Tristrant

Entdeckung der Liebe Tristrants

und Isaldens durch Marke

(3217 - 3276)

_________________________________________________________________________________________

Den nîdêren was von herzin leit

daz der koning sô sêre streit

an Tristrandes êre.

3220

sie begundin dannen kêren

in zornigem mûte

und schûfen dô ir hûte:

ab Tristrant mit der koningîn

nergin vorholin mochte sîn,

3225

daz wusten sie nicht rechte:

sie irhûbin ein gedichte

und sagetin ez dem koninge.

der hâte ez al vor logine

und woldes in nicht getrûwen.

3230

«nû sal es uns rûwen»

sprach Antrêt der herzoge,

«daz ez sal allez sîn gelogen,

swaz wir unsern hêren sagin.

wuste wir daz weme clagin

3235

die uns bûzete desir nôd

die uns unsir hêre tûd,

von dem wir haben diz herzesêr!»

«nû swîgit ûwir clage mêr!»

sprach der koning hêre,

3240

«und sêt daz ich nimmir mêre

sulche rede von ûch gehôre.

ir sît wol rechte tôren,

daz ir drauwet einem man

dem ich sô wol gûtis gan.

3245

he sal vor ûch wol genesin:

mûz he andirs gesunt wesin,

swie vil ir im tût nîdes,

ich enwil es nicht vormîden,

ich lege ez im ze êren.»

3250

der koning gîng von den hêren

in zorne und wolde slâfin gân.

do vant he vor sînem bette stân

den kûnen Tristranden.

mit armen hâte he bevangin

3255

die koninginne he kuste

und twang sie zu sînen brusten

gar minneglîche.

der koning dô freislîche

zornete von ungemach.

3260

zu Tristrande he dô sprach

«daz sîn obele minne!

wie mochte ich daz vorwinnen

zu mîner wereltlîchen êre,

tût ir mir sô grôze sêre

3265

mit ûwir valschen lîbe?

sîd nîman an des anderen wîbe

icht sal habin, leit noch liep,

ich wolde es geloubin niet

dô sie mir ez dicke sagetin.

3270

ab ichz geloubit habete,

sô hête ich recht getân.

ir sît ein ungetrûwer man:

balde rûmet mir den hof

und sagit ûwerm gote lof

3275

daz ir behaldit den lîp!»

sulch kussin machit sulchen nît.