L'Avision de Christine

La première partie

__________________________________________________

XIII

Ci dit la dame couronnee des contens

qui furent pour elle gouverner

Apres ces choses vindrent les esperiz larrescineux habitans es silves qui distrent qua eulx appertenoit a departir les choses propres et privees, yceulz firent des communs usages closes mansions et a eulz les approprierent/ et tant que meismement les sauvagines crierent contre eulx

En cellui temps par le cry du camelion sesveillerent une maniere de gent de reprouvee generacion qui distrent quilz ne souffreroient mie liniurieuse clamour des voix femenines si entrerent es maisons des oisiaux de leurs forests et tant y furent que volans eles leur furent donnees par ycelles en plusieurs parties se translaterent iusques dedens les cavernes des laissons de mes bois. si cueillirent les glans des chaines et mistrent ou feu les pouvres quilz trouverent/ Et a tout ce faire ne trouverent contredit ains furent hordes des degoutes de mes terres

Moulteplie fut lerreur par divers inconveniens. Car le temps vint que les eaues tant crurent quil ne demoura champ qui tout couvert nen fust. Adonc les poissons saillis hors de leurs fossez paissoient es terres semees jusqua devorer les racines des grains apres la verdure des herbes/ Toutes ces choses representoient naiscence de pestillence ha doulce chiere amie iusques ci tay conte grant part de mes aventures diversement de ioye en dueil entregittees. Mais comme ie ne puisse tout dire ensemble nest mie faillis encore le language engoisseux dycelles. ains a chiere amatie or a primes mesteut *te dire la douloureuse encloeure de mes presens tenebres qui precede les autres ou cas que perseverence y seroit longue.