bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Konrad der Pfaffe

um 1170

	Das Rolandslied Verse 6000 - 6999
______________________________________________________________________________

6000	wer saget dem kaiser wiz got hiute uerendet? heten wir etwen widir gesendet, der dem kaiser chunde gesagen di grozen not di wir unter handen haben!»
6005	Do sprach der helt Oliuir: «niemir gerate ich iz dir, noch ist min wille, liebir hergeselle: hetestuz inzit getan,
6010	so hetestu manigen herlichen man dem riche behalten. min swester Alde en scol an dinim arme niemir erwarme.
6015	wer scolte nu gerne leben? ich han so uil laides gesehen. niemir mere geplas din horn: der kaiser mac uns nicht zehelue chom. macht ich tusent houbit getragen,
6020	ich lieze si elliu abe slahen, e ich in minen rucke kere wan nach des riches ere. wir sculen den sige zehoue pringen, oder unser dehain chumet niemir hinnen.
6025	daz hastu allez aine getan: Karl muz uns iemir mere chlagen. owi suze Karlinge, disen tac nemac si nicht uber winde! al ir rat unt wistuom,
6030	paidiu ere unt rvom was an di kom[en] di wir hiute han uerlorn.» Do sprach der biscof Turpin: «nu tuot ir iz durch minin trechtin:
6035	zurnet nicht mere; weget der armin sele, daz diu gnade gewinne! wirne komen niemir hinne, iz ist unser iungister tac.
6040	nu der kaiser en mac uns geheluen enzít, er richet unseren líp: sine mugen sich uf der erde uor im nicht uerperge.
6045	si nement unsere lichenamen, si furent si zeware in gesegente chirich houe. so wuonschent uns heilige biscofe umbe got gnaden
6050	mit anderen unseren magen unt peuelhent uns der erde: wirne sculen den uogelen nicht zetaile werde.» Roulant uie mit paiden hanten den guten Oliuanten
6055	sazter zemunde, plasen er begunde. der scal wart so groz: der tumel unter di haiden dóz, daz niemen den andere[n] machte gehoren:
6060	si uerscuben selbe ir oren. di hirnribe sich im entrante dem chunen wigante. sich uerwandelot allez daz an im was, uil chume er gesaz;
6065	sin herce craht innen. di sine chunden stimme uernamen si alle samt, der scal fluoc in di lant. Uil schire chom zehoue mare,
6070	daz des chaiseres plasare pliesen al geliche. do wessen si warliche daz di helde in noten waren. da wart ain michel ameren:
6075	der kaiser begunde uor angesten swizen, er chom ain tail uz sinen wizen, er undulte harte; daz har prach er uz der swarte. do rafste in harte
6080	Genelun der uerratere; er sprach: «dise ungebare gezimet nicht dem riche. du gebarest ungezogenliche. waz hastu dir selben gewizzen?
6085	Roulanten hat lichte ain prem gepizzen da er slief an dem grase, oder iaget lichte ain hasen. daz du durch ain horn plast aller diner wizze uergezzen hast!»
6090	Der chaiser zu im sprach: «owe daz ich dich ie gesach oder ie dehaine kunde gewan! daz wil ich iemir gote chlagen. uon dir aíním
6095	muz Karlingen iemir wainín. dur den urmaren hort so hastu gefrumt disen mort, den dir Marsilie gap. ich gerich iz ob ich mac.
6100	waz bedorftestu des?» dar zu spranc der herzoge Naimes, er sprach: «ia du ualantes man, nu hastu wirs denne Iudas getan, der unserin herrin uerrit unt hin gap.
6105	dune uerwindest niemir disin tác: dizze hastu gepruwen, du trinchest iz intruwen.» er wolt in gerne haben erslagen. der kaiser hiez in enthaben,
6110	er sprach: «wir sculen in anderes zuchtigen: ich wil hernach uber in richten. also uber in ertailet wirdet, ich wan er wirs erstirbet.» Der kaiser hiz in schenden,
6115	pinten sine hende mit cheten unt mit snuoren hiez er in mit im furen. daz gewant si im uz sluoften, daz har si im zerouften;
6120	si halslageten in genuoc. uerfluochet ist diu muoter di in truoc unt swanner ie geborn wart. er fuor aine egesliche uart: si bunten in uf ainen soumare,
6125	si furten den uerratere wider uber daz gepirge gegen sinim herren Marsilien, sinen untriwen zescam. sin huten zehenzec man.
6130	Der kaiser mante du uerre fursten di herren, daz si Roulanten sin neuen nine liezen unter wegen unt ander ir chunne.
6135	si sprachen alle samt mit ainem munde daz in nie so laide gescahe, unt daz si gerner tot pi im lagen denne si sie da uerliezen. da wart ain michel wainen unt riezen.
6140	di heren biscofe rieffen nach den rossen, herzogen unt grauen. da wart michel ameren. uil schiere si sich peraiten,
6145	niemen des anderen erbaite. ir herce was geseret, ir lait harte gemeret an dem aller tiuristen chunne; ir froude unt ir wunne
6150	was unsanfte gelecet. si waren harte ergetzet ir frolichen haim uerte: ir herce wurden so herte daz der groze sin uon in floh.
6155	igelich fur den anderen zoch. sporen sazten si zesiten, so si hartest machten riten, unze den stunden daz si daz wal funden.
6160	der kaiser rief ze aller wile: «nu hilf mir, frouwe sente Marie, unt alle di an den lebentigen buochen gescriben sín, daz ich ‹den› gaist min muze geben widere,
6165	ê der haiden Marsilie uber di cristen richsent werde: min lichename werde ê begraben in der erde.» Roulant sprach zu sinen gesellen: «gedenchet, helde, an uwer groz ellen!
6170	heue wir uns dar nahen, e si pat geuahen! ratet wisen dar zu, wa wir in den maisten scaden getuon! wirne durfen unsich nicht sumen,
6175	waz hilfet langez rouwin? min herce gert Marsilien: gelit er aine da nidere, so hat mich got wol gewert. in gruozet hiute min swert,
6180	ich pringe in in not, oder iz ist der min tót. daz wil ich iu zeware sagen: sine sculen uns nicht so uore haben.» Do sprach der biscof Turpin:
6185	«nu lone dir selbe min trechtin. du sterchest uns wol inder gotes ê, uor gote bistu wizer den der sne. din wille ist also groz: huite wirstu sente Laurentien genoz,
6190	den di haiden uf dem roste pranten.» zestete si si wider an ranten mit wol geintem muote. schilte unt ir huote hiwen si sam den swam:
6195	da uiel man uber man. da uacht der helt Oliuir rechte sam der wilte stier, des niemen erbaiten darf. swaz er allenthalben sin traf
6200	mit dem guten Altecleren, daz neirte da niemen mere. wol uacht Turpin unt Gerhart uon Roslin; Iue unt Pegon
6205	uachten umbe den ewigen lon. wol uahten di chunen Karlinge: man sach da fuir prinne sam der walt aller prunne. wol uacht des kaiseres chunne,
6210	der mare helt Roulant: er sluoc selbe mit siner hant den herren Falbinen unt sinen pruder Ebelinen; er sluoc in uier unt zwaincec grauen,
6215	di die aller uorderisten waren; inoch sluger ain uil braite scar. daz ouge was im uil gewár, ob er den chunc ersahe. da geuiel manc helt mare
6220	unter den cristen tot. wer fraiste ie so getane nót? Di chunen Karlinge, daz heilige ingesinde, mines trechtines helde,
6225	doch si heten lutzel menige, si riefen «monsoy, monsoy!» si drungen inmitin unter si mit ir scarphen echen. da hiwen in die rechen
6230	aine wite hin unt hêr, da uiel manc haiden uerchser. da nam sich Roulant uz in allen: da musen uor im uallen swaz der haiden er erraichte
6235	an sinem umbe swaifte: di fulten da zestunde. diu siniu manigiu wunder scriben sit di haiden. si uorchten in ainen
6240	mere denne zehen tusent man: sin gebare duchte si harte sorcsam. Di haiden waren nain kom[en], ‹si heten› ir herren Marsilien gesworen, swer fluhe uon dem wale,
6245	dem ware zestete der tot gar; uon diu sturben si al sam gerne da sam andereswa bi ir herren. nahen unt uerren
6250	uielen di uaigen. der chunc sach im genuoc laide. der aide muse si ameren. di cristen begunden nahen, daz si uf in drungen.
6255	di haiden uergazen ir ainunge di si da uor swuren: uil unstatelichen si furen. wi der gute Durndart erchlanc da Roulant an den chunc dranc!
6260	der chunc uacht also chuner wigant: er sluoc mit siner hant Gerharten uon Rosselinen unt den erwelten Iuen, er resluoc Pegonen,
6265	uon Pilme Degionem. Roulant sluoc da widere den sun Marsilien, der hiez Iorfalir. Turpin unt Oliuir
6270	rachen mit ellen ir uil liebe gesellen: si erualten manigen helt guten. alle di des uan huten, di uielen alle tote.
6275	da nachten si genote dem chuonige Marsilie. di haiden slugen si diche widere, si werten uaste ir herren. si gewunnen manigen seren.
6280	Der tiure degen Roulant rief uber schiltes rant: «bistu hie, Marsilie? ane wage gilt ich dir widere daz golt daz du gabe
6285	Genelune dem uerratere. ich uirsnide dich uil harte; uon dem guten Durndarte wil ich dich ain nuwen site leren. dune girrest Karlen minen herren
6290	niemir insinem riche.» uil harte zornliche Roulant an den chunc dranc; da wart ain michel chlanc uon spiezen unt uon swerten:
6295	di haiden den chunc werten. do rief der biscof Turpin: «er scol uon rechte imer muonich sin swer hi nicht slet daz swert, derne wart nie mannes wert!»
6300	mit ellenthafter hant ramte der helt Roulant des chuniges Marsilien: daz houbit wancte widere. er erriet im di achselen
6305	mit ainem scarphen sachse: den arm er im abe swanc. unter diu wart ain michel gedranc: dem chunige si hine hulfen, ir spieze si hin wurfen.
6310	ane zale si si slugen; zefluchte si sich huben. di haiden riefen alle zestét: «nu rich unsich, herre Machmet!» si fluhen ze den stunden
6315	sam der hirz uor den hunden. der chunc uerhal sich mit listen. do sin der helt uermiste, uil harte erbalc er sich; do hiwer Uelentih,
6320	er sucht in also witen: swaz er der haiden machte beriten, derne genas nie nehain barn. der chunc uerlos sinen zesewen arm; er floch uil scantliche
6325	in sinem aigen riche mit uil ummanigem manne, idoch lebet er unlange. Do di siges helde uersuchten after uelde,
6330	mit plutigen swerten di helde do cherten wider an daz wal. do gehorten si michel scal: zwene riche chuonige,
6335	den gelanc da uil uobele: †der aine was uon Kartagein, . . . . . . . . . . . . . . . . . . . . . . . der ander uz Etthiopia; di chomen alrest dá
6340	mit funfzec tusent mannen. der haiden was so uil geuallen daz si uf in habeten. an si uaste draueten di gotlaiden geste,
6345	der si da uor nine westen: si waren swarz unt ubel getan. die cristen heten inoch zwen unt sechzec man. do sprach der biscof Turpin: «waz liutes mac dizze sin?
6350	ob der walt lebete unt waren diu pleter elliu perente, so ware iz groz wunder. wa wuochs dize tiuueles kunter? ob ich ir stimme uername?
6355	ich wesse gerne wer si waren.» «liebir gotes friunt Turpin, nune ruoche wir wer si sin: si wellent gemarteret werde[n]. ouch scule wir ersterben:
6360	der sele phlege min trechtin. en ruchet wer di wizenare sin! sine chument ouch niemir hinne: uns rechent di Karlinge. Karl min herre
6365	der weget unsir sele,» sprach der helt Roulant, «si scol min zeswiu hant zu der helle sente. si uil ellente,
6370	der tiuel lonet in mit flize in dem helle wize.» Der chunc Algarich mit grimme huber sich; er stach Oliuirin,
6375	ain helt uil ziren, in nalmitten durch den lip: «du hast gelebet dine zit. pit dir dinen herren Karln heluen! du hast ain totlich zaichen,
6380	dune perichtest dich sin niemir mere.» mit dem guten Alteclere erriet er in mitten uf den helm; ia sluoc in der degen snel zetale durch den satelpogen;
6385	daz ros uf in toten chom. «uergolten han ich dir,» sprach der helt Oliuir, «dane welle uil gut hail zu slahen, dine chrone muz ain ander tragen:
6390	sine chumet niemir uf din houbit unz si dir min herre Karl erloubit.» also towente cherte Oliuir dar; er gefrumt in der scár manigen haiden wol gar
6395	plaich unt ubel geuar: er uergalt sich genote. da uielen tote uber tote. iz ne wart nie chuner wigant denne Oliuir unt Roulant
6400	unt der erzebiscof Turpin: daz taten si des tages uil wol an schin. mit ir guten swerten siworchtin daz si alle di eruorchtin di pi in waren.
6405	di haiden uor in gelagen, daz si daz wal wolten rumen. durch den heiligen gelouben ia ne uorchten di christen den tot noch ne haine werltliche not.
6410	si riefen uaste an si «monsoy, monsoy!» di haiden pegunden wuoffen, unter in zerufen: «daz ist ‹ain› fraissam diet:
6415	sine rument ditze uelt niet, den tot si suchent. ich wane unser di gote nine ruchent.» Der haiden wart ain michel ual, si waren gerne uon dem wal,
6420	uon dem grozen geuelle, unz dem dritten gesellen sin ellen geswaih: er wart uarlos unt plaih, di ougen im uergiengen:
6425	don erchant er laider niemen. sin tugent im do erlasc, ze dem gesihen im do gebrast. Roulant im danne half, den zugel er im umbe warf;
6430	er sprach: «ia du aller cristen ere, nune machtu leben mere. ia du aller tugente uater, wer machte dich erstaten?» er pegunde biterliche wainen:
6435	«scol ich nu scaiden uon dem allerlibistin gesellen? din groz ellen muz ich imer mere chlagen. zewem scol ich nu trost haben?
6440	diu suze Karlinge nemac dich niemir uber winde.» uon dem laide unt uon dem grimme so erchrachte Roulant inne, daz er sich genaicte uf den satelpogen.
6445	er was nach zu der erde chomen; uil chume er sich gehabete. ane maze er chlagete: di hente di wanter. do sach er hin unt her:
6450	er uorchte Turpines unt des heiligen ingesides. er cherte wider schiere uon dem guten Oliuire. sin herce was hart ergremt.
6455	des wart do beweget manc haidenischer man: er sluoc si uon dem uán daz sin niemen getorste enbiten: in uil churzen ziten
6460	sluger uierhundert man. wa hort ir ie solich wunder gesagen? Des nemacht do rat sín: Roulant unt Turpin wolten sih nicht scaiden:
6465	des engulten di haiden. Oliuir der mare, idoch er niemen gesehe, so erzunt im sin ellen; do wolter sinen gesellen
6470	gerne zehelue sin chomen: er heu daz ros mit den sporen. niemen errechante: er sluoc Roulanten mitten uf den helm.
6475	er sprach: «ia du tiwerlicher degen, hastuz gerne getan? warumbe woltestu mich erslán?» «nu wil ich iz imer gote chlagen, nu han ich harte misseuaren,»
6480	sprach der helt Oliuir; «helt, nu antlaze du mir, daz min sele icht prinne! ich hore dine stimme; anders ich niemen erchenne.»
6485	er sprach: «der aller liebiste geselle den ich ie ze dirre werlt gewan, iane hast du mir nicht getan.» mit den houpten si ainander genigen; nicht langer si entsamt beliben,
6490	durch not musen si sich scaiden: Roulant in gegen den haiden, Oliuir uon dem wal. do uiel er in crucestal, er sprach: «wol du genadiger herre,
6495	ich pit dich durch diner marter ere: sente mir din gelaite unt nim mich uon disem arbaite! uirnim genadiclichen min gebet: swaz ich ie wider dinen hulden getet,
6500	daz riwet mich uil sere. Karln minen herren den enphilh ‹ich› in dine gewalt: nu gere du dinen scalc, dinen unter tanen;
6505	du setze im ze ainem fuz schamel alle sine uiante. herre, ich peuilhe dir Roulanten: du scolt sin genadiclichen gedenchen. er was ie din uorchemphe
6510	des heiligen gelouben. genade ouch dinen getriwen, der suzen Karlinge! ich wil inoch an dich gedinge, alle di hi zeden haiden sint beliben,
6515	daz ir name werde gescriben an des ewigen libes buoche. Roulanten du peruoche an dem libe unt ander sele!» done macht er nicht mere,
6520	daz herce in im prast; uon im fuor ain glast sam ain prinnenter louc. da fuor entuoc zesagen nimere:
6525	die tougen siner eren wolte got niemen uerlazen. uon diu sculn wir unsich da mazen. Vnter diu chom Walthere, uerwundet was er sere,
6530	dan ich iu e gesaget han: er was der Rolantes man. er sprach: «ia min liebir herre, ich gesihe dich uil gerne, ê ich so ersterbe.
6535	machtu uns icht geheluen? haiden di gelfen habent uns scaden getan.» «wa sint nu mine man, di ich beualch zediner hant,»
6540	sprach der helt Roulant, «tusent miner helde? nu gip si mir widere. ich bedarf ir wol zeminer not. dise ligent alle hi tot.»
6545	«semir dine hulde», sprach Walthere, «irne lebit nehainer mere wan ich al aine. di wutigen haiden ranten unsich allenthalben an;
6550	si heten mere denne sechzec tusent man. uil wol wir ir erbiten: wir erkanten wol dine site, ware wir entrunnen, daz wir niemir dine hulde gewunnen.
6555	ia uachten, herre, dine man soz guten chnechten wol gezam. di dine ligent tot da nidere. ouch slugen wir si da widere daz ir neheiner genas.
6560	nine zurne du daz, daz ich danne si chomen. nu ich dine stimme han uernomen, nune mac mir nicht gewerren. zwischen Manbrat den pergen
6565	unt den hohen Iogein da lie ich, herre, den scaden din. ich sage dir ze wunder: unser chom ni dehainer uon ain ander. ich durrait daz wal,
6570	daz ich uber al nehain lebentigen uant.» «nu lone dir got», sprach Roulant, «diner note was uil; inoch was daz chindispil.
6575	nu ist iz an dem zit: hi zestete sculen wir opheren den lip mit anderen unseren genozen, daz wir icht werden uerstozen uon dem engel sange.
6580	du sumist uns ze lange.» Dar huben sich do drí, ich wan iz also gescriben sí, inden drin namen unseres herren: do heten sie helue nicht mere.
6585	di ainmutigen degene slugen di urmaren menige, daz si uor in musen erbaizen. si umbe stunten si mit spiezen, mit scozzen unt mit geren.
6590	da erslugen si Waltheren. harte rach in do Roulant: swaz erre uf rechter uant, di musen Waltheren gelten. si uersuchten da zim uil selten
6595	den guten Durndarten, den uorchten si harte, daz sin da niemen enbaite. swaz er ir ouch erraichte, der gotes urchunde,
6600	owi waz er frumte der toten alumbe sich! manic schuz unde stich wart uf in getan, durch den helm wart er geslagen:
6605	uon dem rosse uiel er zetal. di haiden ilten dar, si wurfen in mit spiezen, fur toten si in liezen. Roulant dar zu sprancte:
6610	di haiden wider wancten. «lebestu noch? owi der aller tiuriste biscof, scolt ich nu den minen lip fur dich geben! Bischof Turpin wird schwer verwundet (P, fol. 91v) iane wart nie tiurer degen
6615	an diser erde geborn. owe daz ich dich han uerlorn!» er begunde haize wainen. «zwiu scol ich nu leben al aine? ich pin uerfluchet:
6620	ich wane min got nine ruochet. suze Karlinge, (zu wem scol ich nu dingen?) nu mustu imer wainen: daz trostet wol di haiden.»
6625	‹do› sprach der biscof Turpin: «tuoz durch minen trechtin: sage dem himilischen herren (so gewegestu wol miner sele) lop unt gnade.
6630	gutem uassale nemac nicht gewerren. ich peuilhe dich dem himilischen herren, Karln unt alle di sine miner frouwin sente Marien
6635	unt aller himilischer herscefte, daz in got chreftige zi beschirmin di hailigen christinhait.» di haiden taten im so groziu lait daz er da nicht langer nemachte gehaben.
6640	wir horen an dem buoche sagen: Turpin der degen inoch uf huber Almicem; also towente spranger dar: manc haiden wol gar
6645	muse du uor im beliben. daz hiez sent Egidie scriben ze Leune inder stat, also in der kaiser gebat. si slugen ir in lutceler stunt
6650	mere denne uierhunt. Roulant wart sin gewar: mit noten chom er dar; er sprach: «wol du helt mare, guot lerare,
6655	du ware ain trost der sele. mines trechtines lere diu was dir ie liep. nune mac ich an dem libe mere niet. diner tugent muze ich geniezen.»
6660	da muser in lazen. Rolant was do aine. do wanten di haiden, si scolten in erslahen: an dem libe nemacht im do niemen gescaden.
6665	Roulant sach in allenthalben sin, wi Oliuir unt Turpin unt ander sine gesellen in pluote lagen bewollen. do erhalte sich der biscof:
6670	uf spranger inoch zehelue sime gesellen; des twanc in sin ellen. Roulant blis aber Oliuanten, di haiden er an rante,
6675	er sluoc si zetal; er durrait daz wal: sine gesellen rach er harte mit dem guten Durndarte. unter diu wart ain michel scal,
6680	daz di berge uber al erchlungen unt erbibeten sam si alle lebeten: sechzec tusent horne pliesen si da uorne.
6685	der kaiser mante di sine; er sprach: «nu wizet ane zwiuel: Roulant ist in noten. nu ilet, helde guote, ob wir in lebentigen finden!»
6690	do huop sich daz gesinde, manc helt erlich; mit flize strebeten si fur sich, swaz si mit den sporen machten erhouwen. da was wainen unt rouwen,
6695	wuffen unt iameren. do begunden si nahen. di haiden horten den scal, si riefen uober al: «da kumet der kaiser!
6700	so we der raise, daz wir ie her komen! iz nahet uns zedem tode. ê wir si lebente liezen, wir berunnen si mit den spiezen.
6705	al daz wir scaden haben gewunnen, daz ist uon Roulante errunnen. machten wir in ainen gewinnen, so huben wir unsich hinnen.» Roulant unt Turpin
6710	di getaten unter in manigen toten unt siêh. di haiden erschuzen Uelentich. si uersuchten iz angestliche: si wolten ir riche
6715	den sige haben errungen; des newolt in got nicht gunnen. Roulant unt Turpin gestunten innalmitten unter in. mit ir tuwerlichen swerten
6720	den sige si wol erherten: di haiden fluhen uon ín, michel not wart unter in; si riefen zallen stunden: «Roulant hat uns uber wunden!
6725	owi chunc Admirate, chomestu nu drate zeschirmen diniu riche, so tetestu herliche!» Turpin scutte sich uz der halsperge,
6730	dicke uiel er zu der erde. Roulant urloubes bat, Turpin im daz gap, daz er di zwelue zesamene truoge unt si ‹in› der erde begruobe.
6735	do gie der helt Roulant, alle zwelfe er si uant: mit manigem zahere bracht er si zesamene. er sprach zu Oliuire:
6740	«ia du geselle liebe, des guten Regenheres barn: disiu werlt muz zergan, daz si dir nicht geliches gewinnet. also der kaiser dich nu uindet,
6745	so chlaget er dich grimme, so wainet Karlinge ir liebe gebornen. ich gehore an den hornen: uns nahet min herre.
6750	nune mac ich leben mere.» do erlasc im sin craft, der helt uiel in ummacht. Turpin begunde ruofen, er wolde im gerne helfen,
6755	er chlagete Roulanten. do pegraifer Oliuanten, Roland mit dem Horn als Waffe (P, fol. 93v) ain wazer wolt er im bringen: ernemachtes nicht gewinnen. diu ougen im uergiengen,
6760	†uz im uielen al daz in im was. uuor toter gesaz er an daz gras. done machtes langer rat sin, tot uiel der biscof Turpin.
6765	di engel di sele hin schieden, si furten den ir lieben zu der marterere chore, zu dem oberisten trone. unser herre enphinc in wol da;
6770	er sprach: «procede et regna!» Roulant cherte gegen Yspanie uerre uon den erslagenen. er gesaz zu ainem boume, da better uil chume.
6775	inainer siner hant truger daz horn Oliuant, in der anderen Durndarten. ain haiden im gewarte. mit bluote er sich allen bestraich,
6780	uil tougenlichen er im nach slaich. do gedachte der haiden: «unter disen uir stainen da erstirbet Roulant. Durndarten nim ich zeminer hant
6785	unt Oliuantem; so sage ich in dem lante daz wir gesiget haben, unt ich habe Roulanten erslagen. des fruot sich imer mere
6790	elliu arabiskiu erde.» Roulant was uon den sinen chomen, so man geschiezen maht ‹mit› ainem bogen, unter den marmil stainen. do wante der haiden
6795	daz er tot ware. do enthilt sich der helt mare unz im der haiden so nahen chom: uf zuchter daz horn, uber den helm er in sluoc,
6800	daz im daz uerhbluot uz sinen ougen spranc. er sprach: «daz dv habis undanc daz du mir ie so nahen torstest chomen! Oliuant ist zechloben.»
6805	er rezurnte uil harte, sus redeter ze Durndarte: «nu ich din nicht scol tragen, dune wirst niemir mennisken zescaden.» daz swert er uf huop,
6810	in den stain er iz sluoc: iz ne tet sin nehain war. er sluoc iz auer dar: mit paiden sinen hanten daz swert er umbe wante.
6815	er uersucht iz zehen stunt; er sprach: «lagestu in des meres grunt, daz du dehainem christen man niemir mere wurdest zeban! scol dich dehain haiden tragen,
6820	daz wil ich imer gote chlagen.» mit grimme er auer sluoc. do daz swert uor im gestunt ane mal unt ane scarte, do redet er aue ze Durndarte:
6825	«ich bechenne wol dinen síte daz du nicht des uermite: swa ich dich hin gebot, den was geraite der tot, di wile ich tochte.
6830	ich han mit dir eruochten daz ‹lant› ze Aíune, di maren Petuwe; ich dwanc mit dir Prouinciam unt di starken Progetaneam,
6835	Lancparten ich mit dir reuacht, Pulle machete ich cinshaft; Malue unt Palerne di bedwanc ich minem herren. di grimmigen Sorbiten
6840	unt Baire di stritegen mit ir scarphen swerten, Sachsen di dicke wol herten in manigem grozen uolcwige: si musen im alle nige.
6845	Alemannia[m] ich eruacht, Ungeren nam ich ir chraft, Pritania nemacht mir nicht wider stan, Behaim unt Polan. Franchen di chuonen
6850	ne liez ich nie geruowen, unze si chom an ir rechten stam. Friesen ich mit dir gewan, Scotten unt Ierlant eruacht ich mit miner zesewen hant;
6855	Engellant ze ainer kamere eruacht ich dem chunc Karle unt andriu uil manigiu riche. iane wart din geliche nie gesmidet uf dirre erde,
6860	noch newirt ouh hinne fur niemir mere: daz bewartestu wol an disem wal. ze Moriana in dem tal der engel dich mine[m] herren brachte. gnadiclichen er min gedachte,
6865	benamen er mich nante: er hiez mir Roulante Karln den kaiser zebeschirmen witewen unt waisen dich Durndarten umbe binten.
6870	daz ich ie sa erplinde! daz riwet mich uil sere, nu uergip du mir, himilischer herre, daz ich iz ungezogenlichen sluoc. mines herren sent Petres bluot,
6875	diu herschaft sent Plasien, des hares mines herren sent Dionisien, des gewates miner frouwen sent Marien, der kaiser newolte nie beliben unz in dir uersigelet wart
6880	diu uil groze herschaft. nune wil ich nehainen erben zu dir mere wan den adel herren der durch suntare geborn wart: der gebot mir dise heruart.
6885	ich scol uerwandelen daz leben. in sine gnade wil ich mich ergeben, swaz ich uon im han, want ich sin nimen so wol gan.» den hantschuoch er abe zoch,
6890	in gegen dem himel er in bot; den nam der urone bote uon siner hant: des ist der helt Roulant uon aller der christenhait geret, also uns daz puoh leret.
6895	Roulant uiel in crucestal, er sprach: «herre, nu waistu uil wal daz dich min herce mainet: dine tugent hastu an mír erzaiget. an minem ende,
6900	herre, dinen boten ruche mir zesenden! nu gnade miner armin sele, daz ir dehain boser gaist níne werre. ich mane dich umbe minen herren (gestatige in an dem rechtin,
6905	uerdruche sine wider uechten, daz sine uiante alle geligen, unt er an in gesige in dines namin mínne!) unt umbe di suzen Karlinge,
6910	unt ander sine untertane di beuilhe ich zu dinen gnaden. alle di in mit truwen mainen, lebentige oder uerschaiden, bestatige si in den Abrahames barn!»
6915	er leite sich an sinen zesewin arm, daz houbet er nider naicte, di hende er uf spraite: dem alwaltigen herre[n] dem beualch er sine sele.
6920	mit sent Michahele, sente Gabriele, sent Raphahele frout er sich imer mere. Do Roulant uon der werlt verschît,
6925	uon himil wart ain michel liecht. sa nach der wile chom ain michel ertpibe, doner unt himilzaichen in den zwain richen,
6930	ze Karlingen unt ze Yspania. di winte huben sich da: zi zeualten di urmaren stalboume, daz liut ernerte sich chume. si sahen uil diche
6935	di uorchlichen himil bliche, der liechte sunne derrelasc. den haiden gebrast: diu scheph in uersunchen, in dem wazer si ertruncken.
6940	der uil liechte tac wart uinster sam diu nacht. di turne zeuielen, diu scone palas zegiengen. di sternen offenten sich,
6945	daz weter wart mislich: si wolten alle wane daz di wile ware daz diu werlt uerenden solte, unt got sin gerichte haben wolte.
6950	Der kaiser unt sine helde uon perge zeuelde chomen si ze Runzeual. si uunden an dem wal so uil der toten
6955	daz fuz niemen nemachte gebieten †andi bar der erde. ich wane ouch imer mere werde chlage also fraissam. wer machte sich des enthaben?
6960	uon den rossen si uielen, uf den toten si giengen: ir iegelich suchte den sinen. di not nemachte niemen gescriben diu unter in wart.
6965	der kaiser brach uz sin bart, er uiel zu der erde, er sprach: «waz scol min nu werde?» di brust bluwer mit den hanten. uil chumer rekante
6970	Roulanten unt Oliuire[n] unt Turpin den maren. uil groz wart di chlage sín: «scolt ich nu den lip mín hi zestunde fur iuh geben,
6975	ia scolt ir uon grozem rechte leben. kint des riches, uwer gelichen newurden nie uf der ‹erde geborn›. scult ‹ich› iwer iugent han uerlorn,
6980	uorderistez chunne! daz mir iwer got nine gunde, harte iameret mich des.» do sprach der herzoge Naimes: «herre, ich sihe inoch di molten stieben:
6985	sine mugen uns nicht enphlihen; wir sculn in nach ilen.» do was iz ander wile sam uespercíten. der kaiser hiez si uaste nach riten.
6990	Der kaiser uiel zu der erde, er sprach: «wol du hímílíscher herre, der tác derne gewert uns nicht: nu sende uns, herre, ain liecht, daz wir di rache da genemen!
6995	du scolt uns sigenunft geben: sent uber si dinen zorn, daz si genozzen icht so hin komen! daz dine ich nacht unt tác also lange ich nu leben mác.»

<<< Übersicht <<< vorige Seite nächste Seite >>>

Das Rolandslied

Verse 6000 - 6999

6000

wer saget dem kaiser

wiz got hiute uerendet?

heten wir etwen widir gesendet,

der dem kaiser chunde gesagen

di grozen not di wir unter handen haben!»

6005

Do sprach der helt Oliuir:

«niemir gerate ich iz dir,

noch ist min wille,

liebir hergeselle:

hetestuz inzit getan,

6010

so hetestu manigen herlichen man

dem riche behalten.

min swester Alde

en scol an dinim arme

niemir erwarme.

6015

wer scolte nu gerne leben?

ich han so uil laides gesehen.

niemir mere geplas din horn:

der kaiser mac uns nicht zehelue chom.

macht ich tusent houbit getragen,

6020

ich lieze si elliu abe slahen,

e ich in minen rucke kere

wan nach des riches ere.

wir sculen den sige zehoue pringen,

oder unser dehain chumet niemir hinnen.

6025

daz hastu allez aine getan:

Karl muz uns iemir mere chlagen.

owi suze Karlinge,

disen tac nemac si nicht uber winde!

al ir rat unt wistuom,

6030

paidiu ere unt rvom

was an di kom[en]

di wir hiute han uerlorn.»

Do sprach der biscof Turpin:

«nu tuot ir iz durch minin trechtin:

6035

zurnet nicht mere;

weget der armin sele,

daz diu gnade gewinne!

wirne komen niemir hinne,

iz ist unser iungister tac.

6040

nu der kaiser en mac

uns geheluen enzít,

er richet unseren líp:

sine mugen sich uf der erde

uor im nicht uerperge.

6045

si nement unsere lichenamen,

si furent si zeware

in gesegente chirich houe.

so wuonschent uns heilige biscofe

umbe got gnaden

6050

mit anderen unseren magen

unt peuelhent uns der erde:

wirne sculen den uogelen nicht zetaile werde.»

Roulant uie mit paiden hanten

den guten Oliuanten

6055

sazter zemunde,

plasen er begunde.

der scal wart so groz:

der tumel unter di haiden dóz,

daz niemen den andere[n] machte gehoren:

6060

si uerscuben selbe ir oren.

di hirnribe sich im entrante

dem chunen wigante.

sich uerwandelot allez daz an im was,

uil chume er gesaz;