L'Avision de Christine

La première partie

__________________________________________________

XV

Ci dit commnet les vertus

au monde sont emprisonnees

Encore autre part gist la maladie amie chere car comme il ne soit a celle doleur pareille qui le cuer tient en amere pensee reste a te dire les combles de mes souffraittes

Na pas souffist aux menistresde perdicion les opprobres offers* a la souche dantiquite. Aincois moult plus deshonnouree

Helas ou est la princece a moy esgale qui peust souffrir veoir denviron soy a tres grant tort tollues chacies batues baumes et emprisonnees ses dames de compaiguie et de parage venerables et de grant dignete dancien droit establies a estre appellees a ses conseus a porter les seaulx de ses ordonnances a soustenir les pans de ses longs abis et les doreures de son chief. Et mettre en leur lieu paillardeles et femmes diffammees et dissolues/ helas chiere amie ce suis ie qui a toy parle. mais que mieux me croiez vueil que le sens de ta veue ait lexperience du vraye de ma parole. Adonc comme elle ouvrist une petite fenestrele me dist regarde les prisonnieres ton sens soit iuge se en palais royaulz la presentacion de leur reverence seroit plus propre que soubz mucies couvertures. Avisez celles qui ia me gouvernerent ou temps de ma ioye or les mont ravies les persécuteurs de mes gloires

Adonc comme mon oeil adrecasse au pertuis de la chartre .iii. dames vi de souveraine reverence et beaute mais differens leurs maintiens estoient ha diex quel divine beaulte en lune vi./ le corps avoit droit long et bien fait et de la beaulte de son vis yssoit un ray de moult grant resplandeur. Celle dame en sa main un grant mirouer tres cler tenoit ou quel la reverberacion du dit ray redondoit et se frappoit en maniere que si grant beaulte et clarte en yssoit que anglet ny avoit tant obscur que tout nen fust enlumines. ha quel pitie de tel beaulte tenir couverte comment fust elle seant es places des assemblees publiques affin que chascun se peust louer de sa lumiere. Ceste fu belle par excellence mais trop plus noble. Car elle se disoit fille de dieu le pere et plus forte quatre riens* car de toutes choses vaincre se vantoit

En un lit couchee pale et descoulouree vi une autre dame de grant autorite a chiere et semblant de femme maladive et enferme comme chose deffoulee et desroupte/ et a la premiere se disoit serour a son coste destre vi gisant unes balances de lautre part une mesure et une ligne.

Assez longnet dycelle dame vi gesir en terre endormie non honnourablement une dame de grant et fourny coursage laquelle estoit toute armee coste soy gisant par terre avoit son escu sa lance et ses esperons/ sa teste tenoit ou giron dune folieuse femme de grant vaguete qui pour lui mieulx endormir chantoit/ et lui gratoit le chief. lors comme ie regardasse par grant entente cestes merveilleuses figures vi que par plusieurs fois vindrent de pluseurs pars en maintes notes les anemis. les uns crioient a haute vois a la dame endormie quelle se deffendist. Et celle adonc un petit remouvait son chief. et entre ouvrait un oeil/ et lors la folieuse femme sesforcoit de lui rendormir revenoit lautre tourbe lui crier en loreille/ et celle toute estourdie sourdoit son chief et la fole de rechief par son chant lendormoit revenoit les autres qui grans coups frapoient en son escu/ et celle se levoit toute droitte pour courir apres mais la deshonneste la prenoit par le col et la rendormoit venoient les plus fors lui courir sus et la batoient/ Adonc celle se levoit comme enragee et juroit par sa force quelle occiroit tout. Si leur lancoit a cop ce que tenir povoit et pluseurs en occioit et souvent chacee estoit mais a son reffrain revenoit a son giste que laissier ne povoit