Le Roman de la Rose

Chapitre XXV

____________________________________________________________________________

Comment d'Ami douce parole

L'Amant reconforte et console.

Quant Amis sot la verité,

3124

Il ne m'a mie espoenté,

Ainz me dist: «Compainz, or seiez

Seürs e ne vos esmaiez;

Je conois bien pieç'a Dangier:

3128

Il a apris a laidengier,

A laidir e a menacier

Ceus qui aiment, au comencier;

Pieç'a que je l'ai esprové.

3132

Se vos l'avez felon trové,

Il iert autres au derrenier;

Je le conois come un denier:

Il se set bien amoleier

3136

Par chuer e par soupleier.

Or vos dirai que vos feroiz:

Je lo que vos li requeroiz

Qu'il vos pardoint sa malvoillance

3140

Par amor e par acordance;

E li metez bien en covent

Que jamais des ore en avant

Ne feroiz rien qui li desplaise;

3144

C'est une rien qui mout l'apaise,

Qui le chue e qui le blandist.»

Tant parla Amis e tant dist

Qu'il m'a auques reconforté,

3148

E hardement e volenté

Me dona d'aler essaier

Se Dangier porroie apaier.