Balade des contre vérités

1455/56

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Balade des contre vérités

Il n'est soing que quant on a fain,

Ne service que d'ennemy,

Ne maschier qu'ung botel de foing,

4

Ne fort guet que d'omme endormy,

Ne clemence que felonnie,

N'asseurence que de peureux,

Ne foy que d'omme qui regnie,

8

Ne bien conseillé qu'amoureux.

Il n'est engendrement qu'en boing,

Ne bon bruit que d'omme banny,

Ne ris qu'apres ung coup de poing,

12

Ne los que debtes mettre en ny,

Ne vraye amour qu'en flaterie,

N'encontre que de maleureux,

Ne vray rapport que menterie,

16

Ne bien conseillé qu'amoureux.

Ne tel repos que vivre en soing,

N'onneur porter que dire: «Fi!»,

Ne soy vanter que de faulx coing,

20

Ne santé que d'omme bouffy,

Ne hault vouloir que couardie,

Ne conseil que de furieux,

Ne doulceur qu'en femme estourdie,

24

Ne bien conseillé qu'amoureux.

Voulez vous que verte vous die?

Il n'est jouer qu'en maladie,

Lettre vraye que tragedie,

28

Lasche homme que chevalereux,

Orrible son que melodie,

Ne bien conseillé qu'amoureux.