Le Roman de la Rose

Chapitre XXI

____________________________________________________________________________

Ci dit que le villain Dangier

Chaça l'Amant hors du vergier

A une maçue à son col:

Si resembloit et fel et fol.

N'osai iluec plus remenoir,

2944

Por le vilain hisdeus e noir,

Qui me menace a assaillir.

La haie me fait tressaillir

A grant peor e a grant heste;

2948

E li vilains crole la teste,

E dit se jamais i retor

Il me fera prendre un mal tor.

Lors s'en est Bel Acueil foïz,

2952

E je remes essaboïz,

Honteus e maz, si me repens

Don onques dis ce que je pens.

De ma folie me recors,

2956

Si voi que livrez est mes cors

A duel, a poine e a martire.

E de ce ai la plus grant ire

Que je n'osai passer la haie.

2960

Nus n'a mal qui Amors n'essaie.

Ne cuidiez pas que nus conoisse,

S'il n'a amé, qu'est grant angoisse.

Amors vers moi mout bien s'aquite

2964

De la poine qu'il m'avoit dite.

Cuers ne porroit mie penser

Ne bouche d'ome recenser

De ma dolor la quarte part;

2968

Par poi que li cuers ne me part

Quant de la rose me sovient,

Que si esloignier me covient.