Le Roman de la Rose

Chapitre XXVII

____________________________________________________________________________

Comment Pitié avec Franchise

Allerent par très-belle guise

A Dangier parler por l'Amant,

Qui estoit d'amer en torment.

Si con j'estoie en ceste poine,

3248

Atant es vos que Deus m'amoine

Franchise, e avuec li Pitié.

N'i ot onques plus respitié:

A Dangier vont andeus toi droit,

3252

Car l'une e l'autre me voudroit

Aidier, s'eus pueent, volentiers,

Qu'eus voient qu'il en est mestiers.

La parole a premiere prise,

3256

Seue merci, dame Franchise,

E dist: «Dangiers, si Deus m'ament.

Vos avez tort de cel amant,

Qui par vos est trop mal menez.

3260

Sachiez que vos avilenez,

Car je n'ai mie encore apris

Qu'il ait de rien vers vos mespris.

S'Amors le fait par force amer,

3264

Devez le vos por ce blasmer?

Plus i pert il que vos ne faites,

Qu'il en a poines maintes traites.

Mais Amors ne viaut consentir

3268

Que il s'en puisse repentir;

Qui le devroit tot vif larder,

Ne s'en porroit il pas garder.

Mais, biaus sire, que vos avance

3272

De li faire enui e grevance?

Avez vos guerre a lui emprise

Por ce qu'il vos redoute e prise,

E que il est vostre sougiez?

3276

S'Amors le tient pris en ses giez

E le fait a vos obeïr.

Devez le vos por ce haïr?

Ainz le deüssiez espernier

3280

Plus qu'un orguilleus pautonier.

Cortoisie est que l'en secueure

Celui don l'en est au deseure;

Mout a dur cuer qui ne se ploie

3284

Quant il trueve qui le souploie.»

Pitiez respont: «C'est veritez

Qu'engrestié vaint umilitez;

E quant trop dure l'engrestiez,

3288

C'est felonie e mauvaistiez:

Por ce, Dangiers, vos vueil requerre

Que vos ne mainteniez plus guerre

Vers cel chaitif qui languist la,

3292

Qui d'amors onques ne guila.

Avis m'est que vos le grevez

Assez plus que vos ne devez;

Il trait trop male penitence

3296

Des lors en ça que l'acointance

Bel Acueil li avez toloite,

Car c'est la rien qu'il plus covoite.

Il iere avant assez doblez,

3300

Mais ore est ses enuiz doblez;

Or est il morz e mal bailliz

Quant Bel Acueil li est failliz.

Por quoi li faites nul contraire?

3304

Trop li faisoit Amors mal traire.

Il a tant mal que il n'eüst

Mestier de pis, s'il vos pleüst.

Or ne l'alez plus gordeiant,

3308

Que vos n'i gaaigniez neient;

Sofrez que Bel Acueil li face

Des ore mais aucune grace:

De pecheor misericorde.

3312

Puis que Franchise s'i acorde

E le vos prie e amoneste.

Ne refusez pas sa requeste;

Mout par est fel e deputaire

3316

Qui por nos deus ne viaut rien faire.»

Lors ne pot plus Dangiers durer,

Il le covint amesurer:

«Dames», dist il, «je ne vos ose

3320

Escondire de ceste chose,

Que trop seroit grant vilanie.

Je vueil qu'il ait la compaignie

Bel Acueil, puis que il vos plaist.

3324

Je n'i metrai jamais arest.»

Lors est a Bel Acueil alee

Franchise, la bien emparlee,

E li a dit cortoisement:

3328

«Trop vos estes de cel amant,

Bel Acueil, grant piece esloigniez.

Qui regarder ne le deigniez.

Mout a esté pensis e tristes

3332

Des lors que vos ne le veïstes;

Or pensez de lui conjoïr,

Se de m'amor volez joïr,

E de faire sa volenté.

3336

Sachiez que nos avons denté

Entre moi e Pitié Dangier,

Qui vos en faisoit estrangier.

– Je ferai quanque vos voudroiz»,

3340

Fait Bel Acueil, «car il est droiz,

Puis que Dangiers l'a otreié.»

Lors le m'a Franchise enveié.