|
|
I
‹De leone›
Hier begin ih einna reda umbe diu tier, uuaz siu gesliho bezehinen. Leo bezehinet unserin trohtin turih sine sterihchi, unde bediu uuiret er ofto an heligero gescrifte genamit. Tannan sagita Iacob, to er namæta sinen sun Iudam. Er choat «Iudas min sun ist uuelf des leuin». Ter leo hebit triu dinc ann imo, ti dir unserin trotinin bezeichenint. Ein ist daz: so ser gat in demo uualde un er de iagere gestincit, so uertiligot er daz spor mit sinemo zagele, ze diu, daz sien ni neuinden. So teta unser trotin, to er an der uuerilte mit menischon uuas, ze diu, daz ter fient nihet uerstunde, daz er gotes sun uuare. Tenne so der leo slafet, so uuachent sinu ougen. An diu, daz siu offen sint, dar anna bezeichenit er abir unserin trotin, als er selbo quad an demo buhohe cantica canticorum «Ego dormio et cor meum uigilat». Daz er rasta an demo menisgemo lihamin un er uuahcheta an der gotheite. So diu leuin birit, so ist daz leuinchelin tot, so beuuard su iz unzin an den tritten tag. Tene so chumit ter fater unde blaset ez ana, so uuirdit ez erchihit. So uuahta der alemahtigo fater sinen einbornin sun uone demo tode an deme triten tage.
II
‹De pantera›
Ein tier heizzit pantera un ist miteuuare un ist manegero bilido un ist uile scone un ist demo drachen fient. Tes sito ist so gelegin, so ez sat ist misselihes, so legit iz sih in sin hol unde slafæt trie taga. Tene so stat ez uf unde furebringit ummezlihche lutun unde hebit so suzzen stanc, daz er uberuuindit alle bimentun. Tene so diu tier uerro unde naho tie stimma gehorrint, so samenont siu sih unde uolgen imo turih di suzzi des stanhes. Unde der dracho uuiret so uordtal, daz er liget, alsor tot si, under der erdo. Pantera diu bezeichenet unsirin trotin, ter al manchunne zu zimo geladita turih tie suzi sinero genadon. Er uuas miteuuare, also Esaias chat «Gaude et letare, Hierusalem, quia rex tuus uenit tibi mansuetus&gaquo;. Er uuas, alsor manigero bilido uuare, turih sinen manicualten uuistuom unde durih tiu uunder, diu er uuorhta. Er uuas schone den imen io uurde. After diu, do er gesatot uuard mit temo harme unde mit temo spotte unde mit uillon der Iudon un er gecrucigot uuard, to raster in demo grabe trie taga, also dir tet panttera, un an demo triten tage dorstun er uon dien toton, vnde uuard daz sar so offenlihin gehorit uber alle disa uuerilt, unde uberuuand den drachin, den mihchelin tieuel.
III
‹De unicorni›
So heizzit ein andir tier rinocerus, daz ist einhurno, un ist uile lucil un ist so gezal, daz imo niman geuolgen nemag, noh ez nemag ze neheinero uuis geuanen uuerdin. So sezzet min ein magitin dar tes tiris uard ist. So ez si gesihit, so lofet ez ziro. Ist siu denne uuarhafto magit, so sprinet ez in iro parm unde spilit mit iro. So chumit der iagere unde uait ez. Daz bezeichenet unserin trotin Christin, der dir lucil uuas durih di deumuti der menischun geburte. Daz eina horin daz bezeichenet einen got. Also demo einhurnin niman geuolgen nemag, so nemag ouh nehein man uernemin daz gerune unsiris trotinis, noh nemahta uone nehenigemo menislichemo ougin geseuin uuerdin, er er uon der magede libe mennesgen lihhamin finc, dar er unsih mite losta.
IV
‹De hydro›
In demo uuazzere Nilo ist einero slahta natera, diu heizzit idris un ist fient demo korcodrillo. denne so beuuillet sih diu idris in horuue unde sprinet imo in den munt unde sliuffet in in. so bizzet siun innan, unzin er stirbit, unde uerit siu gesunt uz. Ter corcodrillus bezeichenet tot unde hella. Tu idris bezechenet unsirin trohtin, der an sih nam den menischen lihhamin, ze diu, daz er unsirin tot feruuorfe un er hella rouboti under sigehaf heim chame.
V
‹De sirenis et onocentauris›
In demo mere sint uunderlihu uuihtir, diu heizzent sirenæ unde onocentauri. Sirenæ sint meremanniu unde sint uuibe gelih unzin ze demo nabilin, dannan uf uogele, unde mugin uile scono sinen. So si gesehint ‹man› an demo mere uarin, so sinen sio uilo scono, unzin si des uunnisamin lides so gelustigot uuerdin, daz si inslafin. So daz mermanni daz gesihit, so uerd ez in unde brihit si. An diu bezeinet ez den fiant, der des mannis muot spenit ze din uueriltlihen lusten.
Ter onocentaurus, er ist halb man, halb esil, unde bezeichinet di dir zuiualtic sint in ir zunon un in iro herzon, unde daz pilide des rehtis habin un ez doh an ir uuerchin niht eruullint.
VI
‹De hyaena›
Ein tier heizzit igena un ist uuilon uuib, uuilon man, unde durih daz ist ez uile unreine. solihe uuarin, di der erist Crist petiton un after diu abgot beginen. Daz bezeichenet di der neuuedir noh ungeloubige noh rehte geloubige nesint. Von diu chat Salomon «Di dir zuiualtic sint in iro herzin, die sint ouh zuiualtic in iro uuerchin».
VII
‹De onagro›
Ein tier heizzit onager, daz ist ein tanesil, der nerbellot nih, uuar uber daz futer eischoie, unde an demo zuenzigostimo tage mercin sorbellot er zuelf stunt tages, zuelf stunt nahtes: dar mag min ana uuizzen, daz denne naht unde tac ebinlanc sint. Ter onager bezeichenet ten fient; der tac undiu naht bezeichenet di dir rehto uuerchon sulin tages unde nahtes.
VIII
‹De elephante›
So heizzit ein tier eleuas, daz ist ein helfant, ter hebit mihela uerstannussida an imo unde nehebit neheina lihhamhaftiga geruna. Tenne soser chint habin uuile, so uerit er mit sinemo uuibe ze demo paradyse, dar diu mandragora uuasset, daz ist chindelina uurz: so izzit der helfant tie uurz unde sin uuib. Vnde so siu after diu gehiæn, so phaet siu. Tene so siu berin sol, gat siu in eina gruba uolla uuazzeres unde birit dar durih den drachen, der iro uaret. Ter helfant unde sin uuib bezeichenent Adam unde Euun, ti dir dirnun uuarin, er si daz obiz azzin, daz in got uerbot, unde fremede uuaren uon allen unrehlihon gerunon. Unde sar so siu daz azzin, so uurdin sio uertribin an daz ellende tes kagænuuartigen libes. Tiu gruba uolliu uuazzeres bezeichenet, daz er chat «Saluum me fac, deus».
IX
De autula
Ein dier heizzet autula, daz ist so harto gezal, daz imo nihein iagere ginahen nemag, unde hebet uile uuassiu horen unde uile langiu, unde alle die zôge, die imo uuiderstant an sinemo loufte, die segot ez abo mit dero uuassi sinero horne. Den ez aber durstet, so gat hez zi einmo uuazzere, heizzet Eufrates, unde drinket: da bi stant ouh lielline gerta, so beginnet ez da mite spilen unde beuuindet diu horen so uasto, daz ez sih nieht erlosen nemag. So kumet der uueidæman unde slehet ez. Daz dier bezeihchenet den man, der dir giuuarnot ist mit allen dugeden, mit minne, mit driuuon, mit allero reinnussedo, den dir diuual nieht bidregen nemag, uuane uber sih selbo gihefte mit uuine unde mit hôre unde mit allen dien beuuollennussedon, die demo diuuele lihchent.
X
De serra
In demo mere ist einez, heizzet serra, daz hebet vile lange dorne an imo. Sosez div schef gesihet, so rihted ez vf sine uedera unde sinen zagel vnde uuil die segela antderon. Denez so eine vuile geduot, so vuird ez sa môde unde globet sih. Daz mere bezeihchenet dise uuerelt, du schef bizeichenent die heiligen boten, die dir uberuoren unde vberuundan alliu diu uuideruuartdiu giuuel dirro uuerelde; diu serra bizeichenet den, der dir ist unstades muodes, der dir eine uuile schinet annen rehden uuerchan unde aber an dien nieht neuollestet.
XI
De vipera
Ein sclahda naderon ist, heizzet uipera, fone dero zelet phisiologus, so siu suanger uuerdan scule, daz er sinen munt duoge in den iro: so uerslindet siu daz semen unde uuird so ger, daz siu imo abebizet sine gimaht under sa tod liget. So danne div iungide giuuahssent in iro uuanbe, so durehbizzent sie si unde gant so vz. die naderun sint gagenmazzot dien Iudon, die sih iu beuuullan mit unsuberen uuerchan vnde durehahton iro fader Christum unde iro muoter die heiligun christanheid. Ouh gibudet uns got in einemo euangelio, daz uuir also fruota sin same die selben naterun. Dria slahta nateron sint. ein slahta ist, so siu aldet, so suinet iro daz gisune: so uastad siu uerceg dago unde uierceg nahto, so loset sih alliu ire hut abo; so suohchet siu einen locherohten stein unde sliuffet dar dureh unde streifet die hud abo unde iunget sih so. Ein ander slahta ist, so siu uuile drinkan, so uzspiget siu zerest daz eiter. Den uurm sculen uuir biledon: so uuir uuellen drinkan daz geistliche uuazzer, daz uns giscenket uuirt fone demo munde unserro euuarton, so sculen uuir uzspiuuen zaller erist alle die unsuberheit, da mite uuir beuuollen sin. Diu dritta slahta ist, so diu den man gesihet nakedan, so fluhet siu in, gesihet siu in aber giuuatoten, so springet si annen in. Alsamo unser fater Adam, unz er nakeder uuas in paradyso, do negimahta der diufal nieht uuider imo.
XII
De lacerta
So heizzet einez lacerta unde ist also zorftel, also diu sunna, unde fliugat. so daz altet, so gebristet imo des gesunes an beden ougon, daz ez sa die sunnvn gisehan nemag. so gat ez an eina heissci zeinero uvende, diu der ostert bikeret ist, unde kivset ein loh vnde sihet da dureh gegen dero sunnvn, unzin siniv ougan entlvhtet uverdant. Also duo du, christanig man: so dir bedvnkelet uuerde din gesune, so svohche die hosterlihchun stat vnde den sunnen des rehtes, dinen schephare, der dir ist ganemmet oriens, daz din herze intlvide dureh sinen geist vnde daz er dir . . .
|