bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Heinrich von Veldeke

um 1150 - um 1190

	Eneide / Eneit um 1190 Text: Heinrich von Veldeke. (Dichtungen des deutschen Mittelalters 8) Hrsg.: Ludwig Ettmüller, Leipzig: G.J. Göschen'sche Verlagshandlung, 1852 Digitale Edition: Jean L.C. Putmans
_________________________________________________________________________________________
17	Ir habet wol vernomen daʓ, wi der kunich Menelaus besaʓ Troien die rîchen vil gewaldechlîchen,
5	do er sie zefûren wolde dorch Pârîses scholde, der im sîn wîb hete genomen. niht enwolder dannen komen, ê danne er Troien gewan.
10	manech wîb unde man beleib dâ jâmerlîche tôt. dâ was vile michel nôt, dô man die borch sach vallen, under den lûten allen,
15	der vile lutzel dâ genas. manech rîche palas wart dâ zefûret von marmore gemûret unde manech gût hûs.
20	dô wart der kunich Prîamûs dar inne erslagen ze tôde: aleine storber nôde, her nam sîn ende schiere und sîner sune viere:
25	eʓ mûste dâ alsô wesen, dâ ne mohte nieman genesen der gesunden noch der siechen, sint daʓ die Criechen in die borch quâmen.
30	Elenam si nâmen
18	und gâben si Menelâô wider und brâchen Troien dernider. In der borch an einem ende, entgegen dem sundern winde,
5	dâ wonete ein rîche man, den ich genennen wole kan: daʓ was der hêre Ênêas, der dâ herzoge was. des kuneges tohter was sîn wîb
10	der generete sînen lîb. Virgilîûs der mâre, der saget uns, daʓ her wâre von der gote geslehte geboren mit rehte,
15	und Vênûs diu gotinne, diu frowe is uber die minne, wâre sîn mûder und Cupidô sîn brûder. Dô eʓ alsô quam,
20	daʓ Menelaus den sige nam unde Troien zebrach unde sîn leit gerach, daʓ ime dâ getân was, dô hete der hêre Ênêas
25	von den goten vernomen, daʓ her dannen solde komen unde den lîb vor in bewaren und uber mere solde varen ze Italjen in daʓ lant.
30	daʓ weste wol der wîgant,
19	dannen Dardanûs geboren was. dô gesach Ênêas die borch brinnen balde. Dardanûs der alde
5	der was der êrste man, der Troien stiften began. Ênêas der hêre der gedahte im vile sêre, dô ime diu sorge zû quam.
10	sîne frunt er zû im nam, sîne mâge und sîne man, mit in her sprâchen began der herzoge Ênêas, her sagete in daʓ dâ wâr was
15	unde waʓ im was enboten und gewîssaget von den goten, daʓ er sich niht solde erweren und sînen lîb solde generen: daʓ sageter sînen holden,
20	die sich dâ weren wolden, daʓ si alle tôt mûsten sîn. her sprach «lieben frunt mîn, swie diu angest sî getân, doch newil ich niht gân
25	ûʓ ûwer aller râte deweder frû noch spâte. nu saget mir ûwern mût, waʓ ûh dar umbe dunke gût, nâch diu und ir eʓ habet vernomen,
30	ob wir lebende wellen hinnen komen oder wider kêren und sterben mit êren und unser frunt rechen. swaʓ ir wellet sprechen,
35	daʓ û allen lieb sî, des ir mir getorret stân bî, des helfe ich û, ob ich mach.» ir iegelîcher des erschrach, do eʓ an daʓ sterben solde gân:
40	dô dûhte sie daʓ baʓ getân,
20	daʓ sie daʓ lant rûmden denn sie sich dâ versûmden und rûm dâ erworben, dâ si umbe erstorben.
5	Do gesach der hêre Ênêas, daʓ im vile leit was, daʓ man daʓ lant wûste und er Troien rûmen mûste mit den sînen mannen.
10	her wonete verre dannen, dâ die Criechen branden, her ne mohteʓ niht geanden: eʓ was zû der wîle wol uber zehen mîle.
15	der schade nâhet im harde; iedoch schûf er die warde, daʓ her al sîn gût nam und dâ mite enwech quam swar sô im geviele.
20	dô vant her zwênzich kiele wol bereit und gespîset; die worden ime gewîset sîme hûse gnûch nâ. die Criechen lieʓen sie dâ,
25	die si dar heten braht, und wâren hin dâ man dâ vaht. sone mohte her getûn baʓ, her nam sîn gût und schûf daʓ siʓ hin zen schiffen fûrden.
30	vaste sie sich rûrden her und sîne holden, die mit im varen scholden. sînen vater hieʓ er danne tragen: der was sô komen ze sînen tagen,
35	daʓ er niht mohte gân. daʓ het ime daʓ alder getân. sînen sun leiter an sîner hant. dar umbe rûmde her daʓ lant, daʓ her generete sînen lîb:
40	dâ verlôs her sîn wîb,
21	êr her ze schiffe quam. ich ne weiʓ wer sime nam. Dô der hêre Ênêas ûʓ der borch komen was,
5	dô hete der helt milde wol drû tûsent schilde unde ritter alsô vile; dô gieng eʓ ûʓer deme spile. dô sie zen schiffen quâmen,
10	ir anker si dô nâmen und zogen si ûʓ dem sande. der wint quam von dem lande und treib si verre ûf daʓ mere. dô was daʓ Ênêases here
15	sumelîcheʓ vil frô. dô was diu gotinne Jûnô Ênêase vil gehaʓ unde teteʓ umbe daʓ, daʓ sin minnern wolde
20	dorch den apphel von golde, den Pâris froun Vênûse gab. dâ quam al der nît ab, daʓ Troie wart zebrochen. dâ mit wart daʓ gerochen,
25	daʓ saget uns Virgilîûs, des gehalf frou Vênûs, daʓ Pâris Elenam nam: dâ grôʓ ubel vone quam. Dô intgalt Ênêas,
30	daʓ ime frouwe Jûnô was ungenâdich unde gram. dô her ûf daʓ mere quam und dannen varen solde, swar sô her hin wolde,
35	sie was im ie widere mit starkem ungewidere. diu bûch sagent uns vor wâr, daʓ sin volle siben jâr ûf dem mere errete
40	und von dem lande verrete,
22	dâ her gerne wâre. eʓ was ir ummâre, des leider grôʓe quâle. si erscheinde im zeinem mâle
5	unsanfte ire maht drî tage und drî naht. si tet im grôʓen tormint, beide storm unde wint, mit regene und mit hagele.
10	eʓ brasten ire nagele an ir schiffen vaste, ir segele unde ir maste, ir rûder und ôch ir rahen: si wolde se al ze tôde slahen
15	diu gotinne Jûnô. dô quam eʓ alsô, daʓ der schiffe eineʓ versank unde daʓ volc ertrank alleʓ daʓ dar inne was.
20	dô clagete Ênêas, daʓ her ie dare quam, daʓ her sîn ende niht ennam zû Troie mit êren mit Pârise sîme heren.
25	her sprach, her woldeʓ iemer clagen, daʓ er niht enwart erslagen bî dem kunege Prîamô. der stormwint zerteilde dô diu schif vile wîten.
30	alsô mûstens rîten, wan sie sich vor den unden berihten niene kunden. Dô was dâ en sorgen den âbent und den morgen
35	vile manich mûder barn. alsô mûsten sie varn unze an den vierden tach, daʓ der wint dô gelach und die starken unden
40	stillen begunden,
23	und geslihtet wart der sê, der sô rûch was ê, unde hûb sich der tach. dô daʓ Ênêas gesach,
5	daʓ sich daʓ mere slihte, sîn houbet her ûf rihte der wol gelobete wîgant: her gesach von Libîâ daʓ lant und die berge vile hô.
10	des was sîn herze vil vrô, daʓ in Fortûnâ sus erlôste. sîne lûte her dô trôste, daʓ sie sich wol gehielden und rûrden unde schielden,
15	daʓ si ze lande quâmen und die habe dâ nâmen alsolich sô si wâre. daʓ was ein nûwe mâre, daʓ si gerne hôrden.
20	si sprungen zû den borden, si stunden unde rûrden, manlîche sie fûrden ir arme und ir hande, unz si quâmen ze lande.
25	Dô si daʓ lant geviengen und ûʓ den schiffen giengen und an die erde quâmen, daʓ gemach sie dâ nâmen alsolich sô siʓ funden.
30	dô si dô begunden ir schif zellen die ellenden gesellen, sô ich die rede hân vernomen, dô was der schiffe dar komen
35	sibeniu unde niht mê, der dâ zwênzich wâren ê, dô si von Troie fûren ensament von der mûren. Dô der hêre Ênêas
40	in die habe komen was
24	lutzil gûtes her dâ vant. dô sander boten in diu lant zwênzich ritter gûte mit geinôtem mûte,
5	daʓ si versûchten mâre waʓ landes daʓ wâre, daʓ siʓ gesagen kunden, obe si iender funden kouf unde spîse.
10	Ylîonix der wîse der meisterde die schare, diu dâ hin solde varen. Dô die helide balde gefûren after walde
15	alle wîle erre, dô quâmen si alsô verre, da si eine strâʓen funden. zû den selben stunden wolden si daʓ niht lâʓen
20	sine volgeten der strâʓen, unze si ûʓe quâmen. dâ si doch vernâmen ein vil liebeʓ mâre. si gesâgen offenbâre
25	eine grôʓe borch stân vast unde wolgetân. daʓ was Kartâgô, die diu frouwe Dîdô bûwete unde stihte;
30	daʓ lant sie berihte sô iʓ frouwen wol gezam. ich sage û wie si dare quam, alsô von ir is geschriben: si wart von Tyre vertriben.
35	Sie was in daʓ lant komen, als ich eʓ wol habe vernomen und ich û wol gesagen kan. Sichêus hieʓ ir man, den ir brûder irslûch.
40	her tet ir leides genûch
25	âne alle ir scholde, wande er haben wolde daʓ lant, daʓ ime gar beleib, dô her die swester vertreib.
5	Dô ir der brûder wart gehat, dô nam si michelen schat unde ein lutzileʓ here und fûr mit schiffen uber mere und quam ze Libiâ in daʓ lant
10	zû dem hêren den si dâ vant, der des landes dâ gewielt unde die hêrschaft hielt. listichlîchen sie in bat, daʓ er ir verkoufte an einer stat
15	eine wênege rîcheit: sînes landes alsô breit, dâ eʓ ir ze nemenne tohte, als vil sô si belegen mohte mit einer wênegen rindes hût.
20	in den zîten was daʓ lût ein teil alwâre. eʓ was im ummâre: der frouwen herʓ erloufte, daʓ lant her ir verkoufte.
25	Dô hieʓ si einen ir trût nemen eine rindes hût, sine woldeʓ niht vermîden, si hieʓ die hût snîden zeinem smalen riemen
30	und nam dô einen priemen und hieʓen stechen in daʓ lant. den riemen si dar ane bant, si nam in an dem ende selbe mit ir hende,
35	dâ mite sie dô umbe gienk; mit deme riemen sie bevienk einen kreiʓ wîten. in den selben zîten stihte frouwe Dîdô
40	veste torne unde hô,
26	eine schône mûre. des nam si lutzel tûre, wande si was vil rîche: und warb dô listichlîche,
5	unz sie sô verre vore quam, daʓ ir wart gehôrsam Libîâ daʓ lant al uber berch und uber tal. Ir diende lût unde lant,
10	daʓ sie dâ nieman ne vant der ir getorste widerstân, wan diu borch was sô getân, daʓ siʓ alleʓ mite betwank. eʓ wâre ze sagenne alze lank
15	umbe die borch mâre, wie si gebûwet wâre. des Virgilîûs der helt in sînen bûchen dar von zelt, des scholen wir vil lâʓen
20	unde nâch der mâʓen die rede harde korten. si hete siben porten, bî der iegelîcher saʓ ein grêve rîcher,
25	ob eʓ nôt wâre, der die borch mâre mit drin hundert rittern solde weren, ob si ieman wolde heren. dar abe heten sie lêhen.
30	die frouwen mûsten si alle flêhen die rîchen hûsgenôʓen. an Kartâginê der grôʓen stunden torne hundert. swen sô des wundert,
35	wil her eʓ versûchen, her kome zû den bûchen diu dâ heiʓent Êneide. nâch der wârheide, als eʓ dar ane gescriben is,
40	sô mach hers wol sîn gewis.
27	Kartâgô was rîche und stunt gelegenlîche aller slahte gûte. des ieman was ze mûte,
5	daʓ iender wesen solde, der eʓ dâ sûchen wolde, daʓ funden solde werden in waʓʓer joch in erden, des vant man alles dâ genûch,
10	daʓ waʓʓer unde lant trûch. daʓ mer gienk einer sîte daʓ tiefe unt daʓ wîte und anderhalb die flûmen grôʓen unde rûmen:
15	da enmitten stunt diu borch sô vast, daʓ si niene vorhte ein bast alleʓ erdische here. an einem ende ûf dem mere hete frouwe Dîdô
20	torne veste unde hô, dâ ir wonunge was. dâ stunt ein rîche palas und schône kemenâten hêrlîche berâten.
25	Michel was ir wîstûm. si hete grôʓen rîchtûm: des vorhte man si sêre. in vrowen Jûnônen êre stunt ein munster dâ
30	bî ir hûse gnûch nâ, daʓ machte frouwe Dîdô. dâ wart diu gotinne Jûnô vil harde inne gêret. Dîdô hete gekêret
35	ir flîʓ wole dar zû beidiu spâte unde frû. daʓ tete si dorch die scholde, daʓ Jûnô schaffen solde, daʓ Kartâgô diu mâre
40	houbetstat wâre
28	uber alliu diu rîche, und daʓ ir gelîche diu lant wâren undertân. eʓ enmohte niht sô ergân:
5	sint hete Rôme den gewalt, daʓ man ir den cins galt und man ir in sande von vil manegem lande. daʓ was sît uber manich jâr,
10	daʓ weiʓ gnûch lûte vor wâr. Dô die boten quâmen dare und sie der borch worden geware und sie si ane gesâgen, do begonden si frâgen
15	umbe die borch mâre, wer dâ hêre wâre uber die stat und uber daʓ lant. dô sageten in zehant die lûte die si dâ funden,
20	die sis gevrâgen kunden, eʓ wâre Kartâgô, dâ diu frouwe Dîdô gewaldich uber wâre. dô si dô daʓ mâre
25	rehte vernâmen, mit frâge sie dô quâmen vor die frowen, dâ sie dô was nâhen bî ir palas in einer kemenâten.
30	si worden des ze râte, daʓ si dare wolden gân. dô siʓ heten getân, do enphienk si gûtlîche frowe Dîdô diu rîche.
35	Dô gnâdeten sie der frouwen der minnen und der trouwen, die si an ir funden. so si aller beste kunden, sô sprâchen sir ze holden
40	und sageten daʓ si wolden
29	helfe rât unde frede. Ylîonix sprach die rede, dar umbe si ûʓ wâren komen. «frowe, ir habet wol vernomen,
5	sô ich rehte wâne, irn sît des niht âne, irn habet daʓ wort gehôret, wie Troie wart zestôret unde wie daʓ irgienk,
10	daʓ man lûte dâ vienk, daʓ dâ lutzel iemen genas, und wie mîn hêre Ênêas mit ein luzel lûte danne fûr, daʓ ime is worden vile sûr
15	und die mit im wâren in disen siben jâren. die gote heten in gesant zû Italjen in daʓ lant. sine mohten im aber niht gefromen,
20	daʓ er dar in mohte komen. daʓ lant is uns geverret: uns hât harde gerret unsanfte tormint; uns hât weter unde wint
25	misselîchen getriben; uns is daʓ leben kûme bliben vor des meres unden. wir sâgen zeinen stunden daʓ unser schiffe eineʓ versank
30	und daʓ volc alleʓ ertrank. des wâren wir alle vil unfrô. sich hât diu frouwe Jûnô harde an uns gerochen. unser schif sint uns zebrochen,
35	di borde und die negele, und geriʓʓen unser segele; zebrochen sint die maste unde diu rûder vaste, die lînen und diu ankerseil.
40	unser schiffe is noch ein teil
30	kûme an daʓ lant komen, unde habent habe genomen hie bî an ûwer lant. mîn hêre hât uns her gesant,
5	daʓ ir im wellet gnâdich wesen und in hie lât bî û genesen und weteres irbeiten und sîniu schif bereiten. ob eʓ û gevalle
10	her dient û und wir alle, swie sô ir gebietet. wir hân uns genietet grôʓer arbeite ûf dem mere breite.»
15	Do antworde im frouwe Dîdô, si sprach «ich bin des vile frô, daʓ ir her sît komen. ich hân eʓ alleʓ wol vernomen umbe Troie, wieʓ dâ quam,
20	wie Menelaus den sige nam. ich weiʓ es wol die wârheit: ir habet michel arbeit irliden nu vil manegen tach, des man gelouben wole mach,
25	wande ich weiʓ wol ein teil umb ellende und umb unheil und umbe solhe schifvart, sint daʓ ich vertriben wart, êr danne mich got hie beriet.
30	ichn bin hinnen geboren niet: Tyre daʓ was mîn lant. der ûch dâ here hât gesant, Ênêas der hêre, dem wil ich gût und êre
35	und dienstes tûn alsô vil, alser selbe nemen wil. ich wil im bieten âne nôt daʓ ich nie manne erbôt in der werlde noch nie,
40	und wolder alleʓ wonen hie
31	und lieʓe sîn umbevaren stân, des her genûch hât getân. nu in got here hât gesant, ich teile im lûte unde lant
5	und alleʓ daʓ ir hie gesiet. und enwil her des tûn niet, die wîle und er wil hie sîn, ich und al die frunt mîn unde borch unde lant
10	unde schaz unde gewant daʓ stêt ze sîneme gebote. ich wil es danken deme gote der in dâ her sande. her sal in diseme lande
15	alles des haben genûch, des disiu erde ie getrûch her und sîne holden, ob si eʓ haben wolden, die wîle unz ich sal haben daʓ leben.
20	ich woldes in genûch geben mit lîhteme gedinge âne phenninge jungen unde alden. ich wil in wol behalden
25	in mîner kemenâten. ich wil in wol berâten gelîch mîn selber lîbe. nien wart von einem wîbe baʓ enphangen ein man,
30	ob ich mach und ob ich kan.» Die boten wâren vile frô, dô in diu frouwe Dîdô alsô gûte rede bôt, wan des was in doch nôt.
35	mit der frouwen urlove fûren sie ûʓ deme hove unde kêrden hin nider zir hêren Ênêase wider aldâ sie in funden.
40	in den selben stunden
32	wâren diu schif zesamene komen, diu in der wint hete genomen, diu si wânden hân verloren in deme storme dâ bevoren.
5	diu stunden al ensament dâ bî einander gnûch nâ, sunder daʓ dâ was versunken, dâ die lûte inne irtrunken, des si sint iemer mêre enbâren.
10	diu ander in komen wâren, des wâren si alle vile frô. Ênêas was vile hô ûf einen berch gegangen, dô in begunde belangen
15	nâch den, die her hete gesant dorch versûchen in daʓ lant umbe solhiu mâre, als im lieb wâre unde er gerne hete vernomen.
20	do gesach her die boten komen. Ingegene in her dô gienk, minnechlîche er sie enphienk mit frôlîcheme mûte, dô ime die boten gûte
25	nâhen begunden. her sprach «waʓ habet ir funden?» «alleʓ gût.» «unde waʓ ?» «Kartâgô.» «waʓ is daʓ ?» «eʓ is ein borch hêre.»
30	«dorch got, saget mêre, is si verre?» «nein, s'is nâ.» «fundet ir den kunich dâ ?» «da nis kuneges niht.» «wie denne sô ?» «dâ is diu frouwe Dîdô.»
35	«gesprâchet ir si ?» «jâ wir tâten.» «wie fundet ir si ?» «wol berâten.» «waʓ enbûtet sie uns ?» «alleʓ gût.» «meinet sie eʓ ?» «jâ si tût, sie enphienk uns mit minnen
40	und wil ûch des brengen innen,
33	daʓ ir ir willekomen sît zû alsô langer zît, sô ir mit ir wellet sîn. sie wil û daʓ lâʓen schîn,
5	daʓ si ûch vil gerne siht. û enmach hie gewerren niht noch nihtes gebrechen des ieman mach gesprechen. des ir wellet oder geret,
10	ir werdet es alles geweret. welt ir zû ir kêren. sie wil û mit êren, ob ir mit gnâden wellet leben, und âne kouf genûch geben.
15	lâʓet sis gewalden, si wil ûch wol behalden in ir selber palas.» des frowete sich Ênêas. Dô her die boteschaft vernam,
20	zû sînem volke er wider quam frôlîch und offenbâre und sagete in daʓ mâre, daʓ er hete vernomen, wie sîne boten wâren komen.
25	zû zin nam er dô rât umbe sô getâne tât, waʓ si des râten wolden, ob si dar varen solden. dô worden si des alle vrô,
30	daʓ in diu frouwe Dîdô die rede ie wolde enbieten. vil vaste si im rieten beide junge und alde, daʓ her dar fûre balde.
35	Dô wart her des ze râte, daʓ er alsô tâte, wande siʓ alle rieten. dô hieʓ her gebieten den rîtâren, die her wolde,
40	die her mit im fûren solde.
34	niht si dô ne beiten, vil wol si sich gereiten mit hêrlîchem gewande, des si von ir lande
5	gnûch dare brahten, zierheit maneger slahte und manege grôʓe rîcheit. dô si alle wâren gereit sô eʓ hêren wol gezam,
10	Ênêas zû ime nam ritter funf hundert, die hete her gesundert unde erkoren ûʓ dem here daʓ er braht het uber mere,
15	die wâren ime alle gereit. an den het her die fromecheit vil ofte erfunden, daʓ si vil wol kunden sprechen unde gebâren
20	und edele lûte wâren und sumelîche sô wol getân, ob si vor den keiser solden gân daʓ si im wol gezâmen. man saget uns, daʓ si nâmen
25	manich gût kastelân snel unde wol getân und manich schône râvît. dô eʓ den hêren dûhte zît daʓ er zû der borch rite,
30	dô was er nâch sîme site gekleidet hêrlîche. Ênêas der rîche der was ein schône man, deich û niht vollen sagen kan,
35	wie rehte minnechlîche er was. dô reit der hêre Ênêas mit den sînen mannen hêrlîche dannen mit einer schônen schare.
40	dô hieʓ er mit den schiffen varen
35	hin zû der mûren, dar si doch gerne fûren. Dô her zû der borch quam, dô dûhte si in vil lussam
5	ûʓen unde innen. sine mohte niht gewinnen dehein here mit gewalt. dô der mâre helt balt mit sînem volke dar în reit,
10	die strâʓe vander vile breit und sach beidenthalben stân manich hûs wol getân und manich rîche palas, daʓ von marmore was,
15	dâ her vor solde rîten, und gesach en beiden sîten magede unde frouwen, die in wolden schouwen, gezieret unde gebunden,
20	so si allerbeste kunden, die in gerne sâgen. sine dorften niht frâgen, welich der hêre wâre: Ênêas der mâre
25	was sô schône dâ bevoren, daʓ er lîhte was erkoren. Dô quam der hêre Ênêas dâ frouwe Dîdô was, diu mâre und diu rîche.
30	si enphieng in minnechlîche und dar zû alle sîne man. dô sin kussen began, sie schûf im sînen gemach, daʓ ime nihtes gebrach
35	und allen sînen holden: man tet dâ daʓ si wolden. Dô der hêre Ênêas in die borch komen was frowen Dîdônen ze hûs,
40	do geschûf sîn mûder Vênûs
36	und sîn brûder Cupidô, daʓ in diu frouwe Dîdô starke minnen began, daʓ nie wîb einen man
5	harder mohte geminnen. des brahte sie in innen, daʓ sis ubele genôʓ. ir minne diu was ze grôʓ, wand si drumbe mûste geben
10	ze aller jungest ir leben und jâmerlîche ir ende nam. nu hôret, wie eʓ dar zû quam. Dô eʓ alsô ergienk, daʓ Ênêam enphienk
15	frowe Dîdô diu rîche alsô gûtlîche und alle die von deme lande, sîne boten her dô sande von der borch hin nidere
20	zû den schiffen widere nâch Ascânjô sîme sun. dannoch hieʓ er mêre tûn Ênêas der mâre: sînen kamerâre
25	hieʓ er schiere brengen ( ern woldeʓ niht lengen ) einen koph von golde, den ein sîn holde hete in grôʓer hûte,
30	und einen mantel gûten harmîn wîʓ alse ein swane. der zobel was dar ane breit, brûn alse ein bere ( den het er braht uber mere ),
35	lanc zû den fûʓen, her was geworht mit mûʓen. der samît was gût rôt. eʓ ne was dehein nôt, daʓ ieman des gerûchte,
40	daʓ er einen beʓern sûchte
37	iender an deheiner stat. dar zû her ime brengen bat zwêne bouge und ein vingerlîn und ein nusken guldîn,
5	meisterlich gewieret mit golde wol gezieret und einer rîchen frowen gewant, sô nie in daʓ lant dehein beʓereʓ quam.
10	eʓ was vile lobesam: ein pheller dalmaticâ. in hete diu kunegin Êcubâ ane, sô si die krône trûch. her was lobelich genûch,
15	hern mohte niht beʓer sîn. Ênêas lieʓ wole schîn wes her dâ mite gedahte. dô man eʓ ime brahte, dô sand erʓ frouwen Dîdôn.
20	diu gab ime den widerlôn sô harde ûʓ der mâʓen, der beʓer wâre verlâʓen. Zû den selben zîten, do ze hove wolde rîten
25	der jungelink Ascânjûs, dô rûrdin frouwe Vênûs mit ir fûre an sînen munt sâ zû der selber stunt ê her zûze hove rite
30	unde gab im dâ mite solhe kraft von minnen dâ, swer sô in kuste dar nâ zû dem êrsten mâle, daʓ der von minnen quâle
35	verholne und offenbâre dâ intfenget wâre mit der minnen fûre. daʓ koufte vile tûre Dîdô, diuʓ dar abe nam,
40	dô daʓ kint ze hove quam.
38	Vernemet seltsâniu dink. do Ascânjûs der jungelink zû der frouwen bequam, dô was her vile lussam.
5	gezogenlîche er zû ir gienk, mit den armen her si umbevienk, si kuste in an sînen munt: des wart si zû der stunt vaste bestricket.
10	in ir wart erquicket der minnen fûr vile heiʓ, dâ luzel ieman umbe weiʓ, den eʓ nie gebrande. die starken minne sande
15	diu gotinne Vênûs frouwen Dîdôn ze hûs, dâ si ir selber umbe vergaʓ. Ênêas bî ir saʓ do si also brinnen began.
20	her was ein vil schône man unde minnechlîche getân. done mohte si des niht engân, si enmûste in starke minnen. êr hers worde innen
25	des dûhte die frowen vil lanc, wan sie diu minne sêre dwanc. Do enweste niht Ênêas, daʓ im frouwe Dîdô was sô unmâʓlîchen holt,
30	wande si grôʓe undolt in ir herzen verhal, daʓ sie von minnen alsô qual. sine getorste niht beginnen, daʓ si ime der minnen
35	zêrist zû gewûge. swie si sie vertrûge, es nam si grôʓe hâle, sint ir Vênûs die strâle in daʓ herze geschôʓ.
40	sie leit ungemach grôʓ,
39	diu mâre frouwe Dîdô. dô quam der hêre Cupidô mit sîner vakelen dar zû und habet ir spâte unde frû
5	daʓ fûre an die wunden. si wart in korzen stunden vil mislîchen gevar. daʓ gesâgen die des nâmen war. si leit vil michile nôt.
10	in korzer stunde wart si rôt, dar nâch schiere varlôs: ir was heiʓ und si frôs. Si was von minnen alsô wunt: daʓ ir ê was wole kunt,
15	daʓ mûste mans dô lêren. sine weste sich war kêren, sie leit michel arbeit. dô daʓ eʓʓen was gereit und si uber tisch quam,
20	dô diende man als es wol gezam ir unde ir gesten, den lîhten und den besten, man gab in gnûch uber al in der kemnâten und in dem sal
25	vil gezogenlîche. frowe Dîdô diu rîche hete es wol gerâten mit den die eʓ tâten, wand ir der hêre Ênêas
30	ein vil lieber gast was und alle sîne gesellen. man enmohte niht gezellen diu rihte noch daʓ trinken. des ieman mohte irdenken
35	des heten si alle genûch. gefûchlîch manʓ vore trûch. Dô daʓ eʓʓen was getân, dô was dâ manich Troiân wol gemût unde frô.
40	nu was die frouwe Dîdô
40	und der hêre Ênêas aldâ in lieb was ensament geseʓen an ein stat. minnechlîche sie in bat,
5	daʓ her sich bedehte unde ir sagete rehte, wie Troie wart gewunnen. her sprach «ir habet begunnen einer rede, diu mir wê tût.
10	sint eʓ ûch aber dunket gût, ich bin sîn, frouwe, vil gereit, daʓ ich û sage die wârheit, wande ich si wol gesagen kan, sô daʓ ûch des nieman
15	baʓ berihten enmach, wande ichʓ hôrde unde sach. Ich bin es alles vil gewis, dô Alexander Pâris Menelâô sîn wîb nam,
20	dâ michel ubel abe quam, des maneger ubele genôʓ, Troie diu was vile grôʓ, [ drîer tageweide lank al bî des meres gank,
25	und ] einer tageweide wît. wir wâren dô zû der zît vil harde vermeʓʓen. dô wir worden beseʓʓen, wir heten manegen fromen man,
30	sô ir nie kunich mê gewan, in einer borch alsô vil, daʓ mach glouben swer sô wil, eʓ is diu rehte wârheit. die Criechen funden uns gereit
35	ze storme und ze strîte ze aller slahte zîte, ze rosse und ze fûʓe. wir heten gûte mûʓe, wande wir wâren zehen jâr
40	alsô beseʓʓen, daʓ is wâr.
41	werhaft sie uns funden, wir hâten under stunden mêr denne ein jâr frede ûf bescheidene rede,
5	daʓ wir zû zin giengen unde si uns enphiengen und si zû uns quâmen und unsen kouf nâmen und alsô fûren her unt dar.
10	dô sie des worden gewar daʓ si uns mit deheinen sinnen niht mohten gewinnen und dicke schaden heten genomen, dô wârn si des enein komen,
15	daʓ si uns begeben wolden und dannen varen solden. Dô si ze râte worden des, dô erretes Ulixes, dem wir iemer mogen flûchen.
20	her sprach, her wolde versûchen ein list, des her hete gedaht. dô hieʓ er tach unde naht ein ros von holze machen grôʓ. der arbeit in niht verdrôʓ.
25	eʓ was wît unde hô und was gemachet alsô, sô uns dar abe gesaget is, daʓ wir des soln sîn gewis, mit funfzich solren sunder
30	obene unde under und mit solhen sinnen, daʓ man tete enbinnen ritter funfzich hundert von dem here gesundert.
35	dô eʓ alleʓ getân wart, dô hûben sie sich an die vart unde fûr bî naht daʓ here mit den schiffen in daʓ mere hin dan in ein lant,
40	dâ man sie sint inne vant,
42	und lâgen dâ verborgen. als dô quam der morgen unde lieht wart der tach und man daʓ wunder gesach,
5	dô wart daʓ schiere mâre, daʓ daʓ here entrunnen wâre. Dô manʓ in der borch vernam, dô reit der kunich Prîam dar ûʓ mit sînen mannen.
10	dô was daʓ here dannen. des wâre wir alle vile frô daʓ eʓ komen was alsô. eʓ quam uns doch unrehte. eʓ quâmen unser knehte
15	da si einen man funden nacket unde gebunden, der uns alle betrouch und uns tûvellîche louch. niht langer sie ne beiten,
20	vor den kunech sin leiten. her quam in der gebâre, als er siech wâre. wunderlich was sîn klage, alser betalle wâre ein zage,
25	mit den zenen slûch her manegen slach. dô in der kunich ane sach, dô zalder in zeinem armen und begunde in zerbarmen. her gebôt daʓ man in enbant
30	und hieʓ im geben gût gewant. dô frâgete man in mâre, wâ daʓ here wâre und war umbe er dâ wâre bliben. dô begunde er weinen unde biben.
35	Her sprach «hêre, ich bin ein Kriech und von angesten siech, des wirt mir unsanfte bûʓ, wande ich nu sterben mûʓ. vile sicher bin ich des.
40	alsô wolde Ulixes,
43	der mir mînen ôheim slûch. daʓ was mir widermût genûch unde leit und ungemach. dorch daʓ ich sô vil gesprach:
5	quâmeʓ alse ich wolde, daʓ ich in rechen solde, dar umbe hieʓ er mich vân und wolde mich ze tôde erslân. do eʓ alsô was ergangen,
10	dô hielt her mich gevangen, unz die Kriechen opher solden tûn ( sprach der schalk Synûn ) ze lobe allen den goten. alsô dô daʓ was geboten,
15	daʓ man einen Kriechen solde erslân, ( daʓ solde dorch daʓ sîn getân, daʓ in genâdich wâre Êolûs der mâre, der kunich von den winden,
20	daʓ her si wolde senden ze lande wider uber mere): done was under al dem here nieman alsô helfelôs, dô man mich dar ûʓ erkôs.
25	daʓ tet aber Ulixes. her was meister des, daʓ ich dar zû wart erkoren. des hete ich nâch den lîb verloren. ich was dar zû gereitet,
30	mich hete dar geleitet Ulixes und die sîne. mit olei und mit wîne was mir daʓ houbet gewaschen. si heten mir mele und aschen
35	drûf geleget beide. ichn gestunt mir nie sô leide: ich gesach den bî mir stân, der mirʓ houbet solde abe slân. daʓ swert hete her gezogen
40	und ich was dernider gebogen.
44	den hals hieʓ er mich endecken, und ich wolde in strecken: dô wart zû der selber zît underm here ein michel strît.
5	dô des der kunich wart gewar, dô fûr er ageleiʓe dar und die andern alle nâ und lieʓen mich eine dâ. bî mir beleib dâ nieman.
10	dô ich den rûm dô gewan, ich flôch hinder in dan. ichn weiʓ wen si hân erslan, alsô sie mich solden. zeim opher sie mich wolden,
15	unde hânt wint gewunnen. Êolûs hât in gegunnen, daʓ si sint uber sê. des is ein jâr unde mê, daʓ si gerne wâren hinnen.
20	sin mohten die borch niht gewinnen, die wîle daʓ frou Pallas drinne in der borch was alsô harde gêret. nu sint si hinnen kêret,
25	alse ir wole habet vernomen: irn dorfet rûchen wenne si komen.» Der kunich hieʓ in dô frâgen umbe daʓ ros, daʓ sie dâ sâgen, waʓ daʓ wesen solde
30	und dorch welhe scholde eʓ dâ gemachet wâre. dô sageter uns ein mâre, daʓ betalle was erlogen, dâ mite worden wir betrogen.
35	diu luge was im vil gereit. her sprach «eʓ is diu wârheit, daʓ diu gotinne Pallas hie ûʓe harde erbelget was umb daʓ die Kriechen tâten,
40	die ubele wâren berâten.
45	eʓ quam von unsinne. si schûfen, daʓ dar inne ir bilde wart zebrochen. daʓ hât si wol gerochen,
5	daʓ man eʓ dorch tumbheit brach. des wart sint leit und ungemach den blôden und den kûnen. dô wolden siʓ versûnen mit sûnlîchen sachen.
10	daʓ ros hieʓens machen alsô grôʓ und alsô hô, und was gemachet alsô, daʓ man daʓ wolde, daʓ si dar ûf solde
15	gewâfent sîn gesetzet. dô wart daʓ geletzet dorch ein schînbâre nôt: der werkmeister der is tôt, der eʓ machen began.
20	nu enis dehein man der selben liste sîn genôʓ. dar umbe macheten siʓ sô grôʓ, daʓ irʓ mit deheinen dingen in die borch moget bringen.
25	Ich wil eʓ sagen mit sinne: dâ is hêrtûmes inne sô unmâʓlîchen vil, daʓ man daʓ gelouben wil, in swelher borch sô eʓ blibe,
30	daʓ michel êre dâ beclibe von sige unde von sâlden, moht eʓ werden ganz behalden.» dâ mite verriet uns der warch, her was listich unde karch,
35	daʓ wir wânden wole tûn. her nande sich Sînûn: eʓ was idoch Ulixes. grôʓen schaden nâme wir des, daʓ wir sînen willen tâten:
40	des worden wir verrâten.
46	Wir wâren alwâre und wânden, daʓ eʓ wâre alleʓ wâr daʓ her gesprach, dâ uns leit und ungemach
5	und michel schade abe quam. sîn rede dûhte uns lussam. wir markten sie ze gûte und wart uns des ze mûte, dô wir uns besprâchen,
10	daʓ wir unser mûren brâchen funfzich klâfteren nider, dane sprach dô nieman niht wider. daʓ ros zogen wir dar in. daʓ was ein michel unsin
15	unde grôʓ unmâʓe. wir rûmden eine strâʓe funfzich klâfteren breit. wir tâten grôʓe tumbheit. eʓ gienk ûffe schîben:
20	dô hieʓen wir eʓ trîben vor unsers munsters tor, ûf einen hof dar vor wîten unde langen. dâ wart eʓ wol enphangen
25	mit lobe unde mit sange, in grôʓeme gedrange, mit tambûrn und mit seitspile. dâ was der wunnen vile. wir wâren alle in hogen,
30	daʓ wir iemer clagen mogen. Diu wunne was dâ vile grôʓ unzes die lûte dâ verdrôʓ und si begunden swâren, wande si mûde wâren,
35	daʓ si der slâf dannen treib und daʓ ros eine bleib. dô daʓ die gesâgen, die in dem rosse lâgen, daʓ si die stade gewunnen,
40	daʓ ros sie engunnen
47	an dem bûche und an der sîte. sie macheten tore wîte, dar ûʓ si balde giengen. die borch si al beviengen,
5	ir willen sie dô tâten. si wâren wol berâten, si heten dâ ze stunt ritter funfzich tûsunt, daʓ was ein michel here.
10	dô wart âne were diu meiste borch gewunnen. hetes uns got gegunnen, eʓn mohte niht alsô wesen, ob wir solden sîn genesen.
15	si brâchen die borch und branden, daʓ fûr si ûʓ sanden. dô daʓ jene gesâgen, die in den schiffen lâgen, die danne wâren gevaren
20	mit den grôʓen scharen, unde sis worden gewar, dô kêrden si alle dar, daʓ mâre mahtige here. dô ne dorfte unser were
25	niender werden begunnen: sus wart diu borch gewunnen. Dô eʓ alsô komen was, daʓ nieman genas, die sich dâ wolden weren,
30	dô wolde ich mînen lîb neren, wande eʓ was mir geboten von mînen mâgen den goten. dô ich weste unde gesach, daʓ diu borch der nider lach
35	unde ich niene mohte genesen, ob ich dâ wolde sîn gewesen: dô hûb ich mich dannen mit drin tûsent mannen mit vil hêrlîchen scharen
40	und wolde zû Italjen varen
48	uber daʓ mere breite. nu bin ich mit arbeite alsus her zû û komen, alse ir wole habet vernomen.»
5	Des wunderde sich frou Dîdô, daʓ man Troien alsô gewan unde zebrach. sine rûchte waʓ her sprach, wan daʓ her eht sprâche.
10	si forhte daʓ ir gebrâche der stade und der wîle. sine hieʓen niht îlen: ir tete vile baʓ, daʓ si zî ime saʓ
15	unde si wider in sprach, daʓ was ir mêre gemach dan si ûf eime bette lâge unde sie sîn niene sâge. alsô was sie bedaht:
20	mûste si alle die naht bî ime sîn geseʓʓen, si hete wol vergeʓʓen alles des in der werlde was. dô der hêre Ênêas
25	der rede genûch hete getân unde slâfen solde gân dâ sîn bette was gereit, daʓ was der frouwen vile leit, wand si ungerne von im schiet.
30	alsus saget uns daʓ liet. Dô si dô dannen solde gân, done mohte sie niht ûf stân, wan daʓ ir half Ênêas, daʓ ir vil aneminne was.
35	vil linde dûhte sie sîn hant. dô leite sie den wîgant in eine kemenâten. dâ wâren wol berâten diu bette senfte unde weich.
40	dâ in sie mit ime streich.
49	si frâgete den kamerâre, ob daʓ bette senfte wâre. si hieʓ daʓ senfte machen. nû was daʓ deckelachen
5	purper unde marderîn, eʓn dorfte niht beʓʓer sîn; daʓ lîlachen cleine wîʓ unde reine, daʓ bette senfte unde wît.
10	diu zieche was ein samît wol gedûht mit vederen, diu underzieche lederen, vile weich unde vast. dar ûffe solde der gast
15	rûwen under stunde, dem sis wole gunde. dô ze deme mâle ein colter von zendâle lach underm bette ûf dem strô.
20	daʓ hete frouwe Dîdô alleʓ ensament dar gesant daʓ gûte bettegewant. der bolster was phellelîn und daʓ wankusselîn
25	ein vil gût samît was. des gnâdete ir Ênêas. Die kerzen hieʓ er setzen. si wolde sich dâ letzen mit frouden und mit spile.
30	dâ bran der kerzen alsô vile, daʓ man sô liehte gesach, alseʓ wâre mitter tach. eʓ was ouch dâ warm genûch. durre holz man dare trûch.
35	dâ was fûre âne rouch; daʓ hete sie bedaht ouch. diu minne dwanc si sêre, idoch konde si die êre vile wol bedenken.
40	dem hêren hieʓ si schenken
50	und allen sînen holden, sô vil sô sis wolden, wîn unde lûtertrank. her saget ir gnâde unde dank,
5	daʓ si sîn sô wole phlach. vil dicke sie in ane sach mit fruntlîchen ougen. die nosken und die bougen, die her ir hete gegeben,
10	die wâren ir lieb alse ir leben. Do eʓ sô verre naht was unde der hêre Ênêas gerne rûwen wolde und si dannen solde
15	gên mit ir mannen, dô schiet se ungerne dannen, si wâre gerne beliben noch. dannen schiet si iedoch in ir kemenâte.
20	dô dûhte eʓ vile spâte ir juncfrouwen. dô hieʓ si balde zouwen daʓ si ze bette quâme alse ir wol gezâme.
25	ir gemaches sie gedahten, hêrlîche sie si brahten dâ ir bette was gereit, mit gûten phellin bespreit, alse eʓ ir wole gezam.
30	dô si dô dar zû quam unde gelegen was dar ane, die frouwen sande si alle dane wîb unde magedîn, die dâ bî ir solden sîn.
35	si wolde belîben eine dâ. diu minne was ir alze nâ, diu si ze unsanft ane quam und ir den slâf gar benam. dô si denkende wart,
40	ir bette dûhte sie vil hart
51	und was doch senfte genûch. ir was alleʓ widerfûch, daʓ si gerûrde unde gesach. do si eine wîle dâ gelach
5	und sich diu mûde mêrde, ir houbet si umbe kêrde nider zû den fûʓen. irn mohte gebûʓen daʓ ir werrende was
10	nieman wan Ênêas, des si niene vergaʓ. si rihte sich ûf unde saʓ, mislîche si eʓ ane vienk, von dem bette sie dô gienk
15	nider an die erden. sie sprach «waʓ sal werden der armen frouwen Dîdôn?» si bat genâden Cupidôn, Ênêases brûder,
20	und Vênerem sîne mûder. Sie bestreich ir ougen mit den lieben bougen unde kuste ir vingerlîn. si wolde des gewis sîn,
25	daʓ si niemer mohte genesen. dô si umbe Ênêasen denken begunde, dô wolde sie die stunde alsô hine bringen
30	mit eteslîchen dingen. daʓ was al ir ahte. sô si umbe in dahte, sô ir ie wirs was. done weste niht Ênêas,
35	daʓ si sô mit der minne vaht und si in aller der naht nie sanfte gelach. vil dicke rûfts «wan wâreʓ tach!» vil unsanfte si lebete,
40	si switzete unde bebete,
52	sie leit michel ungemach. zû ir selber sie sprach «wie lange sal eʓ sus stân ? waʓ hân ich dem tage getân?
5	wer hât in geerret, daʓ her sô lange merret? ich hân eʓ dicke gedaht, diz is diu langeste naht diu in der werlde ie wart.
10	ouwê der vart, daʓ Pâris Elenam nam und daʓ her ie zû ir quam, dar umbe Troie wart zebrochen. daʓ wirt an mir gerochen
15	unsanfte unde sêre. ouwê, war sal mîn êre und mîn rât und mîn sin, daʓ ich her zû komen bin? nû bedarf ich wol arme,
20	daʓ sich Vênûs mîn erbarme, ob ich iemer sal genesen, od ich mûʓ schiere tôt wesen.» Daʓ genôʓ sie der minne, daʓ si in manegem sinne
25	ir dink ane vienk. diu naht zegleit und zergienk nâch der vinster hanecrât. rehte an der tagerât dô lach frouwe Dîdô
30	unde quam alsô, daʓ ir daʓ ouge zû quam. ir deckelachen sie nam under ir arme vaste. ir getroumde von ir gaste:
35	si dûhte daʓ eʓ wâre Ênêas der mâre. sie dwanc eʓ an ir munt zû vil maneger stunt. grôʓ wunder si machete.
40	dô si dô intwachete,
53	ein wîle hete sie gemach, unze daʓ sie gesach, daʓ der hêre Ênêas dâ bî ir niene was.
5	dô was ir aber vile wê noch wirs danne ê. ir ne was niht baʓ. an ir bette sie gesaʓ, sine weste wie si ûf quam.
10	ir gebende sie dô nam und ir gewant und ire schû und alleʓ daʓs an solde tûn daʓ tete si alleʓ eine an und gienk trûrende dan,
15	des sie vil ungewone was. daʓ geschûf aber Ênêas, daʓ si ir dink sô ane vienk. in eine kameren sie gienk, dâ ir frouwen lâgen.
20	dô si si komen sâgen, dô wâren sie in sorgen: eʓ was doch frû morgen. Sie hete micheln ungemach. geswâslîche sie dô sprach
25	zû ir swester Annen. si leite sie dannen in ir kemenâten wider und viel an daʓ bette nider. si clagete ir ir ummaht,
30	daʓ si in aller der naht nehein teil gesliefe. si sûfte vile tiefe und wart vil ubele getân. si sprach «mîn êre wil zergân.»
35	«frouwe swester Dîdô» sprach Annâ, «wie denne sô? saget, waʓ is ûwer nôt.» «swester, ich bin vil nâch tot.» «wenne wordet ir siech, ze welcher stunt?»
40	«swester, ich bin al gesunt
54	unde enmach doch niht genesen.» «swester, wie mach daʓ wesen? ich wâne, frowe, eʓ is minne.» «jâ jâ, swester, mit unsinne.»
5	«war umbe gehabet ir ûch alsô, liebe frouwe Dîdô? war umbe welt ir sus verderben? irn dorft von minne niht sterben, ir moget vile wol genesen,
10	es mach gût rât wesen. eʓ nis dehein man ûf der erden, her ne moge û wol werden, her ne sî frô, welt irn minnen. ir solt ûch baʓ versinnen.»
15	Do antworde ir frouwe Dîdô «eʓ enstât mir niht alsô, eʓ is diu wârheit daʓ.» «ir solt ûch versinnen baʓ.» «ich tâte wan daʓ ich enkan.
20	nû wiʓʓet ir wol, deich mînem man Sichêô swûr unde gehieʓ, der mir grôʓ gût lieʓ unde michel êre, daʓ ich nimmer mêre
25	deheinen man genâme swie sô eʓ mir quâme.» Dô sprach aber Anne «ir sprechet von dem manne alze vile âne nôt.
30	jâ is her manegen tach tôt. war umbe sprechet ir daʓ? waʓ wâre ime deste baʓ, daʓ ir nû verdorbet und tumblîche erstorbet?
35	ir endorfet ûwer leben dorch sînen willen niht geben: hern mohtes û niht gelônen. ir solt ûwer selber schônen. disiu rede die ir tût
40	diu nis û ze nihte gût.
55	Lâʓet dise rede sîn unde tuot den rât mîn, daʓ is mêre wîsheit. saget mir die wârheit:
5	wer is der sâlige man, deme got der êren gan daʓ ir in welt minnen? des bringet mich innen. ich wil û râten dar zû
10	beidiu spâte unde frû, wande ich û wol gûtes gan. waʓ ob ich solhen rât kan dâ ir mite berihtet sît. nû saget mir in, des is zît.»
15	Sie sprach «ichn wil ûch niht helen, swester, ich wil û bevelcn mîne êre und mîn leben. ir solt mir rât dar zû geben. eʓ is (sprach si) der man
20	der nie gelîchen gewan. ich mûʓ û sagen sînen namen, swie sêre sô ich mich schamen: daʓ nennen tût mir vile wê. her heiʓet» sprach si «der Ê
25	und dar nâch NÊ.» uber lank, alsô sie diu minne dwank, ê si vollesprâche AS, dô weste sie wol wer er was. Dô sprach aber Anne
30	«ir sprechet von dem manne, den ich mit ougen nie gesach. sô ich mich verdenken mach, ir nis dehein sô wol getân, hern sî ein edel Troiân
35	von hêreme geslehte: diu gelîch tût her rehte mit worden und mit werken, der eʓ kan gemerken. her is scône und lussam,
40	im enmohte nieman wesen gram.
56	her is frumech unde gût. swaʓ ir dorch in getût daʓ enmach niht sîn verloren: ir habet geluckelîche erkoren.
5	die gote habent in her gesant dorch ûwer gûte in diz lant.» Dô sprach diu frouwe Dîdô «war umbe lobet irn nû sô? wiʓʓet ir, daʓ ir missetût?
10	her is mir ze schône und ze gût. ich enweiʓ, wer eʓ û riet, ir endorfet mir in loben niet sô ir in mir ie mêre gelobet, so mîn herze ie mêre nâch im tobet
15	und smilzet enbinnen nâch den sînen minnen.» Anne sprach «hân ich missetân ich wil es gerne in bûʓe stân und wil es gerne engelden.
20	sold ich den hêren schelden, frowe, sô mûste ich liegen. ich enwil ûch niht triegen: welt ir bedwingen ûwern mût, ich bewîse ûch, wie ir baʓ tût.
25	wir soln des beginnen daʓ wir in ûwer minnen solen innen bringen mit eteslîchen dingen.» Si sprach «ich bin es al gereit.
30	got weiʓ wol die wârheit, wie gerne ich es begonde, ob ichʓ getûn konde daʓ ich in innen brahte, sô daʓ her nine gedahte
35	deheines ubeles dar zû. ichn weiʓ waʓ ich dâ mite tû, ich vorhte zunmâʓen daʓ tûn und daʓ lâʓen.» «waʓ touch diu rede danne»
40	sprach aber Anne,
57	«ob irs welt missekêren? ir moget in wol mit êren fruntlîchen ane sehen. irn dorfet dorch daʓ niht jehen,
5	daʓ ir in iht minnet, unz daʓ her sich versinnet. her nis niht ein tumbe. waʓ wiʓʓet ir dar umbe, ob her û is von herzen holt
10	und er mit manlîcher dolt in sîme herzen minne treit und er si niht wider ûch enreit? diu wîb sint brôder dan die man: waʓ ob her baʓ helen kan
15	unde leit gedolen mach? mêr schadet û ein ubel tach dan ime tû ein ganzeʓ jâr.» «ouwê» sprach sie, «wan wâreʓ wâr, swester, sô moht ich genesen:
20	anders mûste ich tôt wesen.» Der rât was gescheiden. den frouwen den was beiden vil vaste des ze mûte, daʓ sie mit allem gûte
25	des hêren wole phlâgen, und ob si daʓ gesâgen und sie des worden innen, daʓ her deheiner minnen an frowen Dîdôn gerûchte,
30	ob herʓ an sie versûchte, daʓ sie in gewerde, wan sis vil sêre gerde. Ênêas der mâre swie wol sô her wâre
35	enphangen unde gêret, her hete sô gekêret sîn herze unde sînen mût, daʓ her dorch dehein gût iemer dâ niht belibe
40	noch der êren sich verscribe,
58	dar umbe her wart gesant zû Italjen in daʓ lant. dâ hine was sîn wille, des gesweich her aber stille.
5	Wiste daʓ frou Dîdô, sô wâre sie vil unfrô; eʓ was si harde verholen. iedoch mûste sie dolen ungemach und arbeit.
10	ir dienest was vil gereit ir liebeme gaste, der ir herze vaste hâte gebunden zû zim zallen stunden
15	mit der minnen stricke. bî im was si dicke unde alzoges wâre gewesen. ân in enmoht si niht genesen. sine hete deheinen gemach
20	wan sô si wider in sprach und her ir antworde, daʓ si gerne hôrde svaʓ sô eʓ wâre. sine getorstem offenbâre
25	niht gesagen waʓ si dahte bî tage und bî nahte; sine getorsten der minne niht bringen inne. sine wolde ir im niht jehen:
30	si hete gerne gesehen, daʓ her des gerûchte, daʓ hers an si sûchte. Dô der hêre Ênêas alsô lange dâ gewas
35	und diu frouwe Dîdô, daʓ sis niene mohte sô geahten noch gefûgen, daʓ si enein getrûgen die minne, der si gerde,
40	dô daʓ alsô werde
59	langer dan si dûhte gût, dô quam ir daʓ in ir mût, daʓ si des wart ze râte eines âbendes spâte:
5	ir mût trûch si dar zû, daʓ si eines morgenes frû in den walt rîten wolde und sich banechen solde und hôren die hunde
10	und korzen die stunde, wandes was ir vile nôt. den meisterjageren sie gebôt, si wolde rîten in den walt: al wâre daʓ weter kalt,
15	si wolde, daʓ man jagete. êr eʓ volle tagete des morgenes vile frû gereite sie sich dar zû. Dîdô diu rîche
20	diu was hêrlîche gezieret mit gewande, daʓ si in deme lande vil wol gewinnen mohte sô ir selber tohte,
25	daʓ ir aller beste gezam und daʓ ir vil rehte quam, mit golde und mit gesteine. ir hemede daʓ was cleine, wîʓ unde wol genât.
30	dar an was manich goltdrât. eʓ was gedwenget an ir lîb. si was ein wol geschaffen wîb, sô si baʓ endorfte sîn. ir belliʓ der was hermîn,
35	wîʓ unde vile gût; die kelen rôt alse ein blût; die ermel wol ze mâzen wît, dar ûffe ein grûner samît nâch ir lîbe wol gesniten.
40	daʓ hete si ungerne vermiten.
60	her was wol gezieret und vil wol gezimieret mit berlen unde borden, die dar zû gehôrden.
5	vile wol her ir gezam, dô sie in an sich genam. dâ si sich mite gorde daʓ was ein tûre borde geworht als si wolde
10	mit silber und mit golde. Ir mantel der was ein samît grûne als ein gras; diu vedere wîʓ hermîn daʓ si niht beʓer mohte sîn.
15	der zobel brûn unde breit. dorch daʓ si jagen reit sone was der mantel niht lank. si weste wole waʓ si dwank. wol was si gebunden,
20	ir hâr was ir bewunden mit einem borden der was gût. dô brahte man ir einen hût, mit grûnem samîte bezogen. daʓ vernemet vor wâr ungelogen,
25	ein borde was alumbe drane. si wâre vil gerne dane, ir was vil liebe zû der jaget. ich ne weiʓ, wie manich maget mit ir ze varne was gereit.
30	daʓ si niht schiere enreit daʓ was ir leit unde zorn. zwêne goldîne sporn het man ir an gespannen. dô si mit ir mannen
35	quam gegangen zû dem tore, dô vant si Ênêam dervore unde sîne geselleschaft. grôʓ was ir ritterschaft. si wâren frû dare komen.
40	die jaget heten si wol vernomen
61	und si hete eʓ ime enboten. rôt golt wol gesoten lûhte wider den tach, daʓ an ir gewande lach
5	unde an ir gesmîde. golt unde sîde was vil an ir gewant. dô sie Ênêam vant, dô was ir vile deste baʓ.
10	her diende ir dâ si ûf saʓ. Dô si ûf daʓ pharit quam, mit dem zoume sie nam Ênêas der mâre, des si dô niht enbâre
15	umbe ein vile michel dink. dô leite sie der jungelink. des was ir herze vile frô. dô fûrde frouwe Dîdô einen bracken vil gereht,
20	den enlieʓ si deheinen kneht gestreichen noch gerûren, si wolden selbe fûren. daʓ entet si niht dorch nôt. daʓ ein ôre was im rôt,
25	daʓ ander swarz und der munt. eʓ was ein vil edel hunt und was wîʓ alse ein harm. si warf daʓ seil umbe den arm sô lîse daʓ eʓ si niene dwank.
30	eʓ was vast und gnûch lank, geflohten vone sîden, eʓn mohte si niht gesnîden an den arm noch an die hant noch zefûren ir gewant.
35	diu halse was ein borde, diu dar zû gehôrde, ze mâʓen enge unde wît. enbinnen was ein samît dar ane genât vaste.
40	sie het eʓ ir gaste
62	gegeben, wolderʓ haben genomen, ê si ûʓ der borch wâre komen. Frou Dîdô was des vil gemeit, daʓ der hêre Ênêas bî ir reit
5	mit sînen Troiânen. si gelîchete Dîânen der gotin von dem wilde. ir herze daʓ was milde von des hêren minnen.
10	des brahte sie in innen, êr her quâme wider ze hûs. her reit ouch alse Phêbûs, ein got vile hêre. diu minne dwanc si sêre.
15	Die den wech kunden, die wîsten nâch den hunden, dâ si vore giengen. des tages sie geviengen wildes gnûch unde vile
20	zû vil gûteme spile, dô wâren si alle ensament frô. eʓ quam ouch vil dicke sô, daʓ man daʓ wilt fliehen sach. eʓ quam umbe den mitten tach
25	ein weter vile freissam, daʓ von den wolken nider quam mit storme und mit winden. des mûsten manegen enden gesundert werden balde
30	di gesellen in dem walde. die winde wâren vile grôʓ. vile starke eʓ nider gôʓ hagel unde regen naʓ. der frouwen man dô vergaʓ
35	dorch daʓ weter freissam. nieman weste war si quam, wan der hêre Ênêas, mit dem si gerne eine was. do gesâgen si einen boum stân
40	dicken unde wol getân,
63	dar zû quâmen sie zehant. dô half der mâre wîgant der frouwen zû der erden dô mûste daʓ werden,
5	des lange gegeret was. dô nam der hêre Ênêas die frouwen under sîn gewant. wol geschaffen her si vant. her begreif si mit den armen.
10	do begunde ime irwarmen al sîn fleisch und sîn blût. dô heter manlîchen mût, dâ mite gwan er di oberen hant; der frouwen her sich underwant.
15	in ne was nieman nâ, si beidiu wâren eine dâ. vile schône was diu stat. minnechlîche her si bat, daʓ si in gewerde
20	des si selbe gerde, (iedoch sprach si dar wider) und er legete sie dar nider, alseʓ Vênûs geriet: sine mohte sich erweren niet.
25	her tete ir daʓ her wolde, sô daʓ her ir holde manlîche behielt. ir wiʓʓet wol, waʓ des gewielt. Dô eʓ alsô was komen,
30	alsir wole habet vernomen, und daʓ si solden rîten, dô was in korzen zîten ir gewant worden naʓ. iedoch was ir vile baʓ
35	dan si dâ heime wâre beliben. daʓ tier was rehte getriben. sô der man sô schûʓet daʓ her sîn genûʓet, sô liebet ime diu vart.
40	dô eʓ wider weter wart,
64	und daʓ der regen vore quam, under sîn arme her si nam und hûb sin daʓ gereite. al der arbeite
5	lônde im minnechlîche Dîdô diu rîche. Dô was diu frouwe Dîdô beidiu rouwich unde frô. ich sage û, wes si frô was:
10	daʓ sie der wunden genas, dâ si unsanfte mite qual, die wîle siʓ Ênêam hal; und was iedoch des unfrô, daʓ si sô schiere alsô
15	sînen willen getete dorch sô wênige bete. eʓ tetir aber grôʓe nôt, si mûste anders wesen tôt. diu froude enwâre ir wider komen,
20	dâ mite sie ir was benomen dô si sô sêre wunt wart. daʓ is der rehten minnen art. eʓ is genûgen wole kunt, swen si rehte machet wunt,
25	sal her iemer wol genesen, daʓ mûʓ mit ir helfe wesen. Ir was gesenftet ein teil, iedoch enwas niht heil diu wunde von der strâlen.
30	daʓ vil harde hâlen Dîdô unde Ênêas, daʓ eʓ alsô komen was. ein wîle hâlen sie die tât, daʓ si ime ir êre unde ir rât
35	alsô hâte bevolen. eʓn moht niht langer sîn verholen, daʓ si alsô schûfen ir gemach. dô daʓ mâre ûʓ gebrach, daʓ diu frouwe Dîdô
40	geworben hete alsô,
65	daʓ Ênêas was ir trût, dô wart si offenbâre brût und machete michel hôzît. diu wart mâre unde wît
5	in alleme lande, wande sie die schande dâ mite beschônen wolde, als sie mit rehte solde, die si begienc in deme walt.
10	si wart dô kûne unde balt und tet dô sînen willen offenbâre und stille. Dô daʓ mâre ûʓ quam, dô worden ir vile gram
15	die hêren after lande. si sprâchen ir grôʓe schande. si heten vile wol vernomen, wie si dar zû was komen, und heten vile wol gehôrt
20	diu manegiu schamelîchiu wort, diu si den hêren zû sprach unde in nihtes verjach, die des gerûchten, daʓ sir minne sûchten
25	stille und offenbâre. eʓ was ir unmâre arme unde rîche: si hete in al gelîche versaget unde sie verkoren
30	unde sprach, si heteʓ versworen dorch ir êresten man, dâ si vil vînde abe gewan. sie haʓeten sie vil sêre und rieten ir an ir êre
35	beidiu spâte unde frû. si sprâchen ir hônlîche zû. dô der hêre Ênêas ir man worden was, si sprâchen, eʓ wâre rehte komen,
40	daʓ si hâte genomen
66	den vertriben Troiâre. eʓ was ir ummâre swaʓ ieman dar umbe gesprach: si lieʓ êre unde gemach
5	al zeiner hant gân, dô siʓ hâte getân. Dô der hêre Ênêas dâ vil gewaldeclîchen was unde geminnet was dâ,
10	in korzen zîten dar nâ, do eʓ alleʓ stunt ze sîme gebote, dô enboten ime die gote ein vil starkeʓ mâre, daʓ her des sicher wâre,
15	her mûste varen dannen mit den sînen mannen, des enmohte dehein rât wesen, ober iemer wolde genesen, daʓ her niene beite
20	unde sich gereite, daʓ her daʓ lant rûmde und sich nine versûmde, als im der wint worde gût. des wart betrûbet sîn mût.
25	Hern getorsteʓ widerreden niet. swâslîchen her geriet mit den sînen holden, di im dar zû râten solden und getrûwelîchen wîsen.
30	sîniu schif hieʓ er spîsen, gereiten unde stihten und vil wol berihten. geswâslîch er daʓ ahte. vil wol her daʓ bedahte,
35	vernâmeʓ frouwe Dîdô, daʓ si vile unfrô dar umbe solde werden. hern weste ûf der erden, wie herʓ ane vienge,
40	daʓ eʓ wol ergienge,
67	daʓ her dannen quâme. her forhte, ob siʓ vernâme, daʓ si eʓ wenden wolde und er dâ wesen solde
5	unde in lezte deste mê. daʓ scheiden tete ime wê, iedoch mûster dannen varen, des enmohte her sich niht bewaren. Done dahte niht frou Dîdô,
10	daʓ her si iemer alsô verlâʓen solde und begeben, die wîle si beidiu mohten leben. dar nâch was vil unlank, êr daʓ mâre ûʓ gesprank,
15	daʓ eʓ dô sô verre quam, daʓ siʓ rehte vernam diu mâre frouwe Dîdô. dô wart sie vil unfrô, wandeʓ ê tet ir diu nôt,
20	si was zehant vil nâch tôt. dô siʓ rehte vernam, alseʓ ir doch sint quam, daʓ sie sich selbe erslûch, daʓ was ir dannoch frû genûch
25	unde ein michel teil ze frû. dô eʓ komen was dar zû, daʓ siʓ rehte vernam, zû Ênêase sie quam. aller ir sinne sie vergaʓ,
30	unsanfte sie bî ime gesaʓ, si weinde vile sêre, si sprach «habt ir des êre, daʓ ir den lîb mir wellet nemen ? wie mag û daʓ wol gezemen ?
35	eʓ is mir ein ubel spot.» her sprach «nû ne welle got, daʓ ich daʓ iemêr getû.» «ouwê, jâ gereitet ir ûch dar zû.» «ich wil eʓ gerne bewaren.»
40	«leider jâ welt ir hinnen varen
68	verholenlîchen alse ein dieb.» «frouwe, daʓ nis mir niht lieb, eʓ is mir leit daʓ ich eʓ tû.» «saget, wer dwinget ûch dar zû ?»
5	«die gote enlânt mich hie niht sîn.» «ir getrôstet ûch wol mîn.» «frowe, ichn hâns deheinen rât.» si sprach «ouwê der missetât, der ich mit û hân getân!
10	eʓ mûʓ mir ubele ergân. daʓ is von mîner scholde: wie hân ich ûwer holde sus wunderlîchen verloren! daʓ ich ie wart geboren,
15	eʓ mach mich balde rouwen. ich mûʓ mîner trouwen engelden vile sêre, daʓ ich û gût und êre getân hân manegen tach,
20	sint ich ûch von êrist sach.» Dô sprach barmechlîche Ênêas der rîche «frowe, ne weinet niht mê ! mir tût unmâʓen wê
25	ûwer clage die ir tût. got lône û alleʓ daʓ gût, daʓ ir mir dicke habet getân. solde eʓ an mir stân, von û geschiede ich niemer.
30	ich enweiʓ, ob mich iemer got dare gesende, dâ ich frunt vinde, alsich nû mûʓ lâʓen hie. ich engewan noch nie
35	deheines wîbes kunde, an der ich mêr funde minne unde trouwe. des is, liebiu frouwe, mîme herzen vil leide,
40	daʓ ich von û scheide.»
69	Dô sprach diu frouwe Dîdô «war umbe trôstet ir mich sô daʓ mich gehelfen niene mach ? ouwê, daʓ ich ûch ie gesach !
5	wannen kumet mir der sin, daʓ ich û alsus holt bin sô harde ûʓer mâʓen, nû ir mich welt lâʓen ? daʓ is ein michel untât.
10	jâ ne was eʓ niht mîn rât, daʓ man Troie zerbrach, dâ mir sô grôʓ ungemach ane was gehalden. waʓ sal des nû gewalden ?
15	haʓʓet den der eʓ geriet. ichn slûch ouch ûwern vater niet.» «nein ir, frouwe, weiʓ got, in nam der gemeine tôt. wie soldet ir daʓ gerâten,
20	daʓ die Kriechen tâten, die Troie zerbrâchen unde ir zorn râchen ? ir sît es alles âne scholt. ichn wart nieman sô holt,
25	sô ich û bin unde was.» «ouwê, hêre Ênêas, ob daʓ wâr wâre, daʓ wâre beʓʓer mâre, dan after lande nû sal gân,
30	daʓ ich mich selbe mûʓ erslân.» «nein ir,» sprach her, «frouwe, dorch die grôʓen trouwe, die ir mir habet bescheinet, ich weiʓ waʓ ir meinet,
35	sehet, daʓ ir es niht entût. ûwer leben is noch gût, ir sît noch ein junk wîb, niht verlieset ûren lîb, eʓ wâre schade vile grôʓ.
40	daʓ ich ûwer ie genôʓ,
70	des mûʓe û got lônen. irn welt ûr selber schônen, sô ne moget ir niht genesen: desn mach ander rât wesen.»
5	Si sprach «was touch diu unscholt, daʓ ir sprechet ir sît mir holt ? sone weiʓ ich waʓ daʓ meinet, daʓ ir mir bescheinet sô grôʓe unminne;
10	daʓ ir welt hinnen varen ûwer strâʓen unde mich hie lâʓen, daʓ is mir leit unde zorn. ich hân mîn dienest verlorn.
15	daʓ rouwet mich sêre, daʓ ich û gût und êre alsô vile hân erboten. ir saget mir von ûwern goten unde machet ûch diu gût,
20	daʓ ir niht entût niwan daʓ si gerâten, die û lutzel êren tâten, dô ir unde ûwer here fûret swebende ûf dem mere,
25	dô si ûch dâ quelen lieʓen: done mohtet ir es niht genieʓen, daʓ ir ir mâch wâret. daʓ ir nû sus gebâret unde ir rât sus gerne tût,
30	daʓn is niht dorch mîn gût.» Si sprach «ich weiʓ wol war eʓ gât, sint mîn rede nû niht vervât. nû ir dorch den willen mîn niht langer hie welt sîn,
35	nû dunket aber mich daʓ gût, daʓ irʓ dorch ûch selben tût, dorch ûres lîbes minne. wan fûret ir nû hinnen, eʓ solde û an daʓ leben gân.
40	daʓ mere is freissam getân,
71	die unde gênt vile hô. niht enzornet ir mir sô, daʓ ir ûrn lîb iet verlieset unde den tôt kieset.
5	des bedenket ûch baz.» her sprach «frowe, waʓ hilfet daʓ ? al ensoldich nimmer genesen, desn mach ander rât wesen. [ moht ich den goten widerstân,
10	ich hete eʓ gerne getân.» ] zû dem êrsten worde, dô si dô gehôrde, daʓ her niht baʓ was bedaht, dô viel sie in unmaht.
15	under sîn arme her si nam, unz ir daʓ herze wider quam. her sprach ir minnechlîche zû «frouwe, daʓ ich daʓ tû, daʓ ich von û scheide,
20	des gedenke ich mir vil leide. esn mach ander rât sîn. stundeʓ an dem willen mîn, ichn quâme nimmer hinnen. ich mûʓ von ûwern minnen
25	vil unfrôlîchen leben. ir solt eʓ mir dorch got vergeben, daʓ ich dar ane missetû: diu nôt dwinget mich dar zû.» Dô sprach aber Dîdô
30	«war umbe smeichet ir nû sô ? jane vervât eʓ niht ein blat: ir sît mîn schiere worden sat. mir is leit daʓ ich ûch ie gesach. ichn hân daʓ kint noch den mâch
35	niender in dem lande. man wecket mir grôʓe schande, sint daʓ ich ûch genam. die hêren sint mir alle gram: den ich versagete wîlen ê,
40	die ne gerent mîn nû niht mê.
72	soldich lebendich blîben, si solden mich vertrîben oder brennen unde heren. ich ne moht mich niht erweren,
5	wand die scholde sint mîn. hetet ir doch ein kindelîn an mir gewunnen ! ob mir got des hete gegunnen, do ich mîner êren sô vergaʓ,
10	mir wâre vile deste baʓ. leider nû enis des niet. daʓ mir mîn herze ie sô geriet, daʓ ich ûch sô tumblîche nam, des mûʓ ich im immer wesen gram.»
15	Her trûrde und si weinde. wie wol sim daʓ bescheinde, daʓ si unsanfte minne trûch ! dô sin gelobete genûch, dô begunde sie in schelden.
20	sie sprach «ich mûʓ des engelden, daʓ ich ûch hân geêret. daʓ habet ir mir gekêret ze grôʓen missewenden. ichn mach an û vinden
25	genâden nehein teil. daʓ is mîn unheil und grôʓes ungeluckes scholt. mir wâren ie die lûte holt die mich erkanden:
30	ir solt ûch mîner schanden vil gemeit machen. ir sît geboren von trachen, irn wordet von lûten nie geboren. ir habet die barmecheit verloren,
35	ûr herze is âne minne. Vênûs diu gotinne ne wart ûwer mûder nie. ich genam ûch unheiles ie, daʓ ir mich sus habet betrogen.
40	ir wordet under wolfen zogen.
73	û erbarmet daʓ niet, daʓ ir mich sus quelen siet. ich wâne ûr herze is steinen, daʓ ir mich sus lât weinen.»
5	Dô der rede vile was, dô mûst der hêre Ênêas ze jungest varen dannen mit den sînen mannen, swie eʓ ir geviele.
10	her hieʓ sîne kiele machen alsô gereit. dô quam er ûf daʓ mere breit mit sînen Troiâren. diu schif hieʓer mâren.
15	dô si sich gehûben an, dô treib sie der wint dan, der in den segel quam geflogen, den si heten ûf gezogen, daʓ was der leidiste tach,
20	den frou Dîdô ie gesach. si was vil ubele bedaht. sie viel dicke in unmaht, diu rouwe gienk ir vile nâ, sie ne hete ir frouwen dâ
25	gelâʓen deheine, sunder alders eine ir swester Annen. die selben sande si dannen mit vil argem liste.
30	sie sprach «Annâ swester, hâst dû daʓ wunder gesehen ? nû mahtû wole jehen, daʓ mir vil leides was beschert sihestû wâ her hine vert
35	der ungetrouwe Ênêas, der mir lieber was denne mîn selber lîb? in der borch is ein wîb, diu starke zouber kan,
40	sô nie dehein man
74	ir gelîche nie gesach. ich erkenne si manegen tach: die saltû mir gewinnen. sie weiʓ vil von minnen,
5	vil von erzenîe; si hât in philosophîe ir flîʓ gekêret; si is sô wol gelêret, daʓ nie wîb wîser wart.
10	si weiʓ wol allen den art vone den plânêten. si gelîchet den prophêten. si kan an den sternen sehen, swaʓ iemanne sal geschehen,
15	und kan wunderes vil und tût swenne sô si wil, daʓ der mâne zergêt, swenner ir ze mûte gestêt, und nimet der sunnen ir schîn.
20	die gwin mir, liebiu swester mîn, si sal mir râten her zû, mit welhen dingen ich daʓ tû, daʓ mir Ênêas erleide unde ich mîn herze scheide
25	von sînen minnen, wandeʓ brinnet innen.» Dô sprach si aber mê: «swester, mir is sô wê umbe den leiden lieben man,
30	daʓ ichs gesagen niene kan sô daʓ eʓ mir tohte. al kunde ich, ich ne mohte, und mohte ich, ich ne wolde, wand ich enkunde die scholde
35	ûf nieman anderen gesagen: mich hât mîn selber wille erslagen. ichn mach si nieman gegeben, ich mûʓ mîn unsenfteʓ leben an mir selber rechen.
40	ichn mach daʓ niht gesprechen
75	daʓ eʓ iemannes scholt sî. Annâ, nû stant mir bî an mîner swester stat. daʓ wîb, dar ich dich umbe bat,
5	die salt dû mir bringen mit gûtlîchen dingen mit listlîchen sachen. ich mûʓ ein opher machen dem gote von der minne
10	und Venerî der gotinne. daʓ si mir genâde tû. swester, dâ hôret zû ein fûre grôʓ unde heiʓ. daʓ ich sô vil dar umbe weiʓ,
15	daʓ mach ich balde gote klagen.» dô hieʓ si holz dare tragen und machteʓ fûre drunder. si frumde michel wunder. Dô si daʓ fûre enbrande,
20	Annen sie dô sande nâch allen Ênêases geben. si sprach, sin wolde niht leben, sine heteʓ alleʓ verbrant, und ouch daʓ bettegewant,
25	dâ si ûffe lâgen und ir minne pflâgen, si und der hêre Ênêas. Annâ gienk da eʓ alleʓ was und brahteʓ alleʓ sament dar.
30	Dîdô was ubile gevar, wande si ubile gedahte. dô eʓ Annâ dar brahte, dar si si hete nâch gesant, daʓ wart vil schiere verbrant.
35	Dô siʓ hâte getân, dô hieʓ sis nâch dem wîbe gân, daʓ si si balde brehte unde des gedehte, daʓ ir angest wâre grôʓ.
40	die ture sie nâch ir beslôʓ,
76	si rach unsanfte ir zorn. dô hete Ênêas ein horn dâ verlâʓen unde ein swert, daʓ was maneges phundes wert,
5	dar ane erkûlde sie ir mût. si warf daʓ horn in die glût und die swertscheide. si gedahte ir vile leide, michel was ir ungemach.
10	unfrôlîchen sie sprach «ouwê, hêre Ênêas, wie gewaldech ich was, dô ich ûch êrst erkande und gesach in diseme lande.
15	des mûʓ ich sêre engelden. ichn wil ûch niht schelden, wande ir sît es âne scholt, ir wâret mir genûch holt, ich minnete ûch zunmâʓen.
20	nû habet ir mich verlâʓen vil unfrô in mîme hûs. ûwer mûder Vênûs und ûwer brûder Cupidô die macheten mich vil unfrô,
25	die mir daʓ herze habent genomen, daʓ mir mogen niht gefromen alle mîne sinne. ouwê, unsenfte minne, wie dû mich hâst bedwungen !
30	ichn mach mit mîner zungen niht gesagen mînen mût. ouwî êre unde gût, wunne unde wîstûm, gewalt unde rîchtûm,
35	des hete ich alles mîn teil. daʓ is ein michel unheil, daʓ ich eʓ sus mûʓ enden ze mînen missewenden und alsus grôʓem mînem schaden.
40	ich bin zunsanfte uberladen
77	mîn ungemach is sô gram, ichn mach gegên noch gestân geligen noch gesitzen. ich sterbe vor hitzen
5	und quele iedoch vor kalde. ichn weiʓ waʓ des gewalde, mir is vreislîche vergeben, sus enwil ich niht langer leben.» Aber sprach dô barmechlîche
10	Dîdô diu rîche «wie ubele mîn dink vert ! ouwê, daʓ mir daʓ wart beschert, daʓ ich sus swelze enbinnen. ouwê dirre minnen,
15	sie is ungehûre, diu mich mit ir fûre brennet alsô sêre. man mach iemer mêre wunder von mir sprechen.
20	ich mûʓ dorchstechen daʓ herze, daʓ mich verriet. war umbe ensterbete ich mich niet, do ich zem êrsten quelen began unde ich den fremden man
25	alsô tumblîche nam, der dorch mich niht here quam ? het ich mich ê selbe erslagen, sone dorfte ich mich niht klagen noch mîner frunde dehein,
30	sô wâre geteilet enzwei mîn schade und mîn schande. nû is after lande mîn laster vile mâre, und mûʓ ouch offenbâre
35	mîn schade vile grôʓ wesen, wand ich ne wil niht genesen.» Dô si daʓ alleʓ gesprach, mit dem swerde sie sich stach in daʓ herze dorch den lîb.
40	al wâre sie ein wîse wîb,
78	sie was dô vil sinne lôs. daʓ si den tôt alsô kôs, daʓ quam von unsinne. eʓ was unrehtiu minne,
5	diu sie dar zû dwanc, mit dem stiche sie spranc unde viel in die glût. dô dorrete daʓ blût, daʓ ir ûʓ der wunden flôʓ,
10	wande daʓ fûr was grôʓ. deste schierre was verbrant ir gebende und ir gewant. ir fleisch mûste smelzen unde ir herze swelzen.
15	dô si vil nâch tôt was, dô sprach si «hêre Ênêas, ir wordet mir zunheile geboren, wande ich dorch ûh hân verloren sus jâmerlîche mîn leben.
20	die scholde wil ich û vergeben, ichn mach û niht wesen gram.» dô diu swester wider quam, diu des alles niht dahte, unde daʓ wîb brahte,
25	dâ si sie nâch hete gesant, vaste sie besloʓʓen vant der kemenâten tore. ein wîle klophete sie dâ vore unde rûrde den rink.
30	dô misseviel ir daʓ dink. zeinem loche sie in sach wâ Dîdô tôt lach verbrunnen in der glût. des wart betrûbet ir mût.
35	«Ouwê» sprach si, «Dîdô, nû bin ich vil unfrô, frouwe swester, edele wîb, war umbe habet ir ûwern lîb sus wunderlîche verloren ?
40	ouwê, daʓ ich ie wart geboren.
79	daʓ ich von û sô verre quam und ûr sô bôse ware nam, daʓ mach ich iemer wole klagen, wand ir ûch selbe habet erslagen
5	dorch eines mannes minne. daʓ quam von unsinne. ir mindet in zunmâʓen: dorch daʓ habt ir verlâʓen ûwern lîb und grôʓe êre.
10	daʓ mach ich wol klagen sêre.» Annâ scrîte unde rief, tobelîche sie lief nâch dem kamerâre. dô man daʓ mâre
15	in der borch wol vernam, vile lûte dare quam, die si wolden schouwen. ritter unde frouwen weinden vile sêre,
20	den si gût und êre dâ bevoren hete getân. done lieʓ man dar in gân nieman wan ir holden, die si leschen solden.
25	eʓ was iedoch ze spâte. dô worden sie ze râte, dô si zesamene quâmen, daʓ si daʓ pulver nâmen von dem edelen wîbe,
30	von allem ir lîbe, von fleische und von gebeine. dô was si worden kleine, doch si dâ vor wâre grôʓ, ê si der minne missenôʓ.
35	daʓ pulver tâten si in ein vaʓ, ein goldîn rôre was daʓ. dô nâmen si einen sark, der was wert maneger mark, die rôre legeten sie dar in.
40	dô het ir rât unde ir sin
80	ubel ende genomen, dô si dar zû was komen. ich sage û daʓ der sark was ein prasem grûne alse ein gras,
5	wole meisterlîche ergraben. mit goldînen bûchstaben was ir name dâ gescriben, wie si tôt was beliben. die bûchstaben sprâchen sô:
10	«hie liget frouwe Dîdô, diu mâre und diu rîche, diu sich sô jâmerlîche dorch minne zû tôde erslûch.» daʓ was wunderlîch genûch,
15	sô wîse sô si was. do ne weste niht Ênêas nochn mohtes niht getrouwen, daʓ si sich ir rouwen sô ubile konde gemâʓen,
20	daʓ sie sich solde lâʓen die minne bedwingen zû sô freislîchen dingen. Dô was der hêre dannen gevaren mit sînen mannen
25	verre ûf den hôhen sê. daʓ scheiden tetim vile wê. noch enwester des niet, daʓ der vîant dâ geriet der frouwen, daʓ si sich erslûch.
30	her was doch trûrech genûch mit sînem ingesinde. dô fûr her vor dem winde ûf dem mere freissam, unzer dâ ze lande quam,
35	dâ sîn vater begraben lach, und quam rehte an den tach dô sîn jârgezît was. daʓ begienk ouch Ênêas harde hêrlîchen dâ.
40	an der nâhsten naht dar nâ
81	erschein ime der vater sîn. «Ênêas» sprach her «sun mîn, vernim, waʓ ich dir sagen wil, und enmerkeʓ niht zû einem spil.
5	Sun, eʓ is dir gût vernomen, dorch daʓ ich her ûf bin komen ûʓ der helle ûf daʓ lant. die gote habent mich gesant, der niderste und der hôste.
10	ich quam dir her ze trôste und sal dir gesagen al swaʓ sô dir geschehen sal, wie dû dîn dink salt ane vân und wie eʓ dir sal ergân.
15	Des saltû danken den goten, die dirʓ bî mir hânt enboten, daʓ si dîn niht vergâʓen. dû salt hie lâʓen ein teil dîner lûte.
20	nû schaffe daʓ noch hûte. Ênêas, (sprach her) sun mîn, die dû weist daʓ si frome sîn und die dir ze storme togen und die dir gedienen mogen,
25	die kanstû wole erkennen, die fûre mit dir hinnen. die aber dar zû sint komen, daʓ in daʓ alder hât benomen beidiu sinne unde kraft,
30	die mache hie wonehaft nâch dînen êren. dune salt niht hinnen kêren niwan nâch mînem râte (al dunkeʓ dich ze spâte,
35	du uberwindest al dîn arbeit und gwinnest grôʓe rîcheit) zû Italjen in daʓ lant, dar dich die gote hânt gesant: dâ wirdest dû vil rîche.
40	dû mûst mich wârlîche
82	in der helle gesprechen ê, ê du immer kumest uber sê : des salt dû sîn vil gewis. als dir vore gesaget is,
5	alsô sal eʓ dir ergân. swaʓ dir enteile is getân, des enwirt dir niht benomen, dû salt vil wol dare komen. Ênêas, (sprach her) sun mîn,
10	desn mach ander rât sîn, wandeʓ wellent die gote. nû volge ir gebote unde alles ir willen: var zû Sibillen.
15	ze Îcônjen is ir hûs, niht enzwîvele dûs, dû salt si wole vinden. sie sal sich dîn underwinden und sal dich geleiten
20	unde wol bereiten zallen disen dingen und sal dich wider bringen lebendich unde wol gesunt. aldâ getûn ich dir kunt
25	unde lâʓe dich gesehen alleʓ, daʓ dir sal geschehen dir und dînen nâchkomen. hâst dû die rede wol vernomen, (sprach her) lieber sun mîn ?
30	ichn mach niht langer hie sîn, eʓ nâhet der hanencrât, hie wider nis nehein rât. daʓ ich dir gesaget hân, daʓ tû und wis flîʓich dar zû.
35	Ênêas, (sprach her) lieber sun, diz mûstû sicherlîche tûn unde enwis des niht laʓ und engedenke niht an daʓ, daʓ eʓ dir angestlîchen stêt.
40	ich weiʓ daʓ eʓ dir wol irgêt
83	und sage dir die wârheit. iedoch sô mûstû arbeit lîden unde ungemach.» dô her daʓ wort volle sprach,
5	vile schiere her verswant von sînen ougen zehant, daʓ hern weste war er bequam, dô diu rede ende nam. Dô der hêre Ênêas
10	vernam waʓ diu rede was, daʓ eʓ wesen mûste sô, her was trûrich unde frô. diu rede dûhte in gût und getrôstem sînen mût:
15	dô her daʓ hete vernomen, daʓ her wole solde komen, dar her varen wolde, und dâ gewinnen solde rîchtûm unde gewalt,
20	des frowete sich der helt balt und missetrôste sich des, daʓ in sîn vater Anchîses zû der helle varen hieʓ, wander daʓ ungerne lieʓ.
25	her ne heteʓ niht getân, iedoch sô mûste herʓ bestân. Dô dem hêren diu vart zû der helle geboten wart, daʓ dûhte in vile freissam.
30	dô her des morgens ûf quam under sîn heimlîche man, mit in her sprâchen began. dô saget der hêre Ênêas al daʓ ime enboten was
35	sînen hergesellen, wan die vart zer hellen die versweich her unde hal, daʓ ander sagete her in al unde hetes ir rât
40	umbe alsô getâne tât.
84	geswâslîche unde stille vernam her ir willen, waʓ si des râten wolden ob si dâ lâʓen solden
5	die lûte die im ne tohten, di gevehten niene mohten und lîden grôʓ arbeit. daʓ dûhte sie dô wîsheit, daʓ her alsô tâte.
10	mit ir aller râte irkôs her eine stat dâ bî dem mere genûch nâ und hieʓ si wole vesten und gab sie den gesten,
15	dier dâ solde lâʓen. sie was wol zemâʓen beidiu veste unde wît. zû der selber zît gescûf der hêre sîne vart,
20	die ime ze angesten wart. Dô fûr der hêre Ênêas dâ frouwe Sibille was. dô her quam dâ her si vant, dô hete der wîgant
25	angest dô her sie gesach umb daʓ ich û sagen mach: si was vil freislîche getân. iedoch gienk her vor si stân, her begonde si ane schouwen:
30	sine was einer frouwen niht gelîch noch einem wîbe. hern hete in allem sîme lîbe nie niht solhes gesehen, des wil ich an die lûte jehen,
35	die daʓ bûch hânt gelesen. sie ne mohte niht wesen egeslîcher dan si was. diu frouwe saʓ antvas in einem betehûs,
40	als uns saget Virgiliûs
85	von ir al vor wâr. grôʓ und grâ was ir daʓ hâr und harde verworren, daʓ wir wol sprechen torren,
5	als eines pharîdes mane. und diu frouwe hete ane vil unfrouwelîch gewant. ein bûch hete si an ir hant, dar ane saʓ si unde las.
10	dô gesach si Ênêas. Her markte sie rehte. mies lokkehte hieng ir ûʓ den ôren. sine mohte niht gehôren,
15	eʓn wâre ob man ir riefe. ir ougen stunden tiefe under den ouchbrâwen langen unde grâwen, die dâr vore hiengen
20	und ir zû der nasen giengen. grûwelîch was ir lîb. ime enwart nie dehein wîb alsô wunderlîche kunt. swarz und kalt was ir der munt.
25	si saʓ in der gebâre, alse ir leben wâre ân aller slahte wunne. die zene stunden ir dunne und wâren ir lank unde gele.
30	ir was der hals und diu kele swarz unde gerumphen. si selbe was gescrumphen in bôseme gewande. ir arme unde ir hande
35	wâren âdern unde vel. dô sie der helt snel vile rehte besach, dô bôt her ir gûten tach. Dô sin sprechen hôrde,
40	diu frouwe ime antworde
86	vile minnechlîchen wider und hieʓ in bî ir sitzen nider. Ênêas der tete daʓ. dô her bî ir gesaʓ,
5	dô sagete her ir rehte sînen namen und sîn geslehte und war her varen solde und dorch welhe scholde her zû zir dare quam.
10	dô si rehte vernam sîne nôt und sînen willen, dô antworde ime Sibille. Sie sprach «edel jungelink, diz is ein angestlîch dink
15	daʓ dû hâst bestanden. die dich dâ her sanden, unser meister die gote, bistû rehte ir bote und wellent siʓ gebieten,
20	dune darft mich niht mieten, ich wil mit dir dâ hin varen unde wil dich wol bewaren unde wider bringen mit gnâdechlîchen dingen
25	lebende unde wol gesunt. mir is der wech wole kunt, ich bin ouch wîlen dar komen: swaʓ sô ich dir mach gefromen, des bin ich dir gereite.
30	ich tûn dir gût geleite.» Ênêas sweich dô stille. dô sprach aber Sibille «nû eʓ alsô is getân, daʓ dû die vart salt bestân
35	unde duʓ dorch nôt tûst, ich sage dir waʓ dû haben mûst, des dû enberen niht ne maht. dar umbe wis ernistaht, des is dir nôt daʓde alsô sîs.
40	dar zû hôret ein rîs:
87	mahtû daʓ gewinnen, sô vare ich sament dir hinnen zû der helle hin nider und bringe dich aber her wider.
5	Daʓ rîs is aber sô getân, daʓ saltû wiʓʓen âne wân, eʓn mûʓ dich nieman wîsen, eʓ nis niht andern rîsen an ir getât gelîche,
10	ir nis en ertrîche niewan daʓ eine. eʓ is ze mâʓe kleine unde is aber sô vast, daʓ es nieman einen ast
15	abe mach gewinnen; eʓne mohte enginnen der wâfene dehein, der diu sunne ie beschein, swie veste sô eʓ sî.
20	ich sage dir aber dâ bî, is eʓ dir enteil getân, daʓ eʓ dir wol sal ergân, des dû hâst begunnen, und es die gote gunnen,
25	sô saltuʓ wole vinden: die soln dich senden an die stat dâ eʓ is, des saltû sîn vil gewis, dâ sal eʓ dir wol werden:
30	dû salt eʓ ûʓ der erden geziehen vile lîhte, sô sal enalgerihte rehte ein alsô getân an der selben stat stân.»
35	Dô daʓ alsô geredet was, dô solde der hêre Ênêas, der mâre und der wîse, varen nâch dem rîse alseʓ ime was geboten.
40	ein opher machete her den goten
88	zêren und ze holden, daʓ siʓ im wîsen solden. innechlîchen her sis bat. dô sanden sie in an die stat
5	rehte dâ her eʓ vant. dô zôch herʓ ûʓ mit der hant. dô her daʓ hete getân, ein anderʓ sach her dâ stân, daʓ dem al gelîch was.
10	dô kêrde der hêre Ênêas wider zû Sibillen. dô hete er sînes willen dâ erworben ein teil. dô lieʓen sie eʓ an ein heil.
15	Dô der helt lussam zû Sibillen wider quam und er daʓ rîs brahte, vil wole sie gedahte, waʓ her haben solde,
20	wand sin leiten wolde als einen ir lieben trût. dô gab si ime ein krût und gebôt im daʓ herʓ âʓe unde es niht vergâʓe,
25	her fûre verre deste baʓ. Sibille eʓ ouch aʓ, alsô tete Ênêas. si sagetim daʓ eʓ gût was wider den helleschen stank.
30	des sageter ir gnâd unde dank, daʓ si in sô wol beriet, daʓ ime enmohte geschaden niet der ubil stank noch der rouch. einer salben gab sim ouch,
35	gût unde tûre wider dem hellefûre, daʓ in niht dâ ne snite, der sich bestriche dâ mite. Dô daʓ getân wart
40	und si beidiu zû der vart
89	gereit wâren unde gare, daʓ swert daʓ hieʓ sie in bare nemen under sîn gewant, daʓ herʓ trûge an sîner hant.
5	si weste wole umbe waʓ. diu frouwe hieʓ eʓ umbe daʓ, daʓ herʓ mit im nâme, so er in die helle quâme in die vinsternisse,
10	daʓ her ime gewisse dâ mite lûhten solde. her tet als si wolde, daʓ her des niht ne lieʓ, daʓ in diu frouwe tûn hieʓ.
15	Alsô eʓ dô naht wart, dô hûben sie sich an die vart. den goten si sich bevâlen. die vart sie dô hâlen ir nâchgebûren.
20	dô si ein wîle gefûren sint si sich ûʓ gehûben, si quâmen zeiner grûben, diu was wît unde lank. freislîche sie stank,
25	sie was vinster unde tief. ein brinnende waʓʓer drin lief, eʓ viel tiefe in den grunt. daʓ was Sibillen wole kunt, eʓ vorhte aber Ênêas,
30	wandeʓ ime unkunt was. daʓ ne was dehein wunder. her hôrde daʓ waʓʓer drunder, daʓ bran unde krachete, grôʓ wunder eʓ machete
35	unde starke nider flôʓ. der rouch was dâ alsô grôʓ, daʓ her dâ ne mohte niht gesehen. al ne torste hers niht jehen, iedoch vorhte im sêre
40	Ênêas der hêre.
90	Dô marcte Sibille vil wole sînen willen, daʓ her im sêre forhte. sie sprach, her ne dorhte
5	nehein angest haben dâ. «eʓ is hie vile nâ an dem êrsten învare. ich wil dir vile gare sagen, wie eʓ hie stêt
10	umbe daʓ loch, daʓ hier in gêt: eʓ is der helle învart. al daʓ ie geboren wart von manne und von wîbe, sô si von diseme lîbe
15	zêrist gescheiden werden hie obene an der erden, arme unde rîche, si mûʓen algelîche ze diseme loche în varen;
20	eʓ ne mach nieman bewaren, eʓ stêt von anegenge sô. des gerihtes phliget Plûtô, sîn is hie diu meisterschaft, her behaldet hie die hêrschaft
25	und diu frouwe Proserpîne, diu alde winje sîne.» Dô Sibille daʓ gesprach, dô gienk eʓ an daʓ ungemach. sine wolde niht langer wesen dâ.
30	der hêre volgete ir nâ al dâ si hine fûr. diu vart wart ime vile sûr, wande sie was freissam. hern weste wier dar nider quam.
35	dô si wâren in dem tal, do gesâgen si lûte âne zal, die weinden unde liefen, si scriwen unde riefen, beidiu man unde wîb.
40	naket was aller ir lîb.
91	si liefen vor unde wider daʓ waʓʓer ûf unde nider, daʓ dâ brinnende flôʓ. ir ungemach was vile grôʓ
5	in dem vinstern walde. si liden michil kalde von îse und von snêwe. die trachen und die lêwen und die lintworme
10	die sûchten sie ze storme und die lêbarde mûten sie vil harde, die si sêre biʓʓen. daʓ fleisch si in zeriʓʓen
15	und von dem beine nûgen. si macheten in genûgen blûtende wunden. si mûsten zallen stunden mit solher nôt werben,
20	sine mohten niht ersterben dorch deheiner slahte nôt, wande si wâren zer werlde tôt. ir quâle was unendehaht. si heten zallen zîten naht,
25	sine gewunnen nimmer tach. dô daʓ Ênêas gesach die jâmerlîche wîʓe dâ, dô frâgete her sâ Sibillen von den lûten,
30	waʓ daʓ mohte dûten. Sibille diu alde si sagete ime balde, daʓ daʓ sêle wâren, die vor manegen jâren
35	sumelîche wâren dar komen, den daʓ leben was benomen von ir selber scholden und dâ dolen solden nôt unde arbeit,
40	unz es den meister dûhte zît,
92	daʓ man si fûrde uber den flût. dô wart dem hêren sîn mût beswâret von den armen, die begonden in erbarmen.
5	Dô her vernomen hete daʓ dô quâmen si vore baʓ Sibille unde ir vartgenôʓ, aldâ si wunder vile grôʓ gesâgen und vernâmen.
10	do si an daʓ waʓʓer quâmen, daʓ dâ heiʓet Flêgetôn, do gesach der Anchîses son daʓ im seltsâne was. der mâre helt Ênêas
15	gesach ein schif dar uber gân, swarz und ubile getân, zebrochen unde vile alt. dar inne gesach der helt balt einen egeslîchen vere,
20	der daʓ jâmerlîche here uber daʓ waʓʓer fûrde. starke her sich rûrde beidiu naht unde tach, daʓ hern saʓ noch enlach
25	und nimmer rûwe gewan. eʓ was ein tûvel, niht ein man, und was geheiʓen Chârô. dâ was maneger unfrô, des her lutzil ware nam.
30	als er zû dem stade quam, sô was dâ michel gedrank. der schaltboum der was lank, den her an sîner hande trûch. die sêle her dâ mite slûch,
35	her gab in manegen sêren stôʓ, want der schaltboum was grôʓ, glûjende stahelîn. dâ mit stûrder daʓ schif sîn. swarz wârn im die hande.
40	vil wole er die erkande,
93	die her dâ lâʓen solde; dier aber uber fûren wolde, die nam her balde dar an, die andern stieʓ her hin dan,
5	her gab in manegen sêren slach. dô daʓ Ênêas gesach, dô frâgete der Trojâre Sibillen, waʓ daʓ wâre. Si sprach «ich sage dir rehte
10	von dem gûten knehte, der daʓ schif stûret. die her dâ uber fûret und in daʓ schif lâʓet gân, die habent die bûʓe getân,
15	diu in hie gesetzet was, daʓ merke frunt Ênêas. die ander dier dâ wider slât und in daʓ schif niht enphât unde freissam ane siht,
20	sine habent sô vil getân niht daʓ si noch uber mûʓen, ê sie noch baʓ gebûʓen.» Dô beschouwete Ênêas wie getân der verje was,
25	her markte in rehte. rûch lockehte was im aller sîn lîb. her haʓete man unde wîb, alser si alle wolde erslân.
30	sîn houbet was ime getân als eime lêbarde. sîn ougen brunnen harde gelîch einem fûre. her was ungehûre
35	hinden unde vorne. scharf alse dorne wâren sîn oucbrâwen unde scharf sîn clâwen an fûʓen unde an handen.
40	alle die in erkanden
94	die vorhten in dorch nôt. die zene wâren ime alrôt unde lank unde grôʓ. her was ein grûlîch vartgenôʓ.
5	sûr was ime der munt, her het ein zagel als ein hunt. egislîch was sîn gebâre. Ênêas der mâre vorhte in dô her in gesach,
10	des man wol getrouwen mach. Dô sprach der Trojân «soln wir an daʓ schif gân ?» «jâ wir» sprach Sibille, «swîch dû aber stille
15	unde ensprich neheine wîs. gib mir daʓ rîs, daʓ ich dich wîse, daʓ tû?» dô gienk si deme stade zû. Dô der hêre Ênêas
20	dar nâher komen was unde zû dem schiffe gienk, ubillîche in enphienk der ubile schalk Chârô. ze ime sprach her alsô
25	«waʓ mannes is daʓ sô getân, der in daʓ schif wil gân ? ich wil eʓ gerne bewaren, ichn lâʓe in niht her uber varen in mînes meisters rîche.
30	hern quam mennislîche nie nieman dorch unser gût. ich ne wil niht daʓ ir tût als Phôcus, demʓ sô wol ergienk, dêr unsern portenâre vienk
35	unde fûrde in hinnen. ich sal in baʓ erkennen den ich hie uber fûre. diz schif wirt im tûre die wîle ich eʓ mach bewaren.
40	her was ouch wîlen gevaren
95	Orpheus der mâre, der gûte harphâre, her wolde hie holn sîn wîb, dar umbe hete er sînen lîb
5	selbe vil nâch verlorn. mir is diu rede vil zorn. dune wellest dich versinnen und varest schiere hinnen, dir wirt lîhte ein slach,
10	daʓ dir der rukke brechen mach.» Dô sprach Sibille «Chârô, nû swîch stille, lâ dîn ubil rede stân, her mûʓ wol in daʓ schif gân:
15	eʓ is der hêre Ênêas. ich sage dir wer sîn vater was: der alde Trojâr Anchîses, ze deme her her komen is mit geleite und mit gebote
20	unser obersten gote, unde die hie nidere sprechent dar niht widere. fûre uns uber unde swîch !» dô lieʓ sin sehen daʓ zwîch,
25	daʓ rehte warzeichen. dô begonder smeichen, dô her des zwîges wart gewar, dô kêrde her daʓ schif dar, beidiu her si dran nam.
30	dô Ênêas drin quam, dô was daʓ schif sô getân als eʓ iezû solt undergân. des wart getrûbet sîn sin. dâ was michel jâmer in,
35	von sêlen michel gedrank, von dem beche grôʓer stank. der angest was dâ vile grôʓ. daʓ waʓʓer, daʓ dâ in flôʓ, daʓ wiel unde brande.
40	doch quâmen sie ze lande
96	mit sorgen vile starken und giengen ûʓ der barken. Dô gesach aber Ênêas daʓ im seltsâne was,
5	her gesach sêle mit den scharen, die dâ uber wâren gevaren, dô sie daʓ lant geviengen, daʓ si zeinem flûme giengen unde trunken al dar zô.
10	Sibillen frâgete her dô, dorch welhiu dink si tâten daʓ. si sprach «ich sage dir umbe waʓ: eʓ heiʓet Oblîvîô und is geschaffen alsô,
15	sô si dâ getrinken, sone kunnen sie gedenken der dinge neheine, grôʓ noch kleine, der in geschehen was dâ bevoren:
20	die gedanke habent sie verloren.» Sibille sprach aber dô dem hêren Ênêase zô «Ênêas, dû bist komen dâ dir wênich mach gefromen
25	dîn mennislîcher list. diu stat dâ dû inne bist is rehte der art, dune quâme nie in dirre vart in sô grôʓe vinsternisse
30	(sprach diu prophêtisse), dar dû nû schiere komen salt. Ênêas helt balt, dâ nis deheiner slahte lieht. doch missetrôste dich nieht,
35	ich sal dich geleiten und vil wol bereiten alles des dîn herze gert. zûch her vore dîn swert und merke, wie ich vore vare,
40	unde trach dîn swert al bare
97	unde lûhte dir dâ mite. ich weiʓ wol allen den site von diseme hellerîche. volge mir wîslîche,
5	wande des is dir nôt.» dô tete her als si ime gebôt. Dô si gesprochen hete daʓ, dô fûren sie vore baʓ dâ si wunder vil vernâmen.
10	zû der porten sie quâmen dar nâch in korzen stunden. Cerberum si funden der helle portenâre. Ênêas der mâre
15	vorhte in dô her in gesach, wander sô tobelîchen lach. hern wolde im niht nâher gân. dô was her sô freislîche getân, daʓ ir eʓ niht geloubet.
20	her hete driu houbet grôʓ und egislîche. her sach sô freislîche, im was diu porte bevolen. sîn ougen glûten sam die kolen,
25	daʓ fûre im ûʓ dem munde flouch und ubil stinkende rouch ûʓ der nasen und ûʓ den ôren, als ir wole moget hôren. wie stark und wie heiʓ her was?
30	daʓ Sibille und Ênêas sich von der hitze brûten. die zene ime glûten als daʓ îsen in dem fûre: her was vil ungehûre
35	des tûveles galle; her was rûch betalle, her ne was doch sô rûch niht, als ander tier diu man gesiht, niwan als ich û sagen sal.
40	sîn lîb was im bewassen al
98	mit nateren und mit slangen, mit korzen und mit langen, mit grôʓen und mit kleinen, an armen unde an beinen,
5	an handen unde an fûʓen. nû wir eʓ sagen mûʓen, wande wirʓ an den bûchen lesen, daʓ die nagele solden wesen, daʓ wâren clâwen vile scharf.
10	den schûm her ûʓ dem munde warf heiʓ und bitter unde sûr. her is ein ubil nâchgebûr. Der helle torwarde der zornde vile harde,
15	dô her die menschen gesach. niht langer her ne lach, zornlîche her ûf sprank. sîn âdem freislîche stank, wîte ginete im der munt.
20	her was gestalt alsam ein hunt hinden unde vorne. her strûbete sich vor zorne. die nateren und die slangen, da her mite was bevangen,
25	si bliesen unde gullen, freislîche si bullen, sô daʓ diu helle erwagete, und als der tûvel jagete, grôʓlîch daʓ gescrei was.
30	dô ervorhte sich Ênêas unde rou in diu vart. schiere des geware wart Sibille diu wîse. sie sprach vile lîse
35	solhiu wort in ir munt, daʓ her sâ zû der stunt alsô vaste enslief, daʓ her ne grein noch enrief Cerberus der arge
40	und alle sîne warge,
99	die an ime hiengen. in die porte si giengen der hêre unde Sibille. Cerberus gelach stille
5	gewunden alse ein schîbe. dâ lieʓen si in belîben. Dô daʓ alsô ergangen was, daʓ Sibille und Ênêas in die porte quâmen,
10	als wir ê vernâmen, zû den selben stunden vile sie dâ vunden lûterlîcher kinde vor der helle an einem ende,
15	da di mûder wâren mite tôt. sie liden michel nôt, si scriren vile sêre. Ênêas der hêre micheln jâmer ir gewan,
20	dô her merken began, wie jâmerlîche si sâgen und wie freislîche si lâgen beidiu nacket unde blôʓ; der jâmer dûhte in vile grôʓ.
25	dô her daʓ wunder dô vernam unde vore baʓ quam, Ênêas der wîgant michel here her dô vant, die tôt wârn von minnen.
30	dâ mûste her erkennen froun Dîdônen die rîchen, diu sich sô jâmerlîchen dorch sînen willen hete erslagen. ir schaden wolder klagen,
35	trûrechlîche sach hers an. mit dem houbet wankte sie hin dan, sine wolden niht ane sehen; daʓ irʓ solde geschehen, daʓ rou si vile sêre
40	und dûhte si unêre.
100	Dô si vernomen heten daʓ, dô fûren si vore baʓ, die vart lieʓens an ein heil. si funden der ein michel teil,
5	die tôt wârn dorch ritterschaft; vil grôʓ was der geselleschaft. dâ was der kunich Adrastus, Polinîces und Tydêus Ypomedôn und Partonopeus,
10	Amphîorâs und Canepeus, die ze Thêbîs den lîb verloren und den tôt dâ erkoren. ouch vander dar nâ der Troiâre vile dâ,
15	die von sîme lande, di er alle wole erkande. dâ was der kunich Prîamûs und der kûne Trôilûs, Pârîs unde Hectôr
20	und der wîse Anthênôr und der hovesche Athamas. harde vile der was, der ich genennen niene mach. dô si Ênêas gesach,
25	dô schamete her sich sêre: eʓ dûhtin unêre daʓ her von in gescheiden was, der herzoge Ênêas, von frunden und von mâgen,
30	die dâ erslagen lâgen in Troie der wîten. zû den selben zîten quam Ênêas der wîgant, dâ her der Criechen vile vant,
35	die Troie zebrâchen unde ir laster râchen. vil erkandir Ênêas. ich wil û sagen wer dâ was. Menelaus und Tytides,
40	Agamemnôn und Achilles,
101	und der fromige Aiax und der junge Protesilax. den erkande wol Ênêas, wande her der êrste was,
5	der vor Troie erschlagen wart. des gnôʓ her der herevart. der Criechen her dâ vile vant. dô sach her zer winstern hant eine grôʓe borch stân,
10	diu was vil egislîche getân, sô si von rehte solde sîn. diu mûre was îsenîn und glûte vone fûre; sie was ungehûre.
15	ein waʓʓer dar ûʓ flôʓ brinnende vile grôʓ, daʓ dâ Flêgetôn hieʓ. unreine was sîn flieʓ, eʓ was der hellische flûm:
20	harde wît was sîn rûm. Dô Ênêas dar nâher quam, micheln jâmer her vernam und grôʓ weinen in der stat. froun Sibillen her dô bat,
25	diu in dar geleite, daʓ sin des bereite umbe die borch mâre, waʓ volkes daʓ wâre, daʓ dâ klagete unde weinde,
30	unde waʓ daʓ jâmer meinde, daʓ her dâr inne hôrde. diu frouwe im antworde, oberʓ wiʓʓen wolde, daʓ siʓ im sagen solde.
35	Dô sprach diu prophêtisse «ich wil dir sagen gewisse, Ênêas geselle, daʓ is diu rehte helle, alsô dû gesehen maht.
40	dâ is immer inne naht,
102	dâ ne wart nie tach noch niemer werden mach. wie wol ich daʓ erkenne, dâ sint die sêle inne
5	mit vil maneger arbeit, daʓ dir die wârheit weder wîb noch man gesagen mach noch enkan daʓ hundert tûsendeste teil.
10	sie hânt michel unheil, die dar inne mûʓen sîn. daʓ wirt in dicke wole schîn immer ze allen stunden under den hellehunden.
15	der dâ wirt is ze hûs der heiʓet Râdamantûs. den sêlen her vil wê tût; gnâde und aller slahte gût is in vile tûre,
20	si brinnent in dem fûre mit tage und mit nahte. ir quâle is maneger slahte, ir fûre is âne lieht unde nis gelîch nieht
25	irdischeme fûre; eʓ is ungehûre und brinnet grimmechlîche. daʓ fûre in ertrîche is als waʓʓer dar wider.
30	si vallent ze allen zîten nider in daʓ abgrunde. si mûʓen ir sunde arnen vile sêre immer und immer mêre
35	beidiu tach unde naht. ir klage is unendehaht, [sie ne habent deheinen trôst, daʓ si iemer werden erlôst ûʓ der misselîcher nôt.
40	dar inne lebet der Tôt
103	iemer âne ende. quâle und missewende, vehten unde strîten is dâ zallen zîten
5	unde koln und niht ersterben. alle die daʓ erwerben oben ûf der erden, die dar geworfen werden, mit schanden mûʓen sie sich schamen,
10	wande si habent beide ensamen arbeit unde ungemach, daʓ dâ nie ne gebrach und nimmer ende geschiht. sone stêt eʓ umbe den menschen niht:
15	swenne sô eʓ sô stêt, daʓ ime ein angest zû gêt und ubiln geheiʓ lîden mûʓ, der sorgen wirt ime bûʓ, als her des smerzen entsebet,
20	wande im daʓ ungemach gebet einen anderen mût; als eʓ dem fleische wê tût, und ime unsanfte wirt getân, sô mûʓ diu angest zergân
25	des smerzen mit dem leide: dise habent aber beide den smerzen mit den sorgen den âbent und den morgen] in dem abgrunde,
30	daʓ dirʓ gesagen kunde nieman in ertrîche der lebet mennislîche, als ich dir eʓ sagen mach und als ichʓ selbe gesach,
35	wande ich dare komen bin. mich hete gefûret dar in diu frouwe Tîsiphône: daʓ ir mîn trohtîn lône, daʓ sie mich dannen brahte !
40	wie dicke ich sint gedahte
104	des wunders daʓ ich dâ vernam: ich was frô deich dannen quam.» Si sprach «Ênêas vartgenôʓ, daʓ jâmer is vile grôʓ,
5	daʓ ich dâ inne gesach, daʓ ich gesagen niene mach die nôt die ich dâ vant, dâ der wirt Râdamant die sêle jâmerlîche quelet.
10	dicke her in vore zelet ir missetâte. frû unde spâte ir schande er in verwîʓet. der bôsheit her sich flîʓet
15	der schalk Râdamantûs. dâ inne sitzet ouch Tantalûs in eime waʓʓer unz an die kelen und mûʓ iedoch vor dorste quelen, swie her in dem waʓʓer sî,
20	daʓ sînem munde is vile bî und im sô nâhen flûʓet: des her doch niht genûʓet. vor hunger lîdet her grôʓe nôt, daʓ her gerner wâre tôt
25	beidiu naht unde tach, wander sterben niene mach. mit quâlen mûʓ her werben, wan mohte her ersterben, eʓ wâre im lieber tûsent stunt.
30	im hanget vor sînen munt ephel und ander spîse, und alser vile lîse mit dem munde hin nâch vât, sô verre eʓ hin dane gât,
35	daʓ hers gewinnen niene mach. des hât her naht unde tach vile michel arbeit. her weiʓ wol die wârheit, daʓ her ne mach niht genesen.
40	dâ bî martert man die resen,
105	den man ouch vil wê tût, die dorch ir ubermût ze himele stîgen wolden und die gote enterben solden
5	und verstôʓen mit gewalt; der iegelîch sîn engalt. si stihten michel wunder. dâ was einer under, der des wolde wânen,
10	daʓ her Dîânen ze wîbe solde gewinnen und sin solde minnen, der was geheiʓen Tîtîûs. den quelet Râdamantûs
15	mit wunderlîchen dingen: her liget ruckelingen der arme verlorne. ûf sîner brust vorne sint gîre geseʓʓen,
20	die im sîn herze eʓʓen immer zallen zîten. starke sie strîten obe der wunden, daʓ sis ze keinen stunden
25	nimmer vergeʓʓent. al daʓ sie sîn geʓʓent daʓ wesset al zehant wider. her liget verre hin nider unde quelet vil sêre,
30	des im nimmer mêre nie ne sal werden bûʓ. die marter her dolen mûʓ. sîn quâle is im endelôs. daʓ screib alleʓ Mînôs,
35	der sich des underwant, daʓ herʓ mit lôʓe bevant mit listechlîchen dingen al besunderlingen die wîʓe von der helle,
40	die nieman mohte erzellen,
106	daʓ sim iemer an der erden alle kunt mohten werden.» Dô daʓ alleʓ was getân, dô lieʓen sie die helle stân
5	zû der winsteren hant, dâ der schalk Râdamant selbe inne wirt was. Sibille unde Ênêas giengen alleʓ vore baʓ.
10	Sibille gebôt ime daʓ, daʓ herʓ rîs dâ lieʓe und tâte als sin hieʓe. als diu frouwe daʓ gesprach, daʓ rîs her in die erde stach,
15	an die wegescheide. dô volgeten si beide der zesewen strâʓen. daʓ rîs hieʓ sin dâ lâʓen, daʓ her sich dâ bekande,
20	alser wider wande undeʓ dâ nâme, sô her wider quâme, als alle die heten getân, die dâ solden vore gân.
25	her tet alse sie in bat. dô quâmen sie an eine stat, dâ eʓ vile schône was, dâ vant der hêre Ênêas sînen vater Anchîsen
30	den alden und den wîsen. des frowete sich der wîgant. diu stat, dâ hern inne vant und dâ her in ouch lieʓ, ich sage û wie diu hieʓ:
35	Elysîî gevilde. dâ vant der helt milde zierheit maneger slahte, daʓ nieman konde gahten. Dô her ze sînem vater gienk,
40	minnechlîche er in enphienk,
107	her hieʓ in willekomen sîn. «Ênêas» sprach her, «sun mîn, ich sage dir die wârheit: daʓ dû dise arbeit
5	dorch mînen willen hâst getân, des sal eʓ dir vil wole ergân beidiu zêren und ze fromen, daʓ dû here bist komen von unser meister gebote.
10	eʓ habent dir die gote dorch fruntschaft gegunnen, dû hâst der mite gewunnen ir aller holde.» kussen her in wolde.
15	«nein» sprach her, «sun mîn, des ne mach niet sîn, daʓ mich ieman berîne: swie fleischlîch ich schîne, ichn bin doch niwan ein geist,
20	als dû selbe wole weist.» Dô hern berihtet hete des, dô leite in Anchîses an ein waʓʓer daʓ dâ flôʓ scône unde niht ze grôʓ,
25	lûter unde reine. edile gesteine was aller der grunt. aldâ teter ime kunt unde lieʓ in gesehen
30	alleʓ daʓ im solde geschehen: rouwe unde wunne und alleʓ sîn kunne, daʓ sint von ime quam, und wie getân ende eʓ alleʓ nam
35	umb in und sîn geslehte. her zeigete ime rehte die storme, die her sint vaht, und wie her wart wonehaht in Itâlischeme rîche,
40	dâ her sich manlîche
108	mit angesten berihte unde die borch stihte. die zeiget her im ouch, daʓ her dar an niht ne louch.
5	zaller êrst Albâne, ein borch wol getâne, und manege ander dar nâ. sînen sun zeigt her im dâ, der dannoch ungeboren was.
10	den sach gerne Ênêas. daʓ was ein seltsâne dink. «sihestû jenen jungelink, der dort stêt mit deme spere? dorch den fûrdich dich here,
15	den mahtû gerne erkennen, den sal von dir gewinnen diu schône Lavîne, diu junge winje dîne, des salt dû sîn vil gewis.
20	der kunich der ir vater is der is geheiʓen Latîn. Silviûs sal her genant sîn dâ obene ûf der erden und sal geboren werden
25	in einer wiltnisse: daʓ wiʓʓest vil gewisse. Sun, hâstû wol vernomen? von Silviô sal ein helt komen, der Silviûs Ênêas heiʓen sal.
30	der sal dir gelîchen al an hûte unde an hâre (daʓ sage ich dir zewâre), von siten und von sinnen, der sal ein sun gewinnen,
35	der sal heiʓen Ênêas, der dir bescheret was uber manich jâr hie bevoren. von ime soln werden geboren in sîneme geslehte
40	die mâren gûten knehte,
109	vil gewaldech alle ensamen, und gewinnent kunechlîchen namen. daʓ merke (sprach her), sun mîn, Rômulûs sal der eine sîn,
5	der mâre und der rîche, der vil gewaldechlîche daʓ rîche sal berihten und sal Rôme stihten und sal ir sînen namen geben.
10	der sal vil hêrlîche leben, wand Rôme houbetstat wesen sal in der werlde uberal. des mahtû haben wunne, daʓ die von dîme kunne
15	die werlt soln bedwingen mit meisterlîchen dingen. sô michel wirt ir kraft, daʓ si gemachent zinshaft diu lant alliu gelîche
20	ze rômescheme rîche.» Anchîses sprach aber dô sînem lieben sune zô «Ênêas sun mîn, des mahtû wole frô sîn,
25	daʓ dû hie hâst vernomen, daʓ dîn kunne sal komen ze alsô grôʓen êren. nû saltû hinnen kêren zû den dînen mannen.
30	als dû geverest dannen, sô kumestû vil gereite uber daʓ mere breite (sprach der alde Anchîses sun, gedenke vil wol des,
35	daʓ ich dich wîse: û sal aver diu spîse ein teil tûre werden, êr ir komet zer erden jenehalb uber mere,
40	sô daʓ dû und dîn here,
110	die helide wol vermeʓʓen, dorch nôt solt ir eʓʓen ûwer schuʓeln ûf ûwerm tische, alse fleisch unde vische
5	und als ander lîbnar. und swenne sô dû kumest dar, sun, dâ dû diz getûst, sô bistû dâ dû wonen mûst und ze dînem ende blîben.
10	swer dich dâ wil vertrîben, des saltû dich vil wole erweren unde dînen lîb generen unde doch mit arbeiten. dîn dink saltû wol bereiten
15	manlîche dar nâ unde vesten dich dâ sô dû aller beste maht; daʓ is dir gût bedaht.» Anchîses sweich dô stille.
20	Ênêas und Sibille urloub ze ime nâmen. schiere sie dô quâmen ûʓ der helle hine wider dannen si wârn gevaren nider
25	mit tage und mit nahte. dô sin hin wider brahte, dâ sîne man wâren, die sîn ungerne enbâren, mit urloub sie von ime schiet,
30	alsus saget uns daʓ liet. Der hêre unde sîn here fûren dô uber mere dar si gelucke sande. dô quâmen sie ze lande,
35	da diu Tiber in daʓ mere gêt, dâ noch Montalbâne stêt. die hieʓ her dô vesten. mit den mûden gesten gienk her ûʓ an daʓ lant.
40	den gemach, den her dâ vant,
111	nam frôlîche Ênêas der rîche und sîne vartgenôʓe lutzel unde grôʓe.
5	niht langer sie ne beiten, ir eʓʓen sie gereiten, so si aller beste mohten dô und giengen sitzen dar zô. Dô si wâren geseʓʓen
10	unde solden eʓʓen frôlîch als si tâten, alseʓ was berâten do si an daʓ lant quâmen, daʓ brôt sie dô nâmen
15	unde legetenʓ ûf ir schôʓ. des dwank sie der hunger grôʓ, den sie heten erliden. von dem brôte sie sniden schuʓeln vile reine,
20	grôʓe unde kleine, do si sich gemacheten dar zô; dar ûf legeten sie dô ir fleisch unde ir vische. sine heten ander tische
25	niwan ir knie unde ir bein. daʓ gemarkte ir dehein aller der die dâ sâʓen. dô sie daʓ fleisch gâʓen, die schuʓʓeln âʓen sie dar nâ.
30	daʓ gemarkte schiere dâ Ascânjûs der jungelink. «diz is ein hoveslîch dink,» sprach Ênêases sun, «waʓ welt ir des tûn?
35	des ne wil ich niht vergeʓʓen, daʓ wir unser schuʓeln eʓʓen. (daʓ sprach her dorch sînen spot) wil mir mîn meister got sô gehelfen hinnen,
40	daʓ ich noch hûs gewinne,
112	sô wil ichʓ gerne zellen zeime bîspelle her nâch uber lank, daʓ uns diu nôt dar zû dwank,
5	daʓ wir unser schuʓeln âʓen, daʓ ne wil ich niht lâʓen.» Daʓ gehôrde Ênêas, daʓ im vile lieb was. harde frowete her sich des.
10	her sprach «mîn vater Anchîses der sagete mir diz rehte und sprach «daʓ ichs gedehte unde eʓ wol vernâme, ob ich immer dare quâme,
15	da ich mîne schuʓeln âʓe, daʓ ich des niht vergâʓe, daʓ wir dâ blîben solden. nû sîn wir dâ wir wolden. ich hân eʓ rehte vernomen,
20	wir sîn in daʓ lant komen, des wir lange haben gegert. die gote habent uns des gewert, des wir si lange bâten, si scholen uns noch berâten.»
25	Dô her geredete alsô, dô wordens alle vile frô. ir leides sie vergâʓen, niht langer sie ne sâʓen, schiere sie ûf sprungen,
30	si spilden unde rungen und opherden ir abgoten. daʓ wart in allen geboten, daʓ si alsô tâten und die gote bâten,
35	daʓ sis mûsten gewalden unde in hulfen behalden daʓ lant dâ si wâren an. diu schif fûrden sie dan in die Tiber ûʓ dem mere.
40	dô was der hêre und sîn here
113	frôlîches mûtes, si froweten sich des gûtes, des si wânden haben dâ. eʓ was dannoch vil unnâ.
5	si wânden schaffen ir gemach, daʓ man dâ harde widersprach daʓ gemach wart in vil ungereit, ê danne si michel arbeit dar umbe heten erliden,
10	wande si vohten unde striden zû vil manegen stunden mit den sie dâ vunden und dien daʓ lant werden mit schilden und mit swerden.
15	Dô der hêre Ênêas alsô dare komen was ze Itâljen in daʓ lant, dô frâgete her die her dâ vant von dem lande mâre
20	und wer dâ kunich wâre, wander dâ gerne wolde sîn. dô saget man im, daʓ Latîn kunich wâre in deme lande. sîne boten her im dô sande,
25	driu hundert ritter gûte mit gerendem mûte, daʓ her dâ blîben wolde, sô wolder sîne holde gerne gewinnen.
30	her sande ime ze minnen ein sceptrum und ein crône, eine gebe vil schône, ein mantel und ein vingerlîn und einen koph goldîn,
35	der des kuneges Menelâî was. den sande ime Ênêas, wander mit fride wolde leben. Menelâûs het in ime gegeben, dô her ze ime was gesant,
40	dô her ze Troie an den sant
114	zaller êriste quam. diu gebe diu was lussam, die Ênêas dar sande deme kunege von dem lande,
5	wand ime was sîner holde nôt. sînen dienest her ime enbôt vile minnechlîche, daʓ hern in sîme rîche wolde lâʓen genesen,
10	daʓ her im willich solde wesen zallem sîneme gebote. daʓ swûr her bî sînem gote, swaʓ sô her in hieʓe, daʓ her des niht ne lieʓe
15	dorch deheiner slahte arbeit unde er sîne wârheit nimmer an ime gebrâche. Yljônix der gesprâche der leite die geselleschaft
20	unde warb die boteschaft. Dô daʓ alleʓ was getân, daʓ Ênêas der Troiân die boten dâ hin sande, dô nâmen si von dem lande
25	lûte die si leiten. niht langer si ne beiten, Yljônix fûr dô dannen mit sînes hêren mannen und mit den die si wîsten.
30	mit schatze sie sich spîsten, den die soumâre trûgen. sie funden kouf genûgen uber alleʓ daʓ lant. hêrlîch was ir gewant,
35	des si gnûch mit in nâmen. zû Laurente sie quâmen, dar si doch gerne wolden sîn. dâ was der kunich Latîn, der si vile wol enphienk.
40	Yljônix dar vore gienk
115	unde ein jungelink sîn neve. dô man Ênêases geve vor Latînum den kunich trûch, si dûhte in lobelîch genûch:
5	eʓ dûhtin michel fruntschaft. dô worben sie die boteschaft als si vil wol kunden. den kunich sie dô funden in hogen unde in michelm mût.
10	diu botschaft dûhte in gût und diu gebe êrsam. danklîchen her si nam alseʓ michel reht was. «ûwer frunt Ênêas
15	sal mir willikomen sîn! daʓ wirt ime wole schîn, mûʓ ich und her leben.» dô hieʓ her den boten geben ze danke und ze lône
20	driu hundert ros schône zêren unde ze minnen. diu mohte wol gewinnen der kunich in dem lande. Ênêase her sande
25	zeheniu vil hêrlîche Latînûs der rîche. Dô eʓ alsô ergienk, daʓ her die gâbe enphienk und die boteschaft vernam,
30	dô teter als im wol gezam, wander ein edel kunich was. «ûwer frunt Ênêas der is mir willikomen hie. ich wâne, daʓ ern quâme nie
35	dâ her willikomener wâre. ir solt ime sagen ein mâre, des her frô wesen mach. ich weiʓ eʓ wol manegen tach unde vil manech jâr
40	âne zwîvel vor wâr,
116	daʓ er noch here quâme, ê dan ich mîn ende nâme, daʓ ich daʓ solde geleben. mîn tohter wil ich ime geben
5	ze minnen und ze wîbe und nâch mînem lîbe mîn lant und mîn rîche. daʓ saget im wârlîche, wande eʓ is mir geboten
10	und gewîssaget von den goten: die wil ichs lâʓen walden. ich hân si ime gehalden unze an dise stunt. eʓ is mir lange wole kunt,
15	daʓ her si haben solde: ich wolde oder enwolde, die gote hânt si ime gegeben. soldich nû dar wider streben, daʓ wâre ein unminne.
20	mîn wîb diu kuniginne diu ne lieʓ mich nie gerûn, ê ich der mite mûste tûn, des ich gerne hete enboren. ir hât ein edel man gesworen:
25	dem ne mach si werden niet. wan daʓ man mir eʓ geriet, ich ne heteʓ nie getân: sie mûʓ haben der Troiân, ûr hêre, dem si was beschert.
30	daʓn mach nû niht sîn erwert. ichn rede eʓ niht umbe daʓ, ichn gunde ir Turnûse baʓ dem vil edelen herzogen, daʓ wiʓʓet vor wâr ungelogen,
35	ob eʓ immer mohte sîn. mîn rîch und diu tohter mîn wâren wol zû ime bewant, beidiu lûte unde lant, wan daʓ eʓ wesen niene mach.
40	ûrm hêren, den ich nie gesach,
117	dem is sie enteile getân: Turnûs mûʓ ir abe stân, eʓ sî uns lieb oder leit. her is ein ritter gemeit
5	unde ein stolzer jungelink. ime sal ditze dink vil ubile gevallen und sînen frunden allen, den eigen und den frîen;
10	ouch solen sie mich zîen der scholt umb dise missetât. iedoch nis es ander rât, es ne mach niht werden bûʓ, wand mîn tohter haben mûʓ
15	ûwer hêre Ênêas, deme sie bescheret was êr si ie worde geboren. Turnûs hât si iemêr verloren.» Dô sprach aber Latîn
20	«ir solt des vil gewis sîn, saget Ênêase daʓ, daʓ her sich trôste deste baʓ unde zû uns kêre. hie wirt im michel êre,
25	sal es gelucke walden. ich wil in wol behalden (sprach der kunich rîche) daʓ saget im wârlîche, daʓ ich ir ime wole gan.
30	ich bin aber ein alt man, alse ir selbe wol gesiet: ichn mach hinnen vort niet vehten noch strîten noch gewâfent rîten:
35	mir wâre zîtiger gemach.» dô der kunich daʓ gesprach, daʓ her sie getrôste alsô, des wâren dô die boten frô, daʓ sie ie dare quâmen.
40	urloub sie dô nâmen,
118	in was getrôstet ir mût, daʓ si nehein michel gût dar vor niht ennâmen. dô si dar wider quâmen,
5	al dâ ir hêre was, dô was der hêre Ênêas gerîten ûʓer dem here ûf einen berch bî deme mere, der stechel was unde hô.
10	des was der hêre vile frô. gût lant dar umbe lach. dô hern rehte besach die hôge und die wîte, daʓ man in an der sîte
15	niemanne endorfte weren, ob in al diu werlt wolde heren, wole geviel im diu stat. helfe her dô bat die gote sîne mâgen.
20	wand alle die'n gesâgen die dûhter gût ze lobene, wand ûf dem berge obene sprank ein brunne ze mâʓen grôʓ. starke her dernider flôʓ
25	von dem berge in daʓ mere. dar legete her sîn here und saget in waʓ her wolde, daʓ her in bûwen solde, obeʓ sie gût dohte,
30	so er aller beste mohte. eʓ dûhte si alle ensament gût. dô vernam her ir mût, manlîche erʓ ane vienk. einhalb dar zû gienk
35	ein hals der ne was niht breit. daʓ was doch diu meiste arbeit, daʓ der hals dorchbrochen wart, want der vels der was hart. die borch nandens Albâne.
40	dô griffen die Troiâne
119	manlîche dar zû beidiu spâte unde frû, starke sie sich rûrden. dar ûf sie dô fûrden
5	ir spîse unde ir wâfen. si mûsten lutzel slâfen, si worhten unde wachten, ir borch si veste machten, wan des was in vile nôt,
10	si wâren anders alle tôt. Sint sie sichs underwunden unde es ouch begunden, sô bûtens unde worhten als si es wol bedorhten,
15	si hiewen unde hûben, dorch den hals si grûben zû der selben zîte graben vile wîte tiefe unde werehaft
20	mit aller ir kraft, want si dâ blîben wolden und sich dâ weren solden, ob es nôt wâre. berfride und erkâre
25	macheten sie vile dâ bî einander gnûch nâ. steine sie trûgen, ir brucke sie slûgen ob den graben wîten,
30	daʓ si uber mohten rîten, beidiu rîten unde gân. dô daʓ alsô was getân, daʓ der hêre Ênêas alsô drûf komen was,
35	dô sach her von der borch nider, dâ die boten quâmen wider harde frôlîche, die Latînûs der rîche wole hete gelâʓen.
40	die hêren niht vergâʓen
120	des in bevolen was. wol enphienk si Ênêas dâ si zû ime quâmen. zeiner sprâche sie in nâmen
5	und sageten im die botescaft, die minne und die fruntschaft, die im Latînûs enbôt, daʓ her alle sîne nôt wol uberwinden solde,
10	wanderm geben wolde sîn tohter und sîn rîche, daʓ her sichs manlîche schiere underwunde, wanderm wole gunde.
15	Dô daʓ vernam Ênêas, dem eʓ vile lieb was, frôlîche schiet her dannen, her sageteʓ sînen mannen armen unde rîchen
20	allen gelîche dem minnern und dem mêren. dô wart under den hêren ein wunne vile grôʓe. die mûden hûsgenôʓe
25	worden alle vile frô, daʓ in der kunich alsô gûten trôst hete enboten. si oppherden ir abgoten und macheten grôʓe wirtschaft
30	dorch die gûten boteschaft, die sie heten vernomen. dô daʓ alsô was komen, dô was der kunech Latînûs ze Laurente in sîme hûs,
35	alseʓ ime wole gezam dô daʓ mâre vernam sîn wîb diu kuneginne, mit zorne âne minne gienk si vor den kunich stân
40	und wart vil ubele getân.
121	ir zuhte sie vergaʓ, unsanfte sie nider saʓ, daʓ si dem kunege niht enneich. dô si eine wîle gesweich,
5	dô sprach sie mit zorne «ouwî, kunech verlorne, herzelôser Latîn, nû soldest dû tôt sîn, hete dirs got gegunnen,
10	want dû hâst begunnen, daʓ dir vil ubile sal ergân. wil dû an den Troiân dîn rîche gerben, sô mûʓestû êr sterben.
15	dû wilt im dîne tohter geben? daʓ enmûʓer nimmer geleben, daʓ her sie gewinne! dû bist ûʓer sinne.» Sie sprach «mir is zoren:
20	daʓ dû den sin hâst verloren, daʓ sal dir wol schînen. woldest dû Lavînen dem edelen Turnûse nemen, daʓ mohte ubele gezemen.
25	wie ungerne ich daʓ sage, daʓ si immêr gelâge bî dem ungetrouwen man, der nie landes teil gewan alsô breit als ein schaft,
30	daʓ wâre ein unsâligiu schaft, diu ime ze teile worde. im nis von geborde solich êre niht geslaht. dû bist ubile bedaht.
35	her was tumb der dir eʓ riet, wandeʓ enmohte wesen niet, ob eʓ dir gienge an daʓ leben. soldestû si sô hin geben, so gewunnestû schiere
40	drî eidem oder viere:
122	ir is genûch an einen. dû maht uns wol bescheinen bôsen willen âne nôt. si wâre mir lieber tôt
5	unde ich selbe unde dû. wan bekennest dû dich nû? soln die eide sîn verloren, die dîne man hânt gesworen Turnô deme herzogen?
10	wiltû daʓ si sîn gelogen ? daʓ is ime ummâre, ob eʓ alsô wâre, daʓ du drumbe soldest sterben. dune maht in niht enterben
15	der borge noch des rîches. daʓ dû sô lîhte entwîches unrehteme gemûte, daʓ nis nehein gûte.» Aber sprach diu kuneginne
20	«eʓ kumet von unsinne, daʓ dû kêrest an den man, der ûʓer Troie entran sînem hêren und sînen knehten, wander niht getorste vehten.
25	her entran sînen mâgen, die dâ erslagen lâgen : fliehende schiet her dannen mit den sînen mannen, der her genûch vant.
30	her quam ze Lybiâ in daʓ lant unde zû Kartâgô. des hât diu frouwe Dîdô engolden vile sêre, daʓ si im gût und êre
35	zû vil tete unde erbôt. dorch sînen willen liget si tôt. daʓ is im unmâre. des ich sicher wâre, ob eʓ dar zû quâme
40	daʓ her mîn tohter nâme,
123	swenner sie gevienge und sîn wille ergienge, sô tâte ir der Troiân, alser der hât getân,
5	diu dorch in liget tôt. ime is nû genâden nôt: her nâmes, woldes dû sim geben. dû mohtest aber wol geleben, daʓ her unsich betroge
10	unde dîner tohter loge swaʓ sô her ir gehieʓe und uns die tohter lieʓe geben swem wir wolden. wie wâre danne vergolden
15	ir êre unde ir magetûm? hern lieʓe eʓ dorch den rîchtûm und dorch die borge und dorch daʓ lant: unser tohter lieʓe her zehant, hern blibe dorch daʓ gût hie.
20	an Troiâren vant man nie êre noch trouwe. des hân ich grôʓe rouwe, daʓ dû ze ime kêrest und in sô vaste êrest.»
25	Dô sprach gezogenlîche Latînûs der rîche zû der kuneginne «waʓ wânet ir gewinnen mit der rede die ir tût ?
30	war zû is der zoren gût ? wânet ir michs bedwingen mit ubellîchen dingen des dâ wesen niene mach ? ich weiʓ eʓ wole manegen tach,
35	swie lieb sô eʓ mir wâre, daʓ Turnûs der mâre mîn tohter nimmer gwunne. swer sô ime ir gunne, swaʓ sô man es tû,
40	her kumet nimmer dar zû,
124	daʓ si iemer werde sîn wîb, ob wir alle unsern lîb dar umbe solden lâʓen. ir zornet zunmâʓen,
5	eʓ is ein ungefûge zorn: ir habet mêr der mite verlorn denne ir habet gewunnen. daʓ irs habet begunnen, ir habet vil ubele getân.
10	waʓ wîʓet ir dem Troiân, einem vil edelen man, der û wole gûtes gan und û nie ubele gesprach? nû habet ir ûwern ungemach
15	ubele dar mite gebûʓt. ich weiʓ wol, daʓ her haben mûʓ unser tohter ze wîbe. daʓ si Turnô blîbe, des ne habe ich neheinen wân;
20	swaʓ sô dermit is getân gesichert unde gesworen, daʓ mûʓ alleʓ sîn verloren.» Dô sprach aber Latîn «desn mach ander rât sîn,
25	swaʓ sô man dar wider tû, sô nis niht sô gût zû alsô gût gedolt. daʓ was betalle ûwer scholt, ob ich sie Turnô geswûr.
30	ich weste wol deich missefûr, wande ich heteʓ wol vernomen, daʓ eʓ niht mohte vollekomen, wande eʓ was mir enboten und gewîssaget von den goten
35	unde sageteʓ û vor wâr, ichn weiʓ uber wie manech jâr, daʓ eʓ alsô mûste wesen. done lieʓet ir mich niht genesen noch mit genâden leben.
40	dem si die gote hânt gegeben,
125	dem wil ich sie lâʓen. woldet ir ûch mâʓen solher unzuhte, ob eʓ ûch gût dûhte,
5	eʓ dûhte mich gût, wandeʓ is bôse daʓ irʓ tût. ir habet ze grôʓe undolt. ich wil es wesen âne scholt, ob irs ein teil engeldet,
10	daʓ ir einen helt scheldet, der is geboren von den goten, die daʓ alleʓ hânt geboten. unde enscheldet in sô niht, ob her û ze lobene geschiht,
15	daʓ irs ûch iht berouwet. des ir mir niht getrouwet, daʓ is doch diu wârheit. waʓ touch ûwer fravelheit? ir sît ein teil ze freissam.»
20	dô diu frouwe daʓ vernam, daʓ herʓ alsô meinde, dô clagete sie und weinde, ir undolt was vile grôʓ. dô es den kunich bedrôʓ,
25	von zorne gienk her dannen hin ze sînen mannen ûʓ der kemenâten. her was des wol berâten, daʓ her si lâʓen solde
30	sprechen swaʓ si wolde. Dô diu kuniginne mit solhem unsinne ir hende lange geslûch und geweinde genûch,
35	ê danne sie sich ûf gerihte, einen brief sie selbe tihte, den si mit schônen worden vant, und screib in mit ir selber hant. den sande sie dâ Turnus was,
40	der den brief selbe las.
126	deme hêren sie enbôt als eʓ ir was nôt, alsô sie eʓ hete vernomen unde wie eʓ dar was komen
5	daʓ vil leide mâre. bî ir kamerâre sande ime diu frowe den brief. diu rede enwas im niht lief. dô her betalle las
10	daʓ an dem brieve gescriben was, dô zornde Turnûs, daʓ im der kunech Latînûs umbe sô getâne scholde sîne tohter nemen wolde
15	und sîn kunichrîche. doch markterʓ buntlîche, wand des was im vile nôt, dô im diu kuneginne enbôt, daʓ herʓ alsô ane vienge,
20	daʓ eʓ ime wole ergienge, alseʓ ime gezâme, daʓ her des war nâme, daʓ her den Troiâre vertribe, daʓ ir neheiner dâ belibe,
25	wandeʓ wâre schande, der ûʓer fremedem lande dar vertriben quâme, daʓ herm sîn wîb nâme und sîne borge und sîn lant,
30	dâ hern geerbet ane vant, und ein unêre. ouch enbôt sim mêre, her solde sich versinnen und trôst nemen zir minnen
35	unde zû Lavînen, daʓ her daʓ lieʓe schînen, wie lieb sime wâre, daʓ her den Troiâre ûʓ dem lande verstieʓe.
40	daʓ her des niene lieʓe,
127	dâ wolde sime helfen zû beidiu spâte unde frû mit allen ir sinnen, mit schatze und mit minnen,
5	mit silber und mit golde swenne sô her wolde. Turnûs hete grôʓen zoren. her sprach «daʓ mir hât gesworen der kunich unde sîne man,
10	daʓ hân ich gerne ob her mirs gan. sîn tohter und sîn rîche daʓne mach mir lîhtechlîche niht werden benomen. ich bin sô rehte dar an komen,
15	ichne wil sîn niht verkiesen. ouch enmach ichs niht verliesen die wîle ich hân mîn leben. her hât mir gîsel gegeben, sîne man, die ich kôs.
20	wil her werden trouwelôs unde meineide, ich wil der wârheide an mîne gîsel jehen, dieʓ gehôrt hânt unde gesehen,
25	gûter lûte sô vil, daʓ her nû bôslîche wil und unhêrlîche werben. ich wolde ê ersterben unde den lîb verliesen
30	unde wolde ê kiesen, daʓ ich mit êren tôt belibe, ê danne mich vertribe ein ellende man, der ûʓer Troie entran.»
35	Turnûs sprach aber mêre «eʓ mûget mich vil sêre daʓ ichʓ gesagen niene kan umbe den entrunnen man, der ze Troie wart sigilôs
40	und mit schanden verlôs
128	sîn wîb unde sîn lant. waʓ her dâ brôder lûte vant âne herze unde âne were mit den entran her uber mere.
5	wes wil her hie beginnen? wânt her hie lant gewinnen? des sal im ubele zouwen. diz lant mit dirre frouwen eʓ wirt ime vil ungereit.
10	eʓ is ein michel tôrheit, daʓ her sô kintlîchen vert. heter sîn eigen lant gewert, danner mit schanden wart vertriben, wârer mit êren dâ beliben,
15	sô heter manlîche getân. swenne sô mir ein Troiân nâme lant unde wîb, sô ne tohte mir mîn lîb, sô wâre ich des wole wert,
20	daʓ man mir schilt unde swert nâme und al mîn êre und daʓ ich nimmer mêre wider fromen man gesprâche, ob her an mir râche
25	daʓ im die Kriechen tâten. her is ubile berâten und vil ubile bedaht: der in dar an hât braht, der hât im ubile mite gevaren.
30	hern mach sich des niht bewaren, hern mûʓe mir rûmen daʓ lant, oder her lâʓet mir ein phant: sînen aller liebsten lîb. ich wil mîn lant und mîn wîb
35	wol vor ime behalden, sal es gelucke walden.» Dô sprach aber Turnûs «daʓ mich der kunech Latînûs alsus wil betriegen
40	unde mir erliegen
129	den eit den her mir swûr, sone weiʓ ich wes her erre fûr, daʓ herʓ ie gelobete. ichn weiʓ ob er tobete,
5	dô her sich es underwant. ich hân die borge und daʓ lant alle in mînem eide. ê ich dâ von scheide, eʓ wirt ê lange bestriten.
10	her hât ze lange gebiten, ob er mir eʓ nemen wil. ich hân frunde sô vil, manne unde mâge, daʓ ich wol gelâge
15	den bôsen Troiânen, die mich wânent ânen wîbes unde êren. si mûʓen hinnen kêren, sie sint ubile here komen:
20	mirn werde mîn lîb benomen in vil korzen zîten, ich wil mit in strîten sô daʓ sis schande gewinnen. des wil ich beginnen
25	schiere ernestlîche. si soln in diseme rîche vil ubile gedîen. ich ergetze sie ir frîen mit leide und mit rouwen,
30	des solt ir mir getrouwen, als mir ze mûte gestêt, daʓ eʓ in niemer ergêt ze deheinem lieve.» dô hieʓ er scrîben brieve.
35	vil wîten her die sande mit boten after lande dâ sîne frunt wâren. den hieʓ er enbâren unde in klagen sîne nôt.
40	scône rede her in enbôt
130	mit gefûgen worden. unde als eʓ gehôrden sîne mâge und sîne man, michel here her gewan
5	unde grôʓe mankraft, daʓ si was unzalehaft. Turnûs der edile man michel here her gewan. eʓ was aber lanksâme,
10	êr eʓ ze samene quâme, die risen und diu hêrschaft. dar quam diu mâre ritterschaft, die her besande wîten after lande.
15	dô si zû zim quâmen und sîne rede vernâmen, wand sim wol gûtes gunden, in den selben stunden daʓ si sich gereiten
20	und des tages beiten, der in enboten was, die wîle bûwete Ênêas sîne borch Albâne und sîne Troiâne,
25	wander hete wol vernomen, daʓ Turnûs dar wolde komen mit vil grôʓeme here. dâ wider schûf her sîne were so er aller beste mohte getûn.
30	dô solde Ascânjûs sîn sun eins tages birsen rîten. zû den selben zîten, dô her daʓ urloub gewan, dô nam her sîne weideman,
35	den der walt kunt was. dar zû gab im Ênêas zweinzich jungelinge willich zû dem dinge, biderbe unde wol gezogen.
40	si fûrden kocher unde bogen
131	und vil scharphe strâlen und swert mit schônen mâlen und braken vile gûte. ir rocke unde hûte
5	wâren grâ schâfvare, die wîsten sie dare die den wech kunden, aldâ si wilt funden. Nû hôret wie der jungelink
10	Ascânjûs sîn dink an dem spile ane vienk und wâ daʓ birsen ergienk und welch wiltbrât her gewan. dâ bî wonde ein edil man,
15	der was geheiʓen Tyrrêûs. her hete ein vesteʓ hûs in der gegene dâ bî und hieʓ diu veste Tyrrêî, [und stunt] bî Laurente in dem walt.
20	der selbe hêre der was alt und swach an sînem lîbe. her hete bî sînem wîbe zwêne sune hêrlîche. al ne wâren sie niht rîche,
25	si wârn vil gûte knehte von edelem geslehte, stark unde schône, wîse und kône, ob uns Virgiljûs niht enlouch.
30	eine tohter heter ouch, eine maget wol getâne, geheiʓen Silvîâne. Vernemet diz vor ungelogen: diu maget het einen hirʓ gezogen,
35	der was vile wole zam, schône unde lussam, grôʓ unde wol gehorn. dar abe quam vil michel zorn. her was wol zehen jâr alt.
40	under wîlen gienk her in den walt
132	weiden mit deme wilde des tages ûʓ an daʓ gevilde und zâbent wider in daʓ hûs. und als der hêre Tyrrêûs
5	obe sîme tische saʓ, der hirʓ diende im alser aʓ. uber sîn houbet vorne kleibte man im an sîn horne kerzen die branden,
10	die sînen site erkanden, wande man der vone gesach. ich sage û wes her mêre phlach, des im der hêre weste dank: her rihte sich ûf sô her trank;
15	her was gelêret den site. dâ was dem hêren wole mite und diu junkfrowe was es frô. des selben tages quam eʓ sô (daʓ was sîn unsâlicheit),
20	dô Ascânjûs birsen reit, als ir dâ vor habet vernomen, dô was der hirʓ hin ûʓ komen ze anderen tieren mit wilden hirʓen vieren
25	eines morgenes frû. dô reit Ascânjûs dar zû mit sînen weidegesellen. die bogen hieʓer stellen dâ si daʓ wilt funden.
30	die dâ schieʓen kunden, die giengen zû den boumen stân. Ascânjûs der Troiân bî eime boume er stênde bleib und schûf daʓ man daʓ wilt treib.
35	Dô wart daʓ wilt sô getriben dâ Ascânjûs was beliben an eime boume gestân. dô quam zû ime gegân der hirʓ der dâ was zam.
40	und alser im sô nahen quam,
133	daʓ in selben dohte, daʓ hern schieʓen mohte, dô râmder im der sîten. daʓ wilt daʓ schiet sich wîten,
5	daʓ dâ freislîchen flôch. den bogen her manlîchen zôch. der zame hirʓ der was grôʓ. dorch den lîb her in schôʓ ein wênich hinder den bûch,
10	daʓ her die strâlen dannoch trûch. daʓ blût starke ûʓ flôʓ, want diu wunde diu was grôʓ. dô her den hirʓ hete gewunt, die braken lieʓ er sâ zestunt
15	unde schuftes an die vart. michel froude dâ wart unde spil harde gût, dô si bestunken daʓ blût, dâ eʓ viel an daʓ gras.
20	der hirʓ der dâ wunt was dô her der wunden entsûb, balde her sich dannen hûb zû der vesten hin wider und viel tôter dernider,
25	daʓ her dar in niht volle quam. dô der wirt daʓ vernam und sîn tohter diu maget, dô wart dâ vil geklaget. die sune eʓ ouch vernâmen.
30	do si alle dar quâmen und si in tôten vunden und si ûʓ der wunden daʓ blût dieʓen sâgen und si wolden frâgen,
35	wer daʓ mohte hân getân, dô quam der junge Troiân Ascânjûs dar zû gerant. bî dem hirʓe her si vant die unkundige diet.
40	sin vernam sîner rede niet,
134	ir rede her ouch niht vernam. hern weste niht daʓ her was zam, ouch enkonder sie niht frâgen. dô si in komen sâgen,
5	der in den hirʓ hete erslagen, unde sie in hôrden jagen frôlîche mit dem horn, dô was in allen zorn. in daʓ hûs si wider giengen,
10	ir wâfen sie geviengen, swert schilt unde spere. si heten michile gere, daʓ si in ze tôde slûgen. ê si im ihtes zû gewûgen,
15	do bestunden sin mit unfrede, ê sim gesageten die rede, war umbe sie eʓ heten getân. dô wart ein sîn Troiân dorch den lîb geschoʓʓen.
20	daʓ het hers genoʓʓen, daʓ her dâ tôt lach. dô daʓ Ascânjûs gesach, daʓ man sîne lûte slûch, dô wart her zornich genûch.
25	Dô misseviel im daʓ dink. her was ein snel jungelink, den bogen heter gespannen. her sprach ze sînen mannen, ob si ime helfen wolden,
30	der tôte worde vergolden, ê danner quâme dane. ein scharphe strâlen sazter ane und rach sînen weidegenôʓ: Tyrrêûses sun her erschôʓ,
35	der der eldiste was, daʓ her mêre niht genas noch nimmer mêre wort gesprach. die gieʓâdern her im brach, daʓ her tôt viel an den graben.
40	dâ quam michel leit abe.
135	Dô des der brûder wart gewar, manlîche rander dar zû dem hêren Ascâne und râmde sîn ze slâne
5	an daʓ houbet mit dem swerde, niwan daʓ in ernerde, daʓ her wol geriten was: daʓ half im daʓ her genas unde dannen quam gesunt,
10	wande jener ze fûʓen stunt, hern mohte in niht erspringen. diu ros hieʓer bringen im und sînen mannen und kêrden sâ dannen
15	die fremeden birsâre. und als die borgâre ûf diu ros quâmen, ir schilde sie dô nâmen unde ir spere unde ir bogen.
20	dô wâren jene vor gezogen, die in den frunt heten benomen, und wâren ûf ein vels komen. aldar volgeten sie in nâ und jene erwereten sich dâ,
25	wand Ascânjûs gesande einen boten von dem lande ze sîme vater dâ her was. dô clagete hêre Ênêas, daʓ her in dâ hin rîten lieʓ.
30	driu hundert ritter her hieʓ dâ hine varen balde mit gewâfine ze walde und hieʓ si balde rîten. in den selben zîten
35	wâren sie vil nâch tôt. si liden angest unde nôt, daʓ si den lîb ernereten: idoch si sich erwereten, wande in diu helfe quam,
40	driu hundert ritter lussam,
136	ein wol gewâfenete schar. dô si ir worden gewar, dô worden sie vile frô da si ûf dem steine stunden hô;
5	lieb was in daʓ mâre. aber die borgâre und die von deme lande die lieʓen die schande und den schaden hine gân
10	und alleʓ daʓ in was getân, die kêrden alle dannen, der hêre mit den mannen, si flohen vile balde sumelîche ze walde,
15	sumelîche in die borch wider, und jene fûren hernider. swaʓ sô sie ir mohten ervaren, irn genas nie dehein baren. Dô triben sie die geste
20	wider in die veste, wan si heten unheil. ir lûte was ein michil teil ûʓerhalb der borch beliben, do di andern worden in triben
25	beidiu wunt unde erslagen. sumelîche lieʓen sich jagen after walde her und dare. dô erbeiʓete diu schare vor die borch ze fûʓe.
30	si heten gûte mûʓe. dô hete Tyrrêûs gerne erweret sîn hûs, daʓ lieʓ her vil wole schîn. desn mohte aber niht sîn,
35	sîn helfe was ze kleine. si worfen grôʓe steine und schoʓʓen vaste mit den bogen. die valporten heten si ûf gezogen und giengen ze were stân.
40	die geste hieʓen si abe gân,
137	ob si den lîb wolden generen und si wânden sich erweren. daʓn half aber niht ein bast, want diu borch ne was niht vast,
5	si giengen drin mit gewalt. der hêre Tyrrêûs engalt her ne weste selbe wes. harde rouwich was her des, daʓ her sînen sun het verloren
10	und die hêren ir zoren an im sô sêre râchen und im sîn hûs brâchen, daʓ was ime ein ubil rât. si nâmen ir wilbrât,
15	ze Albâne siʓ sanden, daʓ hûs sie verbranden. Dô diu veste was verbrant, dô fûren si uber al daʓ lant. grôʓen roub si nâmen,
20	und swaʓ si ane quâmen daʓ was alleʓ verloren, vihe fleisch unde koren, mele brôt unde wîn. si dahten daʓ si mûsten sîn
25	ze Albâne beseʓʓen. die helide vermeʓʓen sazten sich zû der were, wande sie mit here wole werben kunden.
30	si nâmen daʓ si funden und alleʓ daʓ in tohte daʓ man gefûren mohte getrîben unde getragen unde leiten manegen wagen
35	die stolzen Troiâne ûf Montalbâne, die alden zû den jungen. die gebûre sie bedwungen, daʓ sin den wech wîsten.
40	ir borch sie dâ spîsten
138	vil nâch zeime jâre, swem eʓ leit wâre. Dô daʓ mâre ûf quam undeʓ Turnûs vernam,
5	dô was her des vil unfrô, daʓ der Troiâr alsô den edilen man hete erslagen. harde halferʓ ime klagen, daʓ her daʓ hûs hete verbrant
10	und si uber alleʓ lant den roub heten genomen. her was ze Laurente komen unde hâte gesant nâch den hêren in daʓ lant
15	und sagete in daʓ mâre und nam die borgâre, die ime mohten gefromen. die forsten heter ouch genomen und manegen helt lussam,
20	mit den her vor den kunich quam. Den daʓ ubel was getân die hieʓ her bî ime stân. vaste her ir rede sprach und clagete daʓ ungemach,
25	daʓ im dâ getân was. her sprach «daʓ hêre Ênêas sô wol hie wart enphangen, daʓ is ze leide ergangen uns und unsern holden.
30	des hât sêre engolden der edile man Tyrrêûs, dem zebrochen is sîn hûs und sîn sun dâ liget tôt. des ne wâre dehein nôt,
35	daʓ sis immer gedehten: sie hânt ime ir vehten unsanfte bescheinet. ichn weiʓ waʓ daʓ meinet, daʓ eʓ der kunich wil verdolen.
40	daʓ sî û allen unverholen,
139	ich ne wilʓ im niht vergeben: sal ich behalden mîn leben, eʓ wirt ime zunminnen. ichn woldes aber niht beginnen
5	noch daʓ ubel mêren, ê danne ich mit û hêren den kunich hete gesprochen. eʓ wirt alsô gerochen, daʓ im nie dehein vart
10	ze solhen schanden ne wart, daʓ sie unser lant verheret hânt und verbrant und des mannes veste. wir mohten solher geste
15	hie vile wole enberen. ich wil in unser lant weren sô daʓ siʓ rûmen mûʓen. ich gesetze sie ze bûʓen, daʓ si hie hânt missetân.
20	man sal es in vaste widerstân, daʓ si unser lûte hânt erslagen. ich geschaffe daʓs ouch mûʓen clagen in vil korzen zîten. swaʓ ich mir mach berîten,
25	eʓ wirt in ze rouwen. solden si borge bouwen mit gewalt in diseme lande, daʓ wâre ein michel schande.» Dô sprach der kunich Latîn
30	«der rede mach lîhte gnûch sîn, daʓ lob is an den werken, derʓ rehte kan gemerken. ir sît ze verre drane komen, wande ich hân daʓ wol vernomen,
35	daʓ der hêre Ênêas selbe dâ niene was, dâ daʓ ubel wart getân, und weiʓ daʓ wole âne wân daʓ eʓ von ungelucke quam.
40	eʓ was im leit dô herʓ vernam,
140	her vertreib die eʓ gerieten, ouch wil her gerne bieten êrhafte sûne. daʓ stêt im wol ze tûne,
5	ouch sal herʓ niht lâʓen. woldet ir ûch mâʓen umbe die rede eteswaʓ, daʓ geviele mir baʓ. ichn mach û des gelouben niet,
10	daʓ ir ûch die rede an ziet ze alsus grôʓen schanden. jâ is û hûte entstanden manich jâr unde tach. swâ eʓ mit êren wesen mach,
15	dâ râte ich daʓ manʓ gûte unde man des hûte, daʓ niht ubel dâ von quâme, der ûch dar vone nâme, daʓ moht û ze staten komen.
20	sine gerieten û niht ze fromen, die ûch diz sprechen hieʓen. man lâʓes den genieʓen deme eʓ ie leit was. ouch is der hêre Ênêas
25	dorch genâde an uns komen: ich hân in in mînen fride genomen und sîn volk und sîn gût. swer im iht leides tût, der hât wider mich getân
30	unde hât mich âne wân al betalle verloren.» dô was dem hêren vil zoren Turnô und vil ungemach, daʓ Latînûs dise rede sprach.
35	her clageteʓ sînen mannen und gienk mit zorne dannen unde mit unminne hin ze der kuniginne. Do er in die kemenâten gienk,
40	minnichlîche in enphienk
141	diu kuniginne rîche. vil gezogenlîche gnâdete her ir dâ wider. si hieʓ in sitzen bî ir nider.
5	dô her bî ir gesaʓ, sîner rede niht vergaʓ Turnûs der rîche vil gewiʓʓenlîche: her was ein edile forste.
10	«frouwe, ob ich getorste, ich wolde û von dem kunege clagen, daʓ her daʓ laster wil vertragen, daʓ Ênêas der Troiân im und û hât getân
15	unde uns andern allen. wem mohte daʓ gevallen? her sprichet der wunderlîche zû. swie bôslîche her tû, ichn wil eʓ weiʓ got niht verdolen.
20	wande her hât mir bevolen sîn lant und sîn rîche. swie her mir geswîche und mîner wârheit niene giht, mîn herze geswîchet mir niht
25	und mîne frunt und mîne man. ich wil, ob mirs got gan, die bôsen trôischen zagen ûʓer diseme lande jagen hin wider uber mere
30	mit michelme here, daʓ ich schiere gewinne.» dô sprach diu kuniginne «Turnûs, lieber sun mîn, des wil ich gewis sîn,
35	alsô dû spriches alsô tû, dâ wil ich dir helfen zû mit sinne und mit râte beidiu frû und spâte unde naht unde tach,
40	als ich kan unde mach,
142	mit listen und mit fûgen. ich gibe dir schaz genûgen, den dû gerne nemen maht, wande dû bist wol bedaht.
5	dank habe der eʓ geriet, daʓ dû die trôischen diet betalle wil vertrîben. lieʓest dû si blîben, eʓ wâre schande unde spot.»
10	«frouwe, daʓ vergelde û got,» sprach der helt lussam. urloub her dô nam zû der kuneginne. dô schieden si sich mit minne.
15	Dô daʓ alsô getân was und sich der hêre Ênêas vaste sazte zû der were, dô quam Turnûses here ze rosse und ze fûʓe,
20	als wir eʓ sagen mûʓen. des wart erweget al daʓ lant, wander hete sich besant verre unde wîten. si quâmen in allen sîten
25	ze Laurente zû gevaren mit vil michelen scharen daʓ lant ze berge und ze tale. des heres was ein grôʓe zale, als ich eʓ an den bûchen las.
30	hundert tûsent ir was und vierzich tûsent dar zô. wol enphienk sie dô Turnûs der hêre. her bôt in michel êre,
35	fruntlîche er sie beriet. ichn mach û die forsten niet rehte genennen alle ensamen: idoch weiʓ ich ein teil ir namen, die dâ wâren aller hêrste.
40	Mezentiûs quam zaller êrste
143	der leite ein hêrlîche schare, tûsent ritter brahter dare sîner frunt und sîner manne. iedoch sô was verre dannen
5	sîn lant unde sîn hûs. dar nâch quam sîn sun Lausûs zû deme tagedink, der schôniste jungelink, den der ieman gesach,
10	daʓ ich erzûgen wole mach mit den dieʓ bûch hânt gelesen: hern mohte nimmer scôner wesen von allem sînem lîbe. von manne und von wîbe
15	nie enwart schôner belde. her fûrde sneller helde mêr dan funfhundert. her hete sich gesundert von den anderen scharen.
20	Aventînus quam nâch ime gevaren, des hêren Hercules sun; her wolde ritterschaft dâ tûn. Aventînus der mâre, man saget uns daʓ her wâre
25	hobisch unde êrhaft kûne unde wârhaft. her was Turnô vile trût, unde het eins lêwen hût gemachet ze sîme schilde.
30	der junge helt milde dorch die scholde phlach her des, daʓ sîn vater Hercules einen lêwen erslûch und anders wunders genûch,
35	des weiʓ man wol die wârheit. dem hêren was diu fromicheit von sîme vater wol geslaht. tûsent ritter heter braht sunder schutzen und fûʓhere.
40	her wonde bî dem western mere.
144	Nâch Aventîne dô quam ein hêre vile lussam, der herzoge von Prênestîne. ein michel menege was diu sîne:
5	tûsent ritter hêrlîche fûrde der herzoge rîche wol gewâfent und wol berâten, die scône ritterschaft tâten unde wole vehten kunden,
10	dô si siches underwunden unde sich wol werden mit speren und mit swerden. Dô quam ein hêre dar nâ, der wole wart enphangen dâ,
15	der margrâve von Pallante. tûsent ritter sunder sarjante und hundert schutzen brahter dare ze storme harde wole gare. Dar nâch quam Messâpûs,
20	deme hete Neptûnûs sîn vater tûsent ritter gesant mit gewâfenter hant. her was kunich von dem mere. harde beschowete man sîn here,
25	dô her ze Laurente quam. ir ros wâren lussam, snel unde vile gût, von einer slahte stût, diu dâ wont in deme mere.
30	her und alleʓ sîn here heten solhe vârîs, sine lebeten aber neheine wîs langer danne vier jâr. daʓ welnt die wîsen vor wâr,
35	die eʓ von den bûchen sagent. die mûder die sie tragent die enphânt si von dem winde an des meres ende, daʓ is gnûgen unverholen.
40	von den rossen und von den volen
145	ne kumet nimmer dehein fruht. wâre eʓ niht unzuht, ich gedûtez wole baʓ: nû lâʓe ich eʓ umbe daʓ,
5	daʓ ich beschône dar mite. eʓ is ein unhovesch site, daʓ man der zuhte niene gert. si wâren maneger marke wert, mohten si leben zehen jâr.
10	nû wiʓʓen wir daʓ wol vor wâr, die wir diu bûch hân gelesen, daʓ daʓ niht ne mach wesen. Do quam Claudjûs der wol getâne, her was hêre ze Sabîâne.
15	dar nâch quâmen die Barbarîne, die Pulloise und die Latîne, die von Nâplîs, von Salerne, von Calabrîe, von Volterne, die von Genuê, die Pîsâne,
20	die Ungere und die Veneziâne, und dar zû manich rîche man, des ich genennen niene kan, manich helt lussam. umb daʓ here daʓ dâ quam
25	is uns diu zale wole kunt: sibenwarb zweinzich tûsunt was eʓ dô eʓ quam ze samen. sold ich diu lant und die namen zellen albesunder,
30	daʓ wâre ein michel wunder. Daʓ here daʓ was lussam, daʓ dem hêren Turnô quam: manech ritter gemeit, den her hete sîn leit
35	enboten unde geclaget. ze jungist quam ein maget dorch Turnûses willen, diu hieʓ frou Camille, diu kunegîn von Volcâne,
40	ein maget wol getâne,
146	verwiʓʓen unde reine. sie was iemer eine der schônisten juncfrouwen die ieman mohte beschouwen
5	an allem ir lîbe. sie was zeinem wîbe wol gewassen genûch, sô nie wîb mêr getrûch schôner tohter dan si was.
10	wîʓgele was ir daʓ vas und diu scheitel vil gereht. daʓ vorhoubet was ir sleht, die ouchbrân brûn und niht breit, gewassen âne arbeit.
15	schône ougen und wol stânde, daʓ manech man des wânde, daʓ si wâre ein gotinne. diu nase der munt daʓ kinne daʓ stunt sô minnechlîche,
20	daʓ nieman wart sô rîche, in geluste daʓ her sie gesâge, daʓ si an sînem arme lâge. ir varewe lieht unde gût, rehte als milich unde blût,
25	wol gemischet rôt und wîʓ, âne blank und ân vernîʓ (desn was ir nehein nôt), von natûre wîʓ und rôt. scône ir arme unde hande,
30	wol gezieret mit gewande minnechlîch was ir lîb al, wol geschaffen unde smal unde wîblîch genûch. ir gewant al daʓ si trûch
35	daʓ stunt ir ritterlîche, wande sie was rîche und mohteʓ wol gewinnen. anderre kuniginne gelîchete ir neheine.
40	ir hemede daʓ was cleine
147	unde wîʓ alsam ein swane. einen rôten borden trûch si ane, gedwungen vaste umbe ir lîb. sie ne tet niht alse ein wîb,
5	si gebârde als ein jungelink unde schûf selbe ir dink, als si ein ritter solde sîn. ir mantel der was harmîn, dar ûffe ein grûner samît,
10	dâ si dô zû der zît inne gienk unde reit. der zobel was brûn unde breit, als uns daʓ bûch saget vor wâr. mit einem borden was ir daʓ hâr
15	wol gewalkieret. si was gebalzieret als ein ritter lussam. irn mohte nieman wesen gram, der si rehte gesach.
20	deheines werkes sie ne phlach, daʓ wîbes werk wâre. eʓ was ir unmâre, man ne moht siʓ niht gelêren, sie ne wolde sich niht kêren
25	niewan an ritterschaft. grôʓ was ir geselleschaft, die si hete braht dare: magede eine grôʓe schare, funf hundert junkfrouwen,
30	die konden helme houwen unde schilde stechen unde spere brechen unde justieren unde wol pungieren,
35	die ir volgen mûʓen ze orse und ze fûʓen, slahen mit den swerden mit den die des gerden. Des plach frou Camille
40	und daʓ was ir wille,
148	daʓ si wâfene trûch, und was doch heimelîch genûch mit den rittern allen tach. ich sage û wes si nahtes plach:
5	dâr si herberge gewan dar ne mûste dehein man neheine wîs nâher komen: des wart gûte war genomen, daʓ sis nimmer vergaʓ.
10	diu frouwe teteʓ umbe daʓ, dorch andern neheinen rûm, si wolde ir magettûm bringen an ir ende sunder missewende.
15	Vernemet scône hovescheit umbe ein pharît daʓ si reit: ein tûre zoum lach dar ane. daʓ winster ôre und der mane wâren im wîʓ als der snê.
20	eʓ was ir uber sê gesant bî einem môre. im was daʓ zewese ôre und der hals swarz als ein rabe. ich moht û wunder dar abe
25	sagen, ob es wâre nôt. daʓ houbet was im al rôt und wol geschaffen genûch, und ein bein rôt und ein bûch, der ander bûch was ime vale
30	al daʓ bein hin ze tale. si mohteʓ gerne rîten. im gliʓʓen die sîten als ein wilder phâwe. diu ein gofe was aphelgrâwe,
35	rehte als ein lêbart. harde eʓ besehen wart, dô siʓ geriten brahte dare. der zagel was im einvare crisp und swarz als ein bech.
40	eʓ gienk ebene in den wech,
149	sanfte und balde genûch. die frowen eʓ ritterlîchen trûch. Der satel, der dar ûffe lach, der was als ich û sagen mach
5	vore wâr und ungelogen: im wâren die satelbogen gût von helfenbeine, gezieret mit gesteine, ze mâʓen enge unde wît.
10	diu decke was ein samît, mit goldînen nageln beslagen. daʓ pharît daʓ in solde tragen des mûste wol gephlegen sîn. die darmgurteln wâren sîdîn,
15	veste unde lange, und die antphange, dâ mans ane gorde, daʓ was ein tûre borde, und daʓ vorbûge
20	ein borde vil gefûge, genât ûf einen samît (des geluste sie dô zû der zît) zweier vingere breit. dorch Laurente sie reit
25	Camille diu rîche vil behagelîche. die hêren und die frouwen, die si wolden schouwen, si quâmen zû den strâʓen,
30	si stunden unde sâʓen, ze den venstern sie lâgen. alle die si gesâgen, die dûhte si vil wol getân. Turnûs mohtes niht enphân
35	baʓ danne her tete, wande si dorch sîne bete ze sîner helfe komen was. vor Laurente an ein gras, als man ûʓ der borch reit,
40	an eine scône wisen breit
150	heten herberge genomen ir boten die ê wâren komen. dâ bevor alle wîle vil nâch eine mîle
5	wâren geslagen ir gezelt an die wîsen und an daʓ velt. Dô der hêre Turnûs gwan alsô manegen rîchen man, als ir wole habet vernomen,
10	und si ze samene wâren komen dâ her trôst hete zû, eines morgenes frû die forsten her zû zime gewan, die im gerne wolden gestân.
15	her leite sie an eine stat und si giengen swar hers bat in ein boumgarden an ein gras. her saget in des im nôt was, her sprach «lieben frunt mîn,
20	die dorch mich her komen sîn, mîne lanthêren, got lône û der êren, die ir mir habet getân. moht ich ûch sô wol enphân,
25	als mir lieb wâre (sprach der helt mâre), dâ hân ich gûten willen zû. eʓ is reht daʓ ich eʓ tû so ich beste mach unde kan.
30	mîne mâge und mîne man vernemet, des is mir nôt, dorch welhe rede ich û enbôt. als ir mir gûtes gunnet, dâ ir vernemen kunnet
35	daʓ ich unrehte tû, nimmer gehelfet mir derzû: sprechet daʓ ichʓ lâʓe. ich hân es gerne mâʓe, ich wil es gerne abe stân.
40	is aber diu rede sô getân,
151	daʓ ir mîn reht erkennet und ir ûch des versinnet, sô stêt mir fruntlîchen bî, als ûwer trouwe gût sî.»
5	Aber sprach Turnûs «mîn hêre der kunech Latînûs der wart des ze râde, daʓ her sîne genâde sô an mich kêrde
10	und mich sô vil êrde vor den lûten offenlîche, daʓ her mir sîn rîche mit sîner tohter wolde geben, ob ich in mohte uberleben,
15	daʓ ich es alles gewielde und daʓ ich behielde sîn tohter ze wîbe, und bî sîme lîbe gab her mir borge unde lant,
20	sô daʓ ich dâ nieman ne vant, der iht dar wider sprâche. daʓ herʓ immer zerbrâche, des ne hetich deheinen wân. nû wil hers alles abe stân.
25	iedoch hât her es gesworen und manech helt wol geboren, die ich genennen wole kan, die forsten und des kuneges man, die man hât ze den besten.
30	daʓ lant und die vesten die hân ich noch in mîner gewalt (sprach der mâre helt balt), als eʓ dâ geredet was. nû is ein hêre Ênêas
35	von Troien in daʓ lant komen, als ir wole habet vernomen, in vil korzen stunden. der hât sich underwunden grôʓes hôchmûtes,
40	daʓ her mich mînes gûtes
152	betalle wil enterben. dar zû wil ubele werben mîn hêre der kunich Latîn: daʓ rîche und die tohter sîn,
5	daʓ mir dâ gegeben was, daʓ wil her daʓ Ênêas habe unde behalde. nû sprechet helide balde, lieben frunt alle,
10	wie û daʓ gevalle, unde râtet dar zû, wie ich daʓ beste getû nâch diu und ir habet vernomen, nû ir dorch mich her sît komen.
15	Ênêas der Troiân der hât uns laster getân, daʓ is noch ungerochen. unser borch hât her zebrochen unde dar zû unser lant
20	geroubet unde verbrant unde unser lûte erslagen. daʓ wil ich û allen klagen von den leiden gesten. ouch wânent sie vesten
25	ein borch in diseme lande. den schaden und die schande, die mir der selbe Troiân mit sînen lûten hât getân, daʓ lâʓet û allen leit sîn,
30	(sprach her) lieben frunt mîn.» Dô sprach ein forste hêre, der het michel êre, daʓ was der hêre Mezentiûs, «got weiʓ, hêre Turnûs,
35	daʓ ir sprechet daʓ is wâr. ich weiʓ eʓ mêre danne ein jâr unde ich hân eʓ wol vernomen, wie ir ze samene wâret komen, ir und der kunich Latîn.
40	eʓ solde von rehte stâte sîn,
153	als eʓ dâ gesworen was. nû hât der hêre Ênêas in vil korzen stunden sich sîn underwunden,
5	er hât beroubet daʓ lant und Tyrrêô sîn hûs verbrant, her und sîn Troiâne, und wil Montalbâne machen zeiner veste.
10	nû tût ab ir daʓ beste. ob eʓ dise hêren dunket gût, sô weiʓ ich daʓ ir wole tût : nû her tumblîch hât getân, nû solt ir wîslîch ane vân.
15	ir sît ein edel jungelink: mit sinne solt ir ûwer dink ze gûten dingen bringen. ir solt im tagedingen an ûwern hof vor ûwer man,
20	so ich allerbeste gedenken kan, und solt in lâʓen mit frede, unze ir in gesetzet ze rede umb alle sîne missetât. daʓ dunket mich der beste rât.
25	ne mach hers niht gebûʓen, daʓ ir in welt grûʓen, is daʓ hern wil noch enkan, sô manet frunt unde man, hêren unde mâge.
30	ob her an die wâge sîn leben wil lâʓen, sô solt ir'n der unmâʓen mit sînen schanden bringen wider unde brechet ime nider
35	die borch, die her bouwen wil. ir habet heres alsô vil, daʓ irʓ lîhte getût, ob eʓ dise hêren dunket gût.» Dô Messâpûs daʓ hôrde,
40	Mezentiô her antworde,
154	dô sprach der vorste rîche «ir habet vil wunderlîche Turnô gerâten. die ûch der rede bâten,
5	die wâren ubele bedaht. als irʓ vore habet braht, ob eʓ û ieman geriet, des ne volge ich û niet, daʓ im wol gezâme,
10	daʓ her immer nâme sûne oder gerihte, daʓ wâre alze lîhte dem die ime sîn lant beroubet hât und verbrant,
15	als man vil wole gesiht. hern darf im widersagen niht noch mêre warnen. man schaffe daʓ siʓ arnen die Troiâre und Ênêas,
20	wandes lutzel nôt was, daʓ man sîne lûte slûch. si heten im widersaget genûch, ob ir der wârheite giet. sine sint ouch sô tumb niet,
25	sie ne sîn des wol gewis, daʓ Turnûs ir vîant is und sînes herzen unholt. eʓ is betalle ir scholt, daʓ ime Turnûs is gehaʓ.
30	ouch wiʓʓet wole daʓ, daʓ her im wole schaden mach. hern gefridet eʓ nimmer tach mit mînem râte mêre: eʓ gêt im an sîn êre.
35	sine mogen sich nimmer des bewaren, wir solen zû der borch varen, die her dâ wânet vesten mit den sînen gesten der ubermûtige man.
40	daʓ is vile baʓ getân,
155	daʓ man in dannen trîbe, denner dâ belîbe mit gewalde under unsern dank; wande eʓ wirt vile lank,
5	ê dan manʓ mit gedinge ze fromem ende bringe, mich ne triege mîn wân.» dô dûhteʓ genûge wol getân, daʓ Turnûs alsô tâte.
10	dô worden sie ze râte daʓ man die borch besâʓe, und ob her sich vermâʓe mit den sînen holden, daʓ si sich weren wolden,
15	daʓ man si drûffe vienge und marterde oder hienge: des wâren sie wole wert. des hete lange gegert Turnûs der gemeide,
20	wande im vile leide Ênêas der Troiân dâ vor habete getân: daʓ wolder gerne rechen. die borch wânder zerbrechen,
25	si was im doch vil ungereit: des gewan her michel arbeit. Dô daʓ alsô geredet wart, dô schûf der hêre sîne vart Turnûs der wolgetâne
30	hin ze Montalbâne mit den die im wâren komen. daʓ hete wol dâ vor vernomen Ênêas der wîse. wâfen unde spîse
35	erwarb vile der Troiân. her unde sîne man, die her dar hete braht, si wâren des wol bedaht, daʓ si sich vaste wolden weren
40	mit den swerden und mit speren,
156	mit armbrusten und mit bogen. Turnûs was des betrogen, des her gewis wolde wesen, daʓ si nimmer mohten genesen
5	ûf der borch einen tach. dô her die wârheit gesach, dô was her vil unfrô, want der vels was vile hô. Der berch was stechel uber al,
10	niwan ein hals der was smal, den heten sie dorchhouwen. dâ mohte man wol schouwen, daʓ si frome lûte wâren. des enmohte in drin jâren,
15	sint es Ênêas began, ein unwerehaft man niht sô vile hân getân. dô schûf der edel Troiân mit den sînen holden,
20	wie si sich weren wolden, wer ûffen tornen wâre und wie man erkâre machete albesunder oben unde under,
25	und wer phlâge der zinne, daʓ schûf her mit sinne. wîslîch her des ahte, wer des nahtes wahte und wer dâ solde slâfen.
30	her bereite in allen wâfen, die si kunden genutzen, und schûf daʓ gûte schutzen ûf der porten lâgen und der borge phlâgen.
35	da es allermeiste nôt was, dar geschûf hêr Ênêas die allerbesten hûte. her hete helide gûte, die konder wol gewîsen.
40	mit wâfen und mit spîse
157	wâren si wol berâten. si leisten unde tâten swaʓ her gebôt unde bat. die borch stunt an einer stat
5	ûf einem wîʓen steine, des nanden si algemeine die edelen Troiâne die nûwen borch Albâne. Dô der hêre Ênêas
10	in solhen angesten was, do gesach sîn mûder Vênûs, daʓ im der hêre Turnûs gerne schaden wolde und in besitzen solde
15	ûf Montalbâne. si quam ze Volkâne ze deme smidegote ir man, flêgen sie in began Vênûs diu gotinne,
20	si bôt ime ir minne (daʓ was im grôʓ miete), daʓ her sie beriete des si in gebâte, und den rât tâte
25	und daʓ niene lieʓe daʓ sie in hieʓe dorch kost noch dorch arbeit her was der frouwen vil gereit ir willen ze tûne.
30	dâ wart ein grôʓ sûne gemachet under in zwein, daʓ si trûgen enein, dô her ir wolde volgen. sie was ime erbolgen
35	siben jâr dâ bevoren umb einen wênegen zoren, den ich û wol sagen kan. Volcânûs ir man der weste wol âne spot,
40	daʓ hêre Mars des wîges got
158	bî frouwen Vênûse lach. daʓ heter manegen tach verswigen unde verholen. dô herʓ niht mêr wolde dolen,
5	ê siʓ mohten gemerken, ein netze hieʓer werken von silber und von stâle: des nam in michel hâle. Dô meisterde Volcân
10	ein netze sô getân, als ich û sagen mach, daʓ manʓ kûme gesach, sô cleine wârn die drâte. eines âbendes spâte
15	uber daʓ bette her eʓ hienk, und alse Mars dar in gienk und bî Vênûse was gelegen und der minnen wolde phlegen, dô dûhtes Vulcânum genûch:
20	mit deme netze er sie beslûch dâ zehant beide. dâ lach ir Vênûs leide, wander braht al die gote dare. dô sis worden geware
25	und eʓ in clagete Volcân, dô dûhteʓ sie missetân, dô si daʓ gesâgen, daʓ si ensament lâgen einander vile nâ.
30	idoch was etelîcher dâ, der gerne offenbâre bî Vênûse wâre dorch solhe sache gevangen. dô daʓ was ergangen,
35	dô wart ime Vênûs gram, daʓ her niemer sider quam an daʓ bette dâ si lach unze an den tach, daʓ si sîn bedorhte.
40	dô schûf her daʓ man worhte
159	der got von deme fûre einen halsperch sô tûre, daʓ ê noch sint nehein man deheinen beʓeren gewan.
5	Der halsperch was des gût, daʓ der man drinne was behût vor aller slahte wunden ze allen den stunden daʓ hern an dem lîbe trûch.
10	her was vast und scône gnûch, lieht von vil gûtem werke, daʓ in mit lîhter sterke ein man mohte an gefûren und sich drinne wol berûren,
15	als in [einem] lînînem gewant. vil wol daʓ Turnûs bevant, dô der hêre Ênêas dâ mite gewâfent was, dô her im sînen lîb nam.
20	dô der halsperch vollequam, harde lobete man in dô. zwô hosen worhter im derzô scône wîʓ îsenîn, sine mohten niht beʓer sîn,
25	sô nie ritter nehein scôner geleite an sîn bein, veste vone cleinen ringen, der man mit deheinen dingen niene mohte gebrechen,
30	dorchslahen noch dorchstechen. Einen helm sander der mite. swar sô her gienge oder rite, der in ûf hete gebunden, in ne mohte niht verwunden,
35	hern worde ouch nimmer sigilôs. wie wol man dar ane kôs, daʓ in meisterde Volcân! her was lieht und wol getân, brûn lûter als ein glas.
40	vil wole her geschaffen was,
160	gnûch wît unde vile hart, sô nie dehein beʓer wart. her was vil wol ze lobene. dâ stunt ein blûme obene
5	von dorchslagenem golde, alseʓ Volcân wolde, dar inne ein rôter jachant. diu lîste und daʓ halsbant daʓ was vil wol gesteinet golt.
10	Volcân was Ênêase holt, daʓ wart wol an dem helme schîn. hern mohte nimmer beʓer sîn mit deheiner slahte dinge. goldîn wâren die ringe
15	von gûteme gesmîde. die snûre wâren sîde, dâ mite man in ane bant. der hêre, dem her wart gesant, der was es vile wole wert.
20	dar zû sander ime ein swert, daʓ scharpher unde herter was dan der tûre Eckesas noch der mâre Mîmink noch der gûte Nagelrink
25	noch Haltecleir noch Durendart: sô nie dehein helm wart, noch dehein schilt sô getân, der dâ vore mohte gestân, eʓ ne scrieteʓ alleʓ enzwei;
30	dâ vor enhalf niht ein ei weder îsen noch stâl. eʓ hete goldîniu mâl unde gesilbert beide. goldîn was diu scheide,
35	wol gesteinet und wol beslagen. solde manʓ vor den keiser tragen, den hêrsten, der ie krône trûch, eʓ wâre lobelîch genûch. Der knoph und daʓ gehelze
40	was golt unde gesmelze,
161	dâ mite man eʓ gorde, der veʓʓel was ein borde alsô breit sô ein hant. eʓ wart eime helde gesant,
5	der eʓ wol nutzen solde. einen schilt von golde sandim der mite Volcân; her woldeʓ wiʓʓen âne wân, dô hern meisteren began,
10	daʓ in nimmer dehein man mit wâfen mohte enginnen. her was gevaʓʓet innen mit borden und mit phelle und was al daʓ gestelle
15	mit goldînen nagelen dran geslagen. swer sô in solde tragen, der solde von rehte ein helt wesen, daʓ sagent die daʓ hânt gelesen. daʓ was der hêre Ênêas.
20	vil wol daʓ bret gesniten was unde gefûchlîche gebogen wol behûtet und wol bezogen. daʓ meisterde Volcân. daʓ gerieme daʓ was corduwân:
25	daʓ was der frouwen Vênûs rât. ein borde was dar ûf genât dorch hovescheit und dorch wunder und ein samît dar under, Ichn weiʓ weder grûne od rôt.
30	eʓ was getân dorch nôt, swer den schilt fûrde, daʓ in niht enrûrde der borde noch daʓ leder, unde daʓ in der deweder
35	an den hals niht enribe und im diu hût ganz belibe. daʓ was dâ mite wol behût. diu buckele was vil gût, sô nie niht beʓʓers mohte sîn.
40	sie was alwîʓ silberîn,
162	geworht harde cleine, gezieret mit gesteine. smaragde und rubîne, topazîe und sardîne,
5	crisolite und amatisten, die wâren mit listen gesetzet drin genûge. dâ stunden inne mit fûge granâte und saphiere.
10	eʓ was gefrumet schiere, dô eʓ der meister gebôt. der lêwe was betalle rôt, der gemâlet was der ane. dar zû sande im einen vanen
15	sîn mûder diu gotinne, der was geworht mit sinne. Ich sage û wes her gût was. diu gotinne Pallas worhten zeiner zîte
20	wider Arânjen ze strîte, dô si sich wider ir vermaʓ. beide gelobeten sie daʓ umb den hêrlîchen vanen, sweder ir beste worhte drane,
25	daʓ si het immer die meisterschaft. dâ hûb sich michel vîentschaft enzwischen den gotinnen. Aragnes wart zeiner spinnen dorch rouwe und dorch zoren,
30	daʓ sie hete verloren die meisterschaft diu ir was, ê danne sir frouwe Pallas ze der stunt ane gewan. eʓ was unheil daʓ sis began:
35	dar nâch ergieng eʓ ir iedoch. des phleget al ir kunne noch, daʓ si spinnen unde weben, dar ane verliesent sie ir leben. Dô daʓ gewâfen was gereit,
40	dâ grôʓ list und arbeit
163	zû wâren getân, dô sandeʓ hêre Volcân Vênerî der frouwen und hieʓ eʓ sie beschouwen.
5	und alseʓ vor si quam, dô dûhteʓ sie vil lussam und alle dieʓ gesâgen. ze samene sie dô lâgen zû der nâhisten naht,
10	alser hete vollebraht ir gebot und ir bete. ichn darf û sagen was her tete: sich geniete gûter minne der got mit der gotinne.
15	Dô daʓ alsô verre quam, Vênûs einen boten nam, den si wole erkande. daʓ gewâfen si dô sande ir sune dâ her was.
20	des frowete sich Ênêas, wandeʓ was im vile nôt. bî dem boten si ime enbôt ein vil liebeʓ mâre, daʓ ein kunich wâre
25	dâ bî in einem lande, den si wole erkande, dâ ze Pallantê, der was Turnô vil gevê, wander tete im vile zoren.
30	dâ heten sie vil an verloren der eine und ouch der ander. der kunich hieʓ Êvander und was ze Pallantê sîn hûs. dô hieʓ frouwe Vênûs,
35	daʓ her zûzim fûre unde mit im swûre und helfe an ime suchte, ob her des geruchte, daʓ her der sorgen worde belôst.
40	her solde helfe unde trôst
164	vil an ime vinden. her mohte im wole senden zwei tûsent sîner manne. eʓ ne was niht verre dannen
5	von der borch, dâ Ênêas mit sînen mannen ûffe was. Dô hêr Ênêas vernam die boteschaft diu ime quam und daʓ gewâfene besach,
10	dô was im allen den tach vile wole ze mûte; im enmoht von solhem gûte niht lieber geschehen. diu wâfen hieʓ her besehen
15	sîne lûte alle. eʓ mûste in wol gevallen, wandeʓ was vil lobelîch. dô sprach rittergelîch, daʓ eʓ lobelîch wâre.
20	ouch sageter in daʓ mâre, daʓ im sîn mûder enbôt. der helfe was im aller nôt, wand diu angest was im nâ. dô ne was nieman dâ
25	under aller der diete, der eʓ ime widerriete, hern fûre dâ hin balde: daʓ rieten junge unde alde. do gelustes in deste baʓ,
30	wand si sprâchen alle daʓ, daʓ eʓ in wol geviele. dô hieʓer zwêne kiele schiere bereiten, hern wolde langer beiten,
35	mit schiffen wolder dâ hin varen. idoch wolder allerêrst bewaren sîne borch Albâne und sîne Troiâne, von den her wolde scheiden.
40	betalle zwô tageweiden
165	was Pallantê dannen niet. dô eʓ im sîn mûder riet, undeʓ sînen mannen lieb was, do beriet der hêre Ênêas
5	sîn dink mit sînen mannen ê danner fûre dannen. Her sprach «lieben frunt mîn, nû wir here komen sîn an unser reht erbelant,
10	dar uns die gote hânt gesant und uns die borch hânt gegeben: al die wîle daʓ wir leben, vâhen wirʓ manlîchen ane, des bitich ûch alle und mane,
15	wande ir gûte knehte sît unde in angest unde in strît vile dicke sît komen und ouch daʓ ofte habet vernomen (sprach der hêre Ênêas),
20	dâ lutzel lûte frome was, die sich sazten ze were wider ein grôʓeʓ here, daʓ si sich erwerden. wir kunnen mit den swerden
25	und mit schilden und mit speren baʓ vehten und uns weren, dan dise lûte kunnen. wir haben hie begunnen dirre gûten veste:
30	nû tût alle daʓ beste, weret ûch alsô helide, ûwern lîb und ûwer selide! irn moget ninder gefliehen, heiʓet ûr valporten ûf ziehen
35	und weret ûch hier inne manlîch und mit sinne, û geschiht al deste baʓ. ir moget wole merken daʓ, al hân ich sô vil bevoren,
40	daʓ ir mich ze hêren habet erkoren,
166	ich ne bin niht wan ein man. swer aller beste gedenken kan hern salʓ den andern niht helen. waʓ mach ich û mêr bevelen
5	armen unde rîchen? eʓ is û iegelîchen an sîn selbes lîb bevolen und is û allen unverholen: weret ûch, des is û nôt,
10	daʓ ir iht geliget tôt mit laster unde mit schanden. gedenket wole zû den handen, sô moget ir harde wol genesen. des solt ir alle vlîʓich wesen.»
15	Dô sprach aber mêre Ênêas der hêre «got gebiete û daʓ ir wol tût, wande disiu borch is gût, die uns got hie hât bescheret.
20	sie is immer erweret vor storme und vor mangen. lâʓet ûch niht belangen, ich kume wider schiere uber drî tage oder viere,
25	ze langest in sehs tagen. ûwer nehein sal verzagen (sprach Ênêas der wîse), ir habet genûch spîse unde gewâfenes vil,
30	swelch sô mannegelîch wil unde des û nôt is. ir solt alle wesen gewis, daʓ ich gerne wider kome sô daʓ ich û gefrome
35	und die borch erlôse. untrôst is bôse: habet alle gûten trôst, ir werdet vile wole erlôst, sal es gelucke walden.
40	ir solt ûch wole enthalden
167	mit sinne unde mit mâʓen ûwer nehein sal sich lâʓen niht ze harde anʓ gemach.» dô herʓ alleʓ gesprach
5	der mâre helt lussam, urloub her dô nam ze Ascânjô sîme sun, alser von rehte solde tûn. he bevalhin sînen mannen
10	unde fûr dô dannen mit manlîcher gwarheit. von der borch her ze tale reit zû der Tiver an den stat, aldâ her in daʓ schif trat
15	mit den sînen holden, die mit im varen solden. Dô der hêre Ênêas in daʓ schif komen was mit den sînen mannen
20	die mit im fûren dannen, dô hûben sie diu schif ane und fûren balde hin dane die Tiver al ze berge. si fûrden halsberge,
25	schilde spere unde bogen. ir segele hetens ûf gezogen, der wint gieng in vaste nâch. zû der verte was in gâch, si stûrden unde rûrden.
30	dô bat her die in fûrden daʓ sis wâren ernesthaht. dô fûrens alle die naht und al den anderen tach, unze daʓ man wole sach
35	daʓ diu sunne ensedil solde gân. dô quam der edile Troiân, des hêren Anchîses baren, ze Pallantê zû gevaren aldâ Rôme nû stêt.
40	da diu Tiver in daʓ mere gêt
168	was her mit schiffen komen dar: der borch worden sie gewar. Dô der helt lussam zû der borch gevaren quam,
5	der schifmûde Ênêas, zû den selben stunden was der kunich ûʓ der borch komen, alse ir wole habet vernomen, mit grôʓen frouden unde spile.
10	do gesâgens allenthalben vile hutten unde gezelde an der wisen und an dem velde bî der Tiber an einer sîte. dâ begienk ein hôgezîte
15	der kunich Êvander und manich man ander. vil flîʓich wâren sie des. eʓ was antach daʓ Hercules ein wunderlîch tier dâ erslûch,
20	daʓ in leides tete genûch: der lûte eʓ vile erbeiʓ, alse man noch wole weiʓ. eʓ was vil unreine, in eime holen steine
25	was sîn wonunge und sîn hûs: daʓ monstrum hieʓ Câcûs. harde wûsteʓ daʓ lant. dô daʓ Hercules bevant und daʓ wunder dâ vernam,
30	von sîme lande er dare quam. her hete manlîchen mût. dô wâfende sich der helt gût, daʓ eʓ manich man ane sach. her quam dâ daʓ kunder lach
35	unde slûch'ʓ ze tôde und lôste vone nôde daʓ lût von dem lande. daʓ kunder her verbrande: des lobete man in wît.
40	daʓ was diu hôgezît,
169	die der kunich dâ begienk. hêrlîch her eʓ ane vienk. Dô Ênêas der edele man dare nâhen began,
5	dâ der kunech Êvander lach, under allenthalben sach diu gezelde blîchen: die segele hieʓer strîchen nider von dem maste.
10	her hieʓ si stûren vaste, hern wolde idoch dar nâr niht komen, ê danner hete vernomen, waʓ heres dâ wâre. dô hete der kunich mâre
15	einen sun der hieʓ Pallas, der gesach daʓ Ênêas mit schiffen dar zû quam. der junkhêre lussam, dô her sîn dâ wart gewar,
20	dô kêrder gegen ime dar. dô het ouch hêre Ênêas getân als dâ site was, und die mit im wâren komen, die heten alle genomen
25	aller ritter gelîch einen olêes zwîch. daʓ bezeichent den fride und was in den zîten side wîten uber manich lant,
30	swer daʓ hete in sîner hant, im ne schadete nieman niet. des phlach diu heidensche diet. Do gesach der junkhêr Pallas, daʓ der hêre Ênêas
35	fridelîche dare quam. dô tet her alsim wol gezam, balder gegen ime gienk, minnechlîche er in enphienk mit michelen êren.
40	die stûren hieʓer kêren
170	vile schiere ze lande, doch her sîn niht erkande. dô grûʓtin Pallas. dô frâgete in Ênêas
5	gezogenlîche mâre, wâ der kunich wâre. dô sageteʓ ime Pallas und fûrdin dâ der kunich was. Dô der helt lussam
10	vor den alden kunich quam, do enphieng in minnechlîche Êvander der rîche. dô sagete ime Ênêas, wannen her fûr und wer her was
15	und war umbe er dare quam. dô der kunich daʓ vernam, sîn geslehte erkander. dô sprach der kunech Êvander «Ênêas lieber frunt mîn,
20	ir solt mir willekomen sîn mit michelme rehte, wande ich ûwer geslehte ein teil wole erkenne. die êre und die minne,
25	die ich û getûn mach beidiu naht unde tach des solt ir sîn vil gewis, daʓ û daʓ gereit is, (sprach her) frunt Ênêas.
30	ich gedenke wol daʓ ich was ze Troie in dem lande. vil wole ich erkande ûwern vater Anchîsen, den frumigen und den wîsen:
35	her bôt mir minne und êre vile michels mêre dan dâr ieman ander (sprach der kunech Êvander): daʓ ne sal niht sîn verloren.
40	her gab mir ein vil gût horen,
171	daʓ beste daʓ ich ie gewan. dar zû gab mir der edele man ein gûten brakken und ein swert und gesteines maneges phundes wert,
5	unde einen gûten bogen gab mir der edele herzoge, strâlen hieʓer mir vor tragen und einen kocher wol beslagen mit rôteme golde.
10	wan daʓ ichs niene wolde, her hete mir michel gût gegeben. des wil ich û, sal ich leben, lônen mit gûte. des is mir ze mûte,
15	daʓ ichʓ gerne welle tûn. ich hân einen jungen sun, Pallas, den ir hie gesiet, der nis noch ritter worden niet, dem wil ich morgen geben swert,
20	des hât er lange gegert, unde wil in crônen und wil û des lônen, des mir ûwer vater tete, unde leisten ûwer bete,
25	so ich mit deheinen dingen immer mach volbringen, des solt ir gewis sîn. ich wil den lieben sun mîn ensamt û senden hinnen
30	dorch ûwers vater minnen und dorch ûch selben beide und Turnô ze leide, dem ich alles ubeles gan. sô wil ich mîne beste man
35	mit mîme sune senden, die wol torren genenden ze manlîchem dinge, die die jungelinge wole kunnen gewîsen.
40	die wil ich selbe spîsen,
172	zwei tûsent oder mêre dorch mîn selbes êre.» Êvander der mâre sprach dô offenbâre
5	«Ênêas, lieber frunt mîn, ir ne solt niht unfrô sîn, ich bin frô, daʓ ir sît komen her ze dirre zît, daʓ ouch û lieb wesen mach,
10	wander is ein hêre tach, den wir hie begên hûte ich unde mîne lûte, als ir wol moget hân vernomen. nû ir here sît komen,
15	nû solt ir frôlîche leben.» her hieʓ im zeʓʓenne geben. dô nam her waʓʓer unde twûch. man gab im alles des genûch im und sînen holden,
20	des si selbe wolden eʓʓen unde trinken, des ieman mohte erdenken. Dô si gnûch ze mâʓen getrunken unde gâʓen
25	alles des in lieb was, dô sande Ênêas nâch sînem spileman. einer frouden her began, des her was berâten.
30	her gebôt daʓ si tâten ir trôische spil seltsâne unde vil, des man dâ niht enphlach. daʓ hôrde gerne und gesach
35	der kunich Êvander und manich man ander. dô wart uber al geboten, daʓ si opherden ir goten zêren und ze holden,
40	daʓ si in des solden
173	helfen unde gunnen, daʓ si zir wunnen sô seltsâner spile vernomen heten alsô vile.
5	Dô der kunich frô was, dô frowete sich Ênêas der wol gezogene Troiân. dô sie heten getân ir spil nâch ir siten,
10	zû der borch si dô riten der kunich unde Ênêas, sament in der junge Pallas mit ir mannen ensamen. do genande Êvander mit namen
15	Ênêam sînen gast. dannoch was diu borch unvast, sint stunt Rôme an der stat. der kunech Êvander dô bat Ênêam den Troiân,
20	dem her êre hete getân, daʓ her im sagete mâre, wie daʓ komen wâre, daʓ man Troie mohte gewinnen, sô vile sô sie dar inne
25	heten gûter knehte. dô sageterʓ ime rehte unde wieʓ von êrist quam und wieʓ alleʓ ende nam al die rehten wârheit.
30	der kunich in die borch reit. Dô reit der kunich edele ze sînem ansedele. dô schûf man dem helide herberge unde selide
35	und schûf in allen ir gemach, daʓ in nihtes gebrach Ênêases holden, swaʓ sô si eischen wolden. Êvander dô sande
40	boten after lande,
174	uber tach und uber naht. her tet des her was bedaht und hieʓ sagen mâre, waʓ sîn wille wâre,
5	daʓ sîn sun Pallas der im vile lieb was gewâfen nemen solde. swer ritter werden wolde, daʓ her ze hove quâme
10	undeʓ von im nâme ros gewant unde schat. dô sie vernâmen dat, dô quam dar vil manich man. grôʓen hof her dô gewan.
15	Dô der werlde alsô vile ze grôʓen frouden unde spile zû des kuneges hove quam, dô teter alsim wol gezam. her gab mit williger hant
20	ros schaz unde gewant Êvander der rîche. dô wart hêrlîche ritter sîn sun Pallas, als daʓ wole reht was.
25	des ne wundert mich niet, daʓ in sîn vater wol beriet mit gewâfen unde mit gewande. mit Ênêase her in sande mit zehen tûsent mannen
30	mit funfzich schiffen dannen Êvander der wîse. her gab in gnûch spîse als vile sô si ir wolden, ob si dâ varen solden
35	ze anderhalbem jâre, ob es nôt wâre. Die wîle daʓ Ênêas an der verte dâ was, ê danner wider mohte komen,
40	sô heteʓ Turnûs vernomen.
175	im was gesaget mâre, daʓ her entrunnen wâre, des was der hêre vil unfrô. iedoch ne was eʓ niht sô,
5	alsim dâ gesaget was, daʓ der hêre Ênêas der lobebâre wîgant, gerûmet hete daʓ lant dorch vorhte oder dorch nôt.
10	uber al daʓ here her gebôt, daʓ man die borch besâʓe. ê danner iht âʓe wânder sie gewinnen. dâ was aber innen
15	manich werehaft man, die hûten daʓ hers niht gewan, wand si gerne genâsen. ir horen hieʓens blâsen: grôʓ gerûfte dâ wart.
20	dô sich hûb an die vart Turnûs der rîche. harde manlîche vienk her daʓ dink ane. manich zeichen unde vane
25	wart dâ an gebunden in vil korzen stunden; gerne tâten sie daʓ. Turnûs die borch besaʓ, si riten vaste an den graben.
30	dâ wart ein michel strît erhaben, si schoʓʓen vaste mit den bogen. ir brucke heten si ûf gezogen, als in Ênêas geriet, ir nehein quam dar vor niet,
35	sie besazten dar inne ir torne unde ir zinne. ir dach si abe brâchen, ir vanen si ûf stâchen unde schûfen ir were
40	engegen dem creftigen here.
176	Dô die Troiâne ûf Montalbâne wâren beseʓʓen, die helide vermeʓʓen
5	wâren wol berâten. si schûfen unde tâten des si dô bedorhten. ein teil sie in vorhten, wandir hêre Ênêas
10	dâ mit in niene was, der in dâ lieb wâre. Turnûs der mâre grôʓen schaden her gewan. si behielden alse gûte man
15	ir hêren sîn hûs. dô greif der junge Ascânjûs harde fromechlîchen zû beidiu spâte unde frû: her trôste sînes vater man.
20	grôʓen lob her dâ gewan. Turnûs der helt balt, dô her die borch mit gewalt gewinnen niene mohte als im selben tohte
25	âne grôʓe arbeit, dicke her derumbe reit. her was ein unfrô man, dô her si schouwen began: betrogen het in sîn wân,
30	wan der berch was sô getân, sô veste und sô werehaht, des her hete gedaht, des ne mohte niht geschehen. den berch hete wol besehen
35	der Troiâre Ênêas, daʓ her vile veste was, dâ hern het bevangen. storm unde mangen die ne vorhter niht ein blat.
40	niewan an einiger stat,
177	als man mohte schouwen, dâ heten sie dorhouwen tiefe graben und wîte in vil korzer zîte,
5	sint daʓ sis begonden, wande siʓ wol konden. eʓ meisterde Ênêas. der nidere grabe der was harde wît unde tief.
10	ein waʓʓer dar inne lief, daʓ von den brunnen nider flôʓ. daʓ ne was niht grôʓ, eʓ vlôʓ von der borch her abe. dâ ûʓen was ein ander grabe,
15	der sô grôʓ niene was, den hete der hêre Ênêas gemeisteret dâ bevoren. des hete Turnûs grôʓen zoren. des erbalch sich der wîgant,
20	daʓ her dâ niht envant dehein unveste stat. die schiltknehte her dô bat, daʓ si ze storme wolden gân, daʓ was doch angestlîch getân.
25	Turnûs tet unrehte, daʓ her die schiltknehte zû deme storme treib, dâ ir vile tôt beleib, wandeʓ enhalf niht ein bast,
30	want der grabe was sô vast. von diu lâgen sie dâ tôt, dô si tâten daʓ her gebôt, âne mâʓe und âne zale. die dâ sprungen ze tale
35	in den graben hin nider, der quam lutzel lebende wider: si worden meistich erslagen. solde man schiltknehte klagen, sô moht dâ michel jâmer wesen,
40	wand sin mohten niht genesen
178	mit deheinem dinge. der grabe was tief und enge, dâ si zû drungen. die dô dar in sprungen
5	die wordens lîbes âne, want die Troiâne, die an den zinnen wâren und ûf den arkâren, sine sparden ir deheinen,
10	si queleten sie mit steinen. eislîche si schoʓʓen. vil ubel es die genoʓʓen, die dâ ze storme giengen, wand sie den tôt enphiengen.
15	Dô ir dâ vile tôt lach, undeʓ Turnûs gesach, daʓ ir lutzel genas und der schade alze grôʓ was vil manegem ze sêren,
20	her hieʓ si dannen kêren. des wart her dâ ze râte. eʓ was idoch ze spâte, daʓ hers niht was ê bedaht, wan si wâren unzalaht
25	die dâ lâgen erslagen. die ne mohte nieman dannen tragen, die beliben in dem graben: si âʓen gîren unde raben und swaʓ si eʓʓen wolde.
30	si heten sêre vergolden den aller êristen storm. si masten manegen grôʓen worm mit fleische und mit blûte. dô wart des zû mûte
35	Turnô daʓ her dannen reit. her hete michel arbeit und lûte dâ vil verloren. daʓ was Turnô vile zoren. Dô Turnûs solde dannen
40	varen mit sînen mannen
179	hin ze herbergen und sie die halsberge sumelîche heten ûʓ getân, dô gesach her schif stân
5	in der Tiber dâ nider. vil drâte rander hine wider mit zorenlîchen dingen. daʓ fûre hieʓer bringen (der stat ne was dâ niht hôch):
10	her schûf daʓ man diu schif zôch ûʓ dem waʓʓer an daʓ lant, und worden schiere verbrant. Dô sprach der hêre Turnûs «heten si dorf oder hûs
15	ienre in diseme rîche, diu woldich wârlîche verwôsten mit fûre. in wirdet vile tûre, den schalken, des si hânt gedaht,
20	daʓ si mit schiffen bî der naht hine entrinnen wolden, Ênêases holden, als ir hêre hât getân, der ungetrouwe Troiân.
25	diu vart is in undernomen, sine mogen hinnen niht komen lebende und ungevangen: si werdent alle erhangen oder gemartert, sal ich leben.
30	ich wil in daʓ lôn geben, daʓ si habent hûte verdient umb unser lûte.» dô Turnûs der wîgant diu schif hete verbrant
35	der helt kûne unde gemeit und er hine wider reit zû sînem gezelde, do gesach her an dem velde manech gezelt wol getân,
40	dâ bî manege hutten stân
180	allenthalben in dem lande. vil manich fûre dâ brande, dâ daʓ mâre here lach. swaʓ der ritter her gesach,
5	die her dare hete braht, den bôt her allen gûte naht. minnechlîche er zûzin sprach und hieʓ si scaffen ir gemach, daʓ si ouch gerne tâten.
10	si wâren wol berâten nâch rîcher lûte wîse. si heten genûch spîse mit in allen dare braht. vil nâ zû der mitter naht
15	si trunken unde âʓen ir leides sie vergâʓen, sie bliesen unde sungen, si spilden unde sprungen und wachten unde riefen,
20	unze daʓ si ensliefen und alle trunken lâgen, sine hôrden noch ensâgen. Dô daʓ alsô komen was, dô het der hêre Ênêas
25	der sâlige Troiân uber die porten getân zwêne ritter die ir phlâgen. dô jene trunken lâgen, daʓ markten si rehte,
30	si wâren gûte knehte, der kûne Eurîâlûs und der fromige Nîsûs der vil liebe geselle sîn. daʓ wart dicke wole schîn,
35	daʓ si geliebe wâren. in alsô vile jâren, sô si wâren ensamen, niht wan ein der namen wâren sie gescheiden:
40	wan si dûhte beide,
181	daʓ si ein lîb wâren. under allen den Troiâren ne hete man niht funden zû den selben stunden
5	zwêne kûne jungelinge, die ze grôʓeme dinge baʓ konden gerâten. vernemet wie si tâten. Dô quam dem helide Nîsen
10	dem fromigen und dem wîsen grôʓ gedank in sînen mût, wander was ein ritter gût, edile unde hêre und het umb die êre
15	dikke gerne ungemach. zû sîme gesellen her sprach «geselle, vil lieber man, daʓ ich weiʓ und daʓ ich kan daʓ kanst ouch dû unde weist.
20	wir sîn ein lîb und ein geist mit willen und mit werken. dû salt daʓ rehte merken, daʓ ich gemerket hân nû (daʓ gesehen wir wol ich unde dû)
25	umb die herelûte, die wâren mûde hûte, daʓ schînt wol an in allen, nû sint si nider gevallen trunken unde enslâfen.
30	der wîn und diu wâfen hânt in benomen ir maht unde hânt si dar zû braht, daʓ sie niht enmogen noch ze storme niht mê togen.
35	der nû under si wolde gân, der mohte ir harde vile erslân. ich sage dir wes ich hân gedaht: daʓ ich an dirre naht underʓ here strîche
40	vil geswâslîche
182	und wil in schaden swaʓ ich mach. ê danneʓ immer werde tach, sô kome ich her wider in, is daʓ ich lebendich bin.»
5	Dô daʓ geredete Nîsûs, dô antworde ime Eurîâlûs «war umbe sprechet ir daʓ? ir solt ûch verdenken baʓ, mich dunket daʓ ir missetût.
10	wir sîn ein fleisch und ein blût (sprach her), liebe frunt mîn, ichn weiʓ wie daʓ mohte sîn, wie wir daʓ ane geviengen, daʓ wir halbe hin ûʓ giengen
15	und halbe beliben hie inne. daʓ dûhte mich unminne. nû uns got hât ein lîb gegeben, wir soln beide ensament leben und ouch ensament sterben.
20	wir soln daʓ beide werben, daʓ dunket mich baʓ getân, unde solen danne gân, daʓ wir mînen hêren venden. wil uns got dare senden,
25	her minnet uns deste baʓ.» dô her gesprochen hete daʓ Eurîâlûs der wîse, dô antworde ime Nîse «eʓ is mir lieb daʓ ir eʓ tût
30	unde dunket mich gût unde bin ich es vile frô. ich ne meinde eʓ niht sô, daʓ ichʓ tûn wold eine: ir redet als ichʓ meine,
35	ichn wolde dar niht eine varen, ich wil daʓ gerne bewaren, daʓ ich von û iht scheide.» dô giengen si beide zû den selben stunden
40	dâ si Ascânjum funden,
183	ir hêren Ênêases sun, und sagten im waʓ si wolden tûn und dorch waʓ si quâmen. urloub sie zim nâmen
5	und ze den hûsgenôʓen luzeln unde grôʓen und giengen von der borch nider. sine quâmen nimmer mêre wider. Welt ir hôren vore baʓ,
10	sô mogen wir û sagen daʓ wie sie eʓ ane viengen, dô si von der borch giengen. si wâren helide lussam. ir iewederre nam
15	einen îsenînen hût unde zwei swert gût, ir gêre sie nâmen. do si underʓ here quâmen, irn wart dâ nieman gewar.
20	ir swert heten sie bar, diu si in den handen trûgen. der lûte si vil erslûgen slâfende unde âne were. si tâten wunder in dem here.
25	in vil korzen stunden machten sie manegen wunden, der niemer mêre genas: wol zwei hundert ir was. flîʓech wâren sie des.
30	dô quâmen sie dâ Ramnes der gûte wîssage lach (Nîsûs in wol besach): der was vile rîche unde lach hêrlîche
35	der wârsage wîse. unsanfte erwacte in Nîse, anders danne ers gerde. mit dem scharphen swerde daʓ houbet her im abe scriet:
40	daʓn heter vor gesaget niet.
184	dâ was diu wîsheit al verloren. her het des âbendes dâ bevoren sô vil getrunken wînes, daʓ her selbe sînes
5	al betalle vergaʓ. iedoch heter gesaget daʓ her in der wochen worde erslagen. ich hân in selden hôrt geclagen. Dô gienk Eurîâlûs
10	in ein gezelt dâ Messâpus lach mit sînen mannen. Nîsûs zôch in dannen, wande in nâhete der tach. Eurîâlûs gesach
15	einen helm vil wol getân: dô her dannen solde gân, her nam den helm an sîne hant, ûf sîn houbet her in bant: daʓ wart im sint ze leide.
20	dô giengen si beide dâ si grôʓen schaden nâmen. dô si ûʓ dem here quâmen, dâ si schaden heten getân, dô quam der hêre Volzân
25	von Laurente dar gevaren mit einer mâʓlîchen schare. her fûrde wole hundert schilde. dô si sie an deme gevilde gegen in komen gesâgen,
30	der grâve wolde sie frâgen von dem here mâre, ob ûf der borch noch wâre diu trôische diet. dem hêren antwordens niet,
35	ir sinne sie vergâʓen, si kêrden von der strâʓen, si wolden fliehen in daʓ holz. dô was dâ manich ritter stolz und genûge die si jageten.
40	niwan daʓ sie verzageten,
185	unde fliehen begunden, in ne wâre zû den stunden niht ubiles getân. Nîsûs der Troiân
5	der was sneller ein teil, doch heten si bêde unheil. Eurîâlûs was ouch snel genûch, wan der helm den her ûf trûch, den sach man verre blîchen.
10	hern mohte niht gewîchen, man ensâge wole war her gienk, dâ von quam daʓ man in vienk zû dem selben mâle. dô viengen si Eurîâle.
15	Dô daʓ was ergangen, daʓ der helt was gevangen Eurîâlûs der Troiân, dô wolden der grâve Volzân wider fûren zû dem here.
20	dâ wider ne mohter deheine were getûn zû den stunden: si heten in gebunden. daʓ was Nîsô vile zoren, daʓ her in sô solde hân verloren,
25	her wolde ê selbe blîben dâ. mit listen quam her in sô nâ, sîn rouwe was vile grôʓ, mit eime gêre her dorchschôʓ einen des grâven man,
30	sô daʓ her nimmer dan mit sîme lîbe quam: sîn ende er dâ ze stete nam. Dô sprach der grâve Volzân «ichn weiʓ wer diz hât getân,
35	der mînen man hie hât erslagen, den ich ubile mach verclagen, eʓ gêt dir an dîn leben.» her hieʓ im einen slach geben. als der grâve gerde,
40	mit eime scharphen swerde
186	daʓ houbet her im abe slûch. des wart rouwich genûch Nîsûs dô her eʓ gesach. eʓ was der leidiste slach,
5	den her gesach slahen ie. gebâren enweste her wie: done wolder niht verholen wesen noch âne in genesen. her hete in gerne erlôst.
10	des lîbes heter sich getrôst, hern vorhte im neheinen teil, her lieʓ daʓ leben an ein heil, als in der grôʓe zoren dwank. manlîche her her vore sprank,
15	der wol gelobete wîgant. daʓ swert trûch her an der hant, eʓ was stark unde gût. ouch heter eines lêwen mût, daʓ mach man wole sprechen.
20	sînen gesellen wolder rechen: her erslûch vil schiere des grâven manne viere, daʓ si tôt lâgen. dô daʓ die andern sâgen,
25	daʓ her sô tobelîchen warb, wandern rûchte ob er starb und enwolde niht komen dane, vaste liefen sie in ane mit speren und mit swerden
30	die sîn alle gerden. ir frunt sie an ime râchen, si slûgen ûf in unde stâchen, unze her dâ tôt lach. dô daʓ Volzân gesach,
35	daʓ sie dâ beide lâgen tôt, sînen lûten her gebôt, hern wolde sie niht scheiden: her gebôt daʓ man in beiden diu houbet abe slûge
40	und si zû dem here trûge.
187	daʓ hieʓ der grâve Volzân, daʓ was schiere getân. Dô der grâve daʓ beriet, sint ne wolder dâ belîben niet,
5	sîn lûte hieʓ er bâren die dâ erslagen wâren, beidiu tôt unde wunt. her reit dâ zer stunt zû deme here dannen.
10	her gebôt sînen mannen, daʓ si diu houbet nâmen. ê si in daʓ here quâmen, dô was eʓ sô verre tach, daʓ man uber al gesach
15	dâ die lâgen erslagen. dâ was weinen unde clagen. vile rouwich was diu diet, wande sie ne westen niet, wer daʓ hete getân,
20	ê der grâve Volzân mit sîner schare dar zû reit: do erfunden sie die wârheit. ich wil û sagen wie eʓ quam. den helm den Eurîâlûs nam
25	in Messâpûs gezelde, der quam ze hôhem gelde, des man luzel gedahte. do in Volzân wider brahte, dô erkande in Messâpûs
30	und der hêre Turnûs. ir lûte daʓ tihten, daʓ si in einen galgen rihten an der porten dâ man zû gienk, diu houbet man dar ane hienk.
35	Dô die Troiâre vernâmen daʓ mâre, daʓ der hêre Nîsûs und sîn frunt Eurîâlûs beide erslagen lâgen,
40	und sie diu houbet sâgen
188	an dem galgen hangen hô, dô was maneger unfrô. si heten rouwe grôʓe umbe ir hûsgenôʓe,
5	die alsô wâren bliben tôt. der hêre Turnûs dô gebôt in dem here uber al uber berch und uber tal und hieʓ sagen mâre,
10	swer sô sîn frunt wâre und sîner minne rûchte, daʓ her die borch sûchte, her wolde fullen den graben, oder her worde dar abe
15	mit den swerden geslagen. dô wart dâ manich stark wagen zû getriben al geladen. jenen wolden sie schaden, die der borch phlâgen.
20	dô si daʓ ersâgen, do geschûfen si ouch ir were, want si gesâgen daʓ here wâfen unde rûren unde dar zû fûren
25	vile grôʓe gedraht. ê dan siʓ worfen in die graht und ê siʓ mohten gelegen, sô heten sie ouch dar engegen geschaffet ir gewarheit.
30	daʓ fûre heten si vil gereit unde dar zû ir gerech, smalz, swebel unde bech, die gedraht si branden under ir handen.
35	die eʓ dar zû trûgen, vil si der erslûgen. Dô Turnô bedohte, daʓ die graben ne mohten niht gefullet werden,
40	dô hieʓ her sie mit erden
189	fullen unde slihten. mangen hieʓer rihten, seilen unde mannen, und ebenhôhen spannen
5	und hieʓ die trîben dar zô. die Troiâre wânder dô alle schiere haben tôt. den schutzen her gebôt beidiu gebôt unde bat,
10	her fûrde sie an eine stat, her tete in rede gûte mit fruntlîchem mûte und bat si vaste schieʓen, daʓ si der ne lieʓen
15	deheinen leben noch genesen, die an den zinnen wolden wesen und dâ stunden ze were, und bat alleʓ daʓ here, daʓ si ze storme wolden gân.
20	daʓ wart schiere alsô getân, als wir û wol gesagen mogen. vile dikke dâ flogen schefte unde phîle eine lange wîle
25	unde materelle grôʓ unde snelle unde scharphe gêre. dô trûgens sêre, die den graben solden weren:
30	sine mohten sich drûf niht generen, von den zinnen man si treib, daʓ ir luzel drane bleib. si mûsten sich bergen. niewan die halsberge
35	und îsen ane trûgen, die schoʓʓen unde slûgen. doch wart ir sô vile wunt, daʓ si dô zû der stunt mit gewalde solden în gân,
40	wan daʓ der edile Troiân,
190	Ascânjus der junge man, die helide trôsten began. Dô sprach der helt mâre, daʓ eʓ noch arger wâre,
5	daʓ si mit schanden storben danne si rûm erworben unde wolden wol genesen. die dâ gûte knehte wolden wesen, der nande her sô vil mit namen,
10	daʓ si sich alle begonden schamen, eʓ wâre in leit oder gemach. sô vil her in zû sprach den alden und den jungen, daʓ si her vor sprungen
15	unde jene enphiengen, die dâ ze storme giengen. als ich die rede hân vernomen, ir was ein michel teil komen zû den zinnen vile nâ,
20	dô widerstunden sie in dâ alse gûte knehte. dâ golden sie in rehte daʓ si unschuldich wâren mit blîkolben swâren.
25	sine spareten ir neheinen. mit grôʓen lâʓsteinen qualten sie si âne zal, die den graben al ze tal tôt walzeten hin nider:
30	sine quâmen nimmer dar wider. Der storm was vile grôʓ. beidenthalben man schôʓ beidiu ûf unde nider. dâ flogen vort unde wider
35	die phîle dikker danne ein regen. Ascânjûs der junge degen getrôste sînes vater man. grôʓ arbeit her des gewan. her schûf daʓ sie sich wereten
40	und den lîb genereten
191	vor ir vîanden. si dahten wol zen handen, si slûgen unde stâchen, die halse si in brâchen,
5	die arme und die rucke. dô was uber die brucke ein berfrit hô gespannen, daʓ was zwelif mannen bestatet unde bevolen,
10	die mûsten angest dâ dolen, dô man si stormen began. dar ûffe wâren zwêne man, zwêne ritter gûte, den dâ diu hûte
15	allermeist bevolen was. den getrouwete Ênêas wol, dô her si dâ lieʓ. Lîcûs der eine hieʓ und der ander Helenôr.
20	dem het der hêre Hectôr wâfen unde swert gegeven. si wâren beide geneven Helenôr unde Lîke zwêne ritter hêrlîke.
25	Die lieben hûsgenôʓe heten sorge grôʓe, Helenôr und Lîcûs, die dâ wâren ûf dem wîchûs, und ander Ênêases man,
30	dô man si sûchen began. dô ir Turnûs wart gewar, des heres leiter vile dar bî der brucke an eine stat. her gebôt unde bat
35	frunt unde holden, daʓ sime helfen wolden, daʓ her den torn verbrande. ê danner dannen wande, woldern hân gewunnen.
40	dô wart dâ begunnen
192	ein storm vile freissam, der ze grôʓem schaden quam den fromen Troiâren. die ûf dem torne wâren,
5	die liden michel nôt und bliben doch ze jungest tôt. si sûchte manich helt balt. man gewan daʓ berfrit mit gewalt, daʓn was nehein wunder:
10	si macheten fûre drunder michel unde vile grôʓ. daʓ ole man dar în gôʓ, daʓ vil sêre brande. hin ûf man sande
15	heiʓe flamme unde rouch. daʓ fûre an die were flouch, sine mohtenʓ niht erleschen. ir blanken wâren eschen, die vil liehte branden.
20	die zwelif wîgande wichen engegen dem winde oben an dem ende, sine mohten niender abe komen, wan diu leiter was in genomen,
25	da si mite solden abe gân. der torn ne moht niht lenger stân, die sûle wâren verbrant: dô viel her nider alzehant. Michel jâmer dâ was,
30	wand ir neheiner genas. si liden groʓe quâle und storben alzemâle unze an die zwêne man, die ich genennen wole kan,
35	Helenôr und Lîcûs. daʓ sach der hêre Turnûs harde frôlîchen an. Lîcûs karde hin dan, engegen der porten her flôch.
40	Helenôr daʓ swert zôch,
193	daʓ was scharf unde lank, dâ mite teter manegen swank, sô eʓ helide wol gezam. zehenen her den lîb nam,
5	Turnûses holden, die in slahen wolden. knehtlîche er sich werde. mit dem gûten swerde slûch her vaste unde stach,
10	unze her dar nider lach. ze jungest slûch in Turnûs. dô was der helt Lîcûs in den graben hin ûf komen, dâ wart ouch im sîn lîb genomen.
15	daʓ jâmer was vile grôʓ: ein ritter dorch in schôʓ mit eineme scharphen gêre: sîne frunt rach her sêre. Dô hete der hêre Turnûs
20	einen sweher der hieʓ Rômulûs, der was ein helt vermeʓʓen unde was geseʓʓen ûf ein ros daʓ harde lief. die Troiâre er ane rief,
25	harde drôweter unde schalt. Ascânjûs der helt balt was ûf der borch obene. daʓ was im wol ze lobene, her stunt bî sînen mannen.
30	den bogen heter gespannen, dô her solde kêren dan, ein scharphe strâlen sazter an, sîn zoren der was grôʓ, in den lîb her in schôʓ,
35	daʓ herze her im dorchbrach, sô daʓ her niemer mêr gesprach ubel noch gût enweder. von dem rosse viel her neder. alsô was im vergolden,
40	daʓ her si hete bescholden.
194	Dô was Turnô vil zoren, daʓ her sô hete verloren sînere swester man. eins starken stormes her began
5	ze der borch in drin sinnen. her wânde sie gewinnen zû der selben zîte. dô stormde an einer sîte Messâpûs und Mezentiûs,
10	Lausûs und Aventînûs anderhalbe mit here. die Troiâre giengen zewere. da enzwischen was Turnûs und der grâve Claudjûs
15	mit ir mannen allen. der torn was gevallen, den si ê dâ branden. diu brucke was bestanden, mit storme giengen sie dar zô.
20	harde ervorhten sich dô Ascânjûs und sîne man. grôʓ angest her gewan, als daʓ nehein wunder was. dô het der hêre Ênêas
25	zwêne risen dâ gelâʓen, die ûf deme torne sâʓen ûf dem oberesten hûs. der eine brûder hieʓ Pandarûs und der ander Bitîas.
30	dô eʓ vil nâch sô komen was, daʓ daʓ vorborge was verloren, daʓ was den risen vile zoren, eʓ dûht si michel schande, daʓ si ir vîande
35	in sô nâhen sâgen gân. ir halsberge heten si an getân, die in ze mâʓen wâren von gûten ringen swâren. freislîch was ir gemûte
40	und wâren ir hûte
195	von stahele dicke geslagen, wan sis mohten wol getragen, daʓ lieʓen sie wole schîn. ir hosen wâren îsenîn
5	veste lank unde wît. si wâren gernde in den strît. balde giengen sie her abe von dem torn her ûf den graben. si bestunden michel arbeit,
10	iedoch was eʓ tumbheit, des si wâren berâten. die porten sie ûf tâten, die valbrucken lieʓens nider unde slûgen jene wider,
15	die dâ ze storme giengen. grimmechlîchen sis enphiengen mit slegen vile swâren, wande sie stark wâren als si von rehte solden wesen.
20	vor in ne mohte niht genesen, si slûgen daʓ in zû quam, want si wâren in gram als den wilden wolven. mit îsenînen kolven
25	grôʓen, die si trûgen, des hers si vil erslûgen, sô daʓ eʓ unmâʓe was, Pandarûs und Bitîas. Dô daʓ Turnûs gesach,
30	daʓ dâ vile tôt lach des hers von den zwein resen, daʓ nieman mohte genesen, den si mohten bestrîchen, si mûsten alle entwîchen:
35	dô des Turnûs wart gewar, mit tûsent rittern kêrder dar mit zornegem mûte. her sprach «helede gûte, nû denket wol zen handen,
40	daʓ wir diz geanden,
196	ir tumbheit in gelônen. niemen sal ir schônen, helfet daʓ wir sie erslân und mit den andern în gân,
5	sô is diu borch gewunnen.» dô wart dâ begunnen ein sperwehsel vile grôʓ. mit ermbrusten man dâ schôʓ und mit starken gêren.
10	si frometen manegen sêren dâ in beiden sîten, daʓ dâ in korzen zîten des heres vile tôt lach, daʓ nieman gahten ne mach.
15	diu swert dâ vaste klungen, dâ si ze samene drungen, vil manech helm dâ erklank, daʓ daʓ fûre drûʓ sprank brinnende ze berge.
20	dâ worden halsperge mit swerden verscrôten, dâ was mit den tôten der wech aller belegen. Turnûs der mâre degen
25	gewan idoch daʓ beste, sô daʓ her sie ze leste mit gewalt in die borch slûch. dô bleib der Troiâre gnûch dar ûʓe âne ir dank.
30	Turnûs in die borch sprank mit funfzich heliden snellen sîner hergesellen. Dô Turnûs in der borch was, dô beslôʓ der rise Bitîas
35	daʓ tor hinder ime zô. in grôʓ angest quam her dô Turnûs der rîche, her wânde sicherlîche, daʓ im sîne holden
40	vaste volgen solden
197	unde mit im în gân. dô was diu porte zû getân. des leit her michel nôt, die sîne bliben alle tôt,
5	die mit im în drungen, die alden mit den jungen, ir neheiner genas. selbe er nâch erslagen was Turnûs der mâre,
10	wan daʓ die Troiâre dar ûʓe wârn besloʓʓen, ne hete er des niht gnoʓʓen, her hete verloren sîn leben, wan daʓ im got wolde geben,
15	daʓ des gedahte Bitîas, daʓ sîn brûder dûʓe was mit den anderen beliben. her was zû dem tore getriben, daʓ rou in zunmâʓen.
20	her wolde in în lâʓen: zû der porten her sprank, manlîch her dar ûʓ drank vor die porte an eine stat. Turnûs nâch ime trat
25	wander slîbes gerde. mit eime scharphen swerde, daʓ her trûch an sîner hant, gereichete her den wîgant: daʓ zesewe diech slûch her im abe,
30	daʓ her viel in den graben, sô daʓ ime der hals brach. sîne frunt her an im rach der herzoge Turnûs. die wîle hete Pandarûs
35	tôtwunden enphangen. dô was der storm ergangen. Der mûden Troiâre, ichn weiʓ wie vil der wâre, die dâ ûʓe wârn genesen,
40	die mûsten wole frô wesen,
198	do si in die borch quâmen wider. Turnûs gienk dô hin nider, her quam kûme danne. dô heter sîner manne
5	tôt dâ gelâʓen vile ûʓ der mâʓen, die ruwen in vil sêre. zweinzich hundert was ir mêre danne der borgâre
10	dâ erslagen wâre, want daʓ unreht was sîn, daʓ wart im dicke wole schîn. Dô kêrde hêre Turnûs mit dem here von dem hûs,
15	ze den herbergen her reit. her hete michel arbeit erliden unde grôʓe nôt. sîm marschalke her gebôt unde hieʓ gebieten,
20	daʓ si daʓ berieten unde holfen ahten umb die schiltwahte. her hieʓ siʓ alsô ane vân, daʓ eʓ worde baʓ getân
25	dan des nahtes dâ bevoren. her hete gerne sînen zoren uber die borch gerochen, dô herʓ hete gesprochen. zû sînen frunden her sprach,
30	daʓ si schûfen ir gemach unde rûweten die naht. des wâren sie wol bedaht unde wol berâten, daʓ si daʓ gerne tâten.
35	Des morgens vile frû der borch kêrde aber zû Turnûs mit allem deme here. dô sazten sich ze were die Troiâre alse in nôt was.
40	do gesâgen sie wâ Ênêas
199	mit den schiffen zû quam, der manegen helt lussam mit ime dare brahte, des Turnûs niht gedahte.
5	hern wiste niht dar umbe, niwan daʓ die tumbe, die ûf der borge lâgen, und si'n komen sâgen, vor froweden sie sprungen,
10	si bliesen unde sungen. dô gemarkte eʓ Messâpûs und der helt Turnûs. do er der schiffe geware wart, dô heter in die zûvart
15	harde gerne benomen: dô wâren sie ze rosse komen ûʓ den schiffen an daʓ lant. Ênêas der wîgant wol gewâfent her was,
20	und der junge Pallas, der kunich Êvanders sun. der wolde ritterschaft dâ tûn, der lussame jungelink, der des tages sîn dink
25	vil manlîch dâ ane vienk, die wîle sîn heil vore gienk. Dô was erlûhtet der tach. der hêre Turnûs ersach, daʓ si ze rosse wâren komen.
30	driu tûsent ritter heter genomen, geteilet in drî schare. dô gesach si varen dare der Troiâre Ênêas und der junge Pallas
35	unde sîn geselleschaft, die vil schône ritterschaft frôlîche dâ begunden. si heten angebunden manech zeichen unde van.
40	Turnûs der randes an,
200	der genendige wîgant. ein zeichen fûrder an der hant, daʓ was gele unde rôt. des ne wâre dehein nôt,
5	daʓ her iht kûner wâre. ouch hete der helt mâre einen wâfenrok ane alsô getân als sîn vane rôt unde gel samît,
10	und saʓ ûf ein râvît, daʓ harde lief unde sprank. ûʓ der schar her vore drank sînen ritteren bevoren. daʓ ros rûrder mit den sporen.
15	daʓ sach der junge Pallas. wol gewâfent her was, sô nie dehein kunich baʓ. ûf ein kastelân her saʓ, daʓ sînem vater sande
20	ûʓ einem fromeden lande der kunich vone Marrok. phellîn was sîn wafenrok unde sîn zeichen was cindâl grûne als ein gras
25	und sîn schilt was grûne. Pallas der was kûne, her was ein helt lussam. daʓ ros her mit den sporen nam dô her Turnûses wart geware,
30	dô sprancte her vor sîner schare vor allen sînen holden: die in wîsen solden, die enmohten sîn niht behalden. her lieʓ es got walden,
35	Pallas der wîgant, den schilt heter an die hant zû dem brîtel genomen, wander sach Turnum komen, hern wolde niht wenken,
40	sîn sper lieʓ her senken,
201	alsô tet Turnûs daʓ sîn. dâ wart degenheit schîn von den wîganden. ze samene sie geranden,
5	als si beide luste. sie tâten eine juste harde ritterlîche zwein degenen gelîche, âne arge liste.
10	ir neweder vermiste, beide sie wol stâchen, daʓ ir schafte brâchen, die sprundelen hôhe flogen. schiere sie diu swert zogen,
15	der si niht vergâʓen. ir beider ros gesâʓen ûf die hassen dar neder, iedoch enviel ir deweder. Dô si alsô heten gevaren,
20	dô gemischeten sich die scharen vaste in beiden sîten, dô gieng eʓ an daʓ strîten. daʓ here quam beidenthalb zû, iedoch was eʓ dannoch frû.
25	ê danneʓ worde mitter tach, dô wart dâ manech grôʓ slach enphangen unde gegeben und verlâʓen manech leben ze solhem widergelde.
30	an dem breiten velde wart dô michel gedrank. eʓ wâre ze sagenne alze lank, wer dâ viel und wer dâ stach und wer dâ sîn spere brach,
35	wer dâ starb und wer dâ slûch, want der was vil unde gnûch und wâren unzalhaft. want dâ was grôʓ mankraft an dem breiten gevilde.
40	dâ worden die schilde
202	und die helme verscrôten. Turnûs lieʓ dâ tôten zweinzich stunt mêre denne Ênêas der hêre.
5	Dô kêrde Ênêas dâ eʓ aller dickest was, die vîande brach er dorch. dâ wart blûtich manech forch, vil manegen her valde,
10	den nieman ne zalde. vil her ir dar nider stach, unz daʓ im sîn spere brach. dô zôch der kûne Troiân daʓ swert, daʓ ime Volcân
15	dorch minne hête gesant, daʓ fûrder bar an sîner hant, eʓ was lobelîch genûch. swen sô her dermite slûch, der ime ze rehtem slage quam,
20	vil schiere er ime den lîp nam. der helm ne was nie sô gût noch der îsenîne hût noch der halsberch nie sô vast, daʓ eʓ im holfe iht umb ein bast,
25	wander hete vil grôʓe kraft. si wâren unzalehaft, die vor im tôt lâgen. die ander die daʓ gesâgen, daʓ her solch wunder worhte,
30	si rûmden im dorch vorhte. Die dô der borch phlâgen, dô si daʓ gesâgen, daʓ der hêre Ênêas mit angesten dâ was
35	bî sînen vîanden, Ascânjûs ime sande funf hundert sneller helde mit helmen ûʓ ze velde, ein wol gewâfente schar.
40	die leite ein kûne helt dar,
203	der frumige Lycomîde. si quâmen ze dem strîde Ênêase wol ze staden und den vîanden ze schaden,
5	daʓ bescheinden sie genûgen: des heres si vil erslûgen. dô vaht der hêre Ênêas und der junge Pallas alsô helide gûte.
10	dô wart von dem blûte daʓ mere dâ bevore rôt. dâ bleib manech helt tôt, der rosse vil dâ tôt lach. der storm werde al den tach,
15	daʓ her nie ende genam. als after mitter tach quam, do gewan Turnûs daʓ heil, daʓ der Troiâre ein teil kêrde mit fluhte.
20	die getrôste mit zuhte der junge kunich Pallas, dem eʓ harde leit was. Der helt Pallas gesach ime vile leiden tach,
25	dô her daʓ troische here sach fliehen in daʓ mere. do ers allerêrist wart gewar, dô kêrder snellîche dar dâ si hin flohen mit dem van.
30	der hêre Pallas rief si an, der frumige unde rîche, vil gewaldechlîche mit einre hôhen stimme «welt ir ze Troie swimme?
35	daʓ is michel tumbheit, want daʓ mere is vile breit, ir moget ûch lîhte ertrenken. ir solt ûch baʓ bedenken, gûter hande lûte:
40	ichn weiʓ waʓ daʓ bedûte,
204	daʓ ir êrhaften tôt fliet und ûch zeim schantlîchen ziet. dorch welhe rede tût ir daʓ? gunnet ir den vischen baʓ
5	daʓ si ûwer fleisch eʓʓen, helide vermeʓʓen, dan den vogelen wilden hir ûʓe an deme gevilde? war zû is û daʓ gût?
10	ich wîse û wie ir baʓ tût: ir moget wol mit êren ze ûwerm hêren kêren, edile wîgande, der ûch ûʓ ûwerm lande
15	in ellende brahte, sô tût ir êrahte. irn solt niht fliehen und gnendechlîche ziehen diu wol snîdenden swert,
20	ob ir des lîbes iht gert, und slahet die ûch wellen slân. daʓ dunket mich baʓ getân, daʓ ir gûte knehte weset und mit êren geneset
25	unde rûm erwerbet, dan ir mit schanden sterbet.» Dô sprach aber Pallas alsô her ein helt was «ichn wil niht daʓ ir verzaget.
30	der ûch dâ here hât gejaget, ich wil des gedingen und wil in dar zû bringen, daʓ hers niht mêre entû. wir scoln im wider stên nû,
35	sô daʓ unser eintweder den anderen leget dar neder von dem rosse an daʓ sant.» do gehôrde eʓ der wîgant, Turnûs, daʓ herʓ sprach.
40	diu rede was im ungemach
205	unde harde unmâre. her frâgete in wer her wâre, Turnûs der vorste, und wie her sich getorste
5	zû zim ebenmâʓen, her mohteʓ wole lâʓen. Dô sagete ime Pallas vile rehte wer her was und daʓ her im wâre gram
10	und her dorch daʓ dare quam, daʓ her im schaden wolde, dorch anders nehein scholde. daʓ was Turnô vile zorn, daʓ ros rûrder mit den sporn.
15	alsô tet ouch Pallas. daʓ sîne vile snel was. hern wolde im niht entwîchen. si lieʓen dare strîchen, die zwêne degene rîche
20	sich dacten ritterlîche mit den schilden die si fûrden. dô si mit den sporen rûrden, dô stach ir ieweder den andern ritterlîche neder
25	von den rossen zû der erden. dâ mûste ervollet werden, des si sêre gerden. si griffen zû den swerden, die helide vile milde
30	zehiewen die schilde ze spânen vil kleinen, si zwêne wârn dâ eine, daʓ nieman dâ bî in was. dô slûch der helt Pallas
35	Turnô einen solhen slach, daʓ her nâch dar nider lach. her brahte in des innen, daʓ her sîner minnen betalle niene gerde.
40	mit dem scharphen swerde,
206	daʓ her an der hant trûch, den helm her ime dorch slûch und der hûben ringe. dem edilen jungelinge
5	Turnô bedohte, daʓ Pallas wole mohte sîn ein vile gût degen, wander was nâch tôt gelegen der mâre helt lussam.
10	ûf diu knie her nider quam vor Pallase an den sant. daʓ swert behielder in der hant, hern mohte deheinen slach erzien. aldâ her stunt ûf den knien,
15	her hete gerne sich erwert, her stach Pallase daʓ swert underm halsberge in den lîb, sô daʓ herm lant unde wîb immer mêr mit fride lieʓ:
20	tôten hern dar nider stieʓ. Dô lach Pallas dâ erslagen, den sîne frunt wol mûsten klagen, daʓ her alsô veiger was, der junge kunink Pallas.
25	dâ was der jâmer vile grôʓ, daʓ her des ubile genôʓ, daʓ her dorch êre dare quam der mâre helt lussam. eʓ was ein vil ubil zît,
30	hern was in storm noch in strît dâ bevor nie komen ê noch getet sint nimmer mê. dannoch was eʓ im ze frû. her greif vil manlîche zû
35	der helt unbescholden. her hete sich vergolden dâ bevor allen den tach, daʓ her mit êren tôt lach, wander hete erslagen ê
40	hundert manne oder mê.
207	daʓ half in luzel iedoch, wan daʓ man in lobet noch und diu tugent is von im gescriben. wârer mit schanden tôt beliben,
5	daʓ al verswigen wâre. nû nam der helt mâre vile êrhaft sînen ende sunder alle missewende. Dô Turnûs gesach,
10	daʓ der helt Pallas lach und tôt viel vor im an den sant, ein vingerlîn heter an der hant der junkhêre Pallas, daʓ gab ime Ênêas
15	dorch trouwe und dorch fruntschaft, dorch minne und dorch geselleschaft, daʓ was rôt goldîn; eʓn dorfte niht beʓʓer sîn und enwas niht ze kleine,
20	mit einem edilen steine, daʓ was ein smaragdûs grûne. Turnûs der helt kûne vergaʓ sîn selbes sêre drane. ê danne er kêrde dane,
25	abe dem vinger herʓ im nam, daʓ im sint zunstaden quam. her tet ouch bôslîche Turnûs der rîche unde harde sînen gewalt,
30	des her sît sêre engalt, dô der helt Ênêas sîn sô gewaldich was, daʓ her wol genesen mohte sîn, niwan daʓ vingerlîn,
35	daʓ her in dar umbe slûch. dâ mite engalders ouch genûch. Dô Turnûs dâ mit umbe gienk und sîn dink ane vienk, als ime selben geviel,
40	dô was dâ bî in eime kiel
208	ein schutze mit eime bogen. her schôʓ Turnûm den herzogen dorch den halsberch in die sîten ime selben zubilen zîten,
5	wanderʓ mit dem lîbe galt. Turnûs der helt balt vil schiere er umbe sach, wand im der zoren sêre wach. dô gesach der helt snel
10	oben ûf daʓ castel den schutzen mit dem bogen stân, der eʓ ime hete getân. sint was diu stunde niht lank, vil schiere er in daʓ schif sprank.
15	dô in der schutze komen sach, dô flôch her dannen unde lach in der sentînen nider, hern quam ouch nimmer mêre wider. dô suchte in der wîgant
20	Turnûs, unz er in vant. daʓ houbet her im abe slûch: dâ heter schaden ane genûch, unde nam im den bogen. die wîle daʓ der herzoge
25	alsô was dar under, do geschach ein michel wunder, daʓ was vil grôʓ unheil: dô lôste sich daʓ ankerseil dâ daʓ schif mit was gehaft.
30	der wint mit grôʓer kraft von dem lande dô quam, daʓ schif her vor sich nam und treib eʓ verre ûf daʓ mere, sô daʓ Turnûs zû dem here
35	niht enmohte wider komen weder ze schaden noch ze fromen. Dô Turnûs des gewar wart, dô gerou in diu vart, daʓ her in daʓ schif quam.
40	dô sprach der helt lussam
209	«ôwê ungelucker man, daʓ ich daʓ leben ie gewan! nû bin ich sêre missetrôst. doch hât mich dicke got erlôst
5	ûʓer maneger grôʓer nôt. wâre ich ûf der erde tôt beliben, sô wâre ich lîhte verklaget. man sal sprechen ich sî verzaget und fliehe dorch mîn bôsheit.
10	ich hân vil michel arbeit mit grôʓen êren dicke erliden. hete ich diz eine vermiden! nû is eʓ leider al verloren. Lâvînâ was mir geboren
15	ze grôʓem unheile. daʓ mir daʓ ze teile von ir halb was getân und ich es niht mohte engân, des mach ich wol unfrô sîn.
20	eʓ is mir wole worden schîn unde bin es wol gewis, daʓ eʓ den goten leit is, daʓ ich sô vile hân getân wider ir mâge dem Troiân:
25	des engilde ich vile sêre. quâme ich ouch immer mêre lebende ze lande, ich hetes grôʓe schande. kome ich aber wider niet,
30	sone rûche ich waʓ mir geschiet (sprach der helt rîche), sô mûʓ ich jâmerlîche ûf diseme mere ligen tôt. daʓ is diu allermeiste nôt,
35	dâ ich ie in quam. diz wilde mere is mir gram, ouch haʓʓent mich die winde, als ich eʓ wol bevinde, die mich von danne hânt getriben.
40	daʓ ich dâ niht was beliben
210	nâch mînen êren erslagen, daʓ mûʓ ich nû wole klagen, wandich ne trouwe niht genesen, eʓ ne wâre ob daʓ mohte wesen,
5	daʓ ich gerne gesâge, daʓ der wint gelâge, der nordert dâ here vert. wâre mir daʓ heil beschert, daʓ mich des got gewerde,
10	daʓ her sundert kêrde, sô mohte mîn rât werden, sô quâme ich ze erden dem Troiâre ze banen. des wil ich got manen,
15	daʓ her mich wider bringe mit gnâdechlîchem dinge.» Alsô fûr der helt balt in des windes gewalt, der mit dem freislîchen mere vaht,
20	den tach unde die naht unze an den andern tach. der nordert wint gelach und der sundert wint quam, der treib den helt lussam
25	wider zû lande, al dâr her sich bekande. dô gelante Turnûs vor eine borch dâ Dampnûs sîn vater hêre uber was.
30	daʓ half im daʓ her genas, Turnûs der helt lussam, daʓ her in daʓ schif quam, dô her Pallantem slûch und in daʓ schif danne trûch.
35	ne heten daʓ schif niht dan getragen, Ênêas hete in erslagen. Dô daʓ alsô was getân, daʓ Pallas der edle man sînen lîb hete verloren,
40	daʓ was Ênêê vil zoren,
211	unde hieʓ in schiere bâren sîne lûte die dâ wâren. Ênêas klagete sêre sîn jugent und sîn êre
5	sîn tugent und sîn trouwe. her hete grôʓe rouwe der helt wol geborne. vor leide und vor zorne ne mohter niht gesprechen,
10	her wolde in gerne rechen an Turnô der in slûch. den helt suchte her genûch und kêrde wider in den strît. her slûch wunden vile wît
15	mit sîner ellenthaften hant. swen her an sînem wege vant, her wâre junk oder alt, mit dem lîbe her eʓ galt. Enêas der hêre
20	was erbolgen sêre unde rouwich genûch. sîner vîande er erslûch vile âne mâʓe. her machete eine strâʓe
25	enalmitten dorchʓ gedrank. dô quam her uber lank dâ ime Mezentiûs wider reit. der leite eine schare breit, dâ reit her hêrlîchen bevoren.
30	dô rûrde Ênêas mit den sporen daʓ ros dâ her ûffe saʓ. eʓn was trâge noch laʓ, eʓ trûch in ritterlîche dar. dô des der hêre wart gewar,
35	Mesentiûs der rîche degen, dô kêrder Ênêase engegen, in den schilt her in stach, sô daʓ im sîn sper brach, Mezentiûs der helt balt.
40	Ênêas ime daʓ vergalt
212	harde ritterlîche wider: sîn sper daʓ lieʓ her senken nider, wand ime der arm wunt was. der Troiâre Ênêas
5	ein wênich ob deme knie stach hern rehte dorch daʓ die und daʓ in trûch daʓ ros dorch, sô daʓ si beidiu in einer vorch ob einander lâgen.
10	sîn man die daʓ gesâgen die lôsten in ritterlîche, wander was ein vorste rîche und was des rehte bedaht unde hete mit ime braht
15	manegen helt gûten, die'm sînen lîb behûten. ze den herbergen sie in trûgen, die arzâte ime twûgen daʓ blût von den wunden.
20	schiere sie in bunden als sie von rehte solden tûn. dô vernamʓ Lausûs sîn sun, daʓ sîn vater wunt was, und weste wol daʓ Ênêas
25	die selben wunden hete getân. dô bestunder den Troiân der junkhêre rîche. her stach ritterlîche daʓ sper in sîme schilde enzwei.
30	daʓ ne war im niht ein ei, her vergalt imʓ ritterlîche wider und stach in von dem rosse nider als lank sô sîn spere was. dô kêrde Ênêas
35	uber den helt jungen. dô was her ûf gesprungen, daʓ swert hete her erzogen, hinder deme satelbogen daʓ ros her ime enzwei slûch,
40	deiʓ nimmer satel mêr getrûch
213	und der helt lussam zû der erden bequam. manlîche her ûf sprank, Lausûs ime zû drank,
5	unde Ênêas der degen trat im ernisthafte engegen. Dô die helide gûte mit grimmigeme mûte ze samene bequâmen,
10	si gâben unde nâmen die slege freislîche. der junkhêre rîche bestunt den kûnen Troiân, der ime hete getân
15	und sînem vater leide. dô schirmeten si beide, als in beiden nôt was. dô konde aber Ênêas baʓ vehten unde schirmen,
20	hern lieʓ nie gehirmen Lausum den jungelink, her leidete im daʓ tagedink swie sô her sich werde. mit dem scharphen swerde,
25	daʓ Ênêas an der hant trûch, dorch den helm her in slûch einen freislîchen slach, daʓ her tôt vor ime lach und des schirmennes vergaʓ.
30	ûf daʓ ros her dô gesaʓ, daʓ dâ Lausûses was. dar ûffe reit Ênêas vil ageleiʓe dannen von Lausûses mannen,
35	die in gerne wolden slân, ob siʓ mohten hân getân. Dô was daʓ after mitten tach, dô frâgete der dâ wunt lach, Mezentiûs der mâre,
40	wâ sîn sun wâre.
214	her hieʓ nâch ime senden, ob man in mohte vinden, daʓ man in brahte schiere. der boten wâren viere,
5	die nâch im varen solden und in bringen wolden, als der hêre gebôt. dô saget man in daʓ her was tôt. dô si die rede vernâmen,
10	schiere si wider quâmen und sagten im daʓ her tôt was unde daʓ in Ênêas selbe hête erslagen. dô braht man in dâ zû getragen.
15	Dô daʓ Mezentiûs gesach, niht langer her ne lach, unsinnechlîche er ûf sprank, als in diu grôʓe rouwe twank, mit zornigen dingen:
20	sîn ros hieʓer bringen, Mezentiûs der alde, her wâfende sich balde, vil kûme er ûf daʓ ros quam, sînen schilt her dô nam,
25	als schiere sô her ûf saʓ. sîner wunden her vergaʓ, daʓ was iedoch tumbheit. tobelîche her dô reit unde leitte danne
30	driu hundert sîner manne und kêrde al dâr der storm was. dâ widerreit im Ênêas, und alser in erkande, vaster in an rande:
35	dô têt ime der Troiân, als her dem sune hete getân, her slûch in daʓ her tôt lach. der storm wert allen den tach, unz daʓ in diu naht schiet.
40	alsus saget uns daʓ liet.
215	Dô der tach vore quam und in diu naht daʓ lieht benam und der storm ergangen was, dô kêrde Ênêas
5	und sîne Troiâne ûfen Montalbâne, diu dâ stunt bî deme mere. die ander kêrden zû dem here, die die borch heten beseʓʓen.
10	die helide vermeʓʓen, die die slege niht vermiden, die heten grôʓe angest liden unde vile michel nôt. die ander die dâ lâgen tôt
15	die wâren unzalaht. dô die hêren uber naht gerûweten und gelâgen, unz sie den tach gesâgen und zesamene quâmen
20	und die rede vernamen, daʓ Turnûs dannen was gevarn und dâ was dehein barn, der wiste wâ her wâre: do geviel in daʓ mâre
25	ein teil ubellîche. dâ wâren vorsten rîche und ander helide gûte: dô wart in des ze mûte den edelen wîganden,
30	daʓ si boten sanden Ênêase dem mâren, einem helide offenbâren, unde gâben ime frede ûf bescheidene rede
35	uber vierzehen naht. des wârens alle bedaht. die botschaft warb Âventînûs. si enboten ime, ob Turnûs niht ne quâme in den stunden,
40	daʓ si ime wole gunden,
216	daʓ her daʓ wîb behielde und des landes gewielde und mit genâden solde leben. alsô wart der fride gegeben
5	enbeidenthalben unde gesworen. manech helt wol geboren was dâ von manegen landen. ir tôten sie verbranden, alsô man dô phlach,
10	der dâ vil erslagen lach. Dô eʓ alsô geredet was, dô ne wolde Ênêas Pallantem den werden niht lâʓen der erden
15	begraben noch verbrinnen. vor jâmer und vor minnen sîme vater hern sande wider heim ze lande harde hêrlîche.
20	Ênêas der rîche, der hetes grôʓe rouwe. man mohte sîne trouwe dar ane wole merken. ein bâre hieʓer werken,
25	die besten die man ie gesach, dâ der hêre ûffe lach der junge kunich Pallas. vil wole sie gemeistert was. Nu vernemet von der bâren.
30	die lin boumîn wâren und von helfenbeine. edeler gesteine stunt dar ane ein michel teil. sîdîn wâren diu seil,
35	dâ mite sie gebunden was. dar ûf legete Ênêas einen kolter von samîde rôt. daʓ wart getân als her gebôt. ûf dem kolter rôten
40	lach der edele tôte,
217	Pallas sîn geselle. ein vil tûre phelle breiten unde langen uber den helt gehangen
5	Pallantem den jungelink. alleʓ meisterde daʓ dink der Troiâre Ênêas, der es vile unfrô was, daʓ der helt was erslagen.
10	sêre begunde her in klagen, ê hern sande dannen mit sînes vater mannen und ouch mit den sînen. her lieʓ eʓ wole schînen,
15	daʓ nie mêr dehein vart sîme herzen leider wart, dem edelen Troiâne. zwei ros kastelâne tet man zû der bâren.
20	die dâ gereit wâren, Pallases holden, und si dan varen solden unde daʓ beredet was, dô sande Ênêas
25	driu hundert sîner manne gewâfent mit im danne. Enêas der hêre der klagete vile sêre sînen lieben vehtgenôʓ.
30	sîn rouwe diu was vile grôʓ und sînes herzen ungemach. sêre weinder unde sprach «edel ritter Pallas, wie ubel diu stunde was,
35	daʓ dû worde erslagen! ichn mach dich nimmer verklagen, daʓ wil ich wole sprechen. ne soldich dich niht rechen an dem, der dir den lîb nam,
40	sô woldich immer wesen gram
218	den goten mînen mâgen, die dîn sô ubile phlâgen, daʓ dû verlore dîn leben. wolden sie mir immer iht gegeben
5	und heten mir dîn gegunnen, ich hete wol gewunnen mîn wîb unde mîn lant. der dich dâ here hât gesant, dîn vater und diu mûter dîn,
10	sie soln immer unfrô sîn unz an ir lîbes ende, daʓ ich dich wider sende alsus jâmerlîche» sprach Ênêas der rîche.
15	«ichn hete niht gelobet daʓ, ich solt dîn hân gehûtet baʓ in stormen und in strîten. nû unde zallen zîten solde ich dîn wol hân gephlegen,
20	schôneʓ bilde, reiner degen! waʓ ich in korzen stunden tugende an dir hân vunden, manheit unde sinne, trouwe unde minne,
25	kûnheit unde mannes rât und willich herze zû der tât, gûte liste unde grôʓe kraft! dû wâre stâte und ernisthaft, milde und reinmûte.
30	dû hetest side gûte und aller tugende genûch, mêr dan der dich dâ slûch, wan daʓ eʓ alsô mûste wesen, daʓ dû ne soldest niht genesen
35	zû dem urteile. von mînem unheile hâstû dînen lîb verloren. jâ wart von mûter nie geboren dehein kint von dîner jugende,
40	daʓ mêr hete tugende,
219	frîgeʓ herze, helt balt. dû ne wâre niht alt sibenzehen jâre!» dô viel her ûf die bâre,
5	mit den armen her si umbevienk, vaste her dar ane hienk, sêre er weinen began, unze in sîne wîse man mit gwalde dar von brâchen
10	unde im zû sprâchen ein teil zorenlîche, daʓ der hêre rîche sîn dink sô kintlîch ane vienk und solhen jâmer begienk.
15	Dô hieʓ bringen Ênêas al diu ros, diu Pallas des tages hete gewunnen, dô her hete begunnen alrêrst manheite.
20	der was wol gereite drîʓich unde mêre. dô klagete in vil sêre Ênêas der milde. dô hieʓer im die schilde
25	aller der rittere tragen, dier des tages hete erslagen der junge kunich Pallas. mêr danne zweinzich der was, ob uns daʓ bûch niene louch.
30	der ritter wâfen iesch er ouch, dier des tages hete gevangen: diu hieʓ her dâ bî hangen. mit im her al daʓ sande sîme vater heim ze lande,
35	der vil unfrô wart. dô hûben sich an die vart die lûte mit der bâren, die vil trûrich wâren, daʓ man gelouben wole mach.
40	si fûren naht unde tach,
220	unz sie ze lande quâmen. dô daʓ mâre vernâmen die lûte von dem lande, dâ man den helt erkande,
5	daʓ der junge Pallas des kuneges sun tôt was, umbe ir lieben hûsgenôʓ was der jâmer vile grôʓ, daʓ nie ûf der erden
10	grôʓer endorfte werden. Daʓ mâre sô verre quam, daʓ eʓ der kunich wol vernam und diu kuniginne, die getrouwelîche minne
15	zû zir sune trûgen. die hende sie slûgen, vil sêre sie weinden, wol si daʓ bescheinden, daʓ in der sun lieb was.
20	«schôner sun Pallas» sprach der kunech Êvander, «nune weiʓ nieman ander wan ich alders eine, mit welhen rouwen ich weine:
25	lieber sun junge, eʓn mohte dehein zunge rehte gesagen nieht. dû wâre mîme herzen ein lieht, daʓ nû vil gar erloschen is.
30	wie mohte ich des sîn gewis, daʓ dû mir sus soldes wider komen ? nû is mir immer mêr benomen froude unde wunne. ichn hân in mîme kunne
35	deheinen frunt ze erbe. swenne sô ich sterbe (daʓ mûʓ nû vil schiere sîn), Pallas lieber sun mîn, sô blîbet mîn rîche erbelôs.
40	ôwê daʓ ich dich ie verlôs
221	und wê daʓ ich dich ie gewan! dû wâre ein kint und ein man, daʓ unstadelîch was. lieber sun Pallas,
5	dû wâre ze frumich alze frû, dir gienk unmâʓe zû dîn tugent unde dîn sin. des ich vile unfrô bin und immer trûrich sal sîn.
10	einiger sun mîn, dû worde mir zunheile geboren: nû ich dich sal hân verloren, daʓ mûʓ ich immer wole klagen.» dô braht man in dar zû getragen
15	mit michelme sêre. dô man den helt hêre vor sînen vater hete braht, dô viel der kunech in unmaht und diu frouwe lussam,
20	dô ir sun dar tôt quam. Der kunich weinete sêre und diu kuniginne hêre. «Pallas» sprach si «lieber sun, wie sal ich immer daʓ getûn?
25	soldich nâch dîme tôde leben, wer mohte mir daʓ herze geben? eʓ wâre unrehte getân. Ênêas der Troiân, der vil ungetrouwe,
30	der hât mir grôʓe rouwe an mîn herze gesant. daʓ her ie quam in ditze lant, des mûʓer sîn verwâʓen. het er dich hie verlâʓen,
35	dîn vater, als ich ime riet, sone lâgest dû hie tôt niet. ichn mohteʓ niht erwenden, hern wolde dich dar senden, eʓ ne dûhte mich niht gût.
40	eʓ quam mir wol in mînen mût,
222	als ich eʓ nû wol hân vernomen, dune wârest nie dâ hin komen, mohte ich dirʓ hân verboten. nû mûʓ ich flûchen den goten,
5	den ich diende al mîn leben und mîn opher hân gegeben, daʓ sie dich behûten, liebeʓ kint. si wâren toub unde blint, daʓ sie dîn niht ne phlâgen
10	noch dich niht besâgen noch mîn gebete enhôrden. mit werken joch mit worden diendich in naht unde tach, daʓ ich nû wol klagen mach:
15	sine gewinnent nimmer mêre dienest noch êre von mir armen wîbe in allem mînem lîbe, daʓ wil ich immer sprechen,
20	eʓn sî daʓ sie mich rechen an Ênêase dem Troiân, der dich lieʓ ze tôde slân, daʓer dir ze helfe niene quam. dô man dir daʓ leben nam,
25	was her dô entslâfen? waʓ helfent disiu wâfen, disiu ros und diz gewant, daʓ her uns here hât gesant, daʓ dû gewunne, sun mîn?
30	deste unfrôr mûʓ ich sîn dîner reinen jugende, sô ich dîner tugende und dîner frumekeite mit der wârheite
35	ie mêre hôre zellen. got mûʓe den vellen, der dich, trût sun, erslûch. ôwê daʓ ich dich ie getrûch.» Dô si geklaget hete genûch,
40	ein gegarewe man dar vore trûch
223	rîlîch unde scône, ein zeptrum und ein crône und ein goldîn vingerlîn. der kunich hieʓ den sun sîn
5	nemen von der bâren. die lûte, die dâ wâren, schiere sin enbunden. dô hieʓer im die wunden mit wîne und mit pigmente twân.
10	daʓ wart schiere getân. an in streich man dar nâ balsam und arômatâ, man salbete in mit beiden. dar nâ hieʓ her in kleiden
15	nâch dem kunichlîchem site. man kleidete in dermite zierlîche unde schône. ein goldîne krône sazte man im ûf daʓ houbet,
20	daʓ wiʓʓet unde geloubet, ein zeptrum gab man im in die hant. dô heten sie den wîgant in ir templum getragen. dâ was weinen unde klagen
25	umbe den helt werden. do bestatte man in zer erden harde hêrlîche. dô hete der kunich rîche ein grab geheiʓen machen
30	mit zierlîchen sachen in einem gewelbe, aldâ der kunich selbe inne wolde sîn gelegen: dâ wart geleget der junge degen,
35	der mâre helt Pallas, umb den eʓ michel schade was. Daʓ gewelbe was lussam, so eʓ dem hêren wol gezam, dâ Pallas inne lach,
40	und stunt, als ich û sagen mach,
224	bî ir synagôge, sinwel und niht hôge, und was geworht mit sinne und wol gezieret inne
5	und was betalle hêrlîch. nidene was der esterîch von lûtern cristallen und jaspide und corallen. die sûle marmelsteine,
10	die wende von helfenbeine, dar inne stunt manch edel stein. diu sunne niender drîn schein noch neheines tages lieht, wan da ne was vinster inne nieht.
15	daʓ himelze was obene gemachet wol ze lobene wol gemischet mit golde, dar inne er ligen solde Pallas der starke.
20	in mitten stunt der sarke ûffe vier phîlâren, die von porfiere wâren misselîche gevar. si wâren verre komen dar,
25	si wâren veste unde hart. der stein, dar în geleget wart Pallas der kûne, der was ein prasîn grûne ergraben wol mit sinne.
30	bî ime stunden drinne zwei vaʓ vil gefûge als zwêne wênege krûge, wandeʓ der kunich wolde. der eine was von golde,
35	daʓ solt ir wiʓʓen âne wân, und was vol balsame getân. der ander was ein edel stein. vil wol daʓ dar ane schein, daʓ der helt Pallas
40	des kuneges lieber sun was.
225	der stein was innen hol unde was alôês vol unde zerbentîne. der stein was ein sardîne,
5	der niht beʓʓer mohte sîn. dô gienk ein rôre goldîn ûʓ iewederm vatte, diu man bî im satte, deme helede lussam,
10	diu im in sînen lîkham den rouch dar in trûch. daʓ was hêrlîch genûch gemachet al mit liste. ein edel amatiste
15	was der stein der drûffe lach. dar an stunt als man wol gesach sîn epitaphium gescriben und wie her tôt was gebliben und wie her hieʓ und wer her was,
20	des kuneges sun Pallas, und wie in Turnûs erslûch des êrsten tages dô her trûch schilt und wâfen unde swert. her was der êren wole wert,
25	die sie ime tâten. eʓ het wol gerâten Êvander der rîche. der gienk hêrlîche opheren sînen goten.
30	dô wart uber al geboten, daʓ si mûsten alsam tûn. dô der kunich sînen sun alsô hete begangen, ein lampade wart dô gehangen
35	uber Pallases grab, diu liehtes genûch gab, sint daʓ si wart entbrant. diu lampade was ein jachant, sie ne was niht glas.
40	daʓ ole daʓ dar inne was
226	daʓ was balsam vile gût, der jachant rôt als ein blût. diu ketene was rôt golt. nû ir eʓ vernemen solt
5	als ich eʓ gelêret bin: eine wiken tet man dar in seltseine unde schône, von eime bestêône, einem edelen steine,
10	niht ze grôʓ noch ze kleine. der stein is vile tûre, her brinnet in dem fûre immer unde immer, sô daʓ her nimmer
15	niht erleschen ne mach. eʓ werte unze an den tach, daʓ Pallas dâ wart funden. daʓ geschach sint in den stunden, daʓ der keiser Friderîch
20	der lobebâre vorste rîch ze Rôme gewîhet wart nâch sîner êrsten hervart, die er fûr uber berge mit maneger halsberge
25	ze Lankparten in daʓ lant. sint vant man den wîgant Pallantem in deme grabe, dâ wir haben gesaget abe. daʓ enis gelogen nieht.
30	dannoch bran daʓ lieht, daʓ sîn vater dar in gab, dô geleget wart in daʓ grab der junge kunich Pallas. vil michel wunder daʓ was,
35	daʓ daʓ lieht werde bran under der erde alsô manegen tach aldâ Pallas lach, daʓ wir wiʓʓen vor wâr,
40	mêr dan zwei tûsent jâr,
227	unze man Pallantem vant, und dannoch was unverbrant, dô man die gruft engrûb und den stein ûf hûb
5	und der wint drin slûch, daʓ is wiʓʓenlîch genûch, do erlasch eʓ von dem winde. man sach an dem ende den rouch und den aschen
10	und den stein unverlaschen. Dô der hêre Pallas alsô bestatet was, als man û sagete dâ bevor, dô wart vermûret daʓ tor
15	mit kalke und mit steinen grôʓen unde kleinen, die veste wâren unde hart. sint daʓ der mortar troken wart, son mohte man sîn niht gebrechen.
20	alsô hôrde ich sprechen, daʓ eʓ wâr wâre. dô wârn dâ die Troiâre, die Ênêas der wîgant mit ime dar hete gesant,
25	vor den kunich si quâmen, urloub sie dô nâmen, si wolden dannen kêren zÊnêase ir hêren, alse si dô tâten.
30	dô hete sich berâten der ander kunich Lâtîn, her und die frunt sîn, daʓ her boten sande nâch sîn mannen after lande
35	und si zime komen bat ze Laurente an eine stat. dar quâmen sie als her gebôt. dô klagete her in sîne nôt, alsô her wol mûste,
40	daʓ man sîn rîche wûste,
228	daʓ ouch sie heten vernomen. dô was ouch Turnûs wider komen, dem was leit unde zoren, daʓ der fride was gesworen
5	und sô lange werde. harde her des gerde, daʓ der fride ende nâme unde eʓ dar zû quâme, daʓ her die Troiâne
10	vienge ûf Montalbâne, die ime leide heten getân. desn wolde aber im niht gestân Lâtînûs der rîche, daʓ sprach her ernestlîche.
15	Dô sprach offenbâre Lâtînûs der mâre sînen mannen ernesthafte zû «nu râtet mir waʓ ich tû, al die lieben frunt mîn,
20	die mir getrouwe wellen sîn. nû sehet ir wol wie eʓ mir stêt, daʓ mîn lant sus ze schanden gêt. nune wil ich eʓ niht mêre dolen, daʓ sî û allen unverholen,
25	ich wil eʓ wol behûten und wil idoch mit gûten ze Ênêase kêren und in dâ mit êren gerne behalden,
30	den kûnen helt balden, wandich im wol gûtes gan. her is ein wol geboren man von der gote geslehte. ir solt eʓ merken rehte:
35	si haʓʓent den der im leide tût, die uns ubel unde gût beidiu wole mogen tûn. wâre Turnûs mîn sun, ich ne wolde im nimmer gestân
40	ze vehten wider den Troiân,
229	want der sige is ime geslaht. ich sage û wes ich hân gedaht, daʓ ich dem Troiâne daʓ lant zû Tuscâne
5	wil lîhen ob herʓ wil enphân. eʓ is ein lant sô getân, daʓ ich es lutzel ie genôʓ, und is doch wît unde grôʓ. des wil ich wol getrouwen,
10	wirt eʓ rehte erbouwen, eʓ sal ein gût lant sîn. korn obeʓ unde wîn wehset gnûch dar inne, is't daʓ manʓ rehte winne.
15	ouch sage ich û daʓ vor wâr, ich wil daʓ man mit rehte var und ze fûgen bescheide, unde sich die hêren beide bedenken dar enbinnen
20	und nâch mînen sinnen und mîner frunt und mîner man. swer uns dar zû gerâten kan, der salʓ uns helfen fûgen, wir haben schaden genûgen
25	und ein michel teil ze vil, ob Ênêas des gevolgen wil. ne wil aber her des niht, daʓ her des offenbâre giht, daʓ her von uns wil kêren:
30	sô soln wir in mit êren von uns hinnen senden swar sô her wil wenden, schaffen sîne sache. wir soln im heiʓen machen
35	nûwiu schif und gûte, des is mir ze mûte, als manech sô im wart verbrant. ich wil im schaz unde gewant und spîse bieten alsô vil,
40	alser selbe nemen wil.
230	daʓ wil ich ime gerne geben und wil mit gemache leben, ob ir eʓ râtet alle. nû sprechet wie û daʓ gevalle.»
5	Dô der kunich mâre sîn man offenbâre rât gefrâget habete des, dô was dâ hêr Drances ein harde gehovet man,
10	dem kunege her antworden began. her was wîse und rîche und was gezogenlîche, verwiʓʓen unde redehaht, niwan daʓ her ungerne vaht
15	unde gerne hete gemach, daʓ was daʓ man von ime sprach des ergisten des her wart gezigen. dô d'andern hêren alle swigen, dô sprach offenbâre
20	Drances der mâre «Lâtîn kunich hêre, der rede habet ir êre der ir nû habet begunnen. alle die û gûtes gunnen,
25	si soln û helfen dar zû. daʓ ich dise unzuht tû, daʓ wil ich bûʓen her nâch, daʓ mir zer rede is sô gâch und ze mînen worden.
30	ich wil û antworden vor disen hêren allen; eʓn darf û niht missevallen, al sî eʓ ungezogenheit. ich wil û sagen die wârheit,
35	sô ich allerbeste kan. Turnûs is ein edele man unde ein vorste lussam. her is mir âne scholde gram, daʓ weiʓ ich wol nû manegen tach,
40	und tûn doch sô ich beste mach,
231	alser selbe wol gesiht. ouch ne hân ich von im niht weder erbe noch lêhen. ich ne darf in niht flêhen,
5	ich bin, hêre, ûwer man. swâ ich iht bedenken kan ûwers frumen und ûwer êren, dâ zû wil ich kêren mîn herze unde mînen sin,
10	als ich û von rehte schuldich bin. eʓ is harde wol getân, daʓ ir ûch wider den Troiân, Ênêam den kûnen, mit minnen wellet sûnen
15	unde daʓ urlouge freden, daʓn sal nieman widerreden, dorch den irʓ immer lâʓet. iedoch ir vergâʓet einer rede diu mich dunket gût,
20	daʓ râte ich daʓ ir daʓ noch tût: eʓ wiʓʓent wole ûwer man, wie daʓ urlouge began unde wieʓ her zû is komen, daʓ ir schaden habet genomen,
25	den ir ubele moget verklagen, daʓ ûwer lûte sint erslagen und verbrunnen manech hûs. man weiʓ wol daʓ Turnûs ûwer tohter geswûr,
30	dâ her unrehte ane fûr, do eʓ ûwer wille niene was. man weiʓ ouch wol daʓ Ênêas dar nâch in daʓ lant quam, der mâre helt lussam,
35	von troischeme lande und û sîn boten sande, die ir êrhafte lieʓet unde im ouch gehieʓet ûwer tohter ze gebene
40	und nâch ûwerm lebene
232	alleʓ ûwer rîche. nû tût hêrlîche (sprach her), lieber hêre mîn, nû si bêde wellent sîn
5	umb ûwer tohter gewis, nâch diu und eʓ komen is, sô dunket mich daʓ vile gût, daʓ ir eine wîs tût, ob eʓ wol gevalle
10	disen forsten allen und andern gûten knehten, sô râte ich daʓ si vehten si zwêne alders eine, daʓ got daʓ reht bescheine,
15	swem got der êren gunne daʓ her den sige gewinne, der habe daʓ rîche und die maget, dâ ir ietweder ûf klaget. daʓ dunket mich baʓ getân,
20	dan man drumbe lâʓe slân unscholdige lûte, und redet eʓ noch hûte, ob eʓ dise hêren dunket gût, sô râte ich daʓ ir eʓ tût,
25	ichn wil michs nimmer geschamen.» dô sprâchens alle benamen arme unde rîche einmûtechlîche zû dem kunege offenbâre,
30	daʓ daʓ gût wâre, daʓ dâ sprach Drances. der kunich gevolgete des. Dô antworde mit zorne Turnûs der wol geborne
35	«got weiʓ, hêre Drances, ich getrouwete û wol des, daʓ ir ungerne sterbet und mînen schaden werbet mit allen ûwern sinnen.
40	ichn wil mit û gewinnen
233	neweder erbe noch wîb. bewaret êt ir ûwern lîb, als ir unz her habet getân, ir kunnet wol hin danne gân,
5	dâ man ze sperewehsel gêt und mit swerden sêre slêt, irn rûchet wer da vehte, und tût ouch lîhte rehte. ûwer schilt is schône und gût,
10	den habet ir noch sô wol behût, daʓ her nie verwerdet wart; und ûwer helm is alsô hart, daʓ her sich nie gebouch: deste lieber is her û ouch.
15	her was ouch ie veste gnûch, swie vil man ûch drûf geslûch oder mit steinen gewarf. ûwer swert is ouch sô scharf, da irʓ an der hant trûget,
20	die ir dâ mite erslûget, daʓ der deheiner genas. daʓ wiste wol Ênêas, dar umbe gibet her û sîn gût, daʓ ir ime niene tût
25	und sîne lûte lâʓet leben. ichn wil aber û niht geben, ir moget die lûte sanfte slân, wan ûwer ros is sô getân, swenne irʓ rûret mit den sporen,
30	eʓ loufet allen den bevoren, die û zû sprengen die verre und ouch die lenge: eʓ mach ûch vile wol getragen und kan baʓ fliehen danne jagen,
35	des im dicke nôt geschiht. daʓn rede ich dar umbe niht: wiʓʓet des die wârheit, daʓ ich des kampfes bin gereit wider Ênêam den Troiân,
40	ich getar in einen wol bestân,
234	und sît gewis daʓ ich eʓ tû, mach ich mit êren komen dar zû.» Drances der rîche sprach aber zorenlîche
5	ze Turnô deme herzogen «irn habet ein hâr niht gelogen, ich hân mich es vil wol behût, ich enwil dorch ûwer gût nimmer unsenften slach enphân
10	noch nieman ze dôde slân noch verderben den lîb. hetet ir daʓ erbe und daʓ wîb unde lâge ich dâ erslagen, ir soldet sanfte mich verklagen,
15	als die ander die dâ ligent tôt. eʓ is aber mir nehein nôt, ichn vorhte ûch niht sô sêre, daʓ ich dorch ûwer êre mîns dankes iht sterbe.
20	welt aber ir daʓ erbe und die maget wol getân, sô mûʓet ir Ênêam bestân und lâʓet mich âne scholde: ich enbir wol ûwer holde
25	nû unde zallen zîten. swenne ir beginnet strîten wider den edelen Troiân, moget ir iht gûtes denne geslân, des wirdet û dan vile nôt.
30	swenner vor û geliget tôt oder sigelôs betalle, sô tût daʓ û gevalle, swenne ir daʓ lant gewinnet und die maget die ir minnet,
35	die ir ûch mit rede anziet. ichn wil mich mit û schelden niet hie in mînes hêren hûs.» dô sprach aber Turnûs «ich bin noch als ich ê was.
40	getar der hêre Ênêas
235	den kampf wider mich bestân, ich wil mîn dink ane vân als ich allerbeste mach. mîn hêre maches einen tach
5	und bringeʓ ze tagedinge, ichn ger niht daʓ herʓ lenge mê wan uber eine naht. ich hân noch sin unde maht unde lîb der mâʓen,
10	ichn wil mich niht lâʓen lebendich enterben, ich wolde ê selbe sterben. iedoch trouwe ich wol genesen, sal mîn gelucke gût wesen.»
15	Dô sprach der kunich Lâtîn «Turnûs, daʓ mach wole sîn, diu rede is manlîch unde gût. unde is daʓ ir eʓ tût, wir mûʓen eʓ enden.»
20	dô wolder boten senden, als sîne man gerieten, und Ênêase enbieten, wie diu rede was getân, ober den kampf wolde bestân,
25	und waʓ sîn wille wâre. dô quam ein starkeʓ mâre in die borch uber al und vor den kunich in den sal, daʓ die Troiâne
30	wârn von Montalbâne under Turnûses her geriten und mit sîn lûten dâ gestriten und ir dâ vile lâge tôt. dô wart dâ michel nôt,
35	dô daʓ mâre dare quam undeʓ Turnûs vernam, der stolze und der kûne, der willich was ze tûne alle manlîche tât.
40	dô wart gescheiden der rât.
236	Dô wâfende sich balde der junge und der alde. Turnûs reit dô dannen mit den sînen mannen,
5	die dâ volgeten sîme van. die halsberge leitens an. dô der helt lussam Turnûs ûʓ der borch quam vor die stat an daʓ velt,
10	dô sach her Dranceses schelt fûren einen sînen kneht. her sprach «nû waldes halb reht unde gelucke unde frome, daʓ dirre schilt heim kome
15	ganz und âne wunde! hie gewinnent ubile stunde die armen herlûte, die erarnent eʓ noch hûte wol nâch sîme willen.»
20	dô was frou Kamille, diu mâre und diu rîche, gewâfent ritterlîche sie und ir geselleschaft. si tâten schône ritterschaft
25	des tages dô si es begunden, wande siʓ vil wole kunden. Kamille was vil gemeit, vermeʓʓenlîche sie reit, si hete manlîchen mût.
30	ir halsberge was vil gût, wîʓ lûter sam ein îs, her ne mohte neheine wîs schôner noch beʓʓer sîn, unde ir hosen îsenîn.
35	vil schône ir helm was, lûter brûn alsam ein glas, gezieret wol mit steinen. ir schilt was helfenbeinen, wol besniten und wol gebogen,
40	ungehûtet und unbezogen,
237	als diu frouwe wolde. diu buckel was von golde, dar inne stunt manech edel stein, dâ diu sunne dorch schein,
5	als ich sagen hôrde. der schiltrieme was ein borde genât ûf einen samît. und si saʓ ûf ein râvît bedaht mit zindâle,
10	dâ si zû dem mâle manech sper ûffe brach und manegen ritter abe stach. Kamille diu rîche und der frouwen iegelîche,
15	die mit ir dare wâren komen, die heten alle genomen sîdîne rîsen, nâch ir lantwîsen umbe den helm gewunden.
20	zû den selben stunden, daʓ der helt lussam zû zir dar geriten quam, si sprach im manlîche zû «eʓ nis nû jârlank niht ze frû,
25	daʓ wir uns heben in den strît. des is mê denne zît, daʓ wir ritterschefte phlegen. wir hân sus lange gnûch gelegen und hân geschaffet unser gemach.»
30	Turnûs wider zû zir sprach stille niht offenbâre «frouwe, ich hân ein mâre wârlîche vernomen, mir is ein spehâre wider komen,
35	den ich hâte gesant, aldâ her Ênêam vant, des hân ich immer sint erbiten, her saget mir daʓ her sî geriten an eine stat, ich weiʓ wol war,
40	ich wil mit tûsent rittern dar
238	gewâfenden rîten: so mach ich im wol gestrîten, ob her mir iender wider vert. is mir diu sâlde beschert,
5	daʓ ich im mach komen zû, ir freischet wol waʓ ich es tû: daʓ ich in ê ze tôde slâ. êr ich in immer gevâ lebendich oder gesunt.
10	mir is der walt wole kunt, die phade und die strâʓen. ich wil mit û hie lâʓen Messâpum den kûnen degen, her sal mînes heres phlegen,
15	dar zû solt irs gewalden, ir zwei solt behalden zehen tûsent ritter ze were sunder schutzen und fûʓhere. got der mûʓe ûch bewaren,
20	ich wil after wege varen gegen Ênêase dem Troiân.» daʓ wart schiere alsô getân. Dô reit Turnûs der helt balt gegen Ênêase in den walt,
25	dâ her sich sîn verwânde. sîn man her des mande, daʓ si riten stille. dô tâtens sînen willen als dem hêren lieb was.
30	dô lach der hêre Ênêas vil stille an sîner lâge, dâ si sîn niene sâgen, und dâ her ir ouch niene sach. sus lâgens allen den tach
35	enbeidenthalben stille. dô hete sich Kamille des stormes underwunden, des in korzen stunden vil manech man den lîb verlôs.
40	vil wol erkande man unde erkôs
239	ir stiche unde ire slege. die Troiâr slûgens after wege wol eine halbe mîle. dô wart dô eine wîle
5	der storm vil harde unde grôʓ: freislîche man dâ schôʓ, ritterlîche man dâ stach, des vil manech schaft zebrach, mit swerden man dâ sêre slûch,
10	von diu beleib ir dâ genûch wunder unde tôten. dâ worden verscrôten helme und sarringe. zû deme tagedinge
15	hete frowe Kamille ein wîle wol ir willen. Kamille diu rîche reit dâ ritterlîche unde ir junkfrouwen.
20	dô moht man wunder schouwen, daʓ si des tages worhten manlîche sunder vorhten. die stolzen Troiâne si wâren des enwâne,
25	daʓ eʓ wârn gotinne oder merminne, die ersterben niene mohten und dorch daʓ sô vohten, daʓ man sie niht mohte erslân,
30	unz Ôrilocus der Troiân gewâfent in den storm quam. her was ein helt lussam, der frouwen slûch her eine, diu maget hieʓ Lareine,
35	daʓ si schiere tôt lach. dô der helt daʓ gesach, daʓ si wâren sô getân, daʓ man si mohte erslân und gewunden unde vellen,
40	her sprach ze sînen gesellen
240	«wert ûch, helide gûte, mit manlîchem mûte! diz volk, daʓ ir hie gesiet, eʓ ne sint merminne niet,
5	eʓ is ein rehteʓ wîbhere. swer sich ir niene were, hern gewinnet nimmer êre.» dô schameten sich sêre die geflohen heten dâ bevorn.
10	diu ros nâmens mit den sporn und lieʓen dare strîchen. dô mûste vore wîchen diu frowe Kamille uber ir willen
15	ze Laurente hin wider. dô gelach ir vil dar nider gestochen unde erslagen. alsô lieʓen sie sich jagen vaste unz in daʓ wîchûs.
20	dô sprancte Messâpûs mit zwein tûsent heliden gûten, die der borch hûten, die Troiâre her dan treib. manech man dâ tôt beleib,
25	wande sie sich werden mit geschutze und mit swerden. Dô Messâpûs mit dem van die Troiâre rande an und Kamille diu maget,
30	dô worden sie gejaget, wole vier acker lank. dâ wart michel gedrank an dem wîten gevilde. da zehiewen sie die schilde
35	und die helme gûte, dâ wart von dem blûte daʓ grûne gras alrôt. die helide dâ lâgen tôt, die wâren unzalaht.
40	starke dâ Kamille vaht,
241	want siʓ wol getorste tûn. dô was der ritter Tarcûn ein harde hobesch Troiân unde ein ritter wol getân,
5	hobesch und gûtes willen: her sprach ze frowen Kamillen ein teil schamelîche Tarcûn der rîche «waʓ meinet daʓ, frouwe maget,
10	daʓ ir uns ritter sus jaget unde stechet unde slât? waʓ wunders is daʓ ir gegât? wie wânet ir wie û daʓ zeme? ich wâne eʓ ubil ende neme,
15	daʓ ir sus gerne strîtet und statelîchen rîtet. ich sage û wârlîche daʓ, ein ander storm zâme û baʓ, wâre daʓ irs phlâget:
20	daʓ ir sanfte lâget an einem scônen bette, und wâreʓ dâ ze wette daʓ vehten umb die minne, dâ moht ir wol gewinnen,
25	des phlâge ich gerne mit û zeim andern mâle denne nû, hin ze der nâhisten naht, daʓ ir versuchtet mîne maht. dar umbe setze ich û mîn phant,
30	einen trôischen bisant, der zwelfe geltent eine mark, ich weiʓ doch wol ir sît sô stark, ir gewunnet schiere, ob mîn wâren viere.
35	daʓ wolde ich varen lâʓen. eʓ rouwet mich ze mâʓen alse vil sô ich dâ sprach: ir hetet es fromen unde gemach und ich schaden und arbeit,
40	des weste ich wol die wârheit.»
242	Tarcûn sweich dô stille. dô rûrde frowe Kamille daʓ ros vaste mit den sporn, sie rach selbe ir zorn
5	den ir Tarcûn sprach: dorch den lîb si in stach, daʓ her schiere tôt lach. ein sîn neve daʓ gesach, der was geheiʓen Flêmîn,
10	und ein ander frunt sîn, Troiâre beide. in wart dâ vil leide, die frowen sie ane randen, si fûrden in den handen
15	diu swert beide ensament bar. des wart der magede einiu gwar, diu hieʓ Tarpîde, diu het in dem strîde ritterschefte vil getân.
20	si stach den einen Troiân, daʓ her niht mêr wort gesprach. Kamille den andern stach, daʓ her tôt viel ûf daʓ gras. si sprach als ir ze mûte was
25	ze deme ritter Tarcône, si grûʓte in vile unschône, sie sprach «nû lige hie! wie getorstest dû mir ie bôse rede gebieten?
30	dune darft mich niht mieten, sus sal man klaffâren weren, ich mach hûte wol enberen dîner phenninge. nû hâstû dîn gedinge
35	vergolden mit dem lebene. nune hâstû niht ze gebene weder rede noch den schat: dû bist gevaren in gotes hat.» Dô daʓ alsô komen was,
40	do was einer der hieʓ Arras
243	mit den Troiâren dâ. Kamillen reit her alleʓ nâ verre allen den tach. der markte unde sach,
5	wie si slûch und wie si stach und wie sie ir spere brach und wie sie justierde und wie sie pungierde und wie ritterlîch si slûch:
10	want des tete sie genûch unglîch einem wîbe. hern hete an sîme lîbe manheit noch ne was sô frome, daʓ her engegen ir torste komen,
15	hern hetes deheinen willen. don nam frowe Kamille neheiner slahte ware des. dô reit der hêre Chôres, der Troiâre prêster
20	unde ir êwe mêster, und was doch ritter vile gût und hete manlîchen mût und kunde wole an ritterschaft. grôʓ was sîn geselleschaft
25	ritter unde schutzen. her kunde wole nutzen beidiu bûch unde swert. daʓ ros was maneges phundes wert, dâ der helt ûffe saʓ.
30	her was gewâfenet baʓ danne ieman dâ wâre under den Troiâren oder in ander sîte in allem deme strîte.
35	zû den selben stunden heter ûf gebunden einen helm scône und sô lieht, daʓ ne sagete man uns nieht, daʓ her beʓʓer mohte sîn.
40	zoberst stunt ein rubîn,
244	unde alumbe an der lîste smaragde unde amatîste und vorne an dem nasebant ein gelwer adamant,
5	genûch grôʓ unde gût, dorchlûhtec rôt sam ein blût. waʓ mach ich û mê sagen? her lûhte engegen deme tage. diu kuniginne Kamille
10	dô was ie gût ir wille, daʓ sie den helm erworbe oder in der ger erstorbe, des geluste si vil harde. si bestunt den êwarden,
15	von dem rosse sie in stach, sô daʓ im der hals brach und vil schiere tôt was. uber in erbeiʓtes ûf daʓ gras, wan sie des helmes gerde.
20	si wolde mit dem swerde die snûre enzwei snîden. si wâren gût sîden und veste wol ze mâʓen. si heteʓ baʓ verlâʓen,
25	wande ir tôt dar ane lach. vil rehte daʓ gesach der Troiâre Arras, der dâ bî ir was, idoch vorht her si sêre.
30	mit eime scharphen gêre die frouwen her ze tôde schôʓ. des her ubile genôʓ, daʓ her ir den lîb nam: mit zorne engegen ime quam
35	zû der selben zîde diu maget Tarpîde, Arrasen sie ze tôde slûch, dâ mite engalt ouch hers genûc. Do Kamille diu werde
40	tôt lach ûf der erde
245	unde ir magede quâmen dar und sie des worden gewar si heten grôʓe rouwe. mit vil gûter trouwe
5	klageten sie ir frouwen. dâ moht man jâmer schouwen. sêre sie weinden, wol si daʓ bescheinden, daʓ in diu frouwe lieb was.
10	si erbeiʓten nider an daʓ gras, si legeten sie ûf einen schelt unde rûmden daʓ velt, sos allerschierste mohten. dô hete sie gevohten
15	ir selben schedelîche diu kuniginne rîche, dô si den lîb hete verloren. al daʓ si hete dâ bevoren erworben lob und êre,
20	daʓ hete sie dô sêre mit dem lîbe vergolden. dô trûgen sie ir holden ze Laurente in des kuneges sal. dô wart schiere uber al
25	in der borch mâre, daʓ dâ tôt wâre Kamille diu hêre maget: dô wart si sêre geklaget. Dô diu frouwe lach tôt,
30	vil schiere manʓ Turnô enbôt an sîner lâge dâ her lach. dâ heter allen den tach unz an den âbent gelegen. harde rouwich wart der degen,
35	dô her daʓ mâre vernam. ze Laurente her geriten quam, dâ vil grôʓ jâmer was. do gesach in Ênêas dannen wole rîten.
40	hern mohte im niht gestrîten,
246	von diu getorste in niht bestân Ênêas der Troiân. daʓ rou in vile sêre. zwei hundert und niht mêre
5	heter dâ sîner manne. Turnûs der reit danne mit tûsent heliden snellen sîner hergesellen und reit ûʓ dem walde.
10	dar nâch reit ouch balde Ênêas der wîgant, dâ her sîne lûte vant. Dô der hêre Ênêas ûʓ dem walde komen was
15	und ze sînen lûten quam und daʓ mâre vernam, daʓ Kamille was erslagen und in die borch was getragen ze Laurente in daʓ betehûs:
20	dô wister wol daʓ Turnûs harde dermite geswachet was, des frowete sich Ênêas. eʓ was doch harde spâte. dô wart her des ze râte
25	mit den sînen holden, die im helfen wolden die borch besitzen an den graben unde nimmer komen drabe, ê her sie gewunne.
30	want dô was worden dunne Turnûses helfe und sîn here, die sich sazten ze were, wan Kamille erslagen was. dô hieʓ der hêre Ênêas
35	alle sîne holden, die im helfen solden, herbergen an daʓ velt unde selbe sîn gezelt vor der borch ûf slân.
40	daʓ wart schiere getân.
247	Liehte schein der mâne. die stolzen Troiâne herbergeten bî der naht. dô hete man Ênêê braht
5	ein gezelt wît unde hô. daʓ hete im frouwe Dîdô gegeben dorch minne. eʓ was geworht mit sinne, als ich û wol sagen mach.
10	eʓ stunt dâ man eʓ verre sach, als eʓ ein turn wâre. zweinzich soumâre ne mohtenʓ dar niht getragen. eʓ wart ûf einen berch geslagen
15	an eine vile schône stat, al dâ Ênêas bat, ûf einen vile hôhen mast. die snûre wâren vile vast, als sie von rehte solden sîn.
20	der knoph der was guldîn, dar ûffe saʓ ein guldîn are. daʓ gezelt was zweier vare, zweier hande samît. einen hof vile wît
25	slûch man umbe daʓ gezelt und bevienk ein michel velt. daʓ wart dorch hêrschaft getân, dorch rîchtûm und dorch wolstân. eʓ stunt als ein mûre.
30	des nam in lutzel tûre, eʓne was niht dorch were. dar umbe herbergete daʓ here, manech kûne Troiân, und manech gezelt wol getân
35	wart dâ des nahtes ûf geslagen. des morgens doʓ begunde tagen unde schein uber al uber berch und uber tal unde eʓ die gesâgen,
40	die in der borch lâgen,
248	ûf mûren und ûf zinnen ze Laurente enbinnen, michel wunder sie des nam. daʓ mâre in die borch quam.
5	sie liefen ûf die mûre, ritâre und gebûre, knehte unde koufman. daʓ mâre wassen began. si sprachen al gelîche
10	arme unde rîche, daʓ Ênêas der mâre ein freislîch man wâre sînen vîanden. die daʓ wol erkanden
15	und daʓ gezelt gesâgen stân, daʓ als ein mûre was getân, alsô schînbâre, si wânden daʓ eʓ wâre ein borch, daʓ ne was eʓ niet.
20	vil starke ervorhte eʓ diu diet. si sprâchen nâch wâne, daʓ die Troiâne worben mit der gotes kraht, wande sie an einer naht
25	ein solhe borch heten geworht. des wart ir angest unde ir vorht gemêret, daʓ tet in diu nôt. der kunich Lâtîn enbôt Ênêê sîne holde
30	und anders daʓ her wolde an sînes liebes frundes stat. minnechlîchen her in bat eins frides sehs wochen. dô wart der fride gesprochen
35	vierzich tage und vierzich naht. des was vile wol bedaht Ênêas der Troiân, dô daʓ alsô was getân. Dô der fride gegeben wart,
40	dô schûf Turnûs die vart,
249	Kamillen her sande tôte heim ze lande. des wart her vil unfrô, iedoch mûsteʓ sîn alsô,
5	swie leit eʓ im wâre. dô hieʓ her eine bâre bereiten hêrlîchen Kamillen der rîchen, als uns daʓ bûch kunt tût.
10	die boume wâren vile gût von helfenbeine, gnûch lank und niht kleine, des enbrast nehein teil. sîdîn wâren diu seil,
15	diu besten diu man ie gesach. ein kolter dar ûffe lach von rôtem samîte. mit grûnem cimîte was diu lîste undersniten.
20	daʓ her ungerne hete vermiten, daʓ wiʓʓet unde geloubet. man legete ir under ir houbet ein phlûmvederîn kussîn. diu zieche was ôsterîn,
25	diu ander driancasîne. ein phelle sarrazîne grôʓen unde langen hieʓ der hêre hangen uber die junkfrouwen.
30	her was in grôʓen rouwen von ir in sînem mûte. zwêne mûle gûte tet man zû der bâren. do si al gereit wâren
35	ir magde und sîne holden, die si fûren solden, dô klagete sie vil sêre Turnûs der hêre. Dô sprach der hêre Turnûs
40	«daʓ wir uns scheiden mûʓen sus,
250	daʓ is ân mînen willen. ôwê (sprach her), Kamille, schôneʓ bilde, reiniu maget, dun wirdest nimmer verklaget
5	die wîle daʓ diu werlt stêt. wie unsanft eʓ mich ane gêt, daʓ dû dînen lîb hâst verloren! wâ wart von wîbe ie geboren in allem ertrîche
10	dehein dîn gelîche unde enwirt ouch nimmer mêre! diu werlt hete dîn êre, niwan daʓ des wesen niene mach, daʓ dû unz an den sûntach
15	lebetes dar inne, aller tugende und sinne der hetest dû genûch. unsâlich sî her der dich slûch, der tet der werlde grôʓen schaden.
20	wie mohten eʓ die gote gestaden, daʓ dû verlore dîn leben, dô sie dir heten gegeben einen lîb sô wol getân? war umbe lieʓen sie dich slân?
25	si solden dîn baʓ hân gehût dorch dîne manege tugent gût und dorch dîn lobelîchen sin. wie sêre rouwich ich des bin, daʓ ich dîn noch enberen mûʓ!»
30	mit der bâre gienk her ze fûʓ eine gûte wîle, wol eine halbe mîle, Turnûs der wîgant. ein kerzen trûch her an der hant,
35	ein wol brinnendeʓ lieht, des ne wolder enberen nieht. sam tâten alle gelîche arme unde rîche, die dâ mit im wâren.
40	si giengen mit der bâren
251	und trûgen an den handen kerzen, die lieht branden. die frouwen êrden sie dâ mite, daʓ was sîn wille und der site.
5	Dô fûren die junkfrouwen mit michelen rouwen mit der frouwen dannen. Turnûs gebôt sînen mannen, zwein hundert rittern gûten,
10	des was im ze mûte, daʓ her si mit ir sande. dô quâmen sie ze lande, ichn weiʓ uber wie manegen tach, des ich gesagen niene mach.
15	dô man daʓ mâre vernam, daʓ si tôt wider quam, Kamille diu rîche, mit rouwen grôʓlîche sie dâ wart enphangen,
20	daʓ ir sô was ergangen. Welt ir nû rehte verstân eine rede alsô getân, die ir ê selden habet gehôrt, sô merket rehte mîniu wort
25	bescheidenlîche sunder, sô moget ir hôren wunder, daʓ mir niht vil enschadet, wie diu frouwe wart bestadet, Kamille diu werde,
30	vil hôhe enboven der erde bî ir templô an ein stat, dâ sie sich selbe legen bat ir lûte die daʓ tâten. des hete si sich berâten
35	selbe bî ir lebene. vil hêrlîch und vil ebene ein geworke sô lussam, daʓ nieman solhes niht vernam, sô hêrlîch sô daʓ was,
40	daʓ meisterde Gêometras.
252	des lônde im Kamille. dar zû was gût sîn wille, sint daʓ hers begonde, wander wole konde
5	die list von gêometrîen. des hôrde ich in zîen, daʓ wart dâ an werke schîn, esn mohte anders niht sîn. Vernemet wie der wîse man
10	des werkes zallerêrst began, wandeʓ in lutzel tûrde. mit marmor her umb mûrde eine sinwelle stat, als man in hieʓ unde bat.
15	eʓ was vile zierlîch. jaspîn was der esterîch zweinzich fûʓ wît innen. dâ lach in vier sinnen vier steine wol gehouwen,
20	die man gerne mohte schouwen, daʓ saget man uns vor ungelogen. dar ûffe stunden zwên swibogen: der wîse man Gêometras, der des werkes meister was,
25	her worhte sie mit mûʓe. si wârn hôch zweinzich vûʓe. des konde her wol râmen, daʓ sie ze samene quâmen in crûʓewîs obene.
30	daʓ was wol ze lobene, als uns daʓ bûch urkunde gît. dâ wart ein fûchstein in gelît, ich wâne eʓ porfir wâre. dar ûf stunt ein phîlâre
35	von marmor vierzich vûʓe hô und was gemeistert alsô, daʓ michel list dar ane schein. dar ûffe lach ein simeʓstein, sinewel, siben fûʓe breit.
40	daʓ was ein michel arbeit,
253	des man lutzel bedorhte. dar ûf man dô worhte mit simeʓe und bereite ein geworke, daʓ sich breite
5	al umbe in allen sîten enlenge unde enwîten ze iegelîchem steine gûter spannen eine. der meister mâʓeteʓ alsô.
10	eʓ wart vierzich fûʓe hô und zweinzich wît enbinnen. eʓ wart geworht mit sinnen unde was vil zierlîch. dâ unden was der esterîch
15	al von edelen steinen grôʓen unde kleinen. desn darf nieman frâgen, ob eʓ lobeten dieʓ gesâgen: der meister lobeteʓ selbe.
20	dar ûf stunt ein gewelbe, gemachet vile wunnesam, als eʓ Kamillen wol gezam der edelen kuneginne. eʓ hete in vier sinne
25	gûter venster viere von granâte und von saphiere, von smaragden und rubînen, von crisolîten und von sardînen topaʓien und berillen.
30	der hete frouwe Kamille selbe gnûch gewunnen, ê des werkes worde begunnen. Daʓ was al wol ze lobene. daʓ himelze was obene
35	gemûset wol mit golde, als der meister wolde. daʓ was wert maneger mark. hêrlîch was der sark, ein tûre calcidônje.
40	dar ûffe ein sardônje,
254	den moht man niht gefûgen baʓ. dô sazte man dar in zwei vaʓ volle balsamen beide ensamen; diu ne lieʓen den lîkhamen
5	niht fûlen noch stinken. daʓ konde wol bedenken der listige werkman, der grôʓ lob dar abe gewan. ûf den sark und der neben
10	worden ir vers gescreben mit gesmelze sardône an deme steine schône mit vil gûter scrihte. nû hôret daʓ getihte,
15	ob irs habet willen: hie liget frowe Kamille diu mâre und diu rîche, diu sich sô manlîche ritterschefte underwant,
20	daʓ nie man ne vant ir gelîchen noch ne sach. deheines werkes sie ne phlach, wande si ûbete ritterschaft und hete grôʓe heres kraft
25	und wart vor Laurente erslagen. ir frunt mûʓen sie wol klagen. Dô sie daʓ heten getân und her ûʓ solden gân, ê danne sie ûʓ giengen,
30	ein lampadem sie dâ hiengen, daʓ solt ir wiʓʓen âne wân: dâ was balsamum în getân sô tûre und sô hêre, daʓ her wol immer mêre
35	bran unde gab lieht unde enminrete iedoch nieht. solîch was der wieche. eʓ meisterde ein Crieche und der wîse Gêometras,
40	der ein listich man was;
255	her schûf eʓ alser wolde. diu ketene was von golde, dâ diu lampade bî hienk. nû hôret wie herʓ ane vienk
5	der meister, der des alles wielt. ein tûbe die ketene hielt, diu gienk dorch ir munt (daʓ is genûgen wole kunt), daʓ si hielt daʓ liehtvaʓ.
10	ûf eime steine sie saʓ, gefûchlîch dar gehouwen. si lûhte der frouwen, daʓ was ein listechlîch rât. ein edel jachant granât
15	was diu lampade vile gût, dorchlûhtec rôt als ein blût, als ich û wol gesagen kan. dâ stunt ein bilde als ein man gesniten an einer want.
20	einen bogen heter an der hant, gespannen algereite. daʓ was mit listecheite. der bolz was gesetzet an, her ne weich niender dan,
25	eʓn was ze nider noch ze hô und was gemachet alsô, swenne sô man wolde daʓ her schieʓen solde die tûben diu ob ime saʓ,
30	sô viel daʓ liehtvaʓ unde erleschete daʓ lieht. anders ne mohteʓ nieht geleschen noch gevallen. daʓ kunden wir û allen.
35	dô gienk daʓ volk alleʓ her vure und vermûrde man die ture mit kopher und mit steinen. der besten spiegel einen, danen abe ich ie gehôrde,
40	der stunt an einem orde
256	oben an dem gewerke mit solhem gemerke, swenne lieht was der tach, daʓ man den spiegel gesach,
5	alsô man iht war nam, swer dô dar zû quam inwendich einer mîle nâ. alsô was bestadet dâ Kamille diu rîche
10	alsô hêrlîche. Dô daʓ alleʓ was getân, dô solde der fride ûʓ gân in korzen zîten dar nâ, den sie gesworen heten dâ
15	Turnûs unde Ênêas. der kunich Lâtîn der was ze Laurente in sîme hûs, und der hêre Turnûs was vor den kunich komen
20	unde hete wol vernomen, daʓ der kunich Lâtîn Ênêas frunt wolde sîn und er worbe umbe sûne. Turnûs sprach der kûne
25	zû dem kunege rîchen «ir welt mich beswîchen der trouwen und der minnen. des bringet ir mich innen, daʓ ir mir zer nôt abe stât.
30	des mach doch werden gût rât (sprach der helt vermeʓʓen): ichn hân noch niht vergeʓʓen des kamphes des dâ geredet was. ich und der hêre Ênêas
35	wir mûʓen uns versûchen. wil es got gerûchen, daʓ ich behalde mînen lîb, her lâʓet mir lant unde wîb. is daʓ ich mich sîn erwere,
40	sô mûʓ daʓ trôische here
257	mit schanden rûmen diz lant, mûʓ ich behalden mîne hant. is mir aber daʓ beschert, daʓ sich Ênêas mîn erwert
5	und ich verliese mîn leben, sweme ir danne welt geben ûr tohter und ûr rîche, daʓ is mir al gelîche.» Dô sprach der kunich Lâtîn
10	«sold ich ûwer râtgebe sîn, ich riete û trouwelîche daʓ, daʓ ir ûch rehter unde baʓ bedahtet und berietet. daʓ ir den kamph hie bietet
15	wider den edelen Troiân, daʓn dunket mich niht wol getân, wandich û wol gûtes gan. her is ein sigesâlich man. des mûʓet ir mir mite jehen,
20	wandirʓ dicke habet gesehen in stormen und in strîten, swâ ir ze allen zîten engegen ime quâmet, daʓ ir den schaden nâmet
25	vil mêr denne Ênêas, und doch ûwer here was drîstunt grôʓer dan daʓ sîn. dar ane wart daʓ schîn, daʓ im holfen die gote,
30	wand er mit ir gebote in diz lant komen is. niht verdenket mich des, daʓ ich spreche dorch gût. is daʓ ir mînen rât tût,
35	ir behaldet ûwern lîb und moget lant unde wîb anders vil wol gwinnen sunder kamph mit minnen. sô tût ir wîslîche.
40	eʓ nis in deme rîche
258	nehein wîb noch maget, dâ ir willen zû traget und der ir gerûchet, is daʓ ir si sûchet,
5	sie ne sî û vil gereit. daʓ is mêre wîsheit, dan ir verlieset ûwern lîb umbe ein lant und umbe ein wîb.» Dô sprach Turnûs der rîche
10	zû dem kunege zornlîche «ach leider arme, daʓ ich û sus erbarme, desn weiʓ ich û deheinen dank. ich erkenne wol den abewank,
15	ir mûwet ûch al âne nôt. Ênêas mûʓ den tôt von mîner hant enphân, older mich ze dôde slân. ir stêt mir bôslîchen bî.
20	sweder unser eʓ sî, der mûʓ den lîb verliesen. ich wolde daʓ ê kiesen, daʓ ich mit êren tôt belibe, danner mich lebende vertribe,
25	der von Troie is geboren: sô hete ich bôslîche verloren ein lant und mîn êre. ichn vorhtin niht sô sêre, daʓ ich im mîn lant rûme.
30	ich erbîtes vile kûme, daʓ wir zwêne ze samene komen. ouch hân ich wol vernomen ûwer herze und ûwern mût, daʓ ir wider mich niht wole tût,
35	ir und ûwer râtgeben. unde genert mir got mîn leben und mach ich den sige gewinnen, ich gelône û der minnen, der ir mir nû bescheinet.
40	ich weiʓ wol waʓ ir meinet:
259	daʓ herze habet ir verloren. ich hete ûr tohter ê gesworen, êr irs Ênêase gehieʓet: daʓ ir mich nû verstieʓet
5	sô gerne ûʓerm lande, sô wil ichʓ âne schande verliesen oder gehalden, sal es gelucke walden. ichn verzîhe mich niht noch.
10	nû erkennet ir wol doch mîn herze unde mînen sin, daʓ ich sô schâfîn niene bin, ich hân den willen und den mût, daʓ ich mîn êre und mîn gût
15	gerne behalde. enbietet eʓ im balde Ênêase, swâ her sî, her is ouch hie nâhen bî her unde Drances.»
20	do gevolgete im der kunich des, daʓ her zÊnêase sande zwêne vorsten vonme lande umbe alsus getâne nôt und dem Troiâne enbôt
25	alsô dâ geredet was. dô gelobete Ênêas vile gerne den einwîch. beide gereitten sie sich unde swûren der rede
30	und lengeten den frede uber vierzehen naht. sie wâren sô bedaht, daʓ si des kamphes gerden mit schilden und mit swerden,
35	ûf den rossen mit den speren. si wolden beide gerne weren ir êre und ir lîb und behalden daʓ wîb, die maget alsô lussam.
40	der kunich gîsel nam
260	von den hêren beiden, daʓ siʓ solden bescheiden sos allerbeste mohten und eine zwêne vohten
5	uber vierzehen naht dar nâ. daʓ gelobetens beide dâ. Dô der kamph gelobet was, des Turnûs und Ênêas beide kûme erbeiten,
10	und sich dar zû gereiten mit manlîchem sinne, dô was diu kuniginne eines âbendes spâte in ir kemenâten.
15	ir tohter sie vor sich nam, eine junkfrowen lussam. einer rede sie begonde, die si vil wole konde, mit michelme sinne.
20	dô sprach diu kuniginne «scône Lâvîne, liebiu tohter mîne, nû mach eʓ lîhte sô komen, daʓ dir dîn vater hât genomen
25	michel gût und êre. Turnûs der helt hêre der dînre minnen starke gert, der is dîn vil wole wert, daʓ is mir wole kunt.
30	und wârist dû noch tûsent stunt alsô schône und alsô gût, sô mohtestû wol dînen mût gerne an in kêren. ich gan dir aller êren
35	und wil daʓ dû in minnest und daʓ dû bekennest, daʓ her ein edele vorste is. dar umbe warne ich dich des umbe den helt lussam
40	und wis Ênêase gram,
261	dem unsâligen Troiân, der in ze tôde wil erslân, den, der dir is von herzen holt. dar zû hâstû rehte scholt,
5	daʓ dû im ungenâdich sîs unde im neheine wîs niemer êre getûst, want duʓ wole lâʓen mûst und in von rehte haʓʓen salt,
10	wander dich mit gewalt hie wil erwerben unde wil erben dînes vater rîche. ob dû sâllîche
15	unde wole welles tûn, tohter sô minne Turnûm.» «wâ mite sal ich in minnen?» «mit dem herzen und mit den sinnen.» «sal ich im mîn herze geben?»
20	«jâ dû» , «wie soldich danne geleben?» «dune salt eʓ im sô geben niht.» «waʓ ob eʓ niemer geschiht?» «und waʓ, tohter, ob eʓ tût?» «frowe, wie mohte ich mînen mût
25	an einen man gekêren ?» «diu Minne sal dichʓ lêren.» «dorch got, wer is diu Minne?» «si is von aneginne gewaldich uber die werlt al
30	und immer mêre wesen sal unz an den jungesten tach, daʓ ir nieman ne mach neheine wîs widerstân, wande sie is sô getân,
35	daʓ mans ne hôret noch ensiht.» «frouwe, der erkenne ich niht.» «dû salt sie erkennen noch.» «wan moget irs erbeiten doch, ich erbeites gerne, ob ich mach.»
40	«lîhte gelebe ich noch den tach,
262	daʓ dû ungebeten minnest. swenne dus beginnest, dir wirt vil liebe dar zû.» «ichn weiʓ, frouwe, weder eʓ tû.»
5	«dû maht es wesen gewis.» «sô saget mir denne waʓ minne is.» «ichn mach dirs niht gescrîben.» «sô solt irʓ lâʓen blîben.» Dô sprach diu kuneginne
10	«so getân is diu minne, daʓ eʓ rehte nieman dem anderen gesagen kan, dem sîn herze sô stêt, daʓ si dar in niene gêt,
15	der sô steinlîchen lebet: swer ir aber rehte entsebet unde zû ir kêret, vile si in des lêret, daʓ im ê was unkunt.
20	si machet in schiere wunt, eʓ sî man oder wîb, sie begrîfet im den lîb und die sinne garwe und salewet im die varwe
25	mit vil grôʓer gewalt. si machet in vil dicke kalt und dar nâch sô schiere heiʓ, daʓ her sîn selbes rât ne weiʓ. solich sint ir wâfen:
30	sie benimt imʓ slâfen und eʓʓen unde trinken. si lêret in gedenken vile misselîche. nieman is sô rîche,
35	der sich ir moge erweren noch sîn herze vor ir generen noch ne kan noch ne mach. nû is des vil manech tach, deich nie sô vil dar abe gesprach.»
40	«frowe, is denn minne ungemach?»
263	«nein si, niwan nâhen bî.» «ich wâne daʓ si sterker sî dan diu suht oder daʓ fieber: si wâren mir beidiu lieber,
5	wan man bekêret nâch dem sweiʓe. minne tût kalt unde heiʓe mêr denne der viertage rite.» «swer bestricket wirt dâ mite, her mûʓ sich alles des genieten.»
10	«sô mûʓe mir si got verbieten.» «nein, jâ is si vile gût.» «waʓ meint denn daʓ si wê tût?» «ir ungemach is sûʓe.» «got gebe, daʓ sie mich mûʓe
15	verren unde vermîden, wie soldich die nôt alle erlîden?» Diu mûter aber wider sprach «niht envorht daʓ ungemach, merke wie ich dirʓ bescheide:
20	michel lieb kumt von dem leide, rûwe kumt nâch ungemache. daʓ is ein trôstlîche sache. gemach kumt von der arbeit dicke ze langer stâticheit.
25	von rouwe kumet wunne und froude maneger kunne. trûren machet hôhen mût, diu angest macht die stâte gût. daʓ is der Minnen zeichen:
30	lieht varwe kumt nâch der bleichen, diu vorhte gît gûten trôst, mit dem dolne wirt man erlôst, daʓ darben tût daʓ herze rîche. ze diseme dinge iegeslîche
35	hât diu Minne solhe bûʓe.» «sis aber von êrist vil unsûʓe, ê diu senfticheit kome?» «dû erkennest ir niht ze frome: si sûnet selbe den zorn.»
40	«diu quâle is zû grôʓ dâ bevorn.»
264	«si tût daʓ dicke under stunden, daʓ si heilet die wunden âne salben und âne trank.» «diu arbeit is ab ê vil lank.»
5	«tohter, daʓ stêt an dem glucke sô man gequilet ein lank stucke und mit arbeiten gelebet und man ungemach entsebet von minnen, als ich ê dâ sprach,
10	und danne froude und gemach mit dem heile dar nâch komt, wie wol eʓ dem herzen gefromt und trôstet danne den mût, wandeʓ ime baʓ tût
15	unde senfter drîʓich warf, dan ders niene bedarf. des saltû mir von rehte jehen. dû hâst dicke wol gesehen, wie der hêre Amôr stêt
20	in dem templô, dâ man in gêt engegen der ture inne, daʓ bezeichent die Minne, diu gewaldech is ubr alliu lant. ein buhsen hât her an der hant,
25	in der ander zwêne gêre: dâ mite schûʓet er vil sêre, als ich dir sagen wolde. ein gêr is von golde, des phleget her alle stunde.
30	swer sô eine wunde dâ mite gewinnet, vil starklîch er minnet und lebet mit arbeite. neheiner unstâticheite
35	ne darf man in zîen. der ander gêr is blîen, von deme tûn ich dir kunt: swer dâ mite wirdet wunt in sîn herze enbinnen,
40	der is der rehten minnen
265	iemer ungehôrsam, her haʓet unde is ir gram. swaʓ sô von minnen geschiht, des ne lustet in niht.
5	solich is daʓ geslehte. wil dû nû wiʓʓen rehte, waʓ diu buhse bedûte, daʓn wiʓʓent niht alle lûte, merke in allenthalben:
10	si bezeichent die salben, die diu Minne ie hât gereit. diu senftet al die arbeit und machet eʓ alleʓ gût, swen diu Minne wunt tût,
15	daʓ si in geheilet. si gibet unde teilet daʓ lieb nach dem leide. daʓ saltû merken beide, daʓ des von minnen vil geschiht.
20	dune bist ouch sô tumb niht, sô dû dar zû gebâres. ob dû junger wâres zweier jâre dan dû sîs, dû mohtest wole sîn gewis,
25	dun gelernst eʓ nimmer ze frû. dû hâst ouch lîb genûch dar zû gewahsen unde scône. daʓ ich dirs immer lône mit minnen und mit gûte,
30	diz behabe in dînem mûte, want dû mûst doch minnen phlegen. von diu minne den kûnen degen Turnûm den edelen vorsten.» «ich ne mohte noch getorsten.»
35	«war umbe?» » dorch die arbeit.» «jâ is eʓ michel senfticheit.» «wie moht daʓ senfticheit sîn?» «got weiʓ, liebe tohter mîn, ich weiʓ wol daʓ dû minnen mûst,
40	swie ungerne dû eʓ tûst.
266	wirde ich des innen, daʓ dû Ênêam wilt minnen und uns sô entêres, daʓ dû dîn herze kêres
5	an den bôsen Troiân, ich heiʓe dich ze dôde slân unde martere dînen lîb, ê dû iemer werdest sîn wîb. her enbirt wol solhes wîbes,
10	hern sal dînes lîbes niemer sich genieten.» «ir moget mirʓ lîht verbieten, ichn gewans nie willen.» dô sweich diu frouwe stille,
15	in zorne gienk si hin dane unde sach die tohter ane vile ungûtlîche diu kuneginne rîche. Nû hôret eine ander rede.
20	ze Laurente was der frede gestadeget unde gesworen, als ich û sagete dâ bevoren, sô daʓs in beiden sîten ze samene mohten rîten
25	mit fride und mit minnen von ûʓen unde von innen beidiu rîten unde gân. daʓ wart dicke alsô getân, want der frede gût was.
30	eins tages hieʓ im Ênêas ein ros dare bringen. mit sînen jungelingen wolder sich banechen rîten. in den selben zîten,
35	sint daʓ die kuneginne geredete umb die minne wider die maget lussam, vor Laurente her geriten quam vaste an die mûren,
40	und die mit ime fûren.
267	dô gehabete Ênêas engegen des kuneges palas beide er und die sîne. dô was diu maget Lavîne
5	gegangen ûf ein palas hô und eʓ gefûchte sich alsô, daʓ Ênêas hielt ûf dem graben. dô sach diu junkfrowe her abe von dem venster dâ si lach.
10	den hêren sie wol besach, den minnesâlegen Troiân. wie wart her ie sô wol getân, hern mohte niemer schôner sîn! daʓ hete ouch daʓ magedîn
15	dâ bevor vil wol vernomen. dô her dô dare was komen, do gesach sie die wârheit. des gewan si michel arbeit. Dô der hêre dare quam
20	und sîn diu maget lussam dâ nidene wart gewar und si ir ougen kêrde dar, dâ si was ûf deme hûs: dô schôʓ si frouwe Vênûs
25	mit einer scharphen strâle. daʓ wart ir al ze quâle sint uber ein lange stunden. si gewan eine wunden an ir herze enbinnen,
30	sô daʓ si mûste minnen, si wolde oder enwolde, dâ si ir mûter holde al mitalle mit verlôs, want si bran und si frôs
35	in vil korzen stunden; sine wiste niht der wunden, dâ ir daʓ ubel vone quam. vile schiere sie vernam irre mûter geheiʓ:
40	sie wart unmâʓen heiʓ
268	unde dar nâch schiere sal. wande si unsanfte qual, si switzete unde bebete, unsanfte sie lebete,
5	sie wart bleich unde rôt. vile michel was ir nôt unde ir lîbes ungemach. do gewan si maht unde sprach. Dô ir daʓ herze wider quam,
10	dô sprach diu maget lussam ir selber jâmmerlîche zû «nune weiʓ ich leider waʓ ich tû, ouch enweiʓ ich waʓ mir werret, daʓ ich sus bin vererret:
15	mirn wart solhes mê niht kunt. nû was ich iezû al gesunt unde bin nû vil nâ tôt. mir wâre gûtes râtes nôt. wer hât sus gebunden
20	mîn herze in korzen stunden, daʓ ê was ledechlîchen frî? ich vorht daʓ eʓ der kumber sî, dâ mich mîn mûter trôste zû. her is mir komen alze frû,
25	niwan daʓ si michs niht erlieʓ, Minne oder swie siʓ hieʓ jâ si nandeʓ Minne. wie wol ich nû erkenne daʓ freislîche ungemach.
30	eʓ is als mîn mûter sprach, mîn frouwe, diu mich getrûch. wê daʓ si mirs ie zû gewûch! ich ne soldeʓ ir wîʓen niet: ichn minne niht daʓ sie mir riet,
35	ich ne darf niht von ir klagen. al hete sie mirs niht gewagen, eʓ wâre doch alsus komen. eteswaʓ mach mir daʓ gefromen, daʓ ich nû sô vil drumbe weiʓ,
40	wandich bin kalt unde heiʓ
269	an mîme lîbe enbinnen. ich weiʓ wol deis von minnen, diu mir ê unkunt was, wan sint der hêre Ênêas
5	hûte dâ her geriten quam und ich den helt lussam allerêrste gesach, des ich vergeʓʓen niene mach, den vil edelen Troiân.
10	wie wart her ie sô wol getân, sîn houbet und aller sîn lîb! ichn weiʓ ob in alliu wîb alsô minnen die in gesehen. nein si, wie moht daʓ geschehen,
15	want daʓ ichʓ lâʓen niene mach. mir is leit daʓ ich in ie gesach, nû ichs sus hân genoʓʓen. Amôr hât mich geschoʓʓen mit dem goldînen gêre.
20	des mûʓ ich quelen sêre und eʓ koufen tûre. mit dem heiʓen fûre brennet mich frou Vênûs. ichn mach niht langer leben sus.»
25	Aber sprach diu maget junge «eʓ ne mohte nehein zunge nimmer vore bringen mit deheinen dingen daʓ ungemach daʓ ich entsebe.
30	daʓ ich sus switze unde bebe in sus korzen stunden, eʓ kumt mir von der wunden der unsenfter Minne, diu mich dâ derret inne
35	und mîn herze machet vale, des wirdich vile schiere sale. wannen komt mir der mût, daʓ eʓ mir sus wê tût, ich lige oder sitze,
40	nâch sus unrehter hitze
270	und sus unrehter kalde? daʓ salwet mich vil balde und verderbet mir den lîb. mîn mûter is ein listisch wîb
5	und weiʓ von solhen dingen vil. swenne si mich nû frâgen wil, wie ich sus ubele sî getân, wie sal ichʓ danne ane vân? swenne sô si mich gesiht,
10	son hilfet mich mîn lougen niht, wan si kan eʓ wol ersehen. ichn getar es aber niht gejehen. von diu bin ich des gewis, daʓ eʓ mîn ungelucke is
15	oder betalle mîn tôt, want den man, den si mir verbôt, den minne ich zunmâʓen. jâ mach ich eʓ wol lâʓen, ob ich ubel dar ane tû.
20	wer twinget mich dar zû? daʓ tût diu starke minne, diu bringet mich uʓer sinne, des bin ich vil unfrô. der minnen got Cupidô
25	und Amôr sîn brûder und Vênûs ir mûder diu hânt mich unsanfte verwunt. mir is schiere worden kunt der starken minne ungemach.
30	wandich von in missesprach, daʓ hânt si an mir gerochen. hete ich iht mêr gesprochen, ich hetes gnûch engolden. und ob ichs hete bescholden.
35	des ne tete ich aber niet, niwan daʓ mir mîn herze riet, daʓ ich mich ir wolde erweren. ichn mach mich niht vor in generen, ich bin dem Troiâr alze holt:
40	ich wâne daʓ is mîn scholt.
271	wes luste mich daʓ ich in sach? daʓ ich nû wol sprechen mach, niwan deiʓ alsô mûste geschehen? ich hân vil dicke gesehen
5	manegen wol getânen man, dâ ich nie minne zû gewan, und manegen man gemeiten, an den mich nie geleiten ne mohte lîb noch mût,
10	ich hân mich wol dâ vor behût, und manegen schônen jungelink. eʓ wâre ein unsâlich dink, ob des mîn herze phlâge, alle die ich gesâge,
15	daʓ ich die mûste minnen. ich kan mich des versinnen, minnete ich mê dan einen, sone minnete ich deheinen: daʓ weiʓ ich wole âne wân.
20	diu minne nis niht sô getân, daʓ man sie geteilen moge sô daʓ sie iemanne toge. Wannen komet mir der sin, daʓ ich sus wîse worden bin,
25	des ich ê sô tumb was? eʓ lêret mich Ênêas, daʓ mir daʓ is worden kunt. von sînen minnen bin ich wunt und lîde micheln ungemach.
30	diu salbe die mîn mûter sprach, diu mich heilen solde, wie gerne ich wiʓʓen wolde, wie senfte sie wâre! eʓ wâre ein beʓʓer mâre,
35	daʓ si mir schiere quâme und mîme herzen nâme dise unsenfte swâre, der ich vil gerne enbâre. nû waʓ salben moht daʓ wesen,
40	dâ ich mite mohte genesen
272	sus getâner minnen? mohte ich die gewinnen, daʓ wâre grôʓ rîcheit. ich vorhte abr sie sî ungereit,
5	ich wâne mîn teil sî verloren: sô wart ich unheiles geboren, daʓ is mir wol worden kunt. und is der hêre Ênêas wunt mit dem blîgen gêre,
10	daʓ her haʓʓet sêre al daʓ von minnen geschiht, daʓ ich in minne und her mich niht, sô ne mach ich niht genesen. der gelieben mûʓen zwei wesen,
15	diu sich underminnen unde mit ir sinnen ir willen vollebringen mit gûtlîchen dingen, obs iemer rât werden sal.
20	wer hât mich diz gelêret al, daʓ ich eʓ nû sô wole kan und ich es doch nie began? ich kondes lutzel hûte frû: ich kan eʓ sô wol iezû,
25	des is mîn herze vile swâr. mîn mûter sagete mir wâr diu wîse kuneginne, si sprach, daʓ mich diu Minne wol gelêren solde
30	des ich niht enwolde tûn noch dorch ir bete. daʓ ich sô ungerne tete, wer hât mirʓ geliebet sô? Amôr unde Cupidô
35	und diu gotinne Vênûs: von ir scholden quele ich sus unde von ir wunden. Minne, ich hân dich funden bitter albetalle.
40	Minne, dû bist noch galle,
273	Minne, nû wirt sûʓe, daʓ ich dich loben mûʓe. Minne, senfte mir etewaʓ, deich dir gedienen moge baʓ.
5	Minne, sal ich iht lange leben, sô mûst dû mir trôst geben mit etelîchem sinne. waʓ hilfet dich daʓ, Minne, daʓ ich sus smilze enbinne?
10	dû heiʓest unreht Minne, als ich dich noch bekenne: dû bist ein quelerinne. Vênûs hêre gotinne, gesenfte mir die minne
15	(sprach diu kuneginne), unze ich bekenne die rehten art der minne. dû treges salbe, Minne, is daʓ ich der gewinne
20	so genese ich, edeliu Minne, und hâstus michel êre, ich quele alsus ze sêre. Amôr (sprach si), der minnen got, zebrach ich ie dîn gebot,
25	daʓ hân ich harde garnet. ich was des ungewarnet, daʓ dû mich sus ane quâmest unde mir sus schiere nâmest den lîb und die maht al.
30	sint daʓ ich dir dienen sal, sô mûʓ ich swâre burden tragen. ich wâne ich mûʓ von dir klagen, wiste ich weme oder wâ. nû is aber verre noch nâ
35	nieman, der dich betwingen moge. der anders sprâche der loge, dû betwingest algelîche arme unde rîche, daʓ man dir der meisterschefte giht.
40	dune hâst von niemanne niht,
274	diu werlt is al dîn eigen, dune wellest mich gesweigen mit etelîchem gûte. des mir is ze mûte,
5	des rede ich lîhte ze vile, wandeʓ gêt mir ûʓ dem spile. dû bestunde mich ze frû, ich bin ze kint noch dar zû: wârich der sterkiste man,
10	der in der werlde ie lîb gewan, dû hetest mir schiere wê getân, woldest dû mich sus ane gân, als dû hâst begunnen. hetest dû mir gegunnen,
15	deich Turnûm mûste minnen mit mâʓlîchen sinnen, des gonde mir mîn mûter baʓ. ôwê, war umbe sprach ich daʓ? ichn mohteʓ nimmer getûn,
20	jâ haʓʓich hêren Turnûm mê dan deheinen man, wie moht ich in minnen dan? ichn weiʓ wan mir daʓ wort quam. war umbe bin ich ime gram?
25	dorch Ênêases willen. des mûʓ ich swîgen stille, daʓ eʓ mîner mûter iht vor kome: eʓ geviele ir niht ze frome, vernâme sie daʓ mâre.
30	ich weiʓ wol daʓ mir wâre vile beʓʓer getân, deich Turnûm und den Troiân gelîche minnete beide, denn ich mîn herze scheide
35	von Turnô sô verre. ich vorhte deiʓ mir werre, als eʓ vil lîhte komen mach. schiere komet der tach, daʓ si vehten mûʓen
40	ze rossen oder ze fûʓen,
275	als daʓ tagedink geliget. sweder ir dâ gesiget, der sal mich behalden. die gote mûʓens walden,
5	daʓ Ênêas der hêre gestadege sîn êre und behabe sînen lîb, wande Turnûses wîb ne wil ich niemer werden.
10	alle die ûf der erden ie worden und noch leben ne mohten mir den rât gegeben noch dar zû getwingen mit deheiner slahte dingen,
15	ich wolde ê ersterben, ê eʓ ieman mohte erwerben, daʓ ich in wolde minnen, und soldich dar mit gwinnen alleʓ ertrîche.
20	von diu sprach ich tumblîche, ich ne weiʓ wer mirʓ geriet. jane mach ich die Minne niet sô enzwei geteilen. sie sal mir noch heilen
25	mîn unsenfte wunden, die mir nû ze stunden alsus trûbent mînen mût. eʓ sal mir noch al werden gût, swenne mir got gibet daʓ heil.
30	mir is gesenftet ein teil, wande daʓ hât mir getân hoffenunge unde wân: diu gebent mir beidiu gûten trôst, daʓ ich noch werde erlôst,
35	und siʓ bringen dar zû daʓ mir diu Minne sanfte tû, diu mir sus wê hât getân. von diu wil ich den Troiân minnen stâtechlîche.
40	und ob al ertrîche
276	Turnûses wâre, her wâre mir doch unmâre wider den edelen Troiân. wie moht ich gekêren dan
5	mîn herze an zwêne man? ich ne mach noch enkan, ich ne wil noch enmach. sint daʓ ich gesach Ênêam den rîchen,
10	sô mûste mir entwîchen mîn herze und mîn sin. wister daʓ ich ime bin sô unmâʓlîchen holt âne menneschlîche scholt,
15	der ich nie kunde gewan, hern wâre nie sô ubel man, hern mûste mich minnen. ichn weiʓ des wie beginnen, deichʓ immer vore bringe
20	mit deheinem dinge.» Dô si des alles vil gesprach und wunne unde ungemach in trûregem herzen underschiet (alsus saget uns daʓ liet)
25	und des alles vile was: dô reit der hêre Ênêas ze sîme gezelde hin wider. dô was sie vil nâ dar nider gevallen in ir ungewalt.
30	daʓ herze wart ir vile kalt unde ir scône lîb al. «nune weiʓ ich leider war ich sal, daʓ ich den man mûʓ minnen, der alsus veret hinnen,
35	daʓ her mich niht ane siht. leider dâ ne weiʓ hers niht, daʓ mîn herze mit im vert. ôwê daʓ mir daʓ was beschert, daʓ ich von minnen sus mûʓ quelen!
40	ich stirbe, sal ich eʓ helen.
277	wie sal ichʓ danne ane vân, daʓ ichʓ in lâʓe verstân âne grôʓe missewende? ob ich im einen boten sende
5	und ime enbiete wieʓ mir stât, und ob herʓ danne ubel enphât und merketʓ niht ze gûte und denket in sînem mûte vil ubellîche dar zû
10	und wânet als ich ime tû, daʓ ichʓ ouch andern habe getân, wie mohteʓ mir dan wol ergân? sone wirdet her mir nimmer holt. umb alsus getâne scholt
15	lîdich kumber unde nôt. einhalb vorhte ich den tôt, anderhalb vorhtich sêre mîner werltlîchen êre, daʓ ich die niht behalde.
20	nû vert her hine balde weiʓ got leider jâ her tût! stunde im iht ze mir sîn mût, her nâme mîn etlîche ware. ichn darf ouch rûchen war her vare,
25	ich rûches ab leider al ze vil, mir is leit daʓ her noch hinnen wil, daʓ im zer verte is alsô gâch.» si sach im trûrechlîchen nâch und markte wâ her hine rite.
30	mit den ougen volgete sime mite so si aller verrest mohte (wandeʓ sie dohte ein michel senfticheit) den wech den her hine reit:
35	der dûht si deste baʓ getân. dô reit der edele Troiân frôlîche uber daʓ velt und erbeiʓte vor sîn gezelt. des nam si vile rehte war
40	und sach vil ernesthafte dar.
278	ir ouge nie danne quam, unz ir diu naht daʓ lieht benam. Dô zergangen was der tach, unde sie niht mêr gesach
5	und si eʓʓen solde gân, dô moht si kûme ûf gestân, diu junkfrouwe lussam. dô sie aber danne quam unde uber tisch gesaʓ,
10	sie ne trank noch enaʓ, si wiste kûme waʓ man sprach. vil michel was ir ungemach, des dâ nieman war nam. do si aber an daʓ bette quam
15	unde slâfen solde, si wolde oder enwolde, si mûste wachen al die naht. diu minne hâte grôʓe maht, diu si vil unsanfte twank.
20	diu wîle dûhte sie vil lank bî tage und bî nahte. mislîche sie dahte, als sie diu minne lêrde. dicke sie sich kêrde
25	an ietwedere sîten. si hete an korzen zîten mislîche sinne. «ôwê» sprach si «Minne, wie unsanfte dû mir tûst,
30	niwan daʓ duʓ wol tûn mûst und ich niht wider dich ne mach und sich naht unde tach mîn ungemach mêret ! dune hâst mich niht gelêret
35	anders denne ungemach. daʓ mîn mûter dâ von sprach, daʓ dû mir soldest senftigen ob dû woldest, ich weiʓ wannen daʓ sal komen,
40	desn hân ich noch niht vernomen,
279	dar umbe is mir vile wê. ich wâne ich smilze als der snê, so an in diu sunne schînet heiʓ. ôwê waʓ ich al weiʓ
5	des ubelen des von dir geschiht! des gûten des ne weiʓ ich niht, daʓ hâstû mich ie noch verholen, daʓn mach ich langer niht verdolen.» Dô Lavîne al die naht
10	mit dem leide alsus vaht, daʓ ir diu varewe abe nam, und si des morgens ûf quam, dô was eʓ verre ûf den tach, und si ir mûder besach,
15	daʓ si sô ubele was gevar, dô wart si vile wol gewar, daʓ ir dink unrehte fûr. listechlîche sie si beswûr diu kuneginne mâre
20	und frâget si wie si wâre sô varlôs und sô bleich? diu maget ersûhte unde sweich und wart von angesten rôt. daʓ lêrde sie diu nôt
25	daʓ sir einer luge erdahte. si sprach vil ernestahte «frowe, ich bin verirret, ichn weiʓ waʓ mir wirret, weder diu suht oder der rite,
30	dâ ich bin bevangen mite, daʓ is mir wol worden schîn.» «got weiʓ» sprach si » tohter mîn, swie wol dû kunnest liegen, dune maht mich niht betriegen,
35	dû mûst der wârheite jehen. nâch diu und ich hân gesehen, dune darft niht valschen dîniu wort. ich hân dîn sûhten wol gehôrt, daʓ ich vil wol bekenne.
40	tohter, eʓ is minne,
280	dâ mit dû bist gebunden: du enphindest der wunden, dâ von ich anders tages sprach. dû hâst daʓ sûʓe ungemach,
5	daʓ was mir ouch hie vore kunt, dû quelest und bist idoch gesunt» sprach diu frouwe rîche, «dû bist untôtlîche beidiu kalt unde heiʓ.»
10	«sô wiʓʓet ir daʓ ich ne weiʓ» sprach daʓ edele magedîn. «got weiʓ, liebiu tohter mîn, dû weist eʓ unde ich merkeʓ ouch: lâʓ dîn lougen, eʓ entouch,
15	eʓ ne verstet niht ein hâr.» «frouwe» sprach si «wâre eʓ wâr, war umbe soldichʓ ûch dan helen? man mach unsanfte quelen, vasten unde wachen
20	an andern ungemachen als wol sô von minne.» dô sprach diu kuneginne «jâ tohter, des alein, eʓn wart nie ungemach dehein,
25	des man sô lange mohte leben. ich hân dir urloub gegeben, daʓ dû minnest Turnûm.» «desne mach ich niht getûn.» «tohter, dorch welhe scholt?»
30	«mîn herze is ime unholt, daʓ ne mach noch enkan.» «nû is her doch ein edel man.» «frowe, swie edel sô her sî, mîn herze is sîner minne frî
35	und immer mêre wesen sal, al gâber mir die werlt al.» Aber sprach diu kuneginne «dir ne wirret niwan minne, swie ungerne duʓ enbarest,
40	und swie dû lougenende varest,
281	dû minnest einen man iedoch.» «desn gihe ich, frouwe, niht noch.» «al wil dus niemer gejehen, sô kan ichʓ doch wole ersehen
5	(sprach si), liebiu tohter mîn; lâ daʓ lougenen sîn, dû verlûsest al dîn arbeit. sage mir die wârheit, sô tûstû rehter unde baʓ.»
10	«frouwe, sprechet irʓ umbe daʓ, daʓ ich sus ubele bin gevar?» «dar an werde ich es gewar und ouch an andern dingen. dune darft eʓ niht lengen,
15	sageʓ alse dû doch mûst. ich weiʓ war umbe duʓ tûst, eʓ nimet dich michel hâle.» «is eʓ denne solîch quâle, daʓ ir dâ heiʓet minne?»
20	dô sprach diu kuneginne «jâ eʓ, weiʓ got, tohter mîn.» «frowe, sô mach eʓ vil wol sîn» sprach diu junkfrouwe wider und sach vil trûrechlîche nider.
25	«mîn herze is mir gebunden (sprach si) in korzen stunden, daʓ ê was ledechlîche frî: ichn weiʓ ob eʓ von minnen sî.» «tohter, ich bin es vil gewis.
30	nû sage mir rehte wie dir is: stêt dir z'ieman dîn mût?» «weiʓ got, frouwe, jâ eʓ tût (sprach si mit grôʓen sorgen): jâ sint gester morgen,
35	daʓ ich einen man gesach, des ich vergeʓʓen niene mach noch nimmer mêre enkan.» «tohter, nû nenne mir den man.» «weiʓ got, frowe, ichn getorste.»
40	«sone is eʓ niht der vorste,
282	Turnûs, dar ich dir zû riet?» «nein, frowe, hern is eʓ niet.» «nû sage mir, frowe, wer eʓ sî.» «ich tâte gerne, wan ôwî
5	daʓ ich mir vorhte und ich mich schame.» «tohter, nû scrîb mir sînen namen unde lâʓ mich in lesen.» «frouwe, eʓ mûʓ doch alsô wesen» sprach diu maget lussam.
10	ir tavelen sie nam und einen griffel von golde, dar an si scrîben wolde. Mit angesten plânete sie daʓ was und solde scrîben Ênêas,
15	dô ir ir mûder urloub gab. E was der êrste bûchstab, dar nâch N und aber Ê. diu angest tete ir vile wê. dar nâch screib si A unde S.
20	do bereite sich diu mûder des und sprach dô si in gelas «hie stêt Ênêas!» «jâ, vil liebe mûder mîn.» «des mûʓest dû unsâlich sîn
25	(sprach diu kuneginne), daʓ dû dîne minne an den man kêrest, dâ du dich mite entêrest und alleʓ dîn geslehte!
30	want dû ne weist niht rehte, wie eʓ umbe den zagen stêt, waʓ mâres von ime gêt wîten after lande. diu werlt hât sîn schande,
35	her is ein sô unreine man, daʓ ich im dîn niene gan, wandern hât niht gûten lîb, her geminnete nie wîb. eʓn is ze sagenne niht gût,
40	waʓ her mit den mannen tût,
283	daʓ her der wîbe niene gert. dû wârest ubele zime gewert, wander nie wîb lieb gewan. phlâgen alle die man
5	des bôsen sides des her phliget, den her vil unhôhe wiget der unsâlege Troiân, diu werlt mûste schier zergân inner hundert jâren,
10	daʓ sage ich dir ze wâren: daʓ schadete vile sêre, sone worde nimmer mêre an wîbe kint gewunnen. wie mohte ich im dîn gunnen?
15	ich gunde dir des tôdes baʓ. nû hâstû wol vernomen daʓ, wie unrehten lôn her gab der frouwen Dîdôn, diu ime gût und êre bôt:
20	sie beleib dorch in tôt. von ime quam nie wîbe gût, tohter, noch ouch dir ne tût. her is aller tugende âne scholt. daʓ du im ie worde sô holt,
25	daʓ sî dem hôhsten gote geklaget.» «nune weiʓ ich, frouwe» sprach diu maget «wes der hêre engildet, wan in nieman mêre schildet. her is ein vorste wol gezogen,
30	swie her wider ûch sî belogen, her is ein edele Troiân und vil reinlîche getân, sô man in rehte besiht. hern glîchet bôsem manne niht.
35	her is von den goten geborn, swie ir in dorch ûwern zorn scheldet alsus sêre und sprechet im an sîn êre: daʓ mohtet ir wol lâʓen,»
40	«des mûʓe dich got verwâʓen!
284	(sprach diu kuneginne), dich betriegent sîne minne, daʓ her dich dunket schône. daʓ dich got gehône!
5	wie getorstestû in ie geloben? nû dû als frû woldest toben unde denken umbe man, wan minnetestû Turnûm dan, der dich minnet manegen tach?»
10	«frouwe» sprach si «ich ne mach, ich bin ze verre drane komen, sîn minne hât mir benomen mîn herze unde mînen sin. mir is leit deich ime sô holt bin,
15	des mûʓ ich sîn unfrô. der minnen got Cupidô der is Ênêases brûder und is Vênûs sîn mûder, diu gewaldege gotinne:
20	die hânt mir sîne minne in mîn herze sô getân, deich ir niht abe mach gestân.» Dô diu mûder daʓ vernam, ir tohter wart si vile gram
25	als sie vil wol bescheinde. Lavîne sêre weinde, wand sir drowete unde schalt. diu maget quam in ir ungewalt. in unmaht sie si ligen lieʓ,
30	leides sie ir vil gehieʓ, in zorne sie danne streich. dâ bleib si varlôs unde bleich diu junkfrouwe lussam, unz ir daʓ herze wider quam.
35	dô rihte si sich ûf und sprach «ôwî minne und ungemach, wie ungenâdich ir mir sît! nû wâres mêr danne zît, daʓ ir mich lieʓet genesen,
40	ob eʓ iemer sal wesen,
285	sô mohtet irs beginnen, wand mîn herze is innen alze unmâʓen heiʓ umb einen man, ders niht ne weiʓ
5	noch mir nie minne zû gewûch. daʓ is doch wunderlîch genûch, deich des niht abe mach gestân. wie sal ichʓ nû ane vân, daʓ ichs in innen bringe
10	mit gefûchlîchem dinge und ich in des mache gewis, daʓ im mîn herze holt is sô harde ûʓermâʓen? daʓn touch mir niht gelâʓen,
15	swie sô ich eʓ erwerbe. eʓ is beʓʓer dan ich verderbe, wandich schiere sterben mûʓ, mir ne werde der hitze bûʓ. ich weiʓ ouch wol, nehein nôt
20	is arger danne der tôt. swie sô mir sî iedoch, ich sterbe ungerne noch, die wîle ich mach lebendech blîben. ich mûʓ, wâne ich, scrîben
25	gefûchlîche an einen brief daʓ grôʓe leit âne lief, des ich mich mûʓ genieten, und wil im enbieten, wie wê mir sîn minne tût.
30	hât her dan manlîchen mût, her sal mir deste holder sîn, swenner weiʓ den willen mîn. dar umbe enbiete ich ime daʓ. her sal ouch vehten deste baʓ,
35	sô daʓ her Turnûm erslât, swanne sô her in bestât, daʓ her sich sîn niemer erwert, ob her mîn iemêr gegert. dar umbe is her mir iemer holt,
40	is her des ubiles âne scholt,
286	des in mîn mûder hât gezigen. ôwî wan hete ich diz verswigen! (sprach diu maget lussam) daʓ eʓ mir ie in den mût quam,
5	des sal ich iemer rouwich sîn. jâ zêch in des diu mûder mîn niwan dorch die scholde, daʓ si mir in leiden wolde. sie verliesent alle ir arbeit,
10	man weiʓ des wol die wârheit, daʓ der hêre Ênêas ie vil unscholdich was umbe solhe missetât: got verwâʓe bôsen rât!»
15	Dô was diu maget reine in der kemenâten aleine. ir angest diu was vile grôʓ. die ture si innen beslôʓ. dô nam des rîchen kuneges kint
20	tinten unde permint, als si diu nôt dar zû treib. welt ir nû hôren waʓ si screib in scônem lâtîne? «eʓ enbûtet Lavîne
25	Ênêase dem rîchen ir dienest innechlîchen, der is ir vor alle man, wande sim baʓ gûtes gan, dan allen den dies ie gesach,
30	und si sîn vergeʓʓen niene mach weder spâte noch frû. unde enbûtet im dar zû, daʓ her der rede sî gewis und vil wol gedenke des,
35	daʓ diu minne vil getût.» alsô dûhteʓ sie gût. dô siʓ gescreib und uberlas und der brief trocken was, gefûchlîche sie in vielt.
40	wîslîche si in behielt,
287	des nam si michel hâle. si erwarb eine strâle, ich ne weiʓ wâ sie si nam diu junkfrouwe lussam.
5	daʓ gevidere si abe bant, den brief si umb den zein want, daʓ lêrde sie diu Minne. die scrift kêrdes enbinne unde bant dô die veder
10	sô gefûchlîche weder, daʓ daʓ nieman ne sach, daʓ der brief drunder lach. Nû hôret wie siʓ ane vienk. zû dem venster sie gienk:
15	dô was eʓ wol mitter tach. lieblîche sie dâ hine sach, dâ ir daʓ herze was. dô quam aber Ênêas mit sînen gesellen dar geriten,
20	des si vil kûme hete erbiten diu junkfrouwe lussam. dô si gesach daʓ her quam, des wart ir herze vil frô unde hûb sich vile hô
25	ir gehuge unde ir mût, alsô noch vil maneger tût, diu ir herzelieb gesiht. von diu ne wundert mich des niht, daʓ sie frô was dô sin gesach.
30	niht langer sie dô lach, frôlîche sie sprank von dem venster ûf den bank. schiere enslôʓ sie die ture und sach in den hof hin fure,
35	diu junkfrouwe wol getân, einen junkhêren stân, einen bogen heter in der hant. si lobetes got daʓ sie in vant. her was ir vater mâch.
40	si winkte im dô si in gesach.
288	dô des der hêre wart geware, vil schiere lief her dare unde alser zû zir quam, dô sprach diu maget lussam
5	«nû tû dorch den willen mîn, des ich dir immer holt wil sîn al die wîle daʓ ich leve, lieber frunt schôner neve, schûʓ die strâle hin abe
10	wider die dâ haldent in dem graben bî der mûre vile nâ. si habent hût wol lange dâ, daʓ is mir leit unde zorn, wande sieʓ ouch hie bevorn
15	al dise wochen tâten. ich vorhte sie verrâten mînem vater al sîn êre. des vorhte ich vile sêre, wande sie die borch besehent
20	unde wartent unde spehent, wâ diu borch sî sô getân, daʓ man ze storme moge gân, swenne der fride ûʓ gêt. ich vorhte, wandeʓ alsô stêt,
25	daʓ wirs betrogen belîben. mahtû si hinnen trîben, des weiʓ ich dir iemer dank, wandir gesprâche is al ze lank.» Dô sprach der edele jungelink
30	«diz is ein angestlîch dink, junkfrouwe, des ir geret. mich dunket gût daʓ irs enberet, want der fride is sô gesworen, daʓ nieman is sô wol geboren,
35	der in hete zebrochen, eʓn worde an ime gerochen, ob man eʓ befunde; hern verlore sîn gesunde unde solde kûme genesen.
40	ich tâteʓ gerne, mohteʓ wesen
289	ân grôʓe sorge mîne.» dô sprach aber Lavîne «eʓn komt dir nimmer zunstaden, dû ne salt niemanne schaden,
5	zû disen stunden salt dû deheinen wunden der rosse noch der lûte, desn gebat ich dich hûte, dû maht wol schieʓen dâ bî,
10	daʓ eʓ dehein schade sî. schûʓ hin dane verre, daʓ eʓ nieman werre, niwan daʓ dû si scheides und in die habe geleides,
15	dâ si dâ haldent al den tach, wandeʓ uns wol geschaden mach. des nis doch nehein nôt.» dô tete her alse sime gebôt, sîn angest was doch vile grôʓ.
20	die strâle her hin abe schôʓ, als in diu junkfrouwe bat, vor die hêren an eine stat. Ênêas sach si vallen. done was under in allen
25	nieman der wiste wannen si quam. ein ritter die strâle nam und gab si Ênêase in die hant. den brief her dar ane vant, der under die vederen was geleget.
30	des im sîn herze wart al beweget. den zein her enzwei brach, ze sînen gesellen her sprach Ênêas der Troiân «si hânt uns unrehte getân,
35	die den fride an uns brechen. nû mach ich wole sprechen, daʓ siʓ an mir beginnen.» do begonder sich versinnen unde sprach «eʓ wirt gût rât
40	umb sus getâne missetât.»
290	geswâslîche er abe nam den brief derm an dem zeine quam. dô hern gesach unde gelas, daʓ dar an gescriben was,
5	dô wart her frô unde sweich. der junkfrouwen her geneich, dâ si in dem venster lach. si frowete sich dô sin gesach unde neich im hin wider
10	von dem venster hin nider. her neich hin ûf und sie her abe. dô reit her nâher zu dem graben und sach vil holtlîchen dar. des wart ein ritter gewar,
15	der was ein spottâre, swie her ein ritter wâre, her sprach alsus dorch sînen spot «waʓ tût mîn hêre, dorch got? war umbe habet her dâ
20	bî dem turne sô nâ? eʓ is ân den rât mîn, ich wil es âne scholt sîn, ob her des missenûʓet, daʓ man in dâ schûʓet,
25	als eʓ vil nâ komen was.» dô winkete ime Ênêas und hieʓ in swîgen stille, wander sînen willen und sînen side erkande.
30	schiere ern dannen sande und bevalch im eine boteschaft. dâ hûb sich diu fruntschaft allerêrest under in zwein, als sint an in beiden schein.
35	Dô frowete sich Ênêas, wand im sîn herze erlûhtet was, daʓ im diu frowede machte lieht. ie doch ne rûmde her sich nieht, die grôʓen froude her versweich.
40	der junkfrouwen her geneich:
291	vil harde sanfte tete ir daʓ und ime was ouch deste baʓ. frôlîche sprach der Troiân «disiu borch is hie baʓ getân,
5	danne si anderswâ sî.» her reit dem venster nâher bî, da diu junkfrouwe inne lach. ir antluze her besach, daʓ alsô minnechlîch was.
10	dô markte Ênêas ir ougen unde ir munt: dô schôʓ in Amôr sâ ze stunt mit dem goldînen gêre eine wunden sêre
15	und Vênûs diu mûder sîn geschûf daʓ im daʓ magedîn lieb wart als sîn eigen lîb, daʓ im nie weder maget noch wîb dâ vor nie sô lieb ne wart.
20	daʓ geliebete im die vart. Dô hielt der helt edele unz diu sunne gienk ze sedele und al die sîne bedrôʓ, sint daʓ in Amôr geschôʓ
25	und her die wunden gewan. ie doch geschûfen sîne man, daʓ her ze herbergen reit und vant sîn eʓʓen al gereit. do her dar zû was geseʓʓen,
30	done mohter niht eʓʓen, weder eʓʓen noch trinken. dô her begonde denken an den sanfte tûnden brief, daʓ denken wart im sô lief,
35	daʓ her des eʓʓennes vergaʓ. mit grôʓer froude er aber saʓ, wand im geliebet was sîn leben. her hieʓ in allen gnûch geben, die dâ vor im sâʓen.
40	si trunken unde âʓen
292	als vil sô sis wolden. dieʓ dâ geben solden, die gâbenʓ willechlîche. Ênêas der rîche
5	her enaʓ noch entrank. diu wîle dûhte in vile lank, want der helt mâre gerne ze bette wâre. Dô man die tische abe genam
10	und er ze sînem bette quam unde her dar ane lach, neheines slâfes her ne phlach, hern mohte noch enkonde. do her denken begonde
15	mit allen sinnen sînen umb die schônen Lavînen, wie rehte minnechlîch sie was, und umb den brief den her las und waʓ im dar an was enboten:
20	do begonder heiʓen unde rôten. von minnen erhitzete im sîn blût und verwandelte im sîn mût. dô wânde der helt vile mâre, daʓ eʓ ein ander wêwe wâre,
25	suht oder fieber oder ride: hern bekande niht der minnen side. des was her ein unfrô man, unze daʓ her sich versan, daʓ eʓ diu starke minne was.
30	do erzornde sich Ênêas, daʓ im war daʓ ungemach; in zorne er zime selben sprach «waʓ is diz oder waʓ sal eʓ sîn? wer hât daʓ herze mîn
35	und mîne manheit mir benomen? war is mîn wîsheit komen? waʓ bedarf ich dirre minnen? sal ich des nû beginnen, des ich nie mêr begân?
40	nû was ich doch hie vore ein man,
293	der herze hete unde sin. daʓ ich nû sus vertôret bin, daʓ is mir an mich selben zoren. ich dahtes lutzel hie bevoren
5	do eʓ mir doch zîteger wâre» sprach der helt mâre. Aber sprach der Troiân «sal mir diz ungmach niht vergân, des mûʓ ich wol sîn unfrô.
10	Amôr unde Cupidô, die mîne brûder solden sîn, und Venûs diu mûder mîn, von den ich dâ bin geboren, si bescheinent mir vil grôʓen zoren.
15	ichn weiʓ waʓs an mir rechen. ich mach wole sprechen, daʓ ich des nie mêr began. wâr ich der fromediste man, der ie gewan den lîb,
20	oder daʓ blôdiste wîb, die ie mûder getrûch, sô tâten sie mir leides genûch, daʓ mir nimmer wirs moht wesen, wandich ne mach doch niht genesen,
25	es ne werde mir schiere bûʓ. nû nâhet daʓ ich vehten mûʓ wider den kûnen Turnûm, daʓ ich gerne wil tûn und vil genendechlîche
30	umb daʓ kunechrîche und umb diz schône magedîn. ob al diu werlt wâre mîn, sone gewunne ich nimmer ander wîb. diz ungemach sal mir den lîb
35	schiere krank machen, sal ich vasten und wachen beidiu naht unde tach, want nieman wol leben mach ân eʓʓen und ân slâfen.
40	nû solde ich mîniu wâfen
294	ze kampfe bereiten. sal ich nû arbeiten beidiu tach unde naht, daʓ benimt mir schier die maht
5	und den lîb und die êre, daʓ vorhte ich vile sêre.» Ênêas sprach aber mê «Minne, ir tût mir al ze wê, wan daʓ ir sîn niht welt enberen.
10	Minne, sal eʓ lange weren, sô mûʓ eʓ mir anʓ leben gân. Minne, waʓ hân ich û getân, daʓ ir mich quelt sô sêre? Minne, nemet ir mir mîn êre,
15	war zû sal mir dan der lîb? Minne, jan bin ich doch niht ein wîb, holfeʓ mich iht, ich bin ein man. Minne, al daʓ ich mach und kan, daʓ hilfet wider ûch niht ein hâr.
20	Minne, ûr burde is mir ze swâr, ichn mach si langer niht getragen. Minne, ichn getar von û niht klagen, swie unsanfte so ir mir tût. Minne, nû trôstet mir den mût
25	schiere, des is mir nôt, Minne, waʓ holfe ûch mîn tôt?» Aber sprach Ênêas «wie seltsâne mir diz was hie bevor al mînen lîb,
30	wande mir nie maget noch wîb sus unmâʓlîchen lieb ne wart. eʓ was ein unsâlich vart, deich ze Laurente banechen reit, dâ von mir disiu grôʓe arbeit
35	komen is und diz ungemach. daʓ man ie von Minnen sprach, wie gewaldech sie wâre, daʓ was mir vil ummâre, dar ûf enahte ich niht ein bast.
40	ich wânde mîn herze wâr sô vast
295	gesigelet mit solhem sinne, daʓ sô unmâʓlîche minne niemer mohte komen dar in. nû is verwandelet mîn sin
5	und unsanft verkêret. sie hât mich gelêret in vile korzer stunt, daʓ mir ê was unkunt hie vor uber den dritten tach.
10	nû weiʓ ich wol waʓ sie tûn mach, des ich wol innen worden bin; und hete ich tûsent manne sin und solde ich leben tûsent jâr, sô weiʓ ich wol daʓ vor wâr,
15	daʓ ich ne mohte ir wunder gezelen albesunder von der Minne diu si tût, beidiu ubel unde gût. Genâde (sprach her), Minne,
20	sint daʓ ich des beginne, deich û sal dienen, Minne, so bedarf ich gûter sinne. der helfet ir mir, Minne, ê danne ich gar verbrinne.
25	waʓ hilfet û daʓ, Minne, daʓ ich sus smelze enbinne? genâdet ir mir, Minne, ê ich den schaden gewinne. getrôstet mich, Minne,
30	starkiu kuneginne! bistû mîn mûder, Minne, Vênûs, hêriu gotinne, ob ich dîn sun bin, Minne, des brink mich schiere inne.»
35	Ênêas dô aber sprach «mir is diz freislîch ungemach vile gâhes ane komen, daʓ mir die rûwe hât benomen, daʓ mir ê unkunt was.
40	want sint ich den brief gelas,
296	der mir dorch minne wart gesant, und dâ ich ane gescriben vant daʓ Lavîne mir enbôt: wiste ich daʓ mir mîn nôt
5	dar ane gehalden solde wesen, ich ne hete in nie gelesen, und daʓ ich arnen solde sus. waʓ wîʓet mir frou Vênûs und Âmôr unde Cupidô?
10	ich wiste wol daʓ frou Dîdô von minnen leit grôʓe nôt, dô si ir selben tet den tôt. wâr mir dô zer selber stunt zehen teil sô von minnen kunt,
15	als ich sider hân vernomen, ichn wâre nie von ir komen. Diu was mir (sprach her) vile holt, von diu hân ich sunde und scholt, daʓ sie verlôs ir lîb.
20	waʓ wunders was daʓ umb ein wîb, ob ir diu Minne nam den sin? und daʓ ich ein man bin und vil sterker solde wesen, ichn hân wan einen brief gelesen
25	und eine junkfrowen gesehen, dâ von mir liebe sal geschehen, desne hân ich niht genoʓʓen, wan daʓ mich Âmôr hât geschoʓʓen dorch daʓ ouge in daʓ herze mîn.
30	als an mir wol wirdet schîn, want mir wirs is tûsent stunt, dan ich mit wâfen wâre wunt, mit swerden unde mit speren, daʓ mich arzâte mohten neren,
35	mit geschoʓʓe und mit spieʓen: sô mohte ich des genieʓen, daʓ mich arzâte bunden, die mich geheilen kunden, daʓ manegem fromen man geschiht.
40	zû dirre wunden hôret niht
297	salbe noch phlaster. mîn vînde soln mir laster und missewende sprechen, die sich welnt an mir rechen,
5	und sprechent daʓ ich sole verzagen. des mûʓ ich von dem briefe klagen, daʓ her mir ie quam ze hant. wan hete ich in verbrant und mich an ime gerochen!
10	waʓ hân ich nû gesprochen? (sprach der Anchîses sun) waʓ mohte mir ein brief getûn, diu tinte und daʓ permint? ich was nû tumber danne ein kint,
15	daʓ ichs den brief hân gezigen, daʓ mohte ich wole hân verswigen.» Der hêre an sînem bette lach. her sprach «hêre, wâ is der tach?» dô in des ligennes bedrôʓ,
20	wand sîn ungemach was grôʓ, dô rihter sich ûf unde saʓ. her sprach «war umbe klage ich daʓ, daʓ mir doch sô lieb was, daʓ ich den sâlegen brief las
25	und Lavînen sach die maget, diu mir daʓ leit hât geklaget, daʓ ir mîn minne tût? ne solde mir daʓ niht wesen gût, daʓ wâre ein michel unheil.
30	iedoch vorhte ich ein teil, diu wîb kunnen liste vil: waʓ ob si mich betriegen wil, und den hêren Turnûm al daʓ selbe wil tûn
35	oder lîhte hât getân (sus sprach der wîse Troiân) und tût daʓ dorch die scholde, daʓ si unser beider holde dâ mit erwerbe mit sinne,
40	sweder unser sie gewinne,
298	daʓ her si minne deste baʓ? ôwî, war umbe sprach ich daʓ, sô rehte holt ich ir bin? wannen quam mir der unnutze sin,
5	der mir den zwîfel geriet? zwâre des ne trouwe ich niht daʓ si sus ze mir tû: sie is alze kint der zû und z'edele und ze wol getân.
10	ich wil daʓ wiʓʓen âne wân, daʓ eʓ was der Minnen rât ân vals und âne missetât. Zwâre (sprach Ênêas), den selben brief den ich dâ las
15	den tihte diu Minne. hern moht von wîbes sinne niemer sô getihtet sîn. Lavînâ daʓ magedîn, diun getorsteʓ niemer bestân,
20	het eʓ diu Minne niht getân, daʓ si sie dar zû betwank. mîn brûder Âmôr habe dank, der der minnen hât gewalt, daʓ her si machete sô balt,
25	daʓ si die kûnheit ie gewan. ich, der dâ solde sîn ein man an herzen unde an lîbe, ichn kondes deheinem wîbe nie sô wol gebieten.
30	nû mûʓ ich mich genieten angest unde sorgen âbent unde morgen beidiu naht unde tach, unz daʓ ich erdenken mach
35	mit allen sinnen mînen, deich die schônen Lavînen der rede innen bringe mit ernesthaftem dinge, wieʓ mir umbe ir minne stêt,
40	diu mich sus unsanft ane gêt,
299	dar umbe ich lîde solhe nôt. daʓ si mir an ir briefe enbôt, ich weiʓ wol daʓs mir niene louch. swîch der rede, sie ne touch,
5	lâʓ si betalle blîben, die man soln den wîben sus unmâʓer minnen niht bringen innen, wand eʓ ne wâre nie gût,
10	si worden alze hôch gemût und alze stolz wider die man. der is wîse der sich bewaren kan, swenne es ime nôt geschiht. enbûte abr ich ir sîn niht,
15	daʓ sie niene weiʓ, wâ von ich bin kalt unde heiʓ, sô vorhte ich vile sêre, daʓ si von mir kêre ir herze unde ir mût.
20	nein si weiʓ got noch entût.» Manlîche sprach Ênêas «wol mich daʓ ich ie gelas den brief der mir von ir quam, und wol mich daʓ ich ie vernam,
25	daʓ ich dar an gescriben vant, unde sâlîch sî diu hant, diu in screib unde vielt, diu in sneit unde behielt und diu in umben zein want
30	und diu die vederen drûf bant mit scôneme sinne. sâlich sî diu Minne, diu tihte den brief und daʓ liet. ichn vorhte Turnûm nû niet
35	noch alle die sîne. sâlich sî Lavîne, diu mir die boteschaft enbôt. bestêt mich Turnûs, deist sîn tôt, eʓ wirt ein ungelîcher kamp
40	als umben lewen und umbeʓ lamp.
300	des bereite ich in schiere. ob sîn wâren viere, ich benâme in allen daʓ leben. Lavîne hât mir gegeben
5	kûnheit unde sin, daʓ ich zehenstunt sterker bin und kûner danne ich ê was, sint daʓ ich den brief gelas.» Do verstunt sich Ênêas,
10	daʓ im ein teil gesenftet was unde er rehte was bedaht. dô was zergangen diu naht und was hôhe ûf der tach. der hêre an sînem bette lach
15	und slief unz an den undern. desn darf nieman wundern, der sîn kan genemen war, wande her die naht gar hete uberwachet.
20	daʓ het diu Minne gemachet. des slief deste vaster der helt âne laster. Nieman getorste in wecken. des wâren sîne recken
25	sumelîche vil unfrô unde sprâchen «wie tût sô unser hêre Ênêas? wie ungewon her des was, daʓ her sliefe ze dirre zît!»
30	sumelîche sprâchen dorch nît «wil her nû siech wesen, sô mûʓ Turnûs wol genesen und behalden diz rîche.» ouch vorhten sumelîche,
35	daʓ der helt mâre anders siech wâre, daʓ klageten die sîne. dô was diu maget Lavîne ûf gestanden vile frû,
40	wand diu Minne twank si der zû,
301	diu si mûte unz an den tach. in dem venster sie lach, alsô sie gewone was. si warte, wanne Ênêas
5	zû quâme geriten, des si unsanfte hete erbiten mit grôʓeme getwange. dô was her sô lange, daʓ es die junkfrowen bedrôʓ,
10	des was ir rouwe vile grôʓ. Si sprach mit grôʓeme zorne «ôwê ich bin diu verlorne, wie frû ich unsâlich was! waʓ wîʓet mir her Ênêas?
15	wil her mich nû sus mîden? daʓ mach ich ubel erlîden, daʓ her nû niht rîtet here. ich vorhte daʓ her niene gere der minnen der ich ime enbôt.
20	wâre ich danne dâ vor tôt mit êren âne sunde, ê ich sîn gewunne kunde, son dorfte mich nieman klagen, wan diz ne mach ich niht verdagen.»
25	Aber sprach daʓ magedîn «ich mûʓ wole unfrô sîn, daʓ ich ie wart geboren, sint ich mîn êre hân verloren und verlûse ich ouch den lîb dâ zû.
30	daʓn rûche aber ich ob ich tû, mir is der lîb ummâre, sal ich offenbâre missevarn hân wider den Troiân. waʓ hân abr ich mit ime getân,
35	wan daʓ ich im mîn minne enbôt? des betwank mich vile groʓiu nôt, daʓ ich niht konde gedenken baʓ. wil her mich haʓʓen umbe daʓ, daʓ ich im bin von herzen holt,
40	sô is eʓ der bôsheite scholt,
302	der in dâ zêch diu mûder mîn. moht ich sîn vîant denne sîn, ich haʓʓete in vor alle man! ich enmach noch enkan
5	sîn vîant niet gewesen, sal ich ouch nimmêr genesen. war umbe bin ich im aber holt, sint her mich vêhet âne scholt und verderbet mir den lîb?
10	nun wart ich doch nie sîn wîb noch her nie mîn man, doch ich sîn niht vergeʓʓen kan.» Dô Lavîne diu maget lange habete geklaget,
15	daʓ ir herzen was wê, dô hûb sich mê unde mê ir ungemûte unde ir zoren. «Ênêas wart mir geboren ze grôʓem unheile.
20	nû mir daʓ was enteile, daʓ ich in minnen solde und her mîn niene wolde, wie mach ich in gewinnen? sint her des wart innen
25	der scône ubel Ênêas, daʓ ich im sô holt was sô harde ûʓer mâʓen, sint hât her mich verlâʓen, daʓ her mich niene wolde sehen.
30	als leide mûʓe ime geschehen, als mir von im geschehen is. deste baʓ getrouwe ich des, daʓ im unmâre sîn diu wîb. sô haʓʓe got sînen lîb,
35	daʓ ich sîn kunde ie gewan. waʓ tûfels minnet her an dem man? eʓ is ein michel bôsheit. wiste ich des die wârheit, daʓ her des scholdich wâre,
40	mir wâre vil unmâre
303	sîn schade und sîn schande. hern sal in diseme lande mit êren niemer blîben, der vîant is den wîben.»
5	Aber sprach in ir zorne diu schône wol geborne «wie bin ich komen her zû? sô vorhte ich daʓ ich ubel tû, daʓ ich den hêren schelde.
10	waʓ ob ichs noch engelde, ichn mach eʓ aber niht lâʓen. ich bin im ûʓer mâʓen beidiu holt unde gram. daʓ her ie in diz lant quam,
15	daʓ im got geswîche!» si schalt in freislîche, als ir der grôʓe zorn geriet. done weste aber sie niet, daʓ der hêre Ênêas
20	in solhen nôten dorch si was umbe ir edele minnen, diu mit sô scharphen sinnen vor si wider in vaht unde in dar zû hete braht,
25	daʓ her an sînem bette lach wol unz an den mitten tach. her lach stille und schône wol unz ûf die nône. dô der tach wenden began,
30	dô wolde trôsten sîne man Ênêas der wîgant. her hieʓ im geben sîn gewant, als eʓ ime wol gezam. dô her eʓ an sich genam,
35	dô saʓ der scône Troiân ûf ein mûl wol getân mit ein teil sîner manne. her reit ouch banechen danne dâ hin dâ sîn herze was.
40	dô der hêre Ênêas
304	ze Laurente zû reit uber daʓ velt vile breit her und die sîne, do gesach in Lavîne
5	diu junkfrouwe lussam, daʓ her dar zû geriten quam. dô wart sie vil unfrô, daʓ si geredet hete sô, daʓ si Ênêam den hêren schalt.
10	ir herze wart ir vile kalt von rouwen und von leide: diu Minne twank si beide. si sprach mit grôʓen rouwen «wer sal mir nû getrouwen
15	deheiner slahte gûtes, sint ich sô lîhtes mûtes und alsô unstâte bin, daʓ ich dorch mînen bôsen sin sus ubellîche hân getân?
20	war umbe schalt ich den Troiân und sprach im an sîn êre? nû vorhte ich vile sêre, her wiʓʓe alleʓ daʓ ich sprach. an ime ich rach
25	niht wan daʓ hêr Ênêas ie biderbe unde gût was ân alle missewende und is unz an sîn ende mit manlîchem sinne.
30	ich vorht daʓ im diu Minne al mîn rede habe gesaget. jâ vorhte ich (sprach diu maget), daʓ her mir nimmer werde holt, dar zû hât her rehte scholt.»
35	Aber sprach daʓ magedîn «unsâlich mûʓe der zorn sîn, der mir den sin alsô benam, daʓ ich dem hêren wart gram dem vil edelen Troiân.
40	eʓ mûʓ mir ubile ergân
305	dorch mîne unstâte. wie sanfte mir daʓ tâte, mûste ichʓ ime gebûʓen. mit mînen baren fûʓen
5	woldich ze sîme gezelde gân, ne dûhteʓ nieman missetân und hete ich mîn selber gewalt. eʓn worde nimmer sô kalt, neweder îs noch snê,
10	daʓ mir daʓ ungmach tât sô wê, deiʓ mich der verte moht bekêren, moht ichʓ anders tûn mit êren.» Sie sprach aber dô dar nâch «mir is leider al ze gâch,
15	des mûʓ ich sîn unfrô. wie hân ich nû geredet sô? daʓ ich dar zime solde gân daʓ wâre unwîblîch getân und wâre laster, tâte ich daʓ.
20	ich wil mich es bedenken baʓ, ê ich sô freislîche tû.» dô reit der hêre Ênêas zû, her und die sîne. do vergaʓ aber Lavîne
25	des ir ê gemût was. dô geneich ir Ênêas der mâre und der rîche und sach vil fruntlîche gegen dem venster dâ si lach.
30	minnechlîch sin ane sach und geneich ime wider von dem venster hin nider. sie sach here und her dar. des worden sîne man gewar,
35	die mit im dar quâmen. ze spotte sie daʓ nâmen. lachende sprach ein Troiân, des hêren Ênêases man «hêr, sal uns daʓ dunken gût,
40	sô sehet daʓ ir wole tût,
306	daʓ ir sô lange habet dâ bî dem turne sô nâ. moget ir rîten her abe ein teil verrer von dem graben,
5	des moget ir baʓ genieʓen, dan daʓ ir ûch lât schieʓen oder werfen von den zinnen. dâr is etwer innen, her sî junk oder alt,
10	heter die borch in sîner gewalt, her gewunne ûch schiere drin, mich ne triege mîn sin.» Dô lachete hêr Ênêas und markte daʓ eʓ sîn spot was,
15	dô sis worden gewar. her sach offenlîche dar âne vorhte und âne schaden. im was iedoch sîn herze entladen. ne mohte er ir niht nâher komen
20	iedoch was ime benomen sîner grôʓen swâre ein teil. wandeʓ dûht in ein michel heil, daʓ si in sô lieblîch ane sach. dô hielt her allen den tach
25	unze daʓ eʓ vinster wart. dô hub her sich an die vart und hin ze herbergen reit. daʓ was ein michel arbeit den gelieben beiden:
30	daʓ sie sich mûsten scheiden, daʓ was âne ir beider dank. wâr der tach einer wochen lank, hern wâre niht dannen komen, als ich die rede hân vernomen.
35	Dar nâch schiere quam der tach daʓ daʓ tagedink gelach von den gûten knehten, die dâ solden vehten, Turnûs unde Ênêas,
40	alsô dô gelobet was.
307	der kunich ûʓ Laurente reit an eine schône wisen breit, lank unde grûne, und Ênêas der kûne
5	und der stolze Turnûs. dô reit der kunech Latînûs vor mit sînen vorsten, di im helfen wol getorsten, die tûrsten von dem lande,
10	mit ir îsengewande und mit schilden und mit speren, alsô sie sich wolden weren ob es nôt wâre, und die borgâre,
15	die dâ mite solden sîn. der alde kunich Latîn der fûrde selbe sîne gote. her ne hete deheinen boten, den her si lieʓe rûren:
20	her woldes selbe fûren, dar ûffe si sweren solden, die dâ vehten wolden als si doch getâten. eʓ hete alsô gerâten
25	der wîse kunich Latîn, daʓ ir beider man solden sîn alsô verre hin dane, daʓ si niene sâgen ane daʓ dâ solde geschehen,
30	man lieʓe siʓ niht ê sehen wan soʓ ergangen wâre. daʓ het der kunich mâre getân dorch sîn gewarheit. doch gwan hers michel arbeit.
35	Dô daʓ geschaffet was alsus, dô hieʓ der kunech Latînûs den kreiʓ bereiten, einen teppich breiten an der wisen ûf daʓ gras.
40	ein phelle drûf geleget was
308	vil tûre unde rîche, den lobeten grôʓlîche alle die in gesâgen. sîn gote dar ûffe lâgen,
5	dar ûffe sie solden sweren, die sich dâ wolden weren Ênêas und Turnûs. daʓ meisterde Latînûs. Dô sprach der hêre Ênêas
10	ein rede der im nôt was ze dem kunige Latîne. daʓ hôrden die sîne arme unde rîche, her sprach gezogenlîche
15	«hêre kunich Latîn, ob eʓ ûwer genâde sîn, gerûchet hôren mîniu wort. sumelîche hânt eʓ wol gehôrt, wie ich her zû bin komen,
20	sumelîche hânt es niht vernomen, die wil ich daʓ siʓ merken und ensolen mich niht sterken an deheiner slahte unreht. wolde ich disen gûten kneht
25	verderben dorch mînen hômût, daʓn solde ûch niht dunken gût, wandeʓ wâre eine missetât, ouch hân ichs gerne ûwern rât.» Aber sprach der Troiân
30	«mîn alder ane Dardân der was ein vorste hie bevoren gewaldich unde wol geboren hie von diseme lande. dô in Fortûnâ sande
35	hin ze Troie in daʓ lant, dô gewan der wîgant einen sun der hieʓ Trôas, nâch dem Troie genamet was, daʓ gnûge wiʓʓen vor wâr.
40	sint heter Troien manech jâr
309	mit vil grôʓer gewalt, unz si der missetâte engalt, der Pâris tete an Elenam, dô her si Menelâô nam,
5	dar umbe uns Menelâûs besaʓ. dô wiste ich wârlîche daʓ, daʓ ich eʓ niht mohte erweren. dô hieʓen mich mîn lîb neren mîne mâge die gote:
10	alsus bin ich in ir gebote komen mit arbeit here uber diz breite mere an mîn rechteʓ erbe, daʓ ich hie gerne erwerbe.»
15	Her sprach «dô ich here quam, do enphienk mich als im wol gezam mîn hêre der kunich Latîn und swûr mir die tohter sîn ze gebenne ze wîbe
20	und nâch sîme lîbe sîn erbe und sîn rîche. daʓ wil gewaldechlîche der hêre Turnûs wenden. nû mûʓen wirʓ verenden
25	mit unser eines lîbe. is daʓ ich lebende blîbe und sal es glucke walden, sô wil ich gerne behalden ûwer tohter (sprach her), hêre mîn.
30	ich wil gerne ûr man sîn die wîle daʓ ich werde leben. swaʓ ir mir gerne wellet geben, daʓ diene ich gerne swâ ich mach beidiu naht unde tach
35	mit dienste und mit gûte. ich wil michs gerne hûten, daʓ ich ûwer holde von mîner scholde nimmer wil verwerken,
40	daʓ solt ir rehte merken.
310	is aber daʓ eʓ sô ergêt, daʓ mich gewaldeget oder slêt der herzoge Turnûs, so gedinge ich daʓ Ascânjûs
5	mîn sun mit fride mûʓe varen. daʓ solt ir, hêre, bewaren al nâch ûwern êren, swar her welle kêren, her unde mîn here,
10	an dem lande od uber mere, swâ eʓ ime gevalle.» dô lobeten sie alle des hêren Ênêases rede und gâben sîme sune frede,
15	ob eʓ alsô quâme, daʓ Turnûs den sige nâme, daʓ Ascânjûs dar nâ gûten fride hete dâ vierzên tage und vierzên naht
20	und des wâre wol bedaht und sint dannen kêrde, swar in sîn sin lêrde, her unde sîn here. wolder varen uber mere,
25	daʓ im daʓ geviele, si wolden im sîn kiele spîsen unde bouwen: daʓ gelobeten sie in trouwen. Die wîle daʓ Ênêas
30	an der rede alsô was und alsô schûf sîn dink und Turnûs der jungelink, daʓ si iezû sweren solden unde vehten wolden,
35	zû der selber zît wart ein michel strît under ir zweier mannen, die verre wâren dannen. den hûb ein Turnûses man,
40	des ich genennen niene kan.
311	her was ein ritâr wol geboren unde sprach dorch sînen zoren ze sînen gesellen allen «wir mogen uns schamen betalle,
5	daʓ wir uns lâʓen an daʓ heil und an unreht urteil und an Turnûm den einen man, der nie gelucke gewan wider Ênêam den Troiân.
10	wirt daʓ heil sô getân, daʓ Ênêas gesiget und Turnûs hie tôt geliget, daʓ wir dan iemer mêre schaden und unêre
15	von disen Troiânen mûʓen dolen und ouch verschalket wesen solen : got hône in, der eʓ geriet, entrouwen ich ne volges niet.» Aber sprach der helt gût
20	«ich wil û sagen mînen mût, ob eʓ ûch dunket wol getân, sô râte ich daʓ wir bestân des hêren Ênêases man, dar ich nie trouwe zû gewan,
25	die dort habent an der schare. ich wil daʓ wir ûf si varen unde sie dorchbrechen, wir slahens unde stechen mit den swerden und mit den speren,
30	sin mogen sich uns niht erweren, si sint uns wol ze mâʓen. daʓ wirʓ sô lange lâʓen, daʓ is mir (sprach her) vile zorn.» daʓ ros nam her mit den sporn,
35	niht mêre her ne sprach, einen Troiân her stach von dem rosse in einen graben. dô wart ein michel strît erhaben, her wart errochen schiere:
40	zwên Ênêê soldiere
312	den Troiân si râchen, ze tôde sie stâchen des hêren Turnûses man, der des strîtes began.
5	Dâ was hômût unde nît. des wart vil herde der strît, dô man sûchen began des heren Ênêases man, die sich vil vaste werden
10	mit den scharphen swerden und sich wole konden weren mit den swerden und mit den speren. mit den scharphen gêren si macheten manegen sêren
15	unde mit den spieʓen, si slûgen unde stieʓen manege grôʓe wunden, diu nie ne wart gebunden. si schuʓʓen vaste mit den bogen.
20	vile dicke dâ flogen schefte unde phîle. dâ was eine wîle der strît vile herde die wîle daʓ her werde.
25	Dâ was michel nôt. von diu lach ir vile tôt, desn mohte dehein rât sîn. dô der kunich Latîn diu starken mâre vernam,
30	eʓ dûhte in vile freissam, her wânde er wâre verrâten: her drowete den dieʓ tâten, eʓ ne dûhte in niht ein spot. her nam sînen liebsten got,
35	der andern aller her vergaʓ, hern konde niht gedenken baʓ, wan als im sîn zageheit riet: hern trouwete genesen niet, daʓ herm gehelfen mohte,
40	her hûb sich ze flohte.
313	dô daʓ gesach Ênêas, als ungewâfent sô her was sprank her schiere ûf ein ravît: her wolde scheiden den strît.
5	Den schilt her an den hals hienk, ein sper her in die hant gevienk, her quam vil schiere dâ si striten, wande her was wol geriten. her gebôt sînen mannen,
10	daʓ si kêrden dannen. eʓn was aber dô niht zît, si wâren sô komen in den strît, daʓ si mit deheinen êren dar ûʓ mohten gekêren.
15	des erbalch sich Ênêas dorch daʓ der kamph erlenget was zwischen im und Turnûm, den her gerne wolde tûn. Daʓ aber der hêre Ênêas
20	dar ungewâfent komen was, des gewan her schaden vile grôʓ. ein schutze im dorch den arm schôʓ mit eime geluptem phîle (daʓ was ein ubel wîle,
25	als ime wart vil wole schîn) in den zeswen arm sîn. dar greif der wîgant mit der winsteren hant, ûʓ zuckete her den zein:
30	dô bleib daʓ îsen in dem bein sô wundern vast dar inne, daʓ herʓ niht mohte gewinnen. her was von zorne worden warm. dô geswal im der arm
35	von dem bûche unz an die hant: daʓ ervorhte der wîgant. Hern wiste waʓ her solde tûn. dô quam Ascânjûs sîn sun und sîner manne viere.
40	si brahten in vil schiere
314	von dem strîte uber daʓ velt und leiten in in sîn gezelt. Ênêas der wunde man her schûf daʓ man ime gewan
5	einen arzât, in sîner wîs was her geheiʓen Lâpîs. her konde vil der bûche. sîne malhen her resûchte, schiere her dar ûʓ nam
10	triakel unde dictam und ein wênege zange gefûge unde lange, slehte unde kleine, dâ mit her ûʓ dem beine
15	daʓ phîlîsen gewan und ernerde den edelen man, wanderʓ wolde kunde. her heilde im die wunde mit pigmente vile gût
20	unde trôste im sînen mût dem hêren âne laster. her machete im ein phlaster, den arm her im dâ mite bewant von der asseln her unz an die hant,
25	dâ von her vil schiere genas. dô wâfende sich Ênêas, wander sîner lûte vorhte. wunder her sint worhte des tages in dem strîte.
30	dar quam her an der zîte. Dô eʓ komen was alsus und eʓ vernam Turnûs, daʓ der hêre Ênêas sô freislîchen wunt was,
35	des wart sîn herze vile frô und erhûb sich sîn gemûte hô. her wâfende sich sâ zehant, sînen helm her ûf bant, sîn îsenhosen leit her an.
40	selbe nam her sînen van,
315	her leite ein hêrlîche schare ze storme harde wole gare und hûb sich vaste in den strît und quam dar als die dûhte zît,
5	den her ze helfe quam. dô wart ein storm freissam. Mit grôʓer mankrefte zestâchen sie die schefte, daʓ die sprindeln ûf flogen.
10	diu swert si riterlîche erzogen, lûte si erklungen. dâ si ze samene drungen der wech wart dâ vil enge, dâ wart grôʓ gedrenge
15	in dem wîten gevilde. sie zerhiewen die schilde, als si wâren von glase. dâ lach blûtich in dem grase vil manech bodech âne houbet,
20	daʓ es nieman geloubet. an den zwein strîten was in korzen zîten vile manech helt gût stolz unde hôchgemût,
25	daʓ dâ vile wole schein. dâ ne wolde ir nehein dem anderen entwîchen. sie lieʓen dare strîchen die degene ûʓ erwelde
30	die Turnûses helde und die Troiâne. dâ wart des lîbes âne vile maneger mûder baren, dâ sich gemischten die scharen,
35	dâ schare wider schare drank. eʓ wâre ze sagene alze lank, wer dâ genas und wer dâ starf, die man alle nennen niet endarf noch genennen niene mach,
40	wan daʓ ir vil dâ tôt lach.
316	Si wâren helide gûte. des wart dâ von dem blûte daʓ gras rôt und der melm. dâ wart verscrôten manech helm
5	unde manech sarrink. dâ quam ein stolzer jungelink engegen Turnô gevaren, dô her quam mit sîner scharen. der Troiân hieʓ Neptânâbûs.
10	«got weiʓ (sprach her), hêr Turnûs, ir wânet des niht sîn mach, ir uberwindet disen tach nimmêr mit ûwern êren. ir habet unsern hêren
15	verrâten in den trouwen. daʓ sal ûch gerouwen an diseme tage hûte. nû welt ir unser lûte alle vahen unde slân:
20	eʓ mûʓ al anders ergân. is mîn hêre nû wunt, her mach wol werden gesunt, sô daʓ irs komet in grôʓe nôt. und wâre her nû gare tôt,
25	beide her und sîn sun, und woldet ir gewalt uns tûn, wir solden uns fromechlîche weren. irn dorfets nimmer gegeren, eʓn sî daʓ ich ersterbe.
30	diz lant is unser erbe: wâr halt Ênêas begraben, dannoch sô wold ich behaben mit den frunden mînen die schônen Lavînen
35	und daʓ kunichrîche und wolde namelîche kunich hie belîben. irn moget uns niht vertrîben, sô wol erkenne ich ûwer maht,
40	als lîhte als ir habet gedaht.»
317	Turnô was diu rede zorn. diu ros hiewens mit den sporn, dâ si beide ûf sâʓen. der rede sie vergâʓen.
5	Neptânâbûs Turnûm stach, sô daʓ im sîn spere brach, mit micheleme zorne in sînen schilt vorne. daʓn war Turnô niht ein bast,
10	wande sîn schilt der was vast. dô her dem stiche gesaʓ, des geldes her im niht vergaʓ Turnûs der wîgant, wander fûrde an sîner hant
15	einen wol geslihten spieʓ: dorch den halsberch her in stieʓ und in daʓ herze dorch den lîb. her sprach «ich behalde mîn wîb und mîn kunichrîche
20	vor dir gewaldechlîche immer unze an mînen tôt. dû mûst mich lâʓen âne nôt, wandich von dir erlôst bin. dû soldest dînen bôsen sin
25	gescholden haben der dirʓ geriet: ichn bin ein verrâtâre niet. hâstû mich bescholden, daʓ is dir wol vergolden, daʓ ichʓ nimmer geklage.
30	eʓn sî daʓ man dich hinnen trage, sô mûst dû der erden hie ze teile werden, dîn fleisch und dîn gebeine. dû geligest aleine
35	alles dînes kunnes. ob dû ie vîant gewunnes, den hân ich vil wole erlôst. Ênêas darf neheinen trôst zû dir haben mêre,
40	swar sô ich gekêre.»
318	Dô der hêre Turnûs sich gerochen hete alsus, dô was her frô unde gemeit. vermeʓʓenlîche er danne reit,
5	her besande aber sîne man. vile schiere her gewan grôʓ here under sînen van. die Troiâr rander aber an, wand der hêre Ênêas
10	dâ bî in niene was und si ouch mûde wâren und in diu lide swâren von grôʓen stichen unde slegen. si heten manegen gûten degen:
15	sin mohten im niht gestrîten wol zû den selben zîten vor der grôʓen uberkraft. des wart Turnûs sigehaft an Ênêases mannen.
20	si mûsten wîchen dannen. die Troiâne mit ir van flohen gezogenlîche dan werhaft uber daʓ velt engegen ir hêren gezelt.
25	dâ widerreit in Ênêas, wol gewâfent her was, der leite ein sûberlîche schar. dô des Turnûs wart gewar, daʓ der hêre Ênêas
30	gewâfent unde genesen was, don trouwete er sich niht erneren. iedoch wolder den lîb erweren, hern wolde sterben dannoch unde flouch, ungerne iedoch:
35	desn mohte ander rât sîn. daʓ wart im vil wole schîn, her mûste dannen kêren mit schanden, niht mit êren. Dô der hêre Turnûs
40	fluhtich wart alsus,
319	âne strît und âne were, don was niht wunder ob sîn here ein teil verzagete. wie gewaldechlîch dô jagete
5	der herzoge Ênêas! swes ros dô niht snel was under Turnûses mannen, der ne quam neheiner dannen. swes ros niht mohte loufen,
10	der mûsteʓ tûre koufen mit sîn selbes lebene, swieʓ im was ze gebene. swer zû der erde dâ quam, vil unsanft er sîn ende nam.
15	swelher dâ besnebete, vil unlange er lebete, wander wart ertrettet. im was dâ sô gebettet, daʓ her immer mêr dâ lach
20	unz an den jungisten tach. Ênêas was erbolgen. swen her mohte ervolgen und mit dem swerde erlangen, des leben was ergangen,
25	swie gerne her sich werde. mit dem scharphen swerde, daʓ dâ smidete Vulcân, dâ mit slûch der Troiân manegen freislîchen slach.
30	vil unde vil dâ tôt lach der rosse und der manne. Ênêas treib si danne unz zû Laurente in die borch die strâʓe al dorch unde dorch.
35	her slûch si zû der porten in. dâ was michel gewin den die dâ jageten. die andern die verzageten, si lieʓen schilde unde spere
40	und aller slahte gewere,
320	manech ros wol getân lieʓen sie ledich stân unde entrunnen dar abe unde flohen in die graben,
5	daʓ si den lîb nerden. niht langer sie sich werden. Ênêas was des vile frô, daʓ eʓ komen was alsô, daʓ Turnûs was verzaget
10	und daʓ her in hete gejaget ze Laurente mit gewalt. dô schûfʓ der mâre helt balt mit manlîchen dingen. dâ hieʓ fûre bringen
15	der herzoge Ênêas swaʓ in der inren mûre was und dem ûʓerem graben, daʓ brander alleʓ samet abe, swem eʓ leit wâre.
20	dô die borgâre daʓ verborge sâgen brinnen, dô vorhten si in dar innen in der mittern mûren, koufman und gebûren,
25	ritter unde hêren. do begonde der zorn sich mêren. Dô klagete eʓ Latînûs. dô antworde im Turnûs vor allen den gûten knehten,
30	her sprach «ich wil vehten eine wider den Troiân. getar mich Ênêas bestân, ich wil ime an gesigen oder mit êren tôt geligen,
35	ê danne ich die schande dole in diseme lande von ime an mînem lîbe, oder daʓ her mich vertrîbe, ich wil ê kiesen den tôt.»
40	der kunich die rede enbôt
321	Ênêase dem Troiân, ob her den kamph wolde hân, alsô her gelobet was. dô sprach der hêre Ênêas
5	der kûne und der stâte, daʓ her in gerne hâte. Turnûs dô niene beite, ze kamphe er sich bereite. als tet der hêre Ênêas.
10	alsô gewâfent sô her was her quam zû dem strîte, daʓ her sich zû der zîte niender wâfende baʓ, wan daʓ her ûf ein ros saʓ.
15	alsô tete ouch Turnûs. selbe der kunech Latînûs her ne sûmete eʓ niet: her schûf eʓ unde beriet, als eʓ ime wol gezam.
20	von in beiden her nam gîsel dier dar zû erkôs, sweder ir dâ worde sigelôs oder sweder ir den sige gewunne, daʓ des andern man und sîn kunne
25	der vîantschefte sich verzigen und des haʓʓes geswigen unde daʓ versprâchen, daʓ siʓ nimmer gerâchen. ûf alsô getâne rede
30	schûf der kunich einen frede. Uʓ Laurente dô reit ein schar lank unde breit mit den zwein gûten knehten, die dâ wolden vehten,
35	Turnûs unde Ênêas, da der kamph ê gelobet was, der alsô was gescheiden, daʓ eʓ in schadete beiden und dem kunige Latîne.
40	dô was diu maget Lavîne
322	ûf ein palas vile hô und sach daʓ man eʓ schûf alsô, daʓ sie dâ vehten solden die si beide haben wolden.
5	umb den einen leit si grôʓe nôt, lâge aber der ander tôt dâ wâre ir lutzel leides umbe. «ôwê (sprach si), ich tumbe, wie krankes herzen ich bin.
10	âne witze und âne sin! diu gelîche hân ich wol getân, daʓ Ênêas der Troiân der lobesâlige man mîn kleinôde nie gewan.»
15	Si sprach «het her mîn hârbant! daʓ ichʓ ime hete gesant, wie lieb mir daʓ nû wâre! heteʓ der helt mâre umb sîn houbet gebunden,
20	sô wâre im vor den wunden daʓ houbet deste baʓ behût und wâre im vor die slege gût. ôwê (sprach si), ich unwîse, heter aber mîne rîse
25	nû ze disen stunden an sînen schaft gebunden, daʓ eʓ wâre âne laster, sô wâre ouch deste vaster sîn spere unde sîn schaft,
30	ouch heter deste grôʓer kraft.» Aber sprach diu junkfrouwe ? hete her doch mîne mouwe an den armen sînen, eʓ solde wole schînen
35	dem goteleiden Turnûm, sone mohter wider in niht getûn, wand Ênêas wâre sô stark, daʓ ichʓ niht nâme vor tûsent mark, ob si alle wâren golt rôt,
40	wandeʓ wâre Turnûses tôt.
323	Het er (sprach si) mîn vingerlîn, her solde deste tûrer sîn und sterker ein michel teil und hete deste beʓʓer heil,
5	wan des wâre her wol wert: sô gloubetich daʓ sîn swert vil snite deste baʓ. ôwî daʓ ich des ie vergaʓ, daʓ ich si niene sande
10	dem edelen wîgande! wê dem unrâte, nu gedenke ich es ze spâte.» Si sprach zem andern worde «heter nû disen borden,
15	dâ mit ich gegordet bin, her hete maht unde sin ein michel teil deste mêr. war umbe gedahte ich es niht êr, ê danneʓ quâme her zû!
20	daʓ ich sô selden wole tû, daʓ kumt von unsinne. ich hân im doch mîn minne und mîn dienest enboten. ich hân in allen mînen goten
25	sunderlîche bevolen und lâʓe daʓ si unverholen, sine behalden im sîn êre, daʓ ich in niemer mêre deheinen dienest getû,
30	alsô sehen sie dar zû!» Si sprach «word Ênêas erslagen, sô mûʓ ich offenlîche sagen mînen goten allen, daʓ ich mich wil ervallen
35	von diseme turne hin nider, dâ nis nehein rede wider. dem ich mîne minne enbôt, gelâge er hie noch hûte tôt, ichn worde nimmer mannes wîb.
40	got behûte im sînen lîb!»
324	Si sprach «ich bin des aber gewis, daʓ Ênêas sô hovesch is und im diu minne is alsô lief, her hât iedoch mînen brief
5	behalden dorch den willen mîn: her sal deste sterker sîn und deste kûner sibenwarf, des ich vile wol bedarf, daʓ her behalde sîn leben.
10	die gnâde mûʓe uns got geben, daʓ wir uns scheiden niht sô frû, ê unser ietwederʓ getû dem andern daʓ im lieb sî.» dô waseʓ der vesperzîte bî.
15	Dô si des geredete vile mit grôʓem ernste niht ze spile mit sorgen und mit leide, dô wâren sie beide, Turnûs und Ênêas,
20	gewâfent als in nôt was wol und ritterlîche. si wâren beide rîche manhaft und hôchgemût. ir beider wâfen wâren gût.
25	Ênêas der Troiân der saʓ ûf ein kastelân, daʓ in ritterlîche trûch: eʓ was stark und snel genûch. Turnûs saʓ ûf ein ravît,
30	dar ûffe er uber den strît reit genendechlîche: eʓ was edel unde rîche. Turnûs der helt wol geboren daʓ ravît hiu her mit den sporen,
35	daʓ stark unde snel was. dô gesach Ênêas, daʓ Turnûs gegen ime quam, sîn ros her mit den sporen nam, beide sie genanden,
40	ze samene sie geranden,
325	ir deweder wolde wenken. diu spere lieʓens senken die helide wol geborne. mit grimmigeme zorne
5	Turnûs Ênêam stach, daʓ der schaft von dem stiche brach und vil nâ dar nider lach. wol her im daʓ wider wach, die stegereife her behilt,
10	her stach Turnûm dorch den schilt. dô fûrde aber Ênêas einen schilt der sô vast was, daʓ in nieman mohte enginnen. her was mit solhen sinnen
15	behûtet und gebunden, in mohte niht verwunden. iedoch stach ir ietweder den anderen dar neder, daʓ eʓ vil lûte sâgen.
20	ir beider ros gelâgen diu starken und diu grôʓen von dem grimmen stôʓen, daʓ si einander stieʓen. diu ros si ligen lieʓen.
25	Balde si ûf sprungen, ze samene sie drungen mit grimmigeme mûte die zwêne degene gûte. Turnûs was ein snel man,
30	schiere her sîn swert gewan. alsô tete Ênêas daʓ sîne daʓ vil gût was. daʓ gehilze was von golde. ir newederre wolde
35	dem andern entwîchen, sie lieʓen dare strîchen. dô si ze samene quâmen, si gâben unde nâmen slege grimme unde grôʓ.
40	wâreʓ ûf einen anebôʓ
326	zwischen zwein starken smiden mit wol gerûweten liden, eʓne dorft niht lûter hellen dan von den heliden snellen,
5	wande si gûte helme trûgen. grôʓe slege sie slûgen ûf die helme und ûf die schilde. uber ein breit gevilde ein halbe welsche mîle
10	hôrde man die wîle manegen freislîchen slach. alsô verslûgen sie den tach unze vil nâch zû der naht. Turnûs gnendechlîche vaht.
15	Dô het aber Ênêas ein gewâfen daʓ sô gût was, helme halsberge unde swert, daʓ was im dô tûsent mark wert, îsenhôsen unde schilt,
20	wandeʓ ime den lîb behilt vor Turnô zû den stunden: hern moht sîn niht verwunden. her noch dehein man, der ie den lîb gewan,
25	ne mohtes niht zebrechen, dorchslahen noch dorchstechen. des verlôs Turnûs sîn leben. daʓ gewâfen hete im gegeben der smide got Volcân
30	unde ein swert sô getân, daʓ niht solhes enwas. dâ mit vaht Ênêas, der des lîbes was ein degen und ein meister ze grôʓen slegen.
35	Sine solde nieman scheiden, wand in was ernest beiden und vohten grimmechlîche umbeʓ kunichrîche und umb die êre und umbeʓ wîb
40	und ir ietweder umben lîb.
327	Turnûs der helt balt vaht mit grôʓer gewalt, her was von zorne worden warm. ûf hûb her den arm
5	der ernesthafte wîgant und die ellenthaften hant, dâ her daʓ swert mite trûch: dem hêrn Ênêê her slûch einen slach wol ze lobene
10	ûf den helm obene mit dem scharphen swerde. dô was der helm sô herde, daʓ her sich niene gebouch. daʓ fûre ouch dar ûʓ flouch,
15	daʓ grôʓ unde lieht was. des erbalch sich Ênêas. Turnûs was des slages gemeit, doch was eʓ Ênêase leit, wandern ime wole galt.
20	dô gesach der helt balt Ênêas der Troiân Lavînen zû dem venster stân: des gewan der helt gût grimmigen hôhen mût,
25	wand im diu maget lieb was. dô rach sich hêr Ênêas: daʓ swert her hôhe ûf trûch, Turnûm her ûfʓ houbet slûch, hern vermiste sîn niet,
30	des helmes her im abe schriet vil nâch einer hende lank. daʓ was ein freislîch swank Turnô dem jungelinge. her verschriet im ouch die ringe
35	bî dem houbete ein teil. dô nâhete im ein unheil, daʓ man wole sagen mach. von dem houbete gienk der slach Turnô in sînes schildes rant,
40	den slûch im der wîgant
328	Ênêas halben hin dane. des gienk Turnûm angest ane. Turnûs der edel man dô her den grôʓen slach gewan,
5	den im tete Ênêas, und im der helm verscrôten was und ouch der schilt abe geslagen, doch ne wolder niht verzagen, wander was ein helt gût
10	und het eines lewen mût. hern wolde im niht entwîchen. mit slegen freislîchen bestunt her den Troiân, der im daʓ leit hete getân:
15	her hete eʓ gerne errochen, wan daʓ eʓ was versprochen, daʓ eʓ niht solde wesen sô. sîn swert hûb er vile hô und slûch den starken Troiân,
20	daʓ her niht langer mohte stân, enebene an daʓ houbet, daʓ her sô wart betoubet, daʓ der helt lussam Ênêas ûf diu knie quam,
25	wandes tete ime nôt. her wâre ouch des slages tôt, wan daʓ in generde der veste helm und herde, der im ûf dem houbet lach,
30	und ouch daʓ Turnô sîn swert brach uber ein spannen vor der hant: daʓ ervorhte der wîgant. Daʓ was sîn ungelucke. dô viel daʓ grôʓer stucke
35	des swerdes nider an daʓ gras. dô sprank der hêre Ênêas ze Turnô unde lief in ane: dô mûster wîchen hin dane. Ênêas ime nâch lief,
40	lûte her in ane rief,
329	als im sîn stolzheit geriet: «man gesiget fliende niet,» sprach Ênêas wider Turnûm. «wil dû nû fromechlîchen tûn
5	unde belîben an den êren, sô salt dû her wider kêren, ob dû behalden wil daʓ lant.» Turnûs dâ vor ime vant einen michelen stein.
10	dâ sîn manheit ane schein. nâch dem greif her in daʓ gras: dô ime daʓ swert zebrochen was, daʓ herde was unde scharf, mit dem steine her dô warf
15	Ênêam den Troiân, daʓ her kûme moht gestân und ouch ein teil besnebete. die wîle daʓ her lebete Turnûs der jungelink
20	so begienk her manlîchiu dink. Der herzoge Ênêas, wander gewâfent wole was, so bestunt her aber Turnûm. her wolde im grôʓen schaden tûn,
25	wanderʓ wâfen het und die kraft: do vant Turnûs einen halben schaft vor im ligen in dem gras, der dâ vore sîn was, dô her Ênêam stach
30	in sînen schilt daʓ her zebrach. Turnûs der mâre wîgant den schaft begreif her mit der hant, wander des lîbes gerde. mit dem schafte her sich werde
35	die wîle und daʓ mohte wesen. hern mohte aber niht genesen vor dem starken Troiân, hern moht im niht widerstân unde enlieʓ in niht gehirmen.
40	ouch ne mohter niht geschirmen
330	vor dem swerde daʓ her trûch. den diechschenkel her im abe slûch: dô mûster vallen dorch nôt, want dô nâhete im der tôt.
5	Des frowete sich Ênêas, daʓ eʓ alsô komen was, daʓ Turnûs der tûre degen vor im alsô was gelegen, daʓ her im niht moht getûn.
10	der Troiân sprach wider Turnûm «wil dû mir noch lâʓen diz lant?» «jâ hêre, (sprach der wîgant), habet û lant unde wîb und lâʓet ôt mir den lîb
15	als einen martirâre leben. irn wellet mir den lîb geben, sone mach ich sîn haben niht, alsô man nû wol gesiht. des tût daʓ û gevalle,
20	den gewalt habt ir betalle, daʓ mûʓ mir leider ane schînen. ich hân frouwen Lavînen engolden alze sêre, daʓ ich lîb und êre
25	dorch ir willen hân verloren» sprach der helt wol geboren. «swie mirʓ komen sî iedoch, ich sterbe ungerne noch, want neheiner slahte nôt
30	is sô grimme sô der tôt.» Do erbarmdeʓ dem Troiân, daʓ Turnûs der edel man alsô klagelîchen sprach. barmechlîche in ane sach
35	der herzoge Ênêas, wande Turnûs was ein edel vorste wol geboren, ze allen tugenden ûʓ erkoren. dorch daʓ woldern lâʓen leben
40	unde wolde ime geben
331	fride und sîne holde und gûtes swaʓ her wolde, beidiu borge unde lant unde schaz unde gewant.
5	Her wolde ime genâdich sîn, wan ein unsâlich vingerlîn, daʓ Turnûs Pallante nam, als im ubile gezam, sô tugentrîche sô her was.
10	daʓ vingerlîn het Ênêas dem jungen Pallante gegeben. dô im Turnûs nam daʓ leben, dô nam herm ouch daʓ vingerlîn: daʓ mûste dô sîn schade sîn,
15	wander bleib dar umbe tôt. do her Ênêê sîn hende bôt und wolde werden sîn man und Ênêas den mût gewan, daʓ hern ze manne wolde enphân:
20	dô ersach der Troiân daʓ goldîne vingerlîn. her sprach «eʓ mûʓ al anders sîn, hien mach sûne niht geschehen: ich hân daʓ vingerlîn ersehen,
25	daʓ ich Pallante gab, den dû fromdest in daʓ grab und im tâte den tôt. des ne was dir nehein nôt, daʓ dû sîn vingerlîn trûge,
30	den dû in mîner helfe slûge: eʓ was ein bôsiu girheit. des sage ich dir die wârheit, nû mûstû sîn engelden. ichn wil dich niht schelden
35	noch niht mêr zû sprechen: Pallas sal ich rechen, der reiner tugende hete genûch». daʓ houbet her im abe slûch. Dô Turnûs lach erslagen,
40	dô wart daʓ weinen und daʓ klagen
332	von sînen frunden vile grôʓ. wande nehein sîn genôʓ mêr tugende nie gewan, wie her wâre ein heidensch man.
5	doch daʓ her dâ was belegen, her was des lîbes ein degen, kûne unde mahtich, wîse unde bedahtich, getrouwe unde wârhaft,
10	milde unde êrhaft, ein adelar sînes gûtes, ein lewe sînes mûtes, ein ekkestein der êren, ein spiegel der hêren.
15	her hete wol getânen lîb, vil lieb wâren im diu wîb, si wâren ouch ime holt: daʓ was sîner tugende scholt. her hete in sîner jugende
20	ûʓ erwelder tugende wol zehener sîner gnôʓe teil, wan daʓ klagelîch unheil, daʓ her des tages veige was unde daʓ her Ênêas
25	sîn lîb danne solde tragen, Turnûs het anders in erslagen. Dô daʓ alsô komen was, dô manete Ênêas den kunich sînes eides.
30	hern daht deheines leides, daʓ lieʓ her wole schînen, her iesch frowen Lavînen, diu im lieb was sô der lîb. her woldes machen sîn wîb,
35	eʓ was aber dô ze spâte. si worden des ze râte, der kunich und Ênêas, als eʓ ir manne rât was, daʓ si den strît zerbrâchen
40	und ein tagedink sprâchen
333	uber vierzehen naht dar nâch. doch daʓ im wâre vile gâch, si rieten ime daʓ her beite, unze her sich baʓ bereite
5	und sîn wîb danne nâme, als eʓ kunege wol gezâme, unde brûte in êre. dô volgete her ir lêre, dô eʓ in alsô lieb was.
10	der herzoge Ênêas ze herbergen her dô reit und hete michel arbeit erliden an deme tage. daʓ lieʓ her alleʓ âne klage.
15	Dô Lavîne daʓ vernam diu junkfrouwe lussam, daʓ Turnûs erslagen was und der hêre Ênêas ze herbergen was geriten,
20	unde sie hete vermiten, daʓ her sie niene sach, daʓ was ir leit und ungemach und was dâ von vil unfrô. si sprach «wie fûget sich diz sô,
25	daʓ der edele Troiân sus ungefûchlîch hât getân, daʓ her mich niene gesiht? desn getrouwetich im niht, ob sîn dink wole quâme,
30	daʓ her mîn niht war nâme, ob im got genâte, daʓ her mich versmâte. her denket lîhte in sînem mût: lebe dir sanfte, eʓ is dir gût,
35	lâ dir sîn niht ze gâch, du gesihst si dicke her nâch. ich erkenne leider wol den sin, daʓ ich im ummâre bin und smâher denne her mir sî,
40	want mîn herze is niht sô frî.»
334	Des tages het der Troiân sînen willen wol getân, daʓ lieʓ her wole schînen den fremeden und den sînen:
5	alle die des gerûchten, daʓ si sîne gnâde sûchten, arme und ouch rîche, die gewerde er mildechlîche, her gab mit williger hant
10	beidiu schaz unde gewant, ros unde wâfen. ê her sich legete slâfen, alsô sprach der Troiân «die gote hânt wol ze mir getân,
15	ich wil nâch mînem willen geben, ichn trouwe diz gût niht uberleben.» Dô Ênêas der degen an sînem bette was gelegen frô unde wol gemeit,
20	eʓ wâre im lieb oder leit, her mûste wachen al die naht. diu Minne lieʓ im ir maht vil unsanfte schînen, wander frowen Lavînen
25	des âbendes niht hete gesehen. done dorfte im leider nie geschehen. mit zorne sprach der Troiân «waʓ hân ich bôse man getân, daʓ ich Lavînen niene gesach,
30	diu mir alleʓ ungemach ze gûtem ende habet braht, mit der helfe ich sigete dô ich vaht, diu mir ernerde den lîb und diu mir is vor alliu wîb
35	und der ich bin vor alle man? als schiere als ich den sige gewan, daʓ ich zû ir niene reit, daʓ was ein michel bôsheit unde sal mich immer rouwen.
40	si beginnet mir missetrouwen
335	und gedenket ubile dar zû und is ouch reht daʓ sie eʓ tû.» Her sprach «ich armer mûdink, daʓ ich diz lange tagedink
5	dorch ieman gelobete! ichn weiʓ ob ich tobete, daʓ ichʓ ie machete sô lank: des habe ich immer undank, daʓ ich sô ubile was bedaht.
10	mich soln dise vierzên naht langer dunken denne ein jâr. daʓ beiten dunket mich vil swâr, daʓ ich nû wol sprechen mach. waʓ wîʓet mir der tach,
15	daʓ her niene wil komen? wer hât der sunnen benomen ir ûfgên unde ir schîn? wie lange wil eʓ naht sîn?» Ênêas der mâre,
20	swie mûde ers tages wâre, her wachete die naht dar zû unze des morgens frû, daʓ diu nahtigale rief. ein wênich her dô enslief,
25	unz daʓ erlûhte der tach. niht langer her dô lach, her hieʓ im bringen sîn gewant unde kleidet sich ze hant, Ênêas der rîche,
30	und gienk dô frôlîche dar ûʓ vor sîne man, mit den her sprechen began. Sîne boten her sande mit briefen after lande
35	ze allen den rîchen, diu man dô mohte erstrîchen mit schiffen oder berîten. ze sînen hôhgezîten ladeter die vorsten unde bat
40	ze Laurente zû der stat.
336	Ênêas der mâre enbôt offenbâre, daʓ her brûten solde, swer gût umb êre wolde,
5	daʓ her frôlîch quâme und es sô vile nâme, daʓ eʓ im iemer mohte fromen und allen sînen nâchkomen. selbe der kunich Latîn
10	sande ouch die boten sîn, her mande frunt unde man. daʓ mâre wassen began. dô manʓ wîten vernam, michel werlt dare quam.
15	Dar nâch tete Ênêas alsô dô site was: her oppherde sînen goten. ze Laurente sander boten dem kunige Latîne,
20	daʓ her die maget Lavîne sîne tohter wolde sehen. daʓ mûste alsô geschehen. do enbôt im der kunich mâre, daʓ her willekomen wâre
25	ze sînem eigenem hûs. do enbôt ouch Latînûs sîner tohter dâ si was, si wolt der hêre Ênêas in korzer stunt gesehen,
30	daʓ ir vil lieb was geschehen. Dô kleidete sich Ênêas. wander ein edel vorste was, vil rîche des gûtes und frô sînes mûtes,
35	dar nâch zierde her sich. sîn gwant daʓ was hêrlîch, wand im lieb was diu vart. sô nie nehein keiser wart, kristen noch heiden,
40	den ich drûʓ welle scheiden,
337	daʓ gwant, daʓ Ênêas trûch, eʓ wâre hêrlîch genûch und er mohteʓ wole tragen an den ôsterlîchen tagen
5	ze grôʓen hôhgezîten. her hieʓ mit ime rîten funfzich ritter wol getân, schône unde lobesam nâch wârheit niht nâch wâne,
10	al meiste Troiâne und der von dem lande, wol gezieret mit gewande und vil ritterlîche, wand si wâren rîche
15	unde habeten stade gûte an der habe und an dem mûte. des fûrden die gesellen die zieren wât phellen, nûwes gescrôten,
20	manegen samît rôten, purpur unde grûne: die heten die helide kûne gemachet als man dô phlach. ich hôrde sagen daʓ der tach
25	dâ von wâre worden lieht: vor wâr ne weiʓ ich des nieht. Michel zierde dâ was, daʓ die blûmen und daʓ gras dâ verschinen varlôs,
30	dô man den liehten schîn kôs in manechvarwen sîden an borden und an gesmîden und an den liehten gimmen. man hieʓ mit hôhen stimmen
35	die vordern in rîten. zû den selben zîten reit der hêre Ênêas ze Laurente als im lieb was mit hêrlîchem gedrange,
40	mit phîfen und mit gesange,
338	mit trumben und mit seitspile. grôʓer froude was dâ vile. Dô frowete sich der Troiân. die porten worden im ûf getân,
5	daʓ her in solde rîten. her sach ze beiden sîten einen wech vil langen mit phelle behangen: her sach dâ sitzen unde stân
10	manege maget wol getân und manech wol getâneʓ wîb, die wol heten ir lîb gezieret nâch ir lantsiten. die hobischâre kaffende riten
15	beidenthalben der strâʓen: ir leides sie vergâʓen. dô sprach ein hobischâre, wâ korzwîle wâre beʓʓer dan an dem velde?
20	«wir haben der gezelde gehûtet nû vil manegen tach, daʓ uns sîn wol verdrieʓen mach. mich dunket, soldich hie wesen, ich wâre immer genesen,
25	solde ich hie lange bouwen, des mach man mir wol getrouwen.» Dô erbeiʓete Ênêas vor des kuniges palas und gienk dâ her den kunich vant.
30	Latînûs nam in bî der hant und fûrde in dâ sîn tohter was. her gebôt daʓ Ênêas sîne tohter kuste, des sie vil wol geluste,
35	wandeʓ in beiden lieb was. eʓ hete gerne Ênêas ân des kuneges bete getân. Lavînjâ und der Troiân ze samene sie gesâʓen,
40	ir leides sie vergâʓen
339	mit frouden unde mit gûte. in was beiden wol ze mûte, ir froude mûst dâ schînen. Ênêas sprach ze Lavînen,
5	der gefroute Troiân «junkfrowe, ir habet ze mir getân, daʓ ich û immer dienen wil. des liebes aber is sô vil, daʓ ichʓ verdienen niene mach
10	unz an mînen jungesten tach, und soldich leben tûsent jâr.» «wolde got, und wâre eʓ wâr.» «jâ, frouwe, eʓ is alsô.» «des bin ich zwâre vile frô.»
15	«frowe, des lône û got.» «ich meineʓ (sprach si) sunder spot.» «Mir is vil wol (sprach Ênêas) gesenftet, dâ mir wê was die wîle daʓ ich ûch vermeit.»
20	«daʓ was ouch mir vile leit.» «desne was nehein rât.» «so vergebe ich û die missetât.» «eʓne sal nû niht mê sîn.» «daʓ is ouch der wille mîn.»
25	«wir soln uns, frouwe, dicke sehen.» si sprach » daʓ mûʓe alsô geschehen.» «eʓ tût, solen wir leben.» «daʓ mûʓe uns got beiden geben.» Michel froude dâ was
30	in des kuniges palas von sange und von seitspile. dâ was ritâre vile, manech vorste rîche saʓ dâ frôlîche
35	und redeten mit den frouwen. sumelîche giengen schouwen diu palas und die torne. die daʓ tâten gerne, si sâgen die kemenâten
40	hêrlîchen berâten
340	mit sîdenen umbehangen breiten unde langen nûwe unde zierlîch. nidene was der esterîch
5	mit tepichen gespreitet, hêrlîche bereitet. des jâhen dieʓ gesâgen. ûf den tepechen lâgen die kolter von samîte
10	von phelle und von dimîte. lieht unde maneger vare. man nam dâ vil lutzel ware ûf ein verblichen baldekîn und ûf kâteblatîn
15	und ûf ein aldeʓ gewant. des nûwen man sô vile vant, daʓ man des alden vergaʓ, want daʓ nûwe zimet baʓ. Dô sprâchete Ênêas
20	als vil sô ime lieb was mit der frouwen rîchen vil harde minnechlîchen als in vil wole luste. gûtlîch her si kuste,
25	her gab ir ein goldîn vingerlîn und bat si frôhes mûtes sîn, her kuste sie wol drîstunt an ir minnechlîchen munt von liebe und dorch minne.
30	her sprach zir meisterinne offenlîche und unverholen «lât û dis maget sîn bevolen, frouwe (sprach der Troiân), ir habet noch wol dar zû getân,
35	ich râte û daʓ irʓ vollentût, wand ûwer lôn wirt vile gût.» Dô grûʓte her die frouwen. dâ mohte man schouwen manegen minnechlîchen lîb,
40	beidiu magede unde wîb,
341	wol gezogen unde gêret, wol gekleit und wol gelêret ze werken und ze worden. manegen tûren borden
5	mohte man dâ schouwen, die trûgen die frouwen wol mit golde genât ûf die phellîne wât, ûf samît unde ûf sîde.
10	man sach dâ gût gesmîde unde manegen edelen stein. Ênêas wart des enein, daʓ her ze herbergen reit. im volgete manech riter gemeit.
15	Dô der hêre Ênêas ze herbergen komen was der rîche und der mâre, sîne kamerâre hieʓ her dare zû zim gân
20	unde hieʓ bringen sân vingerlîn und bougen, sô nieman mit sînen ougen beʓʓer dorfte schouwen. daʓ gab her den frouwen
25	und ouch diu gûten vingerlîn, diu niht dorften beʓʓer sîn, wander was Lavînen holt. her sande ein tûre houbetgolt irre meisterinne
30	ze liebe und ze minne. dar nâch sande Ênêas sîn gâbe diu vil gût was den frouwen allen sunder, want der was ein wunder
35	dâ ze kemenâten. des was wol berâten Ênêas der hêre, daʓ her gût gab umb êre. Dô Ênêas der wîgant
40	sîn kleinôde hete gesant
342	ze Laurente den frouwen und siʓ begonden schouwen, dô was eʓ lobebâre. schiere vernam daʓ mâre
5	diu alde kuneginne. si was nâch ûʓ ir sinne komen dorch den grôʓen zorn: ir witze het si nâch verlorn, si wart vil ubile getân.
10	ir tohter hieʓ si zû zir gân die junkfrouwen lussam. dô diu maget dare quam, dô sprach diu kunegin uber lût «wie frô dû nû bist, ubel hût,
15	mînes herzen rouwen! dû maht mir des getrouwen, mir is leit daʓ ich dich ie getrûch, daʓ ich dich niht ze tôde slûch, als schiere sô ich dich gewan,
20	nû Turnûs der edele man von dînen scholden is erslagen. eʓ mûʓ diu werlt wol alliu klagen, daʓ dû worde ie geboren. dorch dînen willen hât verloren
25	vil manech man sînen lîb. daʓ ich ie wart dîns vater wîb, daʓ quam von unheile, daʓ ich im wart ze teile.» Aber sprach diu kuneginne
30	mit grôʓem unsinne und mit grimmem zorne «ôwê ich verlorne, daʓ ich den unnutzen man dînen vater ie gewan,
35	daʓ mir mit ime ie wart vergeben! ichn sal ouch niht langer leben, und mohte ich, ich enwolde, sint daʓ ich sehen solde, daʓ dû und der Troiân
40	vor mir gekrônet soldet gân,
343	daʓ doch schiere mûʓ wesen, sone moht ich nimmer genesen, daʓ gienge mir ûʓer deme spil. nû dîn vater lâʓen wil
5	Ênêê sîn rîche, her tût vil bôslîche, ich mohteʓ ubile gesehen. leide mûʓe û geschehen, dir von ime und im von dir.»
10	«frouwe, wes engelden wir» sprach Lavînjâ diu maget, «daʓ ir den goten von uns klaget unde uns flûchet sô vil ? unheil habe swer eʓ wil!»
15	«Frouwe,» sprach daʓ magedîn, «des dehein ander rât mach sîn, des mûʓ man sich getrôsten. ich lobe es got den hôsten, daʓ her mich wole hât gewert,
20	des ich lange hân gegert, umb den edelen Troiân, wande nie wart nehein man der tugende sîn gelîche. moht ich zehen kunichrîche
25	mit anderm man gewinnen, ich mohte in niht geminnen, ich wolde kiesen ê den tôt. ir moget ûch mûwen âne nôt, welt ir ûch sterben dorch den zorn,
30	frowe, sô habet ir verlorn ûwer lob und ûwern lîb. nû tût als ein witzich wîb und bedenket ûch baʓ. ich râte û trouwelîche daʓ,
35	daʓ ir dorch zoren niene tût daʓ nieman ne dunke gût (sprach si), liebiu mûder mîn.» «des mûʓest du unsâlich sîn» sprach diu kunegin dâ wider
40	und viel an ir bette nider.
344	mit grôʓen rouwen si lach ich ne weiʓ wie manegen tach, unz ir der tôt inʓ herze quam, der ir den lîb unsanfte nam.
5	Daʓ dô der hêre Ênêas gefrouwet unde gêret was, daʓ lieʓ her dô schînen, und sach frowen Lavînen als dicke als in luste.
10	her halste si und kuste, daʓ si von im gerne nam, unz daʓ tagedink quam, daʓ diu brûtlouft wart. michel wart diu zûvart.
15	dar quâmen in allen sîten die vorsten vile wîten in schiffen und an der strâʓen und ritere ûʓer mâʓen. Die spilman und diu gerende diet
20	die versûmden sich niet, die werltlîchen lûte. daʓ tâten sie noch hûte, dâ solîch hôchzît wâre: gefrieschen sie daʓ mâre,
25	si zogen allenthalben zô. alsô tâten si ouch dô, die eʓ heten vernomen. si mohten gerne dar komen und vil frôlîche,
30	wan si dâ worden rîche, alsô daʓ billîch was. dô wart der hêre Ênêas ze kunige gekrônet. dô wart im wol gelônet
35	aller sîner arbeit mit schônem wîbe und rîcheit. ze êren opherde er den goten, die im die vart dar enboten, und lônde wol den sînen.
40	dô krônde man Lavînen
345	zeiner kuneginne. sie was dô ir minne komen ze gûtem ende ân alle missewende.
5	Michel was diu hôchzît und daʓ gestûle vile wît. hêrlîch man eʓ ane vienk. der kunich dô ze tische gienk und die vorsten edele,
10	ir ieslîch an sîn gesedele, arme unde rîche harde hêrlîche. mit flîʓe dâ gedienet wart. dâ wart diu spîse niht gespart.
15	der sich des flîʓen wolde, daʓ her sagen solde, wie dâ gedienet wâre, eʓ worde ein langeʓ mâre, wand als ich û hie sagen wil,
20	man gab in allen ze vil eʓʓen unde trinken, des ieman konde erdenken und des ir herze gerde, wol man si des gewerde.
25	Dô si dô gesâʓen und frôlîche gâʓen vil wol nâch ir willen, dô was kleine stille, der schal was alsô grôʓ,
30	daʓ eʓ die bôsen bedrôʓ. dâ was spil unde sank, buhurt unde gedrank, phîfen unde springen, videlen unde singen,
35	orgeln unde seitspil, maneger slahte froude vil. der junge kunech Ênêas, der dâ brûtigome was, her bereite dô die spilman.
40	der gâbe er selbe began,
346	wander was der hêrste, von diu hûb herʓ alêrste, als eʓ kunege wol gezam. swer dâ sîne gâbe nam,
5	dem ergiengeʓ sâlichlîche, wander was des rîche sint unz an sîn ende und fromete sînem kinde die wîle daʓ eʓ mohte leben,
10	wander konde wole geben unde hete ouch daʓ gût, dar zû den willigen mût. Dar nâch die vorsten rîche gâben vollechlîche,
15	ir ieslîch mit sîner hant, daʓ tûre phellîne gewant, golt und aller slahte schat, silber unde goltvat, mûle und ravîde,
20	phelle und samîde ganz und ungescrôten, manegen bouch rôten, dorchslagen goldîn, zobel unde harmîn
25	gâben die vorsten, wan siʓ tûn getorsten. herzogen unde grâven den spilmannen sie gâven grôʓlîchen unde sô,
30	daʓ si dannen schieden frô und lob dem kunege sungen ieslîch nâch sîner zungen. Dâ was michel hêrschaft, wunne unde wirtschaft,
35	iedoch klagete Ênêas daʓ ir sô wênich dâ was, die sînes gûtes gerden. einen mânôt werden die selben hôhzîte,
40	daʓ man dâ gab ze strîte.
347	dâ wâren vorsten hêre, die dorch ir selber êre unde dorch den kunich gâven. herzogen unde grâven
5	und die kunege rîche die gâben hêrlîche, die wênich ahten den schaden, si gâben soumâr al geladen mit schatze und mit gewande.
10	ichn friesch in dem lande nie dehein hôhzît sô grôʓ, wand ir maneger wol genôʓ. Dâ von sprach man dô wîten. ichn vernam von hôhzîte
15	in allen wîlen mâre, diu alsô grôʓ wâre, alsam dô het Ênêas, wan diu ze Meginze dâ was, die wir selbe sâgen,
20	desn dorfen wir niet frâgen, diu was betalle unmâʓlîch, dâ der keiser Friderîch gab zwein sînen sunen swert, dâ manech tûsent marke wert
25	verzeret wart und vergeben. ich wâne alle die nû leben deheine grôʓer haben gesehen. ichn weiʓ waʓ noch sole geschehen, desn kan ich ûch niht bereiten.
30	ichn vernam von swertleiten nie wârlîche mâre, dâ sô manech vorste wâre und aller slahte lûte. ir lebet genûch noch hûte,
35	dieʓ wiʓʓen wârlîche. dem keiser Friderîche geschach sô manech êre, daʓ man iemer mêre wunder dâ von sagen mach
40	unz an den jungisten tach,
348	âne logene vor wâr. eʓ wirt noch uber hundert jâr von ime gesaget und gescriben, daʓ noch alleʓ is beliben.
5	Nû soln wir û sagen mê, dâ wir die rede lieʓen ê. dô der hêre Ênêas gewaldiger kunich was, dô was geliebet im der lîb,
10	wander sîn vil schôneʓ wîb minnete nâch sînem willen offenlîche unde stille und was ein kunich rîche und lebete hêrlîche.
15	des stunt sîn mût vile hô und was sîn herze vile frô, als eʓ wole mohte, wand in daʓ selben dohte vil bescheidenlîche,
20	ob in ertrîche niht mêr frouden wâre dan der kunich mâre eine in sînem mûte trûch, daʓ ir al diu werlt hete gnûch,
25	ob her sie wolde teilen, daʓ her dâ mit mohte heilen, alliu unfrôhiu herzen von rouwechlîchem smerzen. Nû dûhte frowen Lavînen
30	die lieben brût sîne, dô sie ir lieben man nâch ir willen gewan und trûte baʓ danne ir lîb, si dûhte daʓ alliu wîb
35	âne froude wâren, die solher minne enbâren, die si hete zaller zît âne hûte und âne strît. Dô hielt der kunich Latîn
40	Ênêam vor den sun sîn,
349	wand er unmahtich was und alt. her gab im allen sînen gewalt, lant, borge unde man. der hêre bouwen began
5	der nûwe kunich Ênêas eine borch dâ im lieb was: diu was grôʓ unde wît. vil wol her si in sîner zît begrabete und bemûrde.
10	wie lutzel in des tûrde, wander tete eʓ gerne. her machete hôhe torne, veste und wol getâne. die borch hieʓ her Albâne,
15	als der kunech si nennen bat: daʓ was dô sîn houbetstat, unz Latînûs verschiet. alsô saget uns daʓ liet. Sint het der kunech Ênêas
20	daʓ lant als eʓ gelegen was alliu îtâlschen rîche vil gewaldechlîche. sînem sune Ascânjô her lieʓ die borch diu Albâne hieʓ
25	und dar zû ein michel lant. daʓ enphienk her von sîner hant und nandeʓ ein kunichrîche. si lebeten frôlîche ichn weiʓ wie lange sint ensamen.
30	Ascânjûs hete zwêne namen: an dem einen hieʓ her Ascânjûs, an dem andern Jûlûs. Dô daʓ alsô komen was, daʓ der kunech Ênêas
35	daʓ rîche eine gewan, dô heter willich sîne man unde sîn vil schôneʓ wîb: diu was im lieb sô der lîb, wande sie braht in wol innen
40	gûter trouwen unde minnen
350	als gût wîb ir lieben man. einen sun her bî ir gewan der wart geheiʓen Silvîûs und wart in neheime hûs
5	her wart in einem walde geboren, als in sîn vater dâ bevoren in der helle sehen lieʓ, und wart als her im gehieʓ ein kunich vile hêre
10	und gewan vil michel êre. Silvjô volgete grôʓ heil, wander hete ein michel teil tugent an sînem lîbe. her gewan an sînem wîbe
15	einen sun der im lieb was, der hieʓ Silvjûs Ênêas und wart rehte alsô getân als Ênêas der Troiân an hâre und an der hûte.
20	daʓ markten die lûte, die si beide erkanden: an fûʓen unde an handen mohte manʓ wol merken an worten unde an werken
25	und uber allen sînen lîb. vil holt wâren im diu wîb. von Ênêâ sînem anen von dem erbeteʓ in ane. Von Silvjô Ênêâ quam
30	ein kunne vile lobesam, daʓ edele geslehte, die mâren gûten knehte, [von allen tugenden ûʓ erkoren, von sînem kunne wart geboren]
35	ein hêre der hieʓ Rêmûs und sîn brûder Rômulûs, die daʓ kunichrîche harde lobelîche befrideten und berihten.
40	Rôme sie dô stihten
351	die zwêne brûder ensant. nâch Rômulô wart si genant und wart genennet Rômâ. si worden vil gewaldech dâ
5	und hieʓen Rômâre, si worden wîten mâre und gwunnen sô michel kraft, daʓ si gemacheten zinshaft dar andriu kunichrîche.
10	daʓ weiʓ man wârlîche. Von dem kunne Rômulî und von Ascânjô Jûlî wart ein hêre geboren an allen tugenden ûʓ erkoren
15	under allen sînen mâgen, die doch grôʓer êren phlâgen, daʓ was Jûljûs Cêsâr. daʓ mach man sagen vor wâr, daʓ her der werlde vil betwank.
20	eʓ wâre ze sagene al ze lank, waʓ her wunders worhte. wîten man in vorhte, sînen gewalt und sîn hervart, unze her erslagen wart
25	ze Rôme verrâten: senâtôre eʓ tâten. Dô erslagen wart Jûljûs, dô wart keiser Augustûs dâ ze Rôme erkoren,
30	der von sînem kunne was geboren. der berihte daʓ rîche harde hêrlîche und wart gewaldich wîten. eʓ wart bî sînen zîten
35	vil stâter fride unde gût, dâ vil wole wâren behût witewen unde weisen vor unrehten freisen, arme unde rîche.
40	done getorste unredelîche
352	nieman dem andern niht getûn. bî des zîten wart der gotes sun geboren ze Bethelehêm, der sint gemartert wart ze Jersalêm
5	uns allen ze trôste, wander uns erlôste ûʓ der freislîchen nôt, wandern êwigen tôt mit sînem tôde ersterbete,
10	den Âdâm an uns erbete. alsô hât her uns erlôst. daʓ is uns ein michel trôst, ob wirʓ selbe behalden. sîn gnâde sal es walden
15	und sal uns gesterken an solîchen werken, als uns zer sêle gût sî. âmen in nomine dominî. [Nû solen wir enden diz bûch.
20	eʓ dûht den meister genûch, derʓ ûʓ der welsche kêrde, ze dûte herʓ uns lêrde: daʓ was von Veldeke Heinrîch. daʓ is gnûgen wiʓʓenlîch,
25	daʓ herʓ tihten kunde. her hete ein lange stunde daʓ mêrre teil getihtet, in tûsche berihtet, unz daʓ der hêre Ênêas
30	frowen Lavînen brief gelas, und woldeʓ vollebringen. do beleibʓ von einem dinge, her lieʓ eʓ dorch einen zoren: her hete daʓ bûchelîn verloren.
35	her lieʓ eʓ einer frouwen ze lesene und ze schouwen, ê danne manʓ wol schreve, daʓ was diu grâvinne von Cleve diu milde und diu gûte
40	mit dem frîen mûte,
353	diu konde hêrlîche geben. vil tugentlîch was ir leben, als eʓ frouwen wol gezam. dô si der lantgrâve nam,
5	dô wart daʓ bûch ze Cleve verstolen einer frouwen, der eʓ was bevolen. des wart diu grâvinne gram dem grâven Heinrîch, der eʓ nam unde eʓ dannen sande
10	ze Doringen heim ze lande. dâ wart daʓ mâre dô gescriben anders dan obʓ im wâr bliben, daʓ mach man sagen vor wâr. sint was daʓ bûch niun jâr
15	meister Heinrîche benomen, daʓ her dar nâch niht mohte komen, unz her quam ze Doringen in daʓ lant, dâ her den phalinzgrâven vant von Sassen, der im daʓ bûch lieʓ
20	unde eʓ in volmachen hieʓ: wander ins bat und im eʓ riet, her ne hete eʓ volmachet niet. he mûste eʓ ouch tûn dorch lantgrâven Lodewîges sun.
25	volmachen herʓ ouch began dorch den phalenzgrâven Herman von der Nûwenborch bî der Unstrût, want diu rede dûhte in gût und daʓ getihte meisterlîch.
30	dô volbrahteʓ Heinrîch dorch sîn gebot und dorch sîn bete. wander im allen dienest tete, den her erdenken konde, und eʓ im wole gonde,
35	sint daʓ her sîn kunde gewan. daʓ was der phalzgrâve Herman, des lantgrâven Lodewîges brûder von vater unde von mûder, und der grâve Friderîch,
354	dem diende gerne Heinrîch.] Ich hân gesaget rehte des hêren Ênêê geslehte und daʓ kunne lobesam,
5	daʓ sint von ime quam, gewaldech unde rîche. si lebeten hêrlîche beidiu junk unde alt und heten grôʓen gewalt
10	in der werlde wîten. lange nâch sînen zîten wâren si kunege hêre und heten michel êre, gewalt unde wunne
15	die von sînem kunne, daʓ is genûgen kuntlîch, als eʓ dâ tihte Heinrîch, derʓ ûʓer welschen bûchen las, da eʓ von latîne getihtet was
20	al nâch der wârheide. diu bûch heiʓent Êneide, diu Virgiljûs dâ von screib, von dem uns diu rede bleib, der tôt is uber manech jâr.
25	ne louch her niht, sô is eʓ wâr, daʓ Heinrîch gemachet hât dernâch. im ne was zer rede niht sô gach, daʓ her von sîner scholde den sin verderben wolde,
30	sint daʓ her sichs underwant. wand als herʓ dâ gescriben vant, alsô hât herʓ vor gezogen, daʓ her anders niht hât gelogen, wand als herʓ an den bûchen las.
35	ob daʓ gelogen niene was, sô wil her unscholdich sîn: als is eʓ welsch und latîn âne missewende. hie sî der rede ein ende.

<<< Übersicht <<< vorige Seite nächste Seite >>>

Eneide / Eneit

um 1190

Text:

Heinrich von Veldeke. (Dichtungen des deutschen Mittelalters 8)

Hrsg.: Ludwig Ettmüller, Leipzig: G.J. Göschen'sche Verlagshandlung, 1852

Digitale Edition: Jean L.C. Putmans

17

Ir habet wol vernomen daʓ,

wi der kunich Menelaus besaʓ

Troien die rîchen

vil gewaldechlîchen,

5

do er sie zefûren wolde

dorch Pârîses scholde,

der im sîn wîb hete genomen.

niht enwolder dannen komen,

ê danne er Troien gewan.

10

manech wîb unde man

beleib dâ jâmerlîche tôt.

dâ was vile michel nôt,

dô man die borch sach vallen,

under den lûten allen,

15

der vile lutzel dâ genas.

manech rîche palas

wart dâ zefûret

von marmore gemûret

unde manech gût hûs.

20

dô wart der kunich Prîamûs

dar inne erslagen ze tôde:

aleine storber nôde,

her nam sîn ende schiere

und sîner sune viere:

25

eʓ mûste dâ alsô wesen,

dâ ne mohte nieman genesen

der gesunden noch der siechen,

sint daʓ die Criechen

in die borch quâmen.

30

Elenam si nâmen

18

und gâben si Menelâô wider

und brâchen Troien dernider.

In der borch an einem ende,

entgegen dem sundern winde,

5

dâ wonete ein rîche man,

den ich genennen wole kan:

daʓ was der hêre Ênêas,

der dâ herzoge was.

des kuneges tohter was sîn wîb

10

der generete sînen lîb.

Virgilîûs der mâre,

der saget uns, daʓ her wâre

von der gote geslehte

geboren mit rehte,

15

und Vênûs diu gotinne,

diu frowe is uber die minne,

wâre sîn mûder

und Cupidô sîn brûder.

Dô eʓ alsô quam,

20

daʓ Menelaus den sige nam

unde Troien zebrach

unde sîn leit gerach,

daʓ ime dâ getân was,

dô hete der hêre Ênêas

25

von den goten vernomen,

daʓ her dannen solde komen

unde den lîb vor in bewaren

und uber mere solde varen

ze Italjen in daʓ lant.

30

daʓ weste wol der wîgant,