sint uon im bekeret: daz erbet in uon rechte an. zefluchte gewant er nie sin uan: got tet in ie sigehaft.
9050	in sinem houe newirdet niemir nacht. ich maine daz ewige licht: des nezerinnit im nicht. untruwe ist im lait, er minnit rechte warhait.
9055	io oubit der herre alle gotlike lere, vnt sin tuire ingesinde. in sime houe mac ‹man› uindin alle state unt alle zucht.
9060	da ist vroude unt gehucht, da ist kuoske unt scham; willic sint ime sine man; da ist tugint unt ere. wa fraistet ir ie mere
9065	daz imen baz geschahe? sime schephere opherit er lip unt sele sam Dauid der herre. swa er sich uirsumet hat,
9070	ze gerichte er im nu stat: an dem iungistin tage da got sin gerichte habe, daz er in ze gerichte nine uordere, sundir er in ordine
9075	zu den ewigin gnaden, dar umbe rufe wir alle AMEN! Ob iu daz liet geualle, so gedencket ir min alle: ich haize der phaffe Chunrat.
9080	also iz an dem buoche gescribin stat in franczischer zungen, so han ich iz in die latine bedwngin, danne in di tutiske gekeret. ich nehan der nicht an gemeret,
9085	ich nehan dir nicht uber haben. swer iz iemir hore gesagen, der scol in der waren gotes minne ain pater noster singe zehelue minem herren,
9090	ze troste allen geloubigin selen, daz unsich got an rechtem geloubin mache ueste, daz uns an guten werken nine gebreste, unt mahe uns sin riche gewis. tu autem domine miserere nobis!

<<< Übersicht <<< vorige Seite

Das Rolandslied

Verse 8000 - 9094

8000

preciosa, preciosa!

des komen si in groze not:

si ilten alle inden grimmigen tot.

So horen wir daz buoch sagen,

Paligan were fraissam,

8005

sin gesune ware egeslich,

sin gebarde were riterlich;

sin marh gienc in sprungen,

sam er ware iunger.

do redeten alle sine man,

8010

Yspaniam scolt er uon rechte han.

Do sprach der chuonc Paligan:

«hete ich nu dehain man

der reche minen anden!

swer da blaset Oliuanten,

8015

der muot mich harte sere,

ich hore iz ungerne.»

der sun do den uater bat,

daz er daz urlop gap

daz er uor uachte,

8020

di scar zesamne brachte.

uil gerne gewert er in des.

er sprach: «lieber frunt Malprimes,

la dirz wol beuolhen sin:

diu ere wirdet elliu din.

8025

ich bin aín alt man.

diu riche mache ich dir unter tan:

nach minem tode

so dinent dir alle chrone.

nu uicht huite umbe alle din ere,

8030

ich nesage dir nicht mere.»

Do uorderot der chuonc Paligan

zwene uorderiste sine man.

daz was Curlenes

unt Clapamorses:

8035

«ich irkenne iwer ellen,

min sun habet ir zehergesellen.

nemet drizec tusent man!

dem kaiser sint di sine chuone[n] alle erslan;

uch dwinget da lutzel dehain not.

8040

di uon Ualpoutenrot

furen drizec tusent dar,

di helde sint wol gar;

drizec tusent uon Meres:

uil gewis sit ir des,

8045

daz nicht kuoners mac sin:

an dem rucke tragent si boursten sam swin.

diu dritte uon Nobiles unt Rosse,

diu uîerde uon Plais unt uon Teclauosse,

diu fuonfte uon Sordis unt uon Sorbes,

8050

di sechste uon Ermines unt uon Demples,

di sibende uon Ioricop,

di bringe[n]si in groze not,

di achte uon Walgies,

di nunte uon Mores,

8055

di zehente uon Paligea:

der unter winde du dich sa!

dar zu gibe ich dir zehen scar

der aller turisten helde wol gar

di ich hie uinden chan,»

8060

sprach der chuonc Paligan,

«diu aine uon Dorcaniuessen,

Falsen unt Flechsen:

diu driu lant richtent aine scar.

ouch sende ich dir aine dar